Eclesiástico 2
2
Ja' tsc'an ti jechuc co'ntontic ta xcac' jbatic ta sc'ob Dios ta yorail jvocoltique
1Querem, me chac'an chatun yu'un Cajvaltique,
tsatsubtaso avo'nton, yu'un tsc'an chcuch avu'un li vocol ta xtale.
2Junuc me avo'nton, xchi'uc oyuc lec stsatsal avo'nton;
mu me xlo'ilaj avo'nton yu'un li vocol ta xtal ta atojole.
3Ac'o lec avo'nton ta stojol li Cajvaltique, mu me xavoc' aba ta stojol,
yu'un jech lec chbat avu'un ta ts'acal.
4Scotol li c'usi chtal ta atojole, lecuc no'ox chava'ay,
me q'uexlaltasel, me vocolil, cuchubino no'ox.
5Yu'un li bats'i c'anal taq'uine ta c'oc' ta smeltsaj;
ja' jech ta horno oyic ya'yel ec li boch'otic lec ch-ilatic yu'un Dios ti chich'ic vocole.
6Ja' pato lec avo'nton ta stojol li Diose, yu'un ja' ta scoltaot;
tuc' me xapas aba, malao coltael.#Sal 37.3-5; Pr 3.5-6.
7Vo'oxuc ti avich'ojic ta muc' Cajvaltique, malaic li c'uxubinel yu'une;
mu xa me xavoc' abaic ta stojol, yu'un jech mu xayalic ta lum.
8Vo'oxuc ti avich'ojic ta muc' Cajvaltique, pato avo'ntonic ta stojol,
yu'un ta ono'ox xavich' atojolic.
9Vo'oxuc ti avich'ojic ta muc' li Cajvaltique, malaic li c'usitic lec cha'ac'batique,
ja' li xcuxetel avo'ntonic sbatel osile xchi'uc li c'uxubinele.
10Na'ic me c'usitic ic'ot tal ta pasel yu'un li amoltot ayame'ic ta vo'onee:
Li boch'otic laj yac' sbaic ta stojol li Cajvaltique, muc xyalic ta q'uexlal.
Li boch'otic muc scomtsanic yich'el ta muq'ue, mu'yuc bu icomtsanatic;
li boch'otic la sc'anbeic vocole, i'aybat sc'opic.#Cf. Job 4.7; Sal 22.4-5; 37.25.
11Yu'un li Cajvaltique ja' lequil jc'uxubinvanej;#Cf. Ex 34.6-7; Sal 103.8; 145.8-9; Stg 5.11.
oy ts'icumal yu'un xchi'uc ta xcoltavan c'alal me oyutic ta vocole.
12¡Toj abul sbaic li boch'otic ta xi'ique xchi'uc li boch'otic ch'ajubenique!
¡Toj abul sbaic li jpasmuliletique yu'un chib be stsacojic!
13¡Toj abul sbaic li boch'otic mu'yuc stsatsal yo'ntonique xchi'uc ti mu'yuc yac'oj yo'ntonic ta stojol Diose!
¡Mu'yuc me ta xpojatic yu'un!
14¡Toj abul abaic vo'oxuc ti mu xana'ic sts'iquel c'usi chtal ta atojolique!
¿C'usi chapasic c'alal ta xtal xchapanutic li Cajvaltique?
15Li boch'otic yich'ojic ta muc' Cajvaltique mu sbajbeic smantal;
li boch'otic lec sc'anojique ta spasbeic li c'usi ch-albatique.
16Li boch'otic lec yich'ojic ta muc' Cajvaltique ja' chaq'uic persa ta spasbeic o li c'usi lec chile;
li boch'otic lec sc'anojique ja' sve'elinojic o ya'yel li smantale.#Cf. Dt 10.12-13; Jn 14.15,21,23; 1 Jn 5.3.
17Li boch'otic yich'ojic ta muc' Cajvaltique jech yo'ntonic o,
biq'uit chac' sbaic ta stojol, jech ta chalbe sbaic:
18“Ja' lec cac' jbatic o ta sc'ob li Cajvaltique,
mu me ja'uc xcac' jbatic ta sc'ob li cristianoetique;
yu'un toj ech'em smuc'ul li stuque
xchi'uc li c'uxubinel yu'une”,#2 S 24.14; 1 Cr 21.13. xiic.
Currently Selected:
Eclesiástico 2: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.