Jonás 2
2
La sc'opan Dios li Jonase
1Li Jonase ja' to te lic sta ta c'opanel Muc'ul Dios yu'un ti c'alal te tiq'uil ta yut xch'ut muc'ta choye, 2jech laj yal:
“Muc'ul Dios, oyun ta at-o'nton;
a'ibun jc'op ti li' chajc'opanote.#2 S 22.7; Sal 18.6; 120.1.
Li' chi'avan tal ta atojol ta yut li lajele;
a'ibun li jc'ope.#Sal 130.1; Lm 3.55.
3Laj atic'un ochel tal ta yutil nab, ta o'lol nab;
La xpixun o ta yip li nabe.
C'alal chapas ta mantal ti tsots ac'o syuq'uilan sbae,
li' chvul ta sba cac'ol scotol.#Sal 42.7; 88.3-7.
4Ja' yu'un la jnop ti jipbil tenbilun xa loq'uel avu'une,#Sal 31.22.
ti mu xa xquil o yan velta li ch'ulna avu'une.
5Solel la smucun ochel o ta yut li vo'e;
la xpixun o ta j'ech'el li muc'ta nabe;
la sts'ot sba ta jol li yamuchale.
6Liyal batel c'alal to ta yibel li vitsetique;#Sal 69.2.
te la smacun o, la smucun o ta j'ech'el li banamile.
Pero li vo'ote, Dios cu'un,
xu' chacoltaun loq'uel ta sventa li lajele.#Sal 30.3.
7Li' ta orae chca'ay ti ta xa xichame,
ja' yu'un chajtaot ta na'el Muc'ul Dios cu'un.
Ta jna' ti chc'ot c'alal ta ach'ulna li jc'ope.
8Li boch'otic ja' chich'ic ta muc' c'usitic cuybil ta diosetic ti mu'yuc stue
mu xa junuc yo'ntonic ta atojol.
9Yan li vu'une xi'avet no'ox chlic quich'ot ta muc',
chlic cac'bot amoton.
Li c'usi caloj ta atojole ta jpas.#Sal 22.25.
Yu'un vo'ot no'ox atuc xu' avu'un chacoltaun”, xi la sc'opan Dios li Jonase.
10Ja' yu'un li Muc'ul Diose la spas ta mantal li muc'ta choye, jech te bat xeta loq'uel ta banamil li Jonase.
Currently Selected:
Jonás 2: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.