DAAN PEKSALNAK 33
33
Moses In Israel Hrin Pawl Thlawsuah A Pek
1Pathian minung Moses cun a thih hlanah hiti in Israel mi pawl parah thlawsuah a pek:
2 Bawipa cu Sinai Tlang in a ra;
Ni bangin Edom tlunin a suak ih,
Paran Tlangin a minung parah
a tlang.
A hnenah vancungmi thawnghra
an um ih,
A vorhlam kutah mei alh a keng.
3 Bawipa in a minung pawl cu
a duhdawt ih,
Amah ih ta pawl cu a humhim a si.
Curuangah a ke hramah kan kun ih,
A thupekmi kan ngai a si.
4Moses ih in pekmi Daan cu
kan thlun,
Kan phunhnam ih sunloih bikmi
rothil cu.
5 Bawipa cu a minung Jeshurun #33.5 Jeshurun timi hi mi ding tican a si ih a sawh duhmi cu Israel mi an si.
pawl ih siangpahrang ah a cang,
Israel hrin pawl le hotu pawl
an tonkhawm tikah cun.
6Reuben hrin cu hiti in thlawsuah
a pek:
“Reuben hrin cu cimit hram
hlah seh,
An minung an malzet naón,” a ti.
7Judah hrin cu hiti in thlawsuah
a pek:
“Maw Bawipa, bom an dilnak
aw cu thei awla,
Israel hrin dang pawl thawn kom
hai aw.
Maw Bawipa, a kut khohter awla,
An ral pawl cu do sak aw,” a ti.
8Levi hrin cu hiti in thlawsuah
a pek:
“Maw Bawipa, Levi mi hnenah
Na Thummim le Urim cu re aw;
Rinsan tlak na minung an si.
Massah ah na hniksak zo ih,
Meribah tidai ah na zuam hai a si.
9Nangmah sawn an lo tlaihsan,
An nu le an pa hnen ah:
‘Ziangah kan lo siar lo’, an ti.
An unau pawl an uar hai lo ih,
Anmah ih faate hman an thei duh lo.
Sikhalsehla na thu cu an thlun ih,
Na thukam cu ṭhatein an kilkhawi.
10Na thupek cu na mi Jakob hnenah
an zirh ding,
Na daan cu Israel mi hnenah.
Na hmaiah rimhmui an ur ding ih
Na biakṭheng ah mei-ur thawinak
an pe ding,
11 Bawipa, an kut thiamnak cu
thluasuah pe awla,
An zungthiamnak parah na lung
awi hram aw.
An ral pawl ih elruh vua awla,
thosal nawn lo dingin,
Anmah a raltu le a huatu,
An ral pawl cu rialbek aw,”
tiah a ti.
12Benjamin hrin cu hiti in
thluasuah a pek:
“Hi hrin cu Bawipa ih duhmi
a si ih thlangamte in a cawl.
Pathian Amah in in sunvu a hum,
A liang karah daitein a umter.
13Josef hrin cu hiti in thlawsuah
a pek:
“Bawipa in an ram cu
van daitla in thlawsuah hram seh.
Leihnuai tidai khal in
hningter in thlawsuah seh.
14Ni ih a hminter mi thingrah le,
Thlatin a tikcu ih a rahmi
thingrah ṭha bik in khatseh.
15Kumkhua ih a hmunmi an tlang
parah cun,
Mi kipih hiarmi thingrah rahseh.
An tlangsaang pawl cu thingrah
rahduhnak in khatseh.
16An ram cu leilung ih a suahmi
thil ṭha a phunphun in khat
sehla,
Hrambur sungin a ṭongtu,
Bawipa ih ṭhatnak tla in
ciah hram seh.
Hi thlawsuah pawl Josef ih lu
parah thleng seh,
Ziangahtile a unau lakah
hruaitu a si.
17Josef ih a lalnak cu a ropi,
A thazaang cu cawcang tha vek,
A ki tla cu sele ki bangtuk a si.
A ki pawl cu Manasseh mi
a thawng a thawng le
Efraim mi a thawng ih thawngsawm
tluk an si.
Cuih a ki cun miphun tampi
a khik ih,
Leilung deng tiang a nor a si,” a ti.
18Zebulun le Issakhar hrin pawl
hiti in thlawsuah a pek:
“Zebulun cu tipi par sum a tuah,
a suhsonak ah hlawhtling hram seh;
Issakhar cu innah a lennak
karhzai hram seh.
19An tlang parah miphun dangdang
an sawm ih,
Cutawkah felzetin thawinak an pek.
Tipi ihsin an lennak an ngah ih,
Tipikap vunnel ihsin a thup-awmi
ro sunglawi an co” a ti.
20Gad hrin cu hiti in thlawsuah
a pek:
“Pathian thangṭhat uh,
Gad ram kauzetih a tuahtu cu.
Gad cu kiosa vek a si,
deh dingin a bawh.
An baan le an lu pawl,
bauhthlek dingah.
21Anmah ih hrangah ram ṭha bik
an hril ih,
Hotu-ih covo cu pek an si.
Bawipa ih aiah a dingmi a tuah,
A thuṭhennak a kimter.
Israel hotu pawl an tonkhawm awk
tikah cun,” a ti.
22Dan hrin cu hiti in thlawsuah
a pek:
“Dan cu kiosa no a si,
Bashan in a hung suakmi kiosa,”
a ti.
23Naftali hrin cu hiti in thlawsuah
a pek:
“Naftali cu Bawipa ih
mithmaiṭha a co,
A thlawsuahnak tla tampi a dong.
An ram cu Galilee tili ihsin
thlanglam tiang a thleng,” a ti.
24Asher hrin cu hiti in thlawsuah
a pek:
“Asher cun hrindang hnakin
thlawsuahnak tam deuh a dong,
A unau ih duh bikmi si hram seh.
A ram cu olif kungin khatseh.
25A khawpi pawl ih kotka hrolh cu
thir le daar lawnglawng sisehla,
A nunsung hnangamzet ih khawsa mi
si hram seh,” a ti.
26Maw Israel#33.26 Israel timi hi Jeshurun ti tla in a um ih mi ding tican a si. A sawh duhmi cu Israel a si. mi pawl:
Nan Pathian bangtuk Pathian dang a um lo,
Van ah khin huham neizet in a um.
A sunlawinak mero parin nanmah
bom duh ah a ra.
27 Bawipa cu a kumkhua in
nan beunak a si ih,
Kumkhua ih a baan a pharmi cu
nan hngauhsanmi baan a si.
Hmailamih nan nor tikah nan ral
pawl cu a dawisuak hai ih,
that thluh dingin thu a lo pek.
28Curuangah Israel tefa pawl cu
hnangamzet le himzet in an um.
Jakob ih tesinfa pawl cu
phan ding zianghman an nei lo.
Rawl le sabit tamnak ram,
Van in leilungah dai a tlakternak
hmunah cun.
29Maw Israel mi pawl:
Ziangtluk mivanṭha so nan si!
Nanmah bangtuk zotal an um maw?
Bawipa ih runsuakmi hi!
Bawipa amah cu nan phaw le
nan nam a si,
A lo ṭantu le nehtu siter dingah;
Nan ral pawl cu zaangfahnak dil
dingah an ra ding naón,
Nan ke hnuai ah nan pal cih ding.
Currently Selected:
DAAN PEKSALNAK 33: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.