JEREMIA 4
4
Eigidho lyeitedhululo
1Omuwa ota ti: “Aaisraeli ne, ngele omwa hala okugaluka, galukileni kungame. Ngele tamu etha iimenka handi yi tondo e tamu inekele ndje, 2otashi ka kala shu uka, sho tamu gana medhina lyandje. Nena iigwana ayihe otayi ka galikana ndje ndi yi yambeke, notayi ka hambelela ndje.”
3Omuwa ota lombwele Aajuda nAajerusalem ta ti: “Kokoleni oshikokola, inamu kuna mokati komano. 4Dhiginineni ehangano nangame, Omuwa gweni, iyapulilii ndje, ne Aajuda nAajerusalem. Ngele itamu shi ningi, ondjahi yandje otayi ka hwama ya fa omulilo omolwiinima iiwinayi mwe yi ningi. Otandi ka hwama nopwaa na omudhimi gwomulilo ngo.”
Ehomono tali zi kuumbangalantu
5Hikeni omankuma noshilonga ashihe!
Ga fudhileni ga kugagane nawa!
Lombweleni Aajuda nAajerusalem
ya ye miilandohote.
6Yelutheni endhindhiliko lyokuuka lwokuSion.
Zii ko neendelelo mu ka holame! Inamu kwatakwata!
Oshoka otandi eta oshiponga tashi zi kuumbangalantu,
ehanagulo enenenene.
7Omuhanaguli okwa mbunzuka ko
a fa onkoshi ya hituka moshiholameno shayo.
Ote ya a hanagule po Juda.
Iilando yaJuda otayi ka kumunwa po,
nokaku na ngoka ta ka kala mo muyo.
8Zaleni omahahi mu lile ne mu takume,
oshoka ehwamo lyondjahi yOmuwa inali penga Juda.
9Omuwa ota ti: “Esiku ndyoka aakwaniilwa nomalenga otaga tyololoka; aayambi otaa kunkwa, naahunganeki otaa kumwa.”
10Ngame onda ti: “Omuwa Omupangeliawike, oshili, owa kotokele Aajerusalem! Owa tile, otaku kala ombili, ihe egongamwele olyo ndyoka li li poothingo dhawo.”
11Esiku otali ya, uuna Aajerusalem taa ka lombwelwa kutya ombepo ompyu otayi pepe tayi ziilile kombuga, yu uka kuyo. Inayi opala, yi pepe po ashike etutu — 12ombepo ndjoka tayi ya palombwelo lyOmuwa, otayi ka ninga epukutula! Omuwa oye mwene ta tumbulile aantu ye epangulo.
Juda ta kondekwa kaatondi ye
13Talii ko, omutondi te ya a fa iikogo. Omatembakwiita ge oga fa ombepo yoshikungulu, nuukambe we otau endelele u vule omakodhi. Yaye tse! Ehanagulo tali ya!
14Jerusalem, yoga ko uuwinayi komwenyo gwoye, opo u hupithwe. Sigo uunake to tsikile nomadhiladhilo guulunde?
15Aatumwa ya zi koshilando Dan nokoondundu dhaEfraim, otaa hokolola onkundana ombwinayi. 16Oye ya okulondodha iigwana nokulombwela Jerusalem kutya aatondi otaa ya taa zi koshilongo shokokule. Aatondi mbaka otaa ka kugila iilando yaJuda onkugo 17notaa ka kondeka Jerusalem ya fa aantu ya keelela epya, oshoka aantu yasho oya tsu ondumbo nOmuwa. Omuwa oye a popi.
18Juda, owe shi iyetele mwene mokukala mondjila ndjoka wa lamba nomokulonga shoka wa ningi. Uulunde woye owe eta iihuna yomahepeko; otayi ku tsu momutima.
Jeremia ta lilile oshigwana
19Yayee, tandi tapata, tandi nkundumanekwa kuuwehame!
Omutima gwandje! Omwenyo gwandje gwa tukuluka!
Ite vulu okumwena;
ondu uvite omankuma nonkugo yolugodhi.
20Oshiponga otashi landula oshiponga oshikwawo.
Oshilongo ashiheshihe osha hanagulwa po.
Omatsali getu oga dhikulwa mo ohaluka,
nomagumbo getu ga ningi iihanuhanu yowala.
21Sigo uunake tandi tala uugeyi wolugodhi
nokukala te pulakene ehiko lyomankuma?
22Omuwa ota ti:
“Aantu yandje aagoya, inaa tseya ndje.
Oyo aanona aatsini;
kaye na nando omayele.
Oya pyokoka mokulonga uuwinayi,
ihe otaa nyengwa okulonga uuwanawa.”
Jeremia to mono eyo lyehanagulo
23Onda tala evi —
olya li lya vongakana nolya mbugala;
onda ligamene kegulu —
kakwa li ku na uuyelele.
24Onda tala koondundu —
okwa li ekakamo,
niikulundundu ayihe oya li tayi tengauka.
25Onda mono kutya kaku na aantu;
noondhila odha tuka ko.
26Evi lyo ondoka olya mbugala;
iilando yalyo oya ningi omakulukuma
molwoohandje dhondjahi yOmuwa.
27Omuwa okwe shi popi ta ti:
“Evi alihe otali ka mbugala,
nando itandi li hanagula po thiluthilu.
28Evi otali ka lila;
eyalelo otali ka luudha.
Omuwa okwa popi noita ka lundulula we omadhiladhilo ge.
Okwa utha etokolo lye
noite li shunithile mo we.”
29Paigidho lyaakayilinkambe noondjumbeta
shaa ngoka ota yi ontuku.
Yamwe otaa ka matukila komakuti,
yamwe otaa ka londakana omamanya.
Oshilando kehe otashi ka thigwa po,
nokaku na ngoka ta ka kala mo we.
30Yaye ngoye Jerusalem!
Omolwashike wa zala uutiligane?
Omolwashike wa zala omawe nowa gwayeke oombafu dhoye?
Owi imbonzola mo osima yowala!
Aaholi yoye oye ku ekelehi
noya hala oku ku dhipaga po.
31Otandi uvu onkugo ya fa yomukulukadhi ta thetwa,
ekemo lya fa lyomukiintu opo ti iyelipa omunona.
Oyo onkugo yaJerusalem ta hetha mefudhagano,
okwa yelutha omaako ge ta takuma ta ti:
“Akwetse! Otandi ka sila miikaha yaadhipagi.”
Currently Selected:
JEREMIA 4: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.