JUDIT 2
2
Li Nabucodonosore la spas ta mantal li Holofernese yu'un ac'o bat scontrain epal lumetic ta smaleb c'ac'al
1Ta xvaxaclajunebal jabil (18)#2.1 Xvaxaclajunebal jabil - Li'i ja' sc'oplal li Nabucodonosor II, xchi'uc ja'o c'alal laj yich' jinesel li Jerusalene. yochel ta ajvalilal li Nabucodonosore ta chib xcha'vinic (22) sba u, la xchapanic ta spasubmantal Nabucodonosor, ja' li muc'ta ajvalil ta Asiriae yu'un ac'o bat spacbeic sutel li c'usi ipasbatique, ac'o bat stsalic scotol li epal lumetique, ja' jech chac c'u cha'al yaloj li ajvalile. 2Jech laj yic'an scotol li yaj'abteltac xchi'uc li boch'otic oy tsots yabtelique; laj yac' ta a'yel ti ac'o yulesic li lumetique. 3Jech scotolic laj yalic ti ac'o yich'ic ulesel scotol li boch'otic muc xich'ic ta muc' li yaj'almantal ajvalile. 4Jech yu'un li ajvalil Nabucodonosore c'alal ilaj yo'nton ta yalel li ya'yeje, la stac ta iq'uel li Holofernese, ja' li banquilal yu'un banquilal yajsoldadotaque, ja' li xchibal jpasmantal yu'une, jech laj yalbe: 5“Vu'un, muc'ta ajvalilun ta scotol banamil, ta jpasot ta mantal, ta ora no'ox xu' chaloc' batel ta jtojol. Ic'o batel avajsoldado ti boch'o lec tsots vinic chavile, ja' vacvinic (120,000) ta mil soldadoetic chavic' batel ti chanovic ta yacanique, xchi'uc lajchamil (12,000) cajajtic ta ca'. 6Loc'an batel ta scontrainel li epal lum ta smaleb c'ac'ale, yu'un muc xich'ic ta muc' li boch'o la jtac batel ta stojolique. 7Albeic ti ac'o yac'bicun ta jc'ob li yosilic xchi'uc li ya'alique. Yu'un ep chi'ilin ta stojolic, jech ta xnoj ta cajsoldadotac li slumalique, xchi'uc ta jpojbeic scotol li c'usitic oy yu'unique. 8Ta xnoj soplejaltic yu'unic li boch'otic tuch'em chcomique; ta xnoj ta animaetic li vo'etic, li uc'umetic yu'unique. 9Ta jchuquic batel c'alal to ta sti'il banamil. 10Batan xa me, tsalbicun comel li yosilalique. Me oy boch'o ta xtal yac' sba ta atojolique, chabibicun lec, yu'un chcac'be lec yich' svocolic. 11Mu me c'uxuc ta avo'nton xava'ay li boch'otic tstoy sbaique. Ac'o ta milel, pojbeic scotol li c'usitic oy yu'unic buyuc no'ox chabatique. 12Ta sventa jcuxlejal xchi'uc ta sventa cabtel ta ajvalilal ta xcal ta jamal, jech ta xcac' c'otuc ta pasel li c'usi ta xcal ta jpase. 13Mu me xacomtsan spasel li c'usi laj calbote, ch'uno me li jmantale, paso me ta ora li c'usi laj calbote, mu me xjalij avu'un”, xut. 14C'alal iloc' batel ta stojol ajvalil li Holofernese, laj yic'an li boch'otic ven banquilaletic yu'un asiria soldadoetique. 15La st'uj soldadoetic ti lec xu' yu'unic jech chac c'u cha'al i'albat yu'un li ajvalile: Vacvinic ta mil (120,000) soldadoetic ta xanovic ta yacanic xchi'uc lajchamil (12,000) soldadoetic cajajtic ta ca' puru flecha yich'ojic. 16La xchapan lec sventa pasc'op. 17Jech yu'un la stsob epal camelloetic, xchi'uc burroetic, xchi'uc mulaetic, yu'un chich' batel yicatsic. Xchi'uc la stsob noxtoc ep chijetic, xchi'uc vacaxetic, xchi'uc tentsunetic sventa sve'elic. 18Jech noxtoc laj yich'ic batel ep c'usi chtun yu'un jujunic, xchi'uc laj yich'ic batel ep c'anal taq'uin, xchi'uc saquil taq'uin te ta spasubmantal ja' li sc'ulejal ajvalile. 19Jech iloq'uic batel xchi'uc epal soldadoetic li Holofernese. Ba'yuc be ijelovic yu'un li ajvalil Nabucodonosore, la smaquic ta xanubal scotol ti c'u smuc'ul osilaltic ta smaleb c'ac'ale, xchi'uc li scaretaique, xchi'uc li sca'ique xchi'uc li soldadoetic ta xanovic ta yacanique. 20Jmoj stsobetic batel jech chac c'u cha'al c'ulub, xchi'uc jech chac c'u cha'al yi'al banamil ti mu stac' atele.
21C'alal iloq'uic batel ta Ninivee, oxib c'ac'al ixanovic batel ta stuq'uil stenlejaltic yu'un Bectilet. C'alal ijelovic batel ta Bectilete, te la spas scarpanaic scotolic ta toyolaltic ta xocon Cilicia. 22Te ibatic ta toyolaltic li Holofernese xchi'uc li yajsoldadotac ti chanov ta yacanique xchi'uc li boch'otic chanovic ta ca'e xchi'uc ta caretaetique. 23Bat yulesic li Fud xchi'uc li Lude. La spojbeic scotol c'usitic oy yu'unic li cristianoetic te ta Rasis xchi'uc li ismaeletique te nacajtic ta xocol banamil ta sur yu'un li Jeleone. 24La xtuch'ic jelovel li uc'um Eufratese. Te i'ech'ic ta Mesopotamia. Laj yulesic comel scotol li lumetic ti setbilic ta coralton ti te oyic ta ti'ti' uc'um yu'un Abronae xchi'uc c'alal to ta muc'ta nab. 25La spojic noxtoc li yosilal Ciliciae, te la smilic scotol li boch'o la scontrain sbaic xchi'uque. Xchi'uc te ic'otic ta yosilal Jafet ta stuq'uil sur ta yeloval Arabia. 26La setuic scotol li madianetique, xchi'uc la xchic'beic comel li scarpanaique. Laj yich'beic o scotol li sts'unub yovolique. 27Ts'acal iyalic batel ta stenlejaltic yu'un Damasco ta yorail tuch' trigoaltic. La xchic'beic comel scotol li trigoaltic yu'unique, xchi'uc la snutsbeic loq'uel li sts'unub yovolic te ta slumalique. Te la smilic comel ta cuchilo scotol li queremetique. 28Solel bats'i muc'ta xi'el laj ya'yic scotol li cristianoetic te ta yosilal Sidón, ta Tiro, ta sur yu'un Ocina, xchi'uc li boch'otic te nacajtic ta Jabnia, ta Asdod xchi'uc ta Escalone.#2.28 Li'i ja' sc'opal jayibuc lumetic te oyic ta ti'ti' nab Mediterráno. Yu'un ech'em xi'el laj ya'yic li jnaclumetic yu'unique, ja' yu'un laj yac' sbaic stuquic ta sc'ob li Holofernes c'alal ic'ot tsalvanuc ta slumalique.
Currently Selected:
JUDIT 2: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.