1 SAMUEL 2
2
Ehambelelondjimbo lyaHanna
1Hanna okwa galikana a ti:
“Omuwa oku udhitha omutima gwandje enyanyu;
ondu uvite uunelago kushoka Omuwa a ningile ndje!
Otandi yolo aatondi yandje;
onda nyanyukwa, oshoka Kalunga okwa kwatha ndje!
2Kaku na omuyapuki a fa Omuwa;
kaku na nando ogumwe e mu fa,
kaku na omugameni a fa Kalunga ketu.
3Inamu popya mokule omaitango geni;
etheni oohapu dhomwiityo gweni.
Oshoka Omuwa oye Kalunga a tseya ayihe
nota pangula ashihe shoka aantu haye shi ningi.
4Omatati gaakwiita aanankondo otaga teywa po,
ihe mboka taa tengenya, otaa kolekwa.
5Aantu mboka ya li aanekuta,
ngashingeyi otaa hehela iipalutha,
ihe aantu mboka ya li aanandjala,
ondjala yawo ya kodha.
Omukulukadhi ihaa vala,
okwa mono uunona uheyali,
ihe yina yoyendji ota thigwa e li owala.
6Omuwa ota dhipaga nota yumudha;
aantu ote ya tumu muusi
e te ya galula mo ishewe.
7Ota thigonapaleke yamwe
e ta yambapaleke yakwawo;
ota shundula yamwe,
nayamwe ote ya nenepeke.
8Ota yambula ohepele montsi
nota kutha omukwanaluhepo muukweyi.
Ote ya ningi ookuume kaana yokombanda
e te ya tula pomahala gesimano.
Omakankameno gevi ogOmuwa;
okugo Omuwa a tungile uuyuni.
9Ota gamene oomwenyo dhaamboka ye mu inekela,
ihe aakolokoshi otaa kanene momilema;
omulumentu ita sindana molwoonkondo dhe mwene.
10Aatondi yOmuwa otaa ka yonwa po;
ote ke ya ndundumina e li megulu.
Omuwa ota ka pangula uuyuni auhe;
ota ka pa omukwaniilwa gwe oonkondo,
omukwaniilwa omuhogololwa gwe ote ke mu ninga omusindani.”
11Nena Elkana okwa shuna kegumbo kuRama, ihe omumati Samuel okwa kala muShilo nokwa longele Omuwa mewiliko lyomuyambi Eli.
Aana yaEli
12Aana yaEli oya li aadhudhu. Inaa pupa ko komalombwelo gOmuwa 13noinaa gwanenwa kushoka aayambi ya vulu okupula koshigwana. Pehala lyasho, manga omuntu a li ta yamba ontselelandjambo ye, omupiya gwomuyambi okwe ya noshizigitho shoonyala ndatu. Onyama manga tayi pi, 14ota tsu oshizigitho mombiga, naashoka te shi zigi mo, ooshoka shomuyambi. Aaisraeli ayehe mboka yi ile kuShilo okuyamba, osho ya ningwa ngaaka. 15Nokuli manga oofu inaadhi kuthwa ko, dhi ka lungunithwe, omupiya gwomuyambi okwe ya nokwa lombwele nakuyamba ontselelandjambo: “Pe ndje onyama yomuyambi yokuyotha; ina hala onyama ya pakwa po, oondjoka ashike ombihu.”
16Omuntu ngele ota yamukula ta ti: “Natu ningeni shoka shu uka, natu lungunitheni tango oofu; nena oto kutha shoka wa hala,” omupiya gwomuyambi ota ti: “Aawe! Yi pe ndje ngashingeyi! Ngele ito shi ningi, otandi ke yi kutha koonkondo.”
17Uulunde mbuka waana yeEli owa li wa vuka unene koshipala shOmuwa, oshoka oya kala nokudhina omayambo gOmuwa.
Samuel muShilo
18Methimbo ndika omumati Samuel okwa tsikile okulongela Omuwa a zala oshitetahema sholiina shuuyambi. 19Omumvo kehe yina okwe mu tungile okanguwo kokombanda naasho ye ya nomulume kotempeli okuyamba ontselelandjambo yokomumvo, okwe ke mu etele. 20Nena Eli okwa laleke nuuyamba Elkana nomukadhi nokwa ti kuElkana: “Omuwa ne ku pe aanona yalwe momukulukadhi nguka, ya kale peha lyaanguka mwe mu gandja kuye.” Konima yaashika oya shuna kaandjawo. 21Omuwa okwa yambeke Hanna. Hanna okwa vala aamati yatatu naakadhona yaali. Omumati Samuel okwa kokele mongulu yOmuwa.
Eli noyana
22Eli okwa li a kulupa unene. Oku uvu ayihe mbyoka ya ningwa koyana ye yi ningile Aaisraeli kutya oya li ya lala nokuli naakiintu mboka ya li haa yakula posheelo shetsalihangano. 23Onkee Eli okwa nyenyetele oyana a ti: “Omolwashike tamu ningi iinima mbika? Shaa ngoka ota hokololele ndje uuwinayi mboka tamu ningi. 24Yi etheni, aamwandje! Mbika iihunalela tayi popiwa kaantu yOmuwa! 25Omuntu ngele ota yono komuntu omukwawo, Kalunga ota vulu oku mu popila, ihe olye ta vulu okupopila omuntu ngoka ta yono kuKalunga?”
Ihe inaa pulakena he. Onkee Omuwa okwa tokola oku ya dhipaga po.
26Omumati Samuel okwa koko nokwa li a hokiwa kOmuwa nokaantu.
Ehunganeko tali popi egumbo lyaEli
27Omuhunganeki okwe ya kuEli nelaka lya zi kOmuwa tali ti: “Hokulu Aaron negumbo lye sho ya li aapika muEgipiti, onde mu ihololele. 28Onda hogolola oluvalo lwe momazimo agehe gaIsrael, lu ninge aayambi yandje, ya yakule moshiyambelo, ya fike iitsinino, ya zale omapepenguwo, opo ya thike koshipala shandje. Onde ya pe uuthemba wokukutha oshitopolwa shomafikilondjambo koshiyambelo. 29Omolwashike ano ne mwa fukila omafikilondjambo niikulyandjambo mbyoka handi pula kaantu yandje? Ngoye Eli, omolwashike to simaneke aamwoye shi vule okusimaneka ndje, sho to ya etha, yi iyondodhe noontumba oombwanawa dhomafikilondjambo taga yambelwa ndje koshigwana shandje? 30Ngame, Omuwa Kalunga kaIsrael, ondu uvaneka nale kutya ezimo lyoye noludhi lwoye lu kale aluhe aayambi yandje. Ihe nena otandi ti kutya inandi lu hala we! 30 Ngame ote simaneke mboka haa simaneke ndje note tondo mboka taa dhini ndje. 31Pulakeneni, ethimbo otali ya, uuna tii ka dhipaga po aagundjuka ayehe maandjeni nomoludhi lwoye, opo maandjeni mwaa kale omuntu ngoka ta adha epipi lyuukulupe. 32Otamu ka kala muudhigu e tamu tala nefupa omayambeko agehe ngoka tandi ke ga pa aantu yalwe muIsrael, ihe maandjeni itamu ka kala ngoka e na omwenyo omule. 33Onkene ngaa otii ka hupitha po gumwe gwomoluvalo lwoye, a kale e na omwenyo nota ka kala omuyambi gwandje. Ihe ota ningi omuposi nota kanitha etegameno alihe. Ayehe yalwe moluvalo lwoye otaa ka sa mokudhipagwa. 34Aamwoyemati yaali Hofni naPinehas otaa si esiku limwe. Shika otashi ku ulukile kutya ashihe shoka nda popi, oshoshili. 35Otandi ka hogolola omuyambi ngoka ta kala omwiinekelwa gwandje nota gwanitha ayihe, ngaashi omwenyo gwandje gwa hala. Otandi ke mu pa oluvalo ndoka talu yakula aluhe koshipala shomukwaniilwa omuhogololwa gwandje. 36Kehe ngoka gwomoluvalo lwoye ta hupu po, oku na okuya komuyambi ngoka e ti indile iimaliwa niikulya ye e ta pula, a ziminwe okuyakula aayambi, opo a mone sha shokulya.”
Currently Selected:
1 SAMUEL 2: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.