MALAKHI 4
4
Bawipa Ih Ni A Ra Thleng Ding
1Ziangkimtithei Bawipa in, “Somei bangin a lingmi meisa ling a ra thleng ding. Mi puarthau le mi ṭha lo pawl fangkung ro vekih ur an sinak ni a ra thleng cing ding. Cuih ni ah annih pawl cu meisa in ur ṭheh an si ding ih an hram le an hnge zianghman a taang lo ding. 2Sikhalsehla ka thu a ngaitu nannih pawl hrangah cun ka mi runnak huham nan parah ni bangin a tlang ding ih ni tleunak in harhdamnak a pek vek in nan parah damnak a thlengter ding. Caw faate caw inn ihsin an suahmi vekin luatzet le lungawizet in nan um ding. 3Ka cangvaih ni ahcun mi ṭha lo pawl cu nan neh dingih nan ke tangih leivut vek an si ding.
4“Israel mi hmuahhmuah ih thlun dingah Sinai tlang ah ka siahhlawh Moses hnen ih ka pekmi daan pawl le thukham pawl le Moses ih thuzirhmi pawl cu ciing ringring uh.
5“Sikhalsehla ni lian le ṭihnungza a si mi Bawipa ih ni a ra thlen hlanah nan hnenah profet Elijah ka run thlah ding. 6Amah in pa le faale pawl hmunkhat ah a finkhawm sal ding; culo ahcun keimah ra in nan ram hi ka siatsuah pang ding,” tiah a ti.
Currently Selected:
MALAKHI 4: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.