Génesis 23
23
Icham Sara xchi'uc imucat
1Li Sarae vucub svucvinic (127) jabil icuxi. 2Te icham ta Quiriat-arba, ja' li lum Hebrón te ta yosilal Canaane. Li Abrahame ep i'oc' ta sventa ti icham li Sarae; ep laj yat yo'nton. 3Iloc' batel yo' bu telel sbec'tal li anima yajnile yu'un bat sc'opan li hetetic te nacalique.
4Jech c'ot yalbe:
—Ac'o me yanlum vinicun ti li' nacalun ta atojolique,#Heb 11.9,13. chonbicun jutebuc osil sventa te chbat jmuc li cajnile#Hch 7.16. —xut.
5Li hetetique jech laj yalic:
6—Avocoluc, banquilal, a'yo ava'ay li c'usi chacalbotcutique. Vo'ot ti li' oyot ta jtojolcutique, t'ujbilot yu'un li Diose. Xu' te chbat amuc avajnil ti bu toj lec li muquinaltic cu'uncutique. Mu'yuc boch'o junucal cu'uncutic xu' chasjalanbot li muquinaltique —xiic.
7Li Abrahame iva'i. Te la snijan sba ta stojol li hetetique. 8Jech laj yalbe:
—Me ta melel chac'anic li' ta jmuc li cajnile, avocolicuc c'anbicun jutebuc yosil li Efrone, ja' li xnich'on Zohare. 9Yu'un ac'o xchonbun li nailch'en ta Macpela te ta sti' avosilique. Xu' ta jtoj ti c'u yepal stojol tsc'ane, yu'un jech ja' jmuquinalcutic ta xc'ot o —xi.
10Li Efrón liquem ta Hete te oy ec. C'alal jech laj ya'ye, tsots la sc'opan li Abrahame, yu'un ac'o ya'yic scotol li xchi'iltaque xchi'uc li boch'otic te chjelovic batel ta ti'coralton yu'un lume.
11—Banquilal, avocoluc mu c'usi xal avo'nton. Ta jq'uelanbot no'ox li cosile xchi'uc li nailch'en te oy ta cosile. Te muco li avajnile. Li' cha'ay ta xchiquinic cuts' calaltac ti ta melel chajq'uelanbote —xi.
12Li Abrahame la snijan sba yan velta ta stojol li jnaclumetic tee. 13Te ta stojol scotolic jech laj yalbe li Efrone:
—Avocoluc a'yo ava'ay li c'usi chacalbote. Avocoluc tsacbun stojol li avosile, jech jun co'nton xu' chbat jmuc li cajnile —xi.
14Itac'ov li Efrone:
15—A'yo ava'ay, banquil: Li stojol cosile ja' chanib ciento (400) ta sep saquil taq'uin. Ti jech yepale mu toyoluc stojol. Bat muco te li avajnile —xi.
16Li Abrahame ichapaj yu'unic ta stoj ti c'u yepal laj yal Efrón ta stojol scotol li xchi'iltaque, ja' li hetetique. Te sq'uelojic sts'inlajet ta atael yu'unic li saquil taq'uine, yu'un jech chvinaj ti lec ts'acal la stoje. 17-18Ja' yu'un li yosil Efrón ta Macpela ti te xcom ta stuq'uil sloq'ueb c'ac'al#23.17-18 C'ac'al - Oy boch'o chalic jtotic. yu'un Mamree, ja' yu'un ic'ot o li Abrahame. Te capal laj yich' li nailch'ene xchi'uc scotol li te'etic te oy ta yut osile. Ja' testigo icomic o li hetetique xchi'uc li boch'otic te ijelovic batel ta ti'coralton yu'un lume.
19Li Abrahame te bat smuc ta nailch'en li Sarae. Li nailch'ene te xcom ta Macpela banamil ta stuq'uil sloq'ueb c'ac'al#23.19 C'ac'al - Oy boch'o chalic jtotic. yu'un Mamre ti ja' Hebrón yan sbie, xchi'uc ti te oy ta yosilal Canaane. 20Ja' jech icom ta yu'un Abraham li osile xchi'uc li nailch'en ti chtun ta sventa muquinaltique, ja' ti ichonbat yu'un hetetique.
Currently Selected:
Génesis 23: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.