JEREMIA 3
3
Uuhasha waIsrael
1Omuwa ota ti: “Ngele oku na omusamane ta henge po omukadhi, nomukadhi ta ka hokanwa kugulwe, ita vulu we oku mu hokanununa. Shika otashi nyateke oshilongo nayi. Ihe ngoye Israel, sho wa hondelwa kaaholike yoye oyendji, oto galukile tuu kungame? 2Yelutha utale omeho goye u ligamene kiikulundundu. Oku na tuu ehala mpoka inoo hondelelwa po? Owa tegamene aasamane yoye pooha dhoondjila wa fa Omuarabia a langela oshihakanwa mombuga. Owa nyateke oshilongo noluhondelo lwoye. 3Omolwashoka omvula ya keelelwa okuloka, omvula yontemuno ya kala inaayi loka we. Nando wa kala moluhondelo, ino sa ohoni.
4“Nongashingeyi oto lombwele ndje to ti: ‘Ongoye tate, nou hole ndje okuza kuugundjuka. 5Ino hala okugeyagana aluhe noino hala okukonenena ndje sigo aluhe.’ Israel, osho to popi, ihe oto longo iihuna ayihe to vulu oku yi huna.”
Israel naJuda oye na okwiitedhulula
6Omuwa okwa lombwele ndje muuyuni womukwaniilwa Josia ta ti: “Owa mona tuu, omuhasha Israel nkene a ningi? Okwa londo koondundu adhihe oondeendeka nokwa yi momizile dhomiti adhihe omitalala e ta lalwa naye nkoka. 7Onda dhiladhila kutya ngele a gwanitha mbika, ota ka galukila kungame. Ihe ina galuka nando, nomumwayina omuhasha Juda okwe shi tala wo. 8Juda okwa mono kutya onda henge po Israel, nonde mu tidha po, oshoka okwa pilamene ndje e ta ningi ohonda. Ihe Juda, omumwayina gwaIsrael, ina tila ndje. Naye wo okwa ningi ohonda 9noina sa nando ohoni. Okwa nyateke oshilongo noluhondelo, sho a simaneke omamanya nomiti omitalala. 10Nokonima yaambika ayihe Juda, omumwayina omuhasha gwaIsrael, ina galukila kungame. Okwi ifethitha ashike, ihe ine shi ninga moshili. Ongame Omuwa nda popi.”
11Omuwa okwa lombwele ndje kutya Israel nando okwe mu pilamene, okwa ningi ngaa hwepo e vule omwiiteki Juda. 12Okwa lombwele ndje, ndi ka lombwele Israel ndi tye: “Israel ngoka wi iteka ndje, galukila kungame. Ngame omunamutimahenda noihandi geye osima. Itandi ku geele we sigo aluhe. 13Zimina owala kutya ngoye omunandjo, nowa tsu ondumbo nOmuwa, Kalunga koye. Hempulula kutya owa saagelele iikalunga yokiilongo momuti kehe omutalala noino vulika kiipango yandje. Ongame Omuwa nda popi.
14“Aantu ne mboka mwi iteka ndje, galukeni; one aantu yandje. Otandi ka kutha gumwe gwomune moshilando kehe, nayaali yomoludhi kehe notandi ke mu galulila kondundu Sion. 15Otandi ke mu pa aaleli haa vulika kungame, notaye mu lele nuunongo noondunge. 16Nongele mwi indjipala oyendji moshilongo shoka, aantu itaa ka tumbula we oshikethahangano. Itaye ke shi dhiladhila we nenge ye shi dhimbulukwe; itaye shi pumbwa we noitaa ka pangela we oshipe. 17Uuna ethimbo ndyoka nali thiki, Jerusalem otashi ka ithanwa ‘Oshipangelapundi shOmuwa’, niigwana ayihe oko tayi ka gongala yi simaneke ndje. Itaa ka ninga we, ngaashi omitima dhawo omiwinayi nodha tangalala tadhi ya lombwele. 18Israel ota hangana naJuda, noyo ayehe otaa zi muupongekwa moshilongo shokuumbangalantu notaa galukile koshilongo shoka nde shi pele oohekulu, shi ninge eliko lyawo.”
Iimenka yaantu yaKalunga
19Omuwa ota ti:
“Israel, onda halele ndi ku taambe omumwandjemati,
otandi ku pe evi lyo ondoka,
evi ewanawa muuyuni auhe.
Onde ku halele, u ithane ndje tate,
noku na mpoka no ka pilamena ndje we.
20Ihe owa fa omukulukadhi ti iteka pomusamane gwe,
ngoye ino inekela ndje.
Ongame Omuwa nda popi.”
21Ewi otali igidha muule koondungu dhoondundu.
Oyo Aaisraeli taa kugu notaa galikana,
oshoka oya kala moondjo
noya dhimbwa Omuwa Kalunga kawo.
22Galukeni, one amuhe mboka mwi iteka Omuwa;
ote ke mu aludha e te mu ningi aainekelwa.
Otamu ti: “Eeno, otatu ya kOmuwa, oshoka oye Kalunga ketu. 23Inatu mona ekwatho miinonoma yuupagani koondungu dhoondundu. Ekwatho lyaIsrael otali zi ashike kOmuwa Kalunga ketu. 24Ihe okulongela Baal, oshikalunga shohoni, oshe tu kanithitha oonzi dhetu, osho wo aanona yetu aamati naakadhona — ashihe shoka ootatekulu ya longelele muuyuni wonale. 25Natu laleni mohoni e tatu pitika ondhino yi tu kwidhidhike. Otse nootatekulu twa yono aluhe kOmuwa Kalunga ketu; inatu vulika nando kiipango ye.”
Currently Selected:
JEREMIA 3: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.