NAHUM 2
2
Nineve Voo Gyo" Soem" Khyoo:
1Nineve we" nang gi gyi zain: lo zi shoug" nyid bye:.
Nang ri lhu: phyo' sain" pyam wa da" yoem: so' gi ju" lo abye:.
Gyivoo ri lhoem: nyid loo: we'.
Fu" moo" khyoo: ri goem loem byid: loo we'.
Meing: zain: yhi: loo wa shid re" soin' loo we'.
( 2Aseing gi Israela byumyu" yiri nya: gyivoo joem nyang: ri abyo, sain" alhoid yu pyam shi" uri yhang: ti" nya: myonhoo: phung" yoeb ri doem tu: shab byid: wa zi nghoid.)
3Gyivoo yi da" gyizoo: yigi goo ani ri ci: lho:
dangain" mo, gi ne da" gyibyi: gyimi void ci: boem ago".
Meing: zain: goo" wa zi soin' nyid boem abye:.
Nyangnu" da" myang: rheing" gi myi: yhang: ti" bang: nyid da:.
Nyangnu" da" gyi myang: joem we' to' yab lho: thu byam nyid ago".
4Gyi khaid wa myang: rheing" joem gi fu" moo" khyoo: cang
phibu phaxeig atoug" ashu: gei doin yen" ago".
Nyangnu" gi myi doem yhang: ti" void voo: bo lho:
lhab' myeig yhang: ti" myab myab tang" yen" ago".
5Gyi zoug: yiri we' khe: zheung" to" zi shoug" bye:.
Nyangnu" gi shid khyoo: gyi khaid yhe: lo" ri
khyid: vhu" thung" lho: leung lo" boem bye:.
Gyi phyo' mo, gi voogung vang khyam: khyoo: myab myab tang" dab yhe: lho:
vang khyam: ri thung" da" seig thung" yo' phyo' pyam wa shid re"
goo zeing ri tu: zhug too" lang" bye:.
6Gyid moo" lang yam mo gyid khoem" ri baid phang kaid wigi
Khokham khoo" gi gyoug dain ziyo' byeung" jo, bye:.
7Khokham myhi' gi myeug yu zi shoug" bye:.
Nya: dei zoo: yigi pheing" kyoug" joem su" ngoug khyang" fang" lho:
nyangnu" gi kougshu: ziyo' yang gang moo thoin: nyid boem ago".
8Teung to" da" lang: cam' boid lo" yhang: ti" mung" byu yigi
Nineve mo phang: thu lo" ago".
«Theing: shi" ge'. theing: shi" ge'» ga: cang yoid tid boem nghoid loug we'
hang" we' atau" loo loo:.
9Ngei ri lhoid yu we'.
Sheing: ri lhoid yu we'.
Voomoo" gi ngei sheing: jonu" yo' byeung" jo, da:.
10Nineve voomoo" gi phyo' sain" pyam zi shoug" bye:.
Phang: cau" to" zi shoug" bye:.
Jham" dung" khi" bue" byug bye:.
Gyug wigi nheigloem: thang bye:.
Myonhoo: we' shoem" shid: yid bue" byug bye:.
Poid lug ko' ko' nain" bye:.
Yoem: goin so' we' goin byug bye:.
11Khang khyi khyung: yhang: te" da" voomoo" gi
akhid" kha khyoo: lo" byug bye: lha".
Khang khyi nu" joem ri zoo: noem zho" wigi
khang: khyi zeing yo' khangkhyi loo: khangkhyi nu" yi
gau" jo, jang: gau: nyu: joyoo voomoo" zeing gi
akhid" kha: khyoo: loo" bye: lha".
12Khang khyi gi nyang: zoo: wa shoo" du: ri ngaid said lho:
nya: khangkhyi myhi' yo' nya: zoo: joem shid re" akhyi' khyi' ngaid phyo' too" yoomo
nya: khyung: moo hau shoo" khyi' yo' byeung" jo, bye:.
13Yoem: moo" bo da" Aseing tid zigi «Ngoo gi re" gyivoo nghoid. Ngoo gi re" gyi myang rheing" joem ri nghe' pyam loo: wa. Re" gyizoo: yigi meing: zain: jang: moo said pyam zi shau" loo: wa nghoid lho: ngoo gi nang sube" jang" mo shoug" yu da" jonu" joem dangain" ri lhoid yu pyam loo: wa. Re" lagyoo: lamang: yi da" tid sang: dang: khoin" joem ri hang" we' shoug" gyoo: loo: wa zi anghoid» ga: tid.
Currently Selected:
NAHUM 2: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.