1 SAMUEL 1
1
Elkana naangandjawo kuShilo
1MuRama moshitopolwa shoondundu dhaEfraim omwa li omusamane edhina lye Elkana, gwomezimo lyaEfraim. Okwa li omuna gwaJeroham nomutekulu gwaElihu, gwomegumbo lyaTohu nogwomoludhi lwaZuf. 2Elkana okwa li e na aakiintu yaali, Hanna naPeninna. Peninna okwa li e na aanona, ihe Hanna ke na omunona. 3Omumvo kehe Elkana okwa zi maandjawo muRama, a ka galikane Omuwa Omunankondoawike kuShilo noku mu yambela omayambo. Aana yaali yaEli, Hofni naPinehas, oya li aayambi hoka. 4Ethimbo kehe Elkana sho a ka yamba omayambo ge, okwa li ha gandja oshitopolwa shimwe shonyama kuPeninna nashimwe komwana kehe. 5Nonando okwa li e hole Hanna noonkondo, okwe mu pe owala oshitopolwa shimwe, oshoka Omuwa ina pa Hanna oluvalo. 6Peninna, omukondjithi gwe, okwa li he mu ehameke noku mu sitha ohoni, oshoka Omuwa ine mu pa oluvalo. 7Shika osha ningwa omimvo nomimvo, aluhe sho ya yi kongulu yOmuwa. Peninna okwa hindi Hanna unene, nolwindji Hanna okwa lili nokwa tindi okulya. 8Omulume Elkana okwe mu pula ta ti: “Hanna, oto lilile shike? Oshike inoo hala okulya? Omolwashike wa nika uupongo aluhe? Ku li nani, ngaashi handi dhiladhila, kutya ngame pungoye oshi vulithe aamwoyemati omulongo?”
Hanna naEli
9-10Esiku limwe sho ya mana okulya mongulu yOmuwa muShilo, Hanna okwa yeluka po. Okwa li u uvite uudhigu e ta lili noonkondo ta galikana Omuwa. Omuyambi Eli okwa li a kuutumba peha lye pomweelo. 11Hanna oku uvaneke a ti: “Omuwa Omunankondoawike, tala ndje, ongame omuntu gwoye! Tala kuudhigu wandje e to dhimbulukwa ndje! Ino dhimbwa ndje! Oshoka ngele to ka pa ndje okanona okamati, otandi uvaneke kutya otandi ke ku yapulile, ka kale koye okukalamwenyo kwako akuhe ko itaka kululwa nando.”
12Hanna okwa tsikile okugalikana Omuwa olule, naEli okwa li a tongolola omilungu dhe. 13Okwa li ta galikana momwenyo a mwena, omilungu dhe adhike dha li tadhi inyenge, ihe ita popi ewi lyu uvitike. Eli okwa dhiladhila kutya okwa kolwa 14nokwa ti kuye: “Ethimbo oli thike peni to italitha wa kolwa? Etha okunwa e to kololokwa.”
15Hanna okwa yamukula a ti: “Aawe, inandi kolwa, tatekulu, inandi nwa! Onda dhigupalelwa nonda galikana nda aneka uudhigu wandje koshipala shOmuwa. 16Ino dhiladhila kutya ngame omukiintu omwiinayi. Onda galikana ngeyi, oshoka ondi na uudhigu noluhodhi.”
17Eli okwa ti: “Inda nombili. Kalunga kaIsrael ne ku pe shoka we mu indile.”
18Hanna okwa yamukula a ti: “Dhimbulukwa ndje aluhe.”
Nena okwa zi po e ta li ye ina sa we oluhodhi.
Evalo lyaSamuel nokugandjwa kwe
19Ongula ya landula ko Elkana naangandjawo oya meneka, nokonima yokugalikana Omuwa, oya shuna kaandjawo kuRama. Elkana okwa monathana nomukadhi Hanna, Omuwa nokwa yamukula omagalikano gaHanna. 20Onkee okwa ningi omusimba nokwa mono okamati. Okwe ka luku Samuel, ndyoka tali ti: “Onde mu indile kOmuwa.”
21Ethimbo olya thiki ishewe lyaElkana naangandjawo, ya ye kuShilo oku ka yambela Omuwa omayambo gokomumvo nomayambo geuvaneko. 22Ihe pethimbo ndika Hanna ina ya ko. Okwa lombwele omulume a ti: “Omunona ngele a toyo, otandi mu fala mbala kongulu yOmuwa, nkoka ta ka kala aluhe.”
23Elkana okwa yamukula: “Eewa, ninga shoka to tala sho opala; kala ano pegumbo, sigo we mu toyitha Omuwa na tsakanithe euvaneko lyoye.” Osho ngeyi Hanna okwa kala pegumbo e ta yamutha okamwana.
24Sho e ka toyitha, okwa kutha ontsezi yomimvo ndatu, olata yimwe yuusila womunziya nombago yu udha omaviinu e ta fala okanona Samuel kuShilo kongulu yOmuwa. 25Sho ya tsele ontsezi, oya fala omunona kuEli. 26Hanna okwa ti kuye: “Ombili, tatekulu. Oto dhimbulukwa ndje tuu? Ongame omukiintu ngwiyaka wa li wa mono a thikama mpaka ta galikana Omuwa. 27Omuwa onda li nde mu indile, a pe ndje okanona haka, oye nokwa pe ndje shoka ndi indile. 28Onkee otandi ka yapulile Omuwa. Oko okOmuwa mokukalamwenyo kwako akuhe.”
Nena oya simaneke Omuwa nkoka.
Currently Selected:
1 SAMUEL 1: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.