NAHUM 1
1
1He: zigi Elkosha byu Nahum khyo" Nineve da" khyoo: myang da" yoeb myang mungdang: daloem: nghoid.
Nineve Voomoo" ri Aseing Nheig yo: Khyoo:
2 Aseing Mangsoo gi nyang: ri mishi' zhang myang: loo mo ri ayo" zeung: kham.
Nyang: gi nyang: ri thougtheung bang: ri shen" yhen nyid.
Nyang: gi nheig yo: ziyo' nyangnu" ri latoo: phug nyid su: nghoid.
3 Aseing nheig yoo: lei su: anghoid.
Nghoid loug we' nyang: gi yoem: moo" boo su: nghoid lho:
shoid vhang: su: ri ajhoug" amho' loo nyid su: anghoid.
Aseing so" yen" joyoo moo uglid moid lo lho:
jhoemmoug" joem ri we' nya: khyid: khyo" nang: tang" kaid da" pheilhoug: nghoid nyid.
4Nyang: gi panglai: ri amyeing" byid: kaid lang"
hau: zigi kain" loo" khare" lho:
nyang: gi gyid moo" lang joem ri we' kain" loo" nhang: bye:.
Bashan janggyoin: we' nyhau" kyug lo"-
Kharmela boem we' kyug moid" lo" lho:
Lebanon da" bain: boo" joem we' nyhau" shu: gyo" byug boem bye:.
5 Aseing shidkhoin" moo boem joem gi lei" nyid bye:.
Nya: shidkhoin" moo bouggung joem gi yau, yu: loo" bye:.
Aseing thu lo ri myid leug leug lo da:.
Mougmyid yo' houg: moo nyid bang: dangain" gi nain" nyid boem bye:.
6Nyang: nheig yo: lo ri hang" yo" se' dei deung nyid wa lha".
Nya: da" gyoug pho" nheig joem: yo: lo ri hang" yo" kham wa lha".
Nyang: gi nya: da" nheig yo: myiyham: ri foid shoin" kaid ri
nya: shidkhoin" mo lug moo" boem joem gi pheilhoug: bue" loo" bye:.
7 Aseing gi ge zi nghoid.
Nyang: gi nya: byumyu" yi yau: khi" zi shoug" nyid da" uri goem loem byid: nyid.
Nya: jhang khyoo: lheung: loo mo, ri nyang: gi yu" goin yu" coung: nyid.
8Nyang: gi gyi" sho' da" gyid khyoid zoo" yo' dakhyoo" ti"
nya: da" gyivoo joem ri jhoid phyo' sain" pyam bye:.
Nyang: gi nyang: ri gyi tau" koid mo, ri shid: jang" khyoo: nhang: kaid bye:.
9 Aseing ri thougtheung wa shid re"
ce: ja: phajhi" khyoug" nyid boem go" lha".
Nyang: wigi nanu" ri phyo' sain" pyam wa zi nghoid.
Hang" nghoid loug we' Aseing ri dalheing: mo jain" lho: ayo" thougtheung.
10Zukyen: gyoem" yo' khoofoo: kyug yhang: ti"
yhid: yed bang: nanu" gi nghe' pyam zi shoug" goo" wa nghoid.
11Nineve nang mo Aseing ri thougtheung wa shid re" akhyeing" khyo" nyheing soin' da" nheigloem: yo' byeung" su: dayug thu loo bye:. 12Aseing gi nya: byumyu" Israela ri hidsu" ga: tid bye: «Asuri byu yigi yoem: boo so' bo lho: byu khamyhoo' damyoo: nghoid loug we' nyangnu" gi phyo' sain" pyam zi shau" lho: byug shang lo" boem wa zi nghoid. Nga" byumyu" yi we" ngoo nanu" ri yau: khi" zi shoug" nhang: bye:. Nghoid loug we' hougsu" adoem shoug" nhang: loo: wa. 13Akhid" ngoo gi nanu" tho' moo nyid da" Asuri byumyu" yi da" yoem: moo" ri thang loo" nhang: lho: nanu" ri tei" to" da" jang coo" ri we' phyed pyam byid: wa.
14He: zigi Asuri byumyu" yiri Aseing amyeing" byid: da" dang: nghoid. Nyangnu" gi nyangnu" da" myeing xo' voin wa nya: akung: ako' yi nyid loo goo" wa zi anghoid. Nyangnu" da" yu phara" jung yhoem: mo da" soolhoo: joem ri we' ngoo phyo' sain" pyam loo: wa zi nghoid. Ngoo gi Asuri byumyu" yi da" shid re" loeb duang: ri soin' du: nyid bye:. Nyangnu" gi kangso' xo' dei nyid wa zi amoin: yi" loo.
15Yu" ge' lu dang: kyoo" su: gi lu dang: gi ci: wigi boem joem ri lid re" lo nyid bye:. Nyang: gi oung: doid lo" khyoo: ri fu" kyoo" wa shid re" khyoo: moo: so" nyid bye:. Yuda mung" byu yi we" ngei bu: ngei lho, da" pui" ri koid nyid lho: Mangsoo ri nanu" dangsoo" to" ziri byid: ge'. Akhyeing" ashoeb bang: gi nanu" mougmyid khoug: khyoo: yo" rhue, vang re" lo boem wa anghoid loo. Nyangnu" gi jhoid phyo' sain" pyam zi shoug" lo" boem bye:.
Currently Selected:
NAHUM 1: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.