Génesis 22
22
Li Abrahame ta ox smil ta smoton Dios li xnich'one
1C'alal i'ech' xa'ox jayibuc c'ac'ale, li Diose la sq'uelbe yo'nton me ta melel xch'unoj li Abrahame. Jech laj yalbe:
—Abraham —xut.
Itac'ov li Abrahame:
—Li' oyune —xi.
2Li Diose jech laj yal:
—Ic'o batel li Isaac ti c'ajumal jun anich'one, ti lec c'ux ta avo'ntone. Batan achi'uc ta yosilal Moria. C'alal te xa oyote, te xamilbun jmotonin ta jolvits ti bu ta xcac'bot avile —x'utat.
3Ta yoc'omal sob ilic li Abrahame, la scajtsanbe syavarta sburo. La sa' batel si' sventa xchic'ubil li matanale. Ibat xchi'uc li Isaaque, ja' li xnich'one, xchi'uc chib smozo. Te ibat yo' bu albil yu'un Diose. 4Ta yoxibal xa'ox c'ac'al xanovelic batel, li Abrahame la sq'uel batel ta nom li vitse. 5Jech laj yalbe li smozotaque:
—Li' xacomic xchi'uc li buroe. Yan li vu'un xchi'uc jquereme chijelovcutic batel yu'un chbat quich'cutic ta muc' li Diose. Ts'acal chisutcutic tal —xi.
6Li Abrahame la stsac li si' sventa chchic'beic o smoton Diose. Laj yac'be xq'uech batel li Isaaque. Te laj yich' batel noxtoc xcuchilo xchi'uc sc'oc', jech ibatic xchibalic. 7C'alal mu'yuc to'ox nat ixanovic batele, li Isaaque jech laj yalbe li stote:
—Tati —xut.
—¿C'usi chaval, jnich'on? —xi li Abrahame.
—Q'uelavil, li' oy li jsi'tic xchi'uc jc'oc'tique, pero ¿bu oy li chij sventa ta jmilbetic smotonin Diose? —xut.
8Itac'ov li Abrahame:
—Dios chiyac'butic tana li chij sventa matanale, jnich'on —xut.
Te to yochelic batel xanubal. 9C'alal ic'otic yo' bu albil yu'un Diose, li Abrahame la spas jun scajleb smoton Dios. La slatsbe lec si'il. Ts'acal lic xchucbe yoc sc'ob li Isaaque;#Stg 2.21. te la xmochan ta scajleb smoton Dios ta sba li si'e. 10C'alal stsacoj xa'ox xcuchilo ta smil li xnich'one, 11ta ora ic'opoj tal ta vinajel yaj'almantal Muc'ul Dios. Jech i'albat:
—Abraham, Abraham —x'utat.
—Li' oyune —xi itac'ov li Abrahame.
12Jech laj yal li j'almantale:
—Mu me c'usi xapasbe li quereme, yu'un jna'oj ti chavich' ta muc' li Diose, yu'un muc xajalan ti c'ajumal jun anich'on oye —x'utat.
13Li Abrahame ijoyij, ja' to laj yil oy jcot chij te ts'otol xulub ta ch'ixtic. Jech te bat yic' tal; ja' la xchic' ta smoton Dios ta sventa xq'uexol li xnich'one.#Heb 11.17-19. 14Li Abrahame laj yac'be sbi li banamile: “Li Muc'ul Diose chac' li c'usi jtunel cu'untique”, xi sbi laj yac'be. Ja' yu'un yoquel to jech chich' albel sc'oplal: “Te ta vits chac' c'usi jtunel cu'untic li Muc'ul Diose”, xi ch-albat sc'oplal.
15Li yaj'almantal Muc'ul Diose la sc'opan tal xchibal velta c'alal ta vinajel li Abrahame. 16Jech laj yalbe:
—Li Muc'ul Diose jech chayalbot: ‘Ta sventa ti muc xajalanbun li jun anich'on ti c'ajumal oy avu'une, jech ta jva'an jba ta testigo jtuc 17ti ta melel ta xcac'bot ep bendicione. Ta xcac' boluc ep amomnich'nab jech chac c'u cha'al c'analetic ta vinajel, jech chac c'u cha'al yi'tic ta ti'nab.#Heb 6.13-14; 11.12. Li stuquique tsalbil ta xc'ot yu'un li yajcontraique. 18Ja' ta sventaic chich' bendición scotol li muc'tic lumetic li' ta banamile,#Hch 3.25; Gá 3.8. yu'un laj ach'un li c'usi laj calbote’, xayutot li Muc'ul Diose —xi li j'almantale.
19Li Abrahame isut batel te yo' bu comenic li smozotaque. Jech jmoj xa isutic batel ta Beerseba; te inaqui o li Abrahame.
Sc'oplal xnich'nab Nacor
20C'alal i'ech' xa'ox jayibuc c'ac'ale, li Abrahame laj ya'ay a'yej ti oy xa yalab li Milcae, jech la sna' ti oy xa xnich'nab li yits'in Nacore. 21Li sba xnich'one Uz sbi. Ts'acal ivoc' its'inal, Buz sbi. Ts'acal ivoc' Kemuel, ja' li stot Arame. 22Ts'acal to ivoc' noxtoc Quesed, Hazo, Pildas, Jidlaf, xchi'uc Betuel. 23Li Betuele ja' stot li Rebecae. Li vaxquibic le'e ja' yalab li Milcae, xchi'uc ja' xnich'nab li Nacore, ja' li yits'in Abrahame.
24Jech noxtoc li Nacore oy xnich'nab ta yan ants yu'un, ja' li Reumae. Li yol xnich'onique ja' li'i: Teba, Gaham, Tahas, xchi'uc Maaca.
Currently Selected:
Génesis 22: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.