Eclesiástico 3
3
Ich'o ta muc' atot ame'
1Jnich'nabtac, a'ibicun li taq'uiel chacalboxuque, yu'un vu'un atoticun;
ch'unic me li jmantaltaque, jech chata acolelic.
2Li Cajvaltique tsc'an ti ac'o yich' ta muc' stotic li nich'naletique,
xchi'uc yaloj noxtoc ti ac'o xch'unbeic smantal sme'ic li alab nich'nabetique.
3Li boch'otic ta xich' ta muc' stotique ta sta perdón yu'un smulic;
4li boch'otic ta xich' ta muc' sme'ique, ja' jech ta xc'ot jech chac c'u cha'al li boch'otic ta sta ep sc'ulejalique.
5Li boch'o ta xich'ic ta muc' stot sme'ique ta sta xcuxetel yo'nton yu'un yalab xnich'nabic;
c'alal ta sc'opanic Diose ta x'a'ibat sc'opic.
6Li boch'otic ta xich' ta muc' stot sme'ique ta xnatub yorailic;
yu'un ja' ta xch'unbe smantal Cajvaltic li boch'otic ta xac'be xcuxetel yo'nton sme'ique,#Cf. Ex 20.12; Lv 19.3; Dt 5.16; Ef 6.1-3.
7yu'un ta xch'unbeic smantal stot sme'ic jech chac c'u cha'al yajvalic.
8Jnich'on, ich'o me ta muc' li atot ame' ta sventa c'usi chapas xchi'uc ta sventa c'u x'elan chatac'ove,
jech xu' chavich' li sbendicione.
9Li bendición chavich' ta sventa li atote, ja' xch'iel sc'opojelic chc'ot li avalab anich'nabe;
yanuc li chopolc'optael chac' ame'e, ja' me ta sts'et acuxlejal.
10Mu me lecuc xava'ay c'alal me oy iyal ta q'uexlal li atote,
yu'un li xq'uexlal atote mu ja'uc sventa lec ac'oplal ec.
11Me lec sc'oplal li jun quereme, ja' yich'el ta muc' chc'ot li stote;
yan me bajbil no'ox li me'ile ja' xq'uexlalic chc'ot li yalabtaque.
12Querem, tuc'ulano me li atot c'alal mol xae;
mu me xavac'be yat yo'nton ti jayib c'ac'al cuxule.
13Ac'o me ch'ayem xa srazon yu'un smalubel, ts'icbo me;
mu me xabaj ta sventa ti vo'ot oy to lec arazone.
14Me ta jcoltatic ta slequil co'ntontic li jtotique, le'e mu xlaj o sc'oplal;
jech chac c'u cha'al laj cac'tic milbil matanal ta sventa mulil chc'ot.
15Li Diose ta sna'ot c'alal me laj ata avocole.
Ja' ta xch'aybot amul
jech chac c'u cha'al bot ti ta x'unij ta xc'uxul c'ac'ale.
16Li boch'o ta sbaj comel stote ja' ta xchopolc'opta ya'yel li Cajvaltique;
li boch'o ta xac' ilinuc li sme'e chopol ta x'ilat yu'un Dios.#Cf. Ex 21.17; Lv 20.9; Dt 27.16; Pr 19.26; 30.17.
Tsc'an biq'uit ac'o cac' jbatic
17Querem, c'alal me lec chbat avu'un c'usitic chapase, biq'uituc me xavac' aba;
jech vo'ot ech'em lec c'anbil chac'ot jech chac c'u cha'al li boch'o chac' matanaletique.
18C'alal me ven ich'bilot ta muq'ue, ja' tsc'an ven biq'uit chavac' aba,#Cf. Mt 20.26-27; 23.11; Mr 9.35; Lc 22.26.
ja' jech lec chayilot li Diose.#3.18 Li ver. 19 oy ta yan poco' vunetic jech chac li'i: Ep boch'otic toj muc', xchi'uc stuc no'ox xa'ay sbaic, pero li boch'otic abul no'ox sbaique ja' ta svinajesbeic c'usi oy ta yo'ntonic li jtoybaetique.
20Yu'un ja' toj ech'em svu'el li Cajvaltique,
ja' ta sventa xu' ch-ich'at ta muc' li boch'otic biq'uit chac' sbaique.
21Mu me xasa' li c'usi tsots ta a'yele yu'un mu xava'aybe smelol;
mu me ja'uc oy ta avo'nton chana' li c'usitic toj tsotsique.
22Ja' no'ox nopilano li mantaletic yac'ojbot Diose;
mu me ja'uc xbat avo'nton yu'un li c'usi mucul smelole yu'un mu aventauc.#Dt 29.29.
23Mu me xatic' aba ti bu mu aventauque;
yu'un ti c'usi chanubtasbilot xae, lec xa xu' o avu'un.
24Yu'un toj ep boch'otic ta slo'la sba ta ya'yej stuquic;
sna' snopel scuyojic, pero te ta xch'ayic o ta razón.#3.24 Li ver. 25 oy yantic vun stic'ojic jech chac li'i: Me mu'yuc asate, mu xavil osil; me mu'yuc chanubtasel avich'oje bu chata li abijile.
26Li boch'o mu sc'an xa'ay razone, chopol chbat ta ts'acal;
li boch'o ja' lec cha'ay li c'usi xi'bal sbae te ta xch'ay o batel xchi'uc.
27Li boch'o mu sc'an xa'ay razone ne't'el ta svocol chcom;
li jpasmulile ja' no'ox ta stsobilan ep yicats sventa smul.
28Li svocol ta sta li jtoybae mu'yuc xa xpoxil,
yu'un yac'oj xa lec yibel ta yo'nton li xchopolile.
29Li boch'o bije ta xchiquinta lequil chanubtaseletic yu'un li boch'o sna'be smelole;
xcuxet no'ox yo'nton ta xchiquinta batel li bijubtasele.
Ja' tsc'an ta jcoltatic li boch'o abul sbae
30Li vo'e ta xtu'p yu'un li c'oc' c'alal xpulpun no'oxe;
ja' jech ec me ta jq'uelanbetic c'usi oy cu'untic li boch'o abul sbae, xu' ta jtatic ch'aybel jmultic.
31Li boch'o ta sq'uelan c'usi ta xc'anbate ta to sta coltael, ta xtaatic ta na'el ta ts'acal;
c'alal me oy c'usi snuptane, ta xcoltaat.
Currently Selected:
Eclesiástico 3: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.