Proverbios 3
3
Oy c'usi lec ta jtatic me chquich'tic ta muc' li bijubtasele
1Jnich'on, mu me xch'ay ta avo'nton li chanubtasel cu'une;
chabio me ta avo'nton li jmantaltaque,
2jech ta xnatub avorail,
xchi'uc jech lec chabat.
3Mu me xacomtsan li c'uxubinvaneje xchi'uc li yalel c'usitic melele.
Pasilano jech chac c'u cha'al li boch'o te xojol o ta snuc' snats'e;
te ts'ibabil ac'o comuc o ta avo'nton.
4Jech lec cha'ilat, lec ac'oplal ta stojol Dios xchi'uc ta stojol cristianoetic.#Lc 2.52.
5Ja' no'ox pato avo'nton ta stojol li Muc'ul Diose;
mu me ja'uc xapat avo'nton yu'un li abijil atuque.#Ro 12.16.
6Ac'o sventain Muc'ul Dios scotol li c'usi chapase,
yu'un ja' xu' chayic'ot batel ta tuq'uil be.
7Mu me xanop ti toj bijote;
ja' ich'o ta muc' li Muc'ul Diose, voc'o aba ta sventa li c'usi chopole.
8Yu'un ja' poxil sventa abec'tal;
ja' sventa tstsatsub o lec abaquiltac.
9Ich'o ta muc' Muc'ul Dios ta sventa li c'usitic oy avu'une,
xchi'uc ta sventa li sba sat c'usitic chloc' avu'une.
10Jech ta xnoj snail li c'usitic oy avu'une; ta xlic tanijuc loq'uel,
xchi'uc ta xlic malanuc loq'uel ta sti'ti' yaviltac li ya'lel ats'usube.
11Jnich'on, mu me chopoluc xava'ay c'alal chayac'bot nucul li Muc'ul Diose;
mu me x'ech' avo'nton yu'un li taq'uiel chayac'bote.#Job 5.17; Heb 12.5-6.
12Yu'un li Muc'ul Diose ta xac'be nucul li boch'o lec sc'anoje;#Ap 3.19.
ja' jech chac c'u cha'al jun totil ti tstaq'ui lec xnich'on ti lec sc'anoje.#Dt 8.5; 2 S 7.14; Heb 12.5-6.
13Toj xcuxet no'ox yo'nton li boch'o ta sta lec sbijile;
lec jun yo'nton li boch'o oy c'usi lec sna'e.
14Yu'un ja' jeloven to c'usi tsta o, ja' jutuc c'usi tsta ta sventa li saquil taq'uine;
ja' toj ep c'usi chloc' o yu'un, ja' jutuc c'usi tsta ta sventa li c'anal taq'uine.
15Ja' toj ven c'upil sba c'otem xchi'uc; ja' xcom slequil li tonetic ti lec c'upilic sbae.
Mu xco'laj xchi'uc jech chac c'u cha'al li c'usi toj c'upilic sba chquiltique.
16Ta sbats'ic'obe ja' te oy nat yorail;
ta sts'etc'obe ja' te oy sc'ulejal xchi'uc yich'el ta muc'.
17Li be bu stamoj batele toj jun yutsil;
toj jun no'ox yo'nton o ta sventa scotol li c'usitic tspase.
18Li jbijiltique ja' jech chc'ot jech chac c'u cha'al te' sventa cuxlejal ta sventa li boch'otic tsc'ane;
xcuxet no'ox yo'ntonic li boch'o laj xa sta sbijilique.
19Li Muc'ul Diose ta sventa sbijil la snacan li banamile;
ta sventa sbijil la xlich'an li vinajele.
20Ta sventa sbijil la svoc' sba yu'un li muc'tic nabetique,
xchi'uc ta sventa sbijil tsyales tal li job osil ta vinajele.
21Jnich'on, mu me xch'ay ta avo'nton li c'usitic lec laj calbote;
ch'uno me li mantal xchi'uc taq'uiele.
22Yu'un ja' sventa alequilal;
ja' chast'ujumtasot jech chac c'u cha'al nats'il.
23Jech jun avo'nton buyuc no'ox chaxanov;
mu xabosi o avacan.
24C'alal chacux avo'ntone, mu'yuc c'usi xi'bal sba chava'ay;
c'alal chamochi ta avayabe, jun avo'nton chavay.#Sal 3.5; 4.8.
25Mu'yuc chaxi' yu'un li c'usi xi'bal sba ti ta anil no'ox chtale;
mu'yuc chaxi' noxtoc ti c'alal chtal tsots svocol li boch'otic chopol yo'ntonique.
26Yu'un ja' chayac'bot smuc'ul avo'nton li Muc'ul Diose;
ja' chaxchabiot jech mu xa'och ta yoquil.
27Mu me xajalan aba ta spasel c'usi lec ta stojol li boch'o oy svocole;#Mt 5.42.
paso me ti c'alal xu' avu'un spasele.
28Mu me jechuc xavalbe li achi'ile:
“Sutan, ts'acal xu' chatal; oc'om to van xu' chacac'bot”;
mu me xavutuc ti c'alal oy avu'un li c'usi xu' chavac'bee.
29Mu me c'usi chopol xanop chapasbe li achi'il
ti spatoj yo'nton ta atojol te nacal ta ats'ele.
30Mu me boch'o xavovil sa' no'ox ta c'op
ti c'alal mu'yuc c'usi chopol spasojbote.
31Mu me xti'etuc avo'nton yu'un li boch'o muc tuc'uc yo'ntone;
mu me xatam batel junuc li beetic stamoje.
32Yu'un li Muc'ul Diose toj chopol chil li boch'otic chopolique;
yan li boch'otic tuc' yo'ntonique lec co'ol yo'ntonic xchi'uc.
33Li stojol mulil yu'un Muc'ul Diose te oy ta sna li boch'otic chopolique;
yan li boch'otic tuc' yo'ntonique ta xac'be lec bendición ta sna.
34Li Muc'ul Diose ta sna'le li boch'otic chna'levanique;
yan li boch'otic biq'uit yac'oj sbaique ta xc'uxubin.#Stg 4.6; 1 P 5.5.
35Li boch'otic bijique ta staic lec ich'el ta muc';
yan li boch'otic bolique ta x'ac'atic ta q'uexlal.
Currently Selected:
Proverbios 3: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.