Baruc 2
2
1‘Ja' yu'un li Dios cu'untique ic'ot ta pasel yu'un li c'usi yaloj ono'ox ti ta xac' jvocoltic ta jcotoltic, xchi'uc ajvaliletic cu'untic, jchapanvanejetic, jpasmantaletic, xchi'uc ta scotol jnaclumetic ta Israel xchi'uc ta Judae. 2Mu'yuc bu jech yan ic'ot ta pasel ta sbejel banamil jech c'u cha'al ic'ot ta pasel li' ta Jerusalene, ja' ti jech ono'ox ts'ibabil ta mantaletic yu'un li Moisese. 3Jech oy boch'otic cu'untic yo' lic sjapoic ta sti'bel sbec'tal li jquerem jtsebtique.#Cf. Lv 26.29; Dt 28.53; Jer 19.9; Lm 4.10. 4Li Cajvaltique lic yac'utic ta sc'ob yantic lum ti li' jts'aquinojtique, yu'un jech chijcomutic ta q'uexlal xchi'uc bajbil chijcomutic. Jeche' xocol banamil icom o yu'unic li jlumaltique yu'un la spucutic batel li Cajvaltique. 5Ta scoj ti mu'yuc la jtuc'ulanbetic sc'op li Dios cu'untique jech la jta jmultic, ja' yu'un lijcomutic ta smozoic li yantic lume, mu'yuc jtutic lijcomutic.#Dt 28.13,43.
6‘Li Cajvaltique lec tuc' c'usi tspas. Li jtot jme'tic xchi'uc vu'utique jtuctic laj cac' jbatic ta q'uexlal ti jech c'otem ta pasel ta ora li' ta jtojoltique. 7Ti c'usi yalojbutic ono'ox Cajvaltic ti c'usi chtal ta jtojoltique ic'ot xa ta pasel ta jtojoltic. 8Mu'yuc la jc'anbetic Cajvaltic ti ac'o sutcutic tal ta stojole ti ac'o jcomtsantic li sbolil co'ntontique.#Dn 9.13-14. 9Ja' yu'un li Cajvaltique laj yac'butic jcuchtic li c'usitic vocole, yu'un li stuque yalojbutic ti tuc' c'usi ac'o jpastique. 10Yanuc li vu'utique mu'yuc laj cac'tic ta venta li smantaltaque, xchi'uc mu'yuc la jch'untic li c'usi yalojbutique.
La sc'opanic Dios yu'un ac'o yich'ic coltael
11‘Li' ta orae, chajc'opanot Cajval, Dios yu'un Israel, yu'un vo'ot ta atsatsal, ta avu'el laj aloq'ues tal ta Egipto li ateclumale; laj avac' ta ilel muc'tic sq'uelubil atsatsal avu'el, jech ivinaj batel ac'oplal jech chac c'u cha'al chvinaj ta jtojolcutic li' ta orae. 12Li vu'uncutique la jta jmulcutic ta atojol, Cajvaltic Dios, ech'em la jsa' jmulcutic ta atojol. La jpascutic ti c'usitic mu'yuc tuq'uique, la jbajcutic li mantaletic avu'une.#Dn 9.15-17. 13Q'uejbuncutic xa batel li sc'ac'al avo'ntone yu'un atbil xa no'ox comenuncutic ta jujun banamiletic ti bu laj apuclinuncutic batele. 14Cajval, a'ybuncutic ti li' chajc'opanotcutic, ti li' xivocoletcutic ta atojole; coltauncutic atuc ti lecuc chiyiluncutic li boch'otic la xchucuncutique. 15Yu'un jech ta sna'ic scotol cristianoetic ti vo'ot no'ox Diosot cu'uncutique ti avac'oj aba ta stojolic ta scotol li Israel xchi'uc c'alal to ta smomnich'nabique. 16Cajval, q'ueluncutic tal c'alal to te ta ana ta vinajel; ts'e'ano me achiquin; a'yo li c'usi chacalbotcutique.#1 R 8.30,33-34. 17Vic'o me asat, q'ueluncutic me tal, yu'un mu ja'uc animaetic ti oyic xa ta c'atinbaque. Oy to li sbec'talique pero mu'yuc xa lec yipalic, mu xa xu' yu'unic tsq'uejintaic li alequilale, xchi'uc ta yalel li c'usitic tuc' achapanoje. 18Ac'o me xva'lajetic to pero solel jeche' saysunic o, jeche' xa xnijlajetic chanovic, jeche' xa xnel-lajet satic yu'un vi'nal li boch'otic chayich'icot ta muq'ue xchi'uc ti chalic alequilale.
19‘Li vu'uncutique mu'yuc la jts'acbecutic li bu tuq'uic yabtelic li jtot jme'cutic xchi'uc li ajvaliletic cu'uncutique, yu'un mu'yuc bu la jc'ancutic vocol ta atojol, Cajval Dios cu'un. 20Ja' vo'ot laj avac' jtoj jmulcutic ta sc'ac'al avo'nton, yu'un jech ono'ox avaloj c'alal laj ach'amanbe ye li j'alc'opetique, jech yalojic: 21Jech yaloj li Cajvaltique: Nijano abaic, tunanic ta stojol li muc'ta ajvalil ta Babiloniae, yu'un jech xu' to chbat naclanic te ta banamil ti bu ono'ox cac'ojbeic li amoltot ayame'ique.#Jer 27.11-12. 22Me muc xach'unic c'usi yaloj li Cajvaltique ti c'u x'elan xu' chijtunutic ta stojol li muc'ta ajvalil ta Babiloniae, 23vu'un ta jlajes li xcuxetel avo'ntonique, li aq'uejimolic sventa li q'uin nupinele, li tse'imol li' ta Judá xchi'uc ta Jerusalene, ta xcom ta xocol banamil, mu'yuc yajval ta xcom, xi ono'ox yalojbuncutic li j'alc'opetic avu'une.#Jer 7.34.
24‘Li vu'uncutique mu'yuc la jch'uncutic ti chituncutic ta stojol li muc'ta ajvalil ta Babiloniae, ja' yu'un ic'ot ta pasel li vocoliletic ti laj yalic li j'alc'opetic avu'une, jech ono'ox yalojic ti ta sloq'uesbeic ta smuquinal sbaquiltac li ajvaliletic xchi'uc li jmoltot jyame'cutique, 25te metsajtic icom ta xc'uxul jujun c'ac'al xchi'uc ta siquil jujun ac'ubal.#Jer 8.1-2; 36.30. Ichamic ta scoj vocoliletic, ta vi'nal, ta milel, xchi'uc ta ch'amajel chamel.#2.25 Ch'amajel chamel - Oy chalic ti ja' smelol ti chich'ic nutsel loq'uel ta slumalique (Jer 14.12). 26Li ach'ulna ti bu to'ox laj yich'icot ta muq'ue laj yich' comtsanel ta scoj xchopolil li israeletic xchi'uc li judaetique.#Jer 7.14.
27‘Pero li vo'ote ep c'usitic laj apas ta jtojolcutic, laj avac'bun quilcutic ep slequil avo'nton xchi'uc c'uxubinel avu'un, 28jech chac c'u cha'al lac'opoj ta stojol Moisés c'alal ja'o yorail laj avac'be ts'ibtabil ta ton li mantaletic ta stojol li israeletique, jech laj aval: 29Me mu'yuc chach'unbicun li jmantale, manchuc me toj epoxuc pero ta persa chabic'tajic ta yantic banamiletic ti bu ta jpucoxuc batele.#Dt 28.58,62. 30Yu'un ta jna' ti ja' to te chasutes avo'ntonic ti me la jpucoxuc batel ta yantic lumetique yu'un toj tsots avo'ntonic; 31ja' to te chana'icun ti vu'un Avajvalicune, ti vu'un Diosun avu'unique, vu'un ta xcac'boxuc yan avo'ntonic xchi'uc achiquinic ti cha'ibe lec smelole. 32Ta xlic lequil c'opojanic ti butic ta jpucoxuc batel ta yantic lume, te chlic ataicun ta na'el. 33Ja' to chlic c'unibuc li avo'ntonic ti toj tsotse, xchi'uc chacomtsanic li abolilique, yu'un chlic ana'ic c'usi ic'ot ta pasel ta stojol li atot ame'ic ti c'alal la sa' smulic ta jtojol vu'un li yajvalicune. 34Jech ta xcac'boxuc yan velta li banamil ti bu cac'ojbeic ono'ox li amoltot ayame'ique, ja' li Abrahám, Isaac xchi'uc Jacobe, jech chavu'uninic o,#Jer 32.37. ta jbolesoxuc, mu'yuc ta xculesoxuc o. 35Xu' ta jchap jc'optic ta sbatel osil. Vu'un atoticun, vu'un Diosun avu'unic chic'ot, jech vo'oxuc jteclumaloxuc chac'otic ec. Mu'yuc xa chajloq'uesoxuc li' ta banamil ti laj cac'boxuc vo'oxuc li israeloxuque, vo'oxuc li jteclumaloxuque,#2.35 Li c'usi ach' la xchapan xchi'uc steclumal li Diose solel bats'i ach' xa; mu xco'laj xchi'uc ta ba'yuc (Jer 31.31-34; 32.38-40). xi laj yal li Diose, xi li Moisese.
Currently Selected:
Baruc 2: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.