Job 42
42
La sbic'tajes sba ta stojol Dios li Jobe
1Li Jobe jech laj yalbe li Muc'ul Diose:
2—Ta jna' ti scotol xu' avu'une;
mu'yuc boch'o xu' tsmac li c'usi chapal avu'une.
3¿C'usi jvu'el vu'un ti mu xc'ot ta co'nton li c'usi chapase?
Me jech ta jpase, ja' no'ox svinajeb ti mu'yuc jbijil oe,#Job 38.2.
yu'un ja' no'ox chcal li c'usi mu xca'ibe smelole;
oy ep c'usi toj lequic chapas ta jtojol, pero mu xca'ibe smelol.
4Jech laj avalbun: ‘Avocoluc, a'yo ava'ay, ta jc'an chajc'opanot;
tac'bun me sutel li c'usi chajac'bote’, xavutun.#Job 38.3; 40.7.
5Le' volje chabje tale ta jchiquin no'ox laj ca'ay ac'oplal,
pero li' ta orae ta xquilot lec ta jsat.
6Ja' yu'un ta jsutes co'nton ta atojol;
li' ta xcac' jba ta pucuctic, ta tantic —xi li Jobe.
7C'alal ilaj yo'nton ta sc'opanel Job li Muc'ul Diose, jech laj yalbe ec li Elifaz liquem ta Temane:
—Li vo'ote liquem sc'ac'al co'nton avu'un xchi'uc li chib achi'iltaque, yu'un mu'yuc tuc' lac'opojic ta jtojol jech chac c'u cha'al li cajtunel Jobe. 8Ja' yu'un, bat tsaco vuccotuc tot vacax xchi'uc vuccot tot chij; batanic ta stojol li cajtunel Jobe. Chiq'uic ta jtojol scotol li matanale; ja' sventa amulic.#Job 1.5. Ja' chisc'anbun vocol ta atojolic li cajtunel Jobe, yu'un ja' ta xca'ibe li sc'ope yu'un jech mu xcac' atojic ti mu'yuc tuc' lac'opojic ta jtojol jech chac c'u cha'al li cajtunel Jobe —xut.
9Li Elifaz, Bildad, xchi'uc Zofare bat spasic li c'usi i'albatic yu'un Muc'ul Diose. Li Muc'ul Diose laj ya'ibe sc'op li Jobe.
Li Jobe i'ac'bat yan velta scotol c'usi oy yu'un
10C'alal la sc'opanbe Dios ta stojol xchi'iltac li Jobe, li Muc'ul Diose lic sloq'uesbe svocol li Jobe, xchi'uc laj yepajesbe yan velta c'usitic oy yu'un.#Job 1.1-3. X'ech' to jech yepal laj yepajesbe jech chac c'u cha'al oy ono'ox yu'une. 11Te italic scotol li xchi'iltac ta voq'uele, vinic, antsetic, xchi'uc li boch'otic lec ono'ox sc'opan sbaic xchi'uque. Te la spasic jun q'uin ta sna; te laj yaq'uic lec ve'el. Te laj yalbeic Job ti c'ux abul sba laj yilic ec ti c'alal c'ux svocole. La spatbeic yo'nton ta sventa scotol li tsots vocol i'ac'bat yu'un Muc'ul Diose. Ta jujuntal laj yac'beic taq'uin, xchi'uc jujun xoj sc'ob pasbilic ta c'anal taq'uin.
12Li Jobe xjelov to jech yepal i'ac'bat bendición yu'un Muc'ul Dios jech chac c'u cha'al ta sliquebe. Yu'un i'ayin chanlajunmil (14,000) xchij, vacmil (6,000) scamello, jmil (1,000) ta chop j'abtel vacaxetic, jmil (1,000) ta cot sme' sburo. 13Xchi'uc i'ayin vucub squeremetic, xchi'uc oxib stsebetic. 14Li vixil stsebe Jemima#42.14 Jemima - Ta hebreo c'op ja' smelol stsumut. laj yac'be sbi; li xchibale Cesia#42.14 Cesia - Ta hebreo c'op ja' smelol canela. laj yac'be sbi; li yoxibale Keren-hapuc#42.14 Keren-hapuc - Ta hebreo c'op ja' smelol yavil sbon sat antsetic. laj yac'be sbi. 15Mu'yuc yan tsebetic toj c'upilic sba ta scotol banamil jech chac c'u cha'al stsebetic li Jobe. Li Jobe co'ol laj yac'be comel c'usitic oy yu'un li stsebetic xchi'uc squeremetique.
16Li Jobe icuxi to batel vucvinic (140) jabil. Laj to yil c'alal to ta xchanc'olal smomnich'nab. 17Ep c'ac'al icuxi li Jobe; lec mol c'alal icham.
Currently Selected:
Job 42: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.