Oseas 13
13
Ta xlaj scotol li Israele
1C'alal chc'opoj to'ox li Efraine, lec to'ox xi'bil;
solel lec ich'bil ta muc' yu'un li yantic israeletique.
Pero c'alal la sa' smul li Efraine,
c'alal laj yich' ta muc' li Baale, icham.
2¡Ja' jech yoquel tsa' smul o c'alal to tana!
Chunijesic li saquil taq'uin yu'unique;
tspasic o loc'ometic sventa tscuy ta sdiosic.
Li boch'o lec sna' spasele
ja' jech ta spas ti c'u x'elan tsc'an yo'ntone.
Ts'acal chlic yalbe xchi'iltac ti ac'o smilbeic smotone,
ti ac'o sts'uts'ic li sloc'obal vacax spasojique.
3Ja' yu'un ja' jech ta xc'otic
jech chac c'u cha'al lumal toc ta sob,
jech chac c'u cha'al job osil ti ta anil no'ox chtaquije,
jech chac c'u cha'al taqui jobel ti chcuchat batel ta sutub iq'ue,#Sal 1.4; Jer 13.24; Sof 2.2.
xchi'uc ja' jech chbatic jech chac c'u cha'al ch'ayil ti chloc' ta jolnae.
4Li Muc'ul Diose jech chal:
“Vu'un Muc'ul Diosun avu'unic
ti c'alal lic jloq'uesoxuc tal ta Egiptoe.
Mu'yuc yan dios avu'unic jech chac c'u cha'al vu'un;
vu'un no'ox jtuc jcoltavanejun avu'unic.#Ex 20.2; Is 43.11; 45.21.
5Vu'un la jchabioxuc te ta xocol banamil
ti bu solel taquin oe, ti toj c'ux c'ac'ale.#13.5 C'ac'ale - Oy boch'o chalic jtotique.
6“Pero c'alal toj lec noj ach'utic
cu'un te ta xocol banamile,
lic atoy abaic ta jtojol,
jech laj ach'ayicun o ta avo'ntonic.#Dt 8.11-17.
7Ja' yu'un ja' jech ta jpas jba ta atojolic jech chac c'u cha'al jcot león;
ta jmacoxuc jech chac c'u cha'al jti'val bolom.
8Ja' jech ta jvoch'ioxuc jech chac c'u cha'al me' oso
ti c'alal ch'ayem yalabe;
ja' jech ta jnet'boxuc ta avo'ntonic.
Ta jmich'oxuc o jech chac c'u cha'al león;
biq'uitic ta jlilinoxuc jech chac c'u cha'al chti'van chonbolometic.
9Ta xculesot, Israel,
yu'un chacontrainun vu'un li Jcoltavanejun avu'une.
10¿Bu oy li ajvalil avu'une,
yu'un ac'o tal scoltaot xchi'uc scotol li lumetic avu'une?
¿Bu oy li jchapanvanejetic avu'un ti laj ac'ane, ti jech laj avale?:
‘Ta jc'an ajvalil cu'un xchi'uc jpasmantaletic cu'un’,#1 S 8.5-6. ti xachie.
11Ta sc'ac'al co'nton laj cac'bot li ajvalil avu'une,#1 S 10.17-24.
jech ta sc'ac'al co'nton la jpojbot noxtoc.#1 S 15.26.
12“Li smul Efraine tsacal lec ta vun;
li xchopolile lec nac'bil.
13Laj xa sta yorail ta xvoc' li Efraine,
pero ja' jun olol ti mu jlec'uc sbijile,
yu'un mu sna' stuq'uibtasel sba ti c'u cha'al xu' chvoq'ue.
14“¿Me ta jpoj loq'uel ta sc'ob li yavil animaetique?
¿Me ta jcolta ta sventa li lajele?
Lajel, ¿bu oy li avu'el atsatsale?
Yavil animaetic, ¿bu oy li lajel avu'une?#1 Co 15.55. La' me achi'uc,
yu'un mu'yuc xa c'uxubinel ta co'nton.
15“Ac'o me x'ac'ubaj no'ox li Israele,
pero ta xtal muc'ta ic' ta sloq'ueb c'ac'al.#13.15 C'ac'al - Oy boch'o chalic jtotic.
Ta stac tal tsatsal ic' li Muc'ul Diose;
te ta xlic tal ta xocol banamil.
Ta xvul taquijesbatuc li nio'etic yu'une;
ta x'ulesbat ya'lel li loq'uem vo'etic yu'une.
Jech noxtoc li iq'ue ta xch'ubabe batel scotol li sc'ulejale
xchi'uc scotol li c'usitic c'upilic sba oy yu'une.
16Li Samariae ta ono'ox xich' yavnaijesel o,
yu'un la stoy sba ta stojol li Dios yu'une.#Os 10.2,7,14.
Ta xich' milel ta espada;
li ololetic yu'une ta xich' t'omesbel xch'utic ta banamil,
li antsetic yu'unic ti oy xch'utique ta xich'ic jatbel loq'uel.
Currently Selected:
Oseas 13: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.