MALAKHI 3
3
1Ziangkimtithei Bawipa in “Ka hrangih lamzin sialtu dingah ka palai ka thlah ding. Cule nan hawl reromi Bawipa cu a Biakinn ah rinlopi in a ra ding. Nan hngakhlap zetmi ka palai cu a ra ding ih ka thukamnak cu a ra phuang ding,” tiah a ti.
2Sikhalsehla a ra thlen ni cu zoso a tuar thei ding? A lang ngaingai tikah cun zoso a luat thei ding? Thil sawpnak satpia vek le thir hman a thiangfaitertu meisa vek a si ding. 3Ngun a tii-ter ih a thiangtertu vekin ṭhuthen dingah amah cu a ra ding. Thir sertu in sui le ngun a thianfaiter vekin Bawipa ih palai cun puithiam pawl a thiangfaiter ding ih cuti cun a dikmi thawinak kha Bawipa ih hnenah an rak keng ding. 4Cule hlanlai ih a rak si vekin Judah mi le Jerusalem mi pawl ih pekmi thawinak cu Bawipa lungawitertu a si sal ding.
5Ziangkimtithei Bawipa in, “Nan thu ṭhen dingah nan hnenah ka ra ding ih dawithiam pawl, ṭaangṭawm sualnak a tuahtu pawl, tetti dik lo pawl, hnaṭuantu pawl ih nihlawh a ei saktu pawl, nuhmei le ngakṭah farah le ramdangmi pawl parih miatnak a hawltu pawl le i upat lotu pawl hmuahhmuah parah mawhnak pe in thu ka ṭhen ding a si,” a ti.
Ṭhenhra ṭhenkhat Peknak
6 Bawipa in, “Keimah hi Bawipa cu ka si ih a thleng-aw dah lomi ka si. Curuangah nannih Jakob tesinfa pawl cu nan cimit hrih lo a si. 7Nanmah hlanih nan pupa pawl vek thotho in nannih khal ka daan pekmi pawl ihsin nan pial ih zianghman nan thlun lo a si. Keimah lam hoikir uhla nan lam ka hoikir ve ding. Asinain nannih cun, ‘Na hnenih ra kir sal dingah ziangso kan tuah ding?’ tiah nan sut. 8Kei khal in ka lo sut ve hnik pei: Mi pakhat in Pathian ta fir hi a dik nan ti maw? A dik lo ti cu zapi theih a si, asinain nannih cun nan fir thotho. ‘Ziangtin so kan lo fir?’ tiah nan sut hrih. Ṭhenhra ṭhenkhat le thawhlawm nan pek lo tikah nan fir a si. 9Nan zate parah siatcamnak a thleng, ziangahtile nan miphunpi in ka ta in fir ruangah a si. 10Biakinn ah nan ṭhenhra ṭhenkhat cu kimtein rak keng uhla rawl tampi a um ding. I hniksak hnik uh, vancung sangka pawl ka ong ding ih nan hrangah thil ṭha a phunphun ka run burh ding. 11Nan lo rawl pawl cucik kharbok in an siatsuah lo ding ih nan sabit hri parah sabit rah a bawr in a rah ding. 12Cuti cun miphun hmuahhmuah in malsawm dong, mi lungawi tiah an lo ti ding, ziangahtile nan ram cu ram ṭha le ram nuam a si ding,” tiah a ti.
Pathian Ih Zaangfah Thukamnak
13 Bawipa in, “Ka thuhla cu mawi lo zetzet in nan rel. A sinan ‘Na thu kan relmi ziangso a um?’ tiah nan ti. 14Nan simsuak rorimi cu ‘Pathian kan rian rero hi a lak a si. A simmi vek ih tuah hi ziangso a ṭhathnem? Kan tuah sualmi kan sir aw ih kan riahsiatnak Ziangkimtithei Bawipa hnenah langter tum rero hi ziangso sawtnak a um? 15Kan hmuh cio vekin mi puarthau lehlam thluasuahnak an ngah ko a si! Mi ṭha lo pawl mi neinung zetzet ah an cang ih tlunah thilsual tuah tahrat in Pathian thinsaunak an hniksak ih cawhkuannak zianghman tong loin an luat ko a sisi!’ nan ti,” tiah a ti.
16Cule Bawipa a ṭihzahtu pawl cu pakhat le pakhat an bia aw ih an ṭongmi cu Bawipa in a ngai ih a thei. A mit hmuh ah Bawipa a ṭihzahtu le a hmin a upattu pawl ih thuhla cu cabu sungah an khum a si. 17Ziangkimtithei Bawipa in, “Anmah cu ka minung an si ding. Thil ka tuah suak ni ahcun ka ta rori ah an cang ding. A pa a riantu fapa cu a pa in a zaangfah ṭheu vekin anmah cu ka zaangfah ding. 18Cutikah a dingmi le a ding lomi parah ziangvek thil a thleng aw tile keimah i riantu le i rianlotu pawl ziangvek an cang ti cu ka minung pawl in an hmu sal ding a si,” tiah a ti.
Currently Selected:
MALAKHI 3: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.