Baruc 3
3
1‘Ja' yu'un Cajval, vo'ot ti scotol xu' avu'une, Dios yu'un Israel, li co'ntone toj vocol oy, toj aluben li jol co'nton ti xivocolet ta atojole. 2Cajval, a'ybun li jc'ope, c'uxubinun yu'un laj xa jta jmulcutic ta atojol. 3Li vo'ote te chotolot o ta achotleb ta sbatel osil, yanuc li vu'uncutique lajeluncutic ono'ox. 4Cajval, vo'ot no'ox atuc ti scotol xu' avu'une. Dios yu'un Israel, a'ybo me sc'opic li boch'otic chamenic ya'yele, ja'ic li xnich'nabtac boch'otic la sa' smulic ta atojole, ti mu'yuc la xchiquintaic li mantaletic avu'un vo'ot li Diosot yu'unique, ja' yu'un ital li epal vocoliletic ta jtojolcutique. 5Mu xa me xat'ab ta avo'nton li xchopolil jtot jme'cutique. Ac'o ta ilel ta ora li avu'el atsatsale xchi'uc li slequilal abie. 6Yu'un vo'ot Cajvalotcutic, vo'ot Diosot cu'uncutic. Li vu'uncutique ta xa jlequilc'opanotcutic Cajval. 7Ja' yu'un laj avac' axi'elal ta co'ntoncutic yu'un jech ac'o jtaotcutic ta na'el. Ta jc'an chcalcutic alequilal li' ta yan lume, ta jc'an ta jcomtsancutic li xchopolilic li jtot jme'cutic ti la sa' smulic ta atojole. 8Li' oyuncutic ta yan banamil ti bu laj apuclinuncutic talel, ti bu chilajcutic ta lo'iltael, ta chopolc'optaele, xchi'uc ti bu chquich'cutic ep vocol ta stojel smulic li jtot jme'cutic#Lm 3.7. ta scoj ti la sbev sbaic ta atojole, Cajval Dios cu'un’, utic”, xi li cartae.
Ja'o c'alal la sta sbijilic
9Israeletic, a'yo ava'yic li mantaletic sventa cuxlejal, xchi'uc sventa chata lec abijilique.
10Israeletic, ¿c'u yu'un ti te oyoxuc ta slumalic li avajcontraique,
ti te chamalubic ta yosilalic li yanlumetique?
11¿C'u yu'un ti te chabolibtas abaic ta stojol li boch'otic chamenique,
ti te jmoj acapoj abaic xchi'uc li boch'otic te oyic ta yavil animaetique?
12Yu'un laj acomtsanic li boch'o chac' bijilile.
13Ja'uc laj ats'aclinic c'usi tsc'an li Muc'ul Diose,
jun avo'ntonic cuxuloxuc sbatel osil ti jechuque.
14Ja' yu'un chanic me bu oy li bijilile, bu oy li tsatsalile,
xchi'uc li sjamubil jba jsatique,
jech chana'ic bu oy li natil cuxlejale,#Pr 3.16. bu oy li saquil osile,
xchi'uc bu ta jtatic jun no'ox co'ntontique.
15¿Me oy boch'o staojbe yavil li bijilile;
me oy boch'o ochem ta snac'ubil?#Cf. 3.29-32; Job 28.12,20; Is 40.13-14; Eclo 1.6.
16¿Bu oy li banquilaletic ta jujun banamile
xchi'uc li boch'otic spasojic ta mantal li chonbolometique,
17xchi'uc li boch'o ta xtajinic xchi'uc li mutetic ta vinajele,
xchi'uc li boch'o ep stsoboj li c'anal taq'uin xchi'uc saquil taq'uine,
ti mu xlaj yo'ntonic ta stsobel staq'uinique
ti ja' spatoj o yo'ntonic li cristianoetique?
18¿Me xana'ic bu oy li boch'otic ven lec ch-abtejic ta smeltsanel ixtolaletic ta q'uine
ti mu boch'o xotquin c'u x'elan ch-abtejique?
19Isacch'ayic xa batel, i'ochic xa yalel ta ch'en;
yantic xa boch'o ochemic ta yabtelic.
20Yan xa jc'ol alabnich'nab laj yilic li sac osile,
ja' xa inaquiic li' ta banamile,
pero mu sna'ic bu oy sbelal li bijilile.
21Ja' yu'un mu'yuc la staic ti bu oye
jech noxtoc li yalab xnich'nabique ich'ayic ta be.
22Mu'yuc boch'o yalojbeic sc'oplal te ta Canaán;
mu'yuc boch'o laj yil te ta Temán.
23Li syal'alabtac Agar ti la sa'ilanbeic sbijilic sventa chotquinic c'usi chc'ot ta pasel li' ta banamile
mu'yuc la staic li bijilile.
Jech noxtoc li jbolomajeletic ta Madián xchi'uc ta Temane#3.23 Temán - Oy jaychop cristianoetic ta sloq'ueb c'ac'al ti oy lec sbijilique, pero li bats'i bijilile mu xotquinic.
li boch'otic sna'ic lec poco' lo'iletique
mu'yuc staojic ec bu sbelal li bijilile;
muc xvul ta sjolic bu ta tael li sbelale.
24¡Israel, toj ech'em smuc'ul xch'ulna li Muc'ul Diose,#3.24 Li xch'ulna Muc'ul Dios chal li'i ja' van sc'oplal li vinajele.
toj jamal ti bu tspas mantale!
25Toj ech'em smuc'ul,
mu'yuc spajebal, mu stac' bisel.
26Ja' te ivoq'uic li muc'tic natil viniquetic#3.26 Ta scoj c'usi chvinaj ta Gn 6.1-4 yu'un xch'unojic cristianoetic ti ja' te ilic sts'unubal natil viniquetic c'alal la xchi'in sbaic xchi'uc xnich'nab Dios li antsetique (Dt 2.10; Sab 14.6; q'uelo noxtoc Gn 6.2n). ti lec otquinbilic ta vo'one,
ja' ti ven muc'tic, xchi'uc ti lec sna'ic pasc'ope.
27Pero mu'yuc it'ujatic yu'un Muc'ul Dios;
mu'yuc x'ac'bat yilic c'uxi ta tael li sjamel satile.
28Ja' yu'un mu'yuc sbijilic ichamic ec;
ta scoj sbolilic ti jech ichamique.
29¿Boch'o imuy batel ta vinajel ti ay yich' tale?
¿Boch'o ay yich' yalel tal ta toc li bijilile?
30¿Boch'o la xtuch' jelovel nab ti jech la stae?
¿Boch'o xu' yu'un tsman ta c'anal taq'uin?
31Mu'yuc boch'o yotquinojbe sbelal
xchi'uc mu'yuc boch'o sna' bu ta tael.#Dt 30.12-13; Job 28.12-14,20-21.
32Pero li boch'o sna'oj scotole lec xotquin,
sna' bu oy, chajal sba sat.
Ja' li boch'o la spas banamil ta sbatel osile,
ti la snojes ta chonbolometique.#Job 28.23-27; Pr 8.22-31.
33Xchi'uc li boch'o ta stac talel saquil osil, ti jech sac osil chc'ote,
ja' li boch'o ta spas ta mantale jech ta xch'unbat ta xi'elal.
34Li c'analetique xcuxet no'ox yo'nton xojobanic ti bu ac'bil yavilique.
35Me ta sc'opane, ta xtac'ovic yu'un:
“Li' oyuncutique”, xiic.
Xcuxet no'ox yo'ntonic ta stojol li boch'o ipasatic yu'une.
36Li stuque ja' no'ox Dios cu'untic;
mu boch'o xco'laj jech chac c'u cha'al li stuque.
37Yu'un ja' yac'oj li sbelal bijilile;
ja' sna'oj bu oy sbelal sbatel osil.
Ja' laj yac'be xchan li yajtunele, ja' li Jacobe,
ja' ti toj lec sc'anoje ja' li Israele.#Eclo 24.8-12.
38Ta ts'acal ivul li' ta banamil li bijilile;
li' la xchi'in ta naclej li cristianoetique.
Currently Selected:
Baruc 3: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.