Susana 13
13
1 # 1.1-64 Susana - Li lo'il chal li'i ja' sventa c'alal icoltaat Susana c'alal ipojvan li querem Daniele yu'un oy boch'otic la snopbeic smul ta jech no'ox. ¿C'u yu'un ti jech chac' ta a'yel li'i? Ja' sventa chvinaj c'u x'elan chich'ic coltael li boch'otic mu'yuc smulique, me ja' spatoj yo'ntonic yu'un li Diose. Te nacal ta Babilonia jun vinic Joaquín sbi. 2Te la sa' yajnil Susana sbi; ja' stseb li Jilquiase, toj lec t'ujum xchi'uc lec yich'oj ta muc' li Diose. 3Li stot sme'e lec yich'ojbeic smelol, lec yalojbeic mantal li stsebique jech chac c'u cha'al chal ta smantal li Moisese.
4Li Joaquine toj c'ulej, oy nichimetic xchi'uc te'etic te ta sna. Ja' jun vinic ti lec ich'bil ta muc' yu'unique. Li judioetique nopen xa'ayic ti te stsobilan sbaic ta sna li Joaquine.
5Ja'o yabilal la st'ujic chib moletic ta sventa ja' ta xcomic ta jchapanvanej ta sventa slumalic, ja'ic li boch'otic albilic yu'un Cajvaltique: “Oy c'usi toj chopol ic'ot ta pasel te ta Babilonia ta scoj yabtelic li moletic xchi'uc jchapanvanejetic ti mu'yuc lec tspas yabtelic ta slumalique”, xi. 6Li viniquetique te italic ta sna li Joaquine yu'un te ta stsobilan sbaic, yu'un me oy boch'otic oy c'op yu'unique yu'un ja' chbat xcholbeic ya'ay.
7C'alal ja'o loq'uemic batel li cristianoetique, ta o'lol xa'ox c'ac'al, li Susanae i'och batel ta sq'uelel li sts'unubal te'etic yu'un smalale. 8Li chib moletique te sq'uelojic ti te chc'otilan scotol c'ac'ale, jech te lic pich'ajuc yo'ntonic yu'un. 9Jech te isoc sjolic, ja' muc xaq'uic ta venta li Diose, yu'un ja' la xch'ay ta yo'ntonic li c'usi tuc' tsc'an chich' pasele. 10Te oy o yo'ntonic xchibalic ta stojol li antse, pero mu'yuc boch'o la spas junucal yu'unic li c'usi chopole, 11yu'un toj q'uexlal cha'yic me jech laj yic' sbaic xchi'uque. 12La spamuc'taic ti c'uxi xu' tsq'uelilanic ta scotol c'ac'ale.
13Ta jun c'ac'al jech laj yalbe sbaic: “Batic ta jnatic yu'un yorail chijve'utic”, xut sbaic. Jech te iloq'uic batel, ibatic ta jujujot yilel. 14Jech te no'ox icha'sutic talel, te vul sta sbaic ti bu iliquique. Jech lic yalbe sbaic ta jujuntal ti c'usi chopol tsc'an tspasique, jech te lic xchapic li c'usi tspasbeic li Susanae.
15Yu'un te smalaojic c'usi ora te chbat ta nichimaltic. Ta jun c'ac'al och batel ta nichimaltic li Susanae, nopen xa'ay ta xchi'in batel chib tsebetic. C'alal toj c'ux c'ac'al laj ya'aye, te lic atinuc ta nichimaltic. 16Mu'yuc boch'o te oy, ja' no'ox te snac'oj sbaic li chib moletique yu'un ta xpamuc'tavanic. 17Li Susanae jech laj yalbe li chib tsebetique:
—Bat ich'bicun talel aceite xchi'uc muil poxil, maquic lec comel li smac scoralil nichimaltique yu'un chi'atin —xut.
18Li tsebetique la xch'unic, la smaquic comel li smac sti' scoralil nichimaltique. Ta yan ti'na iloq'uic batel yu'un bat yich'ic tal c'usi la sc'an li Susanae; mu sna'ic me te snac'oj sbaic li moletique.
19C'alal iloq'uic batel li chib tsebetique, jech yu'un li chib moletique itotsic batel, te ibatic ta anil li bu oy li Susanae. 20Jech laj yalbeic:
—Li sti' scoralil nichimaltique lec xa macbil, mu'yuc boch'o xu' tsq'uelutic. Li vu'uncutique jech co'ntoncutic ta atojol chajc'upinotcutic; ch'uno, ac'o aba ta jtojolcutic. 21Me mu xach'une, ta xcalcutic ac'oplal ti oy jun querem li' achi'uque ti jech laj atac loq'uel li chib tsebetique —xutic.
22Li Susanae te lic ta oq'uel, jech laj yal:
—Mu'yuc lec chiloc' chca'ay me ta jpas li c'usi chavalbicune. Ja' lajebal chavalbicun chca'ay.#Lv 20.10; Dt 22.22. Me mu jch'un li c'usi chavalbicune, mu xiloc' ta ac'obic chca'ay. 23Ja' xu' no'ox chca'ay me chicham ta ac'obique, yu'un mu jpas jmul ta stojol li Cajvale#Gn 39.9. —xi.
24Li Susanae tsots lic avanuc. Jech noxtoc tsots lic avanicuc ec li chib moletique, yu'un ja' ta sa'beic smul li Susanae. 25Oy jun yu'unic ibat ta anil la sjam sti' scoralil li nichimaltique. 26C'alal laj ya'yic ti oy boch'o ch-avan te ta nichimaltique, li yajval nae tal ta anil te ta sti' li nichimaltique, tal sq'uel li c'usi ic'ot ta pasele. 27Li chib moletique lic xchol li ya'yejique. Li j'abteletique toj labal sba laj ya'yic, yu'un mu'yuc baq'uin ya'yojic me oy c'usi chopol ta spasilan li Susanae.
28Ta yoc'omale la stsob sbaic cristianoetic ta sna li Joaquine, yu'un ja' smalal li Susanae. Te ic'otic noxtoc li chib moletique, ep xa c'usi snopojic batel ta scontrainel li Susanae, yu'un ja' tsc'anic ti ac'o yich' milele. 29Te laj yalic ta stojol li jteclume: “Ac'o bat yich' t'unel tal li Susanae, ja' stseb li Jilquiase, ja' yajnil li Joaquine”, xiic. Jech ibat yich' t'unel tal. 30Jech ital, xchi'inoj talel stot sme' xchi'uc yol xchi'uc scotol yuts' yalaltac. 31Li Susanae ja' jun lequil ants toj c'upil sba. 32Xpixoj talel ta lequil poc' li sjole. Li boch'otic chopol yo'ntonique la spasic mantal ti ac'o sloc' li xpix sjole c'u cha'al chac' ta q'uelel li st'ujumale. 33Scotol li yuts' yalaltac xchi'uc xchi'iltac xchi'uc scotol li boch'otic te sq'uelojique te i'oc' scotolic.
34Li chib moletique la sva'an sbaic ta o'lol cristianoetic, te laj yac' sc'obic ta sjol li Susanae.#Lv 24.14. 35Li Susanae te i'oc', la sq'uel muyel vinajel, yu'un jech yo'nton yac'oj sba ta stojol li Diose.
36Li moletique jech laj yalic: “C'alal te oyuncutic ta yavil ts'unubaltique, te chipaxaj jtuccutic. Te ic'ot li antse xchi'uc chib tsebetic te la smaquic comel li smac scoralil nichimaltique, jech la stac sutel li tsebetique. 37Jech te inopaj tal jun querem ti te snac'oj sbae, te lic xchi'in sbaic ta vayel. 38Li vu'uncutique te oyuncutic ta sti'iltic li nichimaltique. C'alal laj quilcutic li c'usi toj chopol tspasique, te libatcutic ta anil ti bu oyique. 39Te smeyoj sbaic laj quilcutic, pero mu'yuc stsac cu'uncutic li quereme yu'un x'ech' to yipal jech chac vu'uncutique, la sjam li sti' corale jech ijatov loq'uel. 40Jech yu'un ja' te la jtsaccutic stuc li Susanae, jech te laj jac'becutic boch'o queremal le'e, xcutcutic. 41Pero muc sc'an xiyalbuncutic. Ja' jech jamal chcalcutic ti ja' jech laj quilcutique”, xiic.
Li cristianoetic te tsobolique la xch'unic, yu'un ja' moletic xa xchi'uc ja' jchapanvanejetic noxtoc, jech laj yalic ti ac'o yich' milel li Susanae.
Ja' la stic' sba ta xchapanel li Daniele
42Jech yu'un li Susanae ven tsots lic avanuc: “Cajval, vo'ot Diosot ta sbatel osil, vo'ot no'ox xavotquin li c'usitic mucul chich' nopele,#Pr 15.11; Heb 4.13. xchi'uc ana'oj xa noxtoc li c'usitic sc'an to xc'ot ta pasele. 43Vo'ot xana' atuc ti nopbilal mulil laj yalic li viniquetic li'i. Jech yu'un li' xa chicham o. Mu'yuc jpasoj li c'usi chopol chiyalbicun li boch'otic toj chopol yo'ntonique”, xi.
44Li Diose laj ya'aybe yoq'uel yavanel li Susanae. 45C'alal yic'ojic xa batel ta milele, li Diose ta Ch'ul Espíritu la stij jun querem ja' Daniel sbi, 46li Daniele jech tsots lic avanuc:
—Li vu'une mu vu'uncun ta jmul chcom ti chich' milel li ants li'i —xi.
47Scotol li cristianoetique ijoybijic la sq'uelic li Daniele, jech la sjac'beic:
—¿C'usi smelol ti jech laj avale? —xutic.
48Jech te lic sva'an sba ta o'lol cristianoetic li Daniele jech laj yal:
—Ven boloxuc ta jyalel xnich'nab Israel, ti chamilic jun stseb Israel ti mu'yuc bu chajaq'uic lec chaq'uelic lec me melel ti c'usi smul tic'bile. 49Sutanic, bat cha'chapanic ta lec, yu'un puru epalc'op laj yalic li viniquetic le'e, ja' no'ox ta sa'beic smul —xi.
50Li viniquetique jech isutic scotolic ta anil. Li yantic moletique jech laj yalbeic li Daniele:
—La' chotlan li' ta o'lol xchi'uc vu'uncutic, alo ca'aycutic li c'usi anopoje, yu'un ja' Dios laj yac'bot ana' sventa jech co'ol chc'ot cabteltique —xiic.
51Li Daniele jech laj yal:
—Voq'uic comel, ta jujuntal li moletic le'e ta jac'be ca'ay ec li ya'yejique —xut.
52Jech te la svoq'uic. Li Daniele laj yic' talel li june, jech laj yalbe:
—¡La malub xa ta spasel li c'usi chopole! Li' ta orae vo'ot chcom ta aba scotol li muliletic li c'usitic laj apasan tale. 53Vo'ot mu'yuc lec laj achapan ti laj atic'be smul li boch'o mu'yuc smule, laj ca'ay ti jech laj yal li Diose: ‘Mu me xamilic li boch'o mu'yuc smulique, xchi'uc li boch'o lequique’,#Ex 23.7. xi. 54C'uxi laj avil, alo ca'tic li c'usi te'al ti te jmoj oyic ta yolon c'alal ja'o tspasic mulil laj avile —xut.
Jech itac'ov li mole:
—Te ta yolon acacia te' —xi.
55Li Daniele jech laj yal:
—Ta melel ta xchopolil no'ox ajol laj atic' aba atuc. Li yaj'almantal Diose laj xa yich' mantal ti chayac'bot atoj amule, ja' ta xtal spasbot ta o'lol li abec'tale —xut.
56Li Daniele la spas mantal ti ac'o yiq'uic loq'uel li jun mole, jech la stac ta iq'uel li yan mole, jech laj yalbe:
—Vo'ote sts'unubalot Canaán, mu ja'uc sts'unubalot Judá, ta scoj no'ox st'ujumal jun ants ti ipich' avo'ntone xchi'uc ta sc'upinel abec'tal ti jech ibolib avo'ntone. 57Ja' jech ono'ox laj apasilanbeic li stsebetic israeletique,#1.57 Stsebetic israeletique - Ja' van sc'oplal Samaria antsetic ti ja' sts'unubalic Israele. jech ta xi'el laj yac' sbaic ta atojolic. Yan li tseb ta jchop yu'un Judae mu'yuc la xch'un li c'usi chopol chac'an chapasbeique. 58Jech yu'un li' ta orae albun ca'ay: ¿C'usi te'al ti te jmoj oyic ta yolon laj atae? —xut.
Jech itac'ov:
—Te la jta ta yolon encina te' —xi.
59Li Daniele jech laj yal:
—Jech noxtoc li vo'ote laj anop ta ajol atuc smul li antse, ta ora chatoj li c'usi chopol laj apase. Te xa oy li yaj'almantal Diose, te xa tsmalaot yich'oj ta sc'ob li yespadae sventa chaspasbot ta o'lol li abec'tale, yu'un jech te chlaj o ac'oplalic achibalic —xut.
60Ta scotol li cristianoetic ti te oyic ta tsobajele ven tsots lic avanicuc. La stojbeic ta vocol li Diose, yu'un ta scolta li boch'otic ja' spatoj yo'ntonic yu'un Diose.
61Jech yu'un te iliquic ta scontrainel scotolic li chib moletic, li boch'otic puru epalc'op laj yalic ta stojol Daniele. 62Ja' la xch'unic li mantaletic yu'un Moisese#Dt 19.16-21. ti ac'o yich' milel li chib moletique, ja' icom ta yac'olic ti ta ox smilic li jun xchi'ilique. Ja' te jun c'ac'al jech icol, muc xich' milel li boch'o mu'yuc smule. 63Li Jilquias xchi'uc yajnile la stojbeic ta vocol Dios ta sventa li stsebic Susanae, jech la spasic noxtoc li Joaquine, ja' li smalal Susanae, xchi'uc ta scotol li yuts' yalaltaque, yu'un mu'yuc c'usi chopol spasoj, mu'yuc la stabeic smul li Susanae. 64Ta jun c'ac'al le'e jech lic yich' ich'el ta muc' li Daniele ta sjunul li lume.
Currently Selected:
Susana 13: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.