Ta̤htû̌sò̌ǐ 143
143
Ta̤kwisaba ta ta̤ma̤jè aya
Khwǐdǎ̤wi̤ ata̤sò̌po̤ htû̌sò̌ǐ.
1Kǒ Cǒmara tûjûpwa̤, gana̤de kû̌ heta̤kwisaba, heta̤kwigwèbǎǐhtò̌ na ta̤ma̤jè htǒo.
Nacǒtè̤ ta nayo̤, na ǒ ta ta̤cǒta̤tè̤ akhû̌akhî, kǒshǔ mò̌ he.
2No to̤ pûma̤ napwa̤ma̤ta̤phû̌ mî̌ he htǒo dě ta̤cèrògûla̤ ma̤.
Dě nalo̤mo̤nu, kòyòcǒkòyòtè̤ ǒ dǐpwǎ̤꤮ tò̤.#Rò̌mǎphû̌ 3:20; Galatǐaphû̌ 2:16
3Pwa̤sò̌khě he toǒ lṳ̂pṳ̂ he dě a shò̌lòkhǔpo̤ he.#Ta̤htû̌sò̌ǐ 31:15
A noǒhtûpwa̤ he dě ta̤khǐta̤lo̤kla sǒsǒta kòyò htě a sihto yî̤nu toǒ.#Jeremǐa ata̤hǎwo 3:6
4He sò̌phlǒpî̌ jî mè̤mè̤̌.
Asò̌gònò̤ ǐsha mè̤mè̤̌ he dě he gònò̤gèglè.#Ta̤htû̌sò̌ǐ 77:3
5He gènè̤htò̌nṳ mṳni̤mṳsa htě atûlû̌htonu toǒ.
He gènè̤ǐ lǒ̤꤮ bò ta̤ htě na ma̤htonu toǒ.#Ta̤htû̌sò̌ǐ 77:12
He gènè̤ te̤mǎ lǒ̤꤮ bò ta̤ htě na ma̤ yǎta nacǔdenu toǒ.
6He yṳ̂htò̌ hecǔde dě he kwisaba.#Yò̤̌bǎ 11:13
He kè̌shuǐ na lò̤kèta hǎkhû̌khwedè̌htè̌ kè̌shuǐ khwè̌junu.#Ta̤htû̌sò̌ǐ 42:1-2, 63:1
7Kǒ Cǒmara tûjûpwa̤, he sò̌phlǒpî̌ mè̤mè̤̌ akhû̌akhî, kǒshǔ mò̌ he.
Kè̌khǒkè pûma̤ he ma̤. Dèmè̤tò̤ hî̌mî̌, he sǒsǒkè pwǎ ta kòyò htě a lòte̤ dě lṳnǎkhwǎdokûnu tapwa̤.#Ta̤htû̌sò̌ǐ 102:2
8He nǎla̤ǐ dě naǒ akhû̌akhî, pṳ̂̌wo̤wo̤꤮ ǐ gènè̤htò̌ he ta nata̤mo̤ǐ htě ahǎbòjò tò̤nu.#Ta̤htû̌sò̌ǐ 90:14
He ǐlò̤ hena̤ dě nacǔdekû hǒ akhû̌akhî, he tobǎ ma̤ hî̌tènu yṳ̂klè̌nè̌klò he.
9Kǒ Cǒmara tûjûpwa̤, ma̤lû̌htò̌ge he dě pwa̤sò̌khě he toǒ acǔdekû.#Ta̤htû̌sò̌ǐ 59:1
He khlè̌hè ǒtûdû dě naǒ.
10Na mî̌ hecǒmaradû̌ akhû̌akhî, pwǐ na sò̌yṳ noma̤ henu sû̌ǐtòwòǐ he.#Ta̤htû̌sò̌ǐ 119:12
Nayola htě a ma̤bwǐma̤sîrî kònu a sûcû̌ tû̌ta he dě klè̌cǒklè̌tè̤ nî̌.#Nehěmia 9:20
11Kǒ Cǒmara tûjûpwa̤, dě ta̤bè̌dubè̌na̤ nami̤sîrîdû̌sîrîhtû ayanu, ǐ ǒhtûpwa̤po̤ he.#Ta̤htû̌sò̌ǐ 23:3
Nacǒnatè̤ akhû̌akhî, ma̤lû̌htò̌ he ta ta̤pò̤ta̤sha.
12Pwǐ na ǒ ta ta̤mo̤ǐ htě ahǎbòjò tò̤nu ma̤sima̤hǎmǎkèbò pwa̤sò̌khě henu.
He mî̌ napwa̤ma̤ta̤phû̌ akhû̌akhî, ma̤pî̌ma̤lṳ̂kèbò bǎ he kòyò lǒ̤꤮ bò htě a ma̤jîma̤jû henu toǒ.#Ta̤htû̌sò̌ǐ 86:16, 116:16
Currently Selected:
Ta̤htû̌sò̌ǐ 143: KRC
Highlight
Share
Copy
Want to have your highlights saved across all your devices? Sign up or sign in
Wycliffe USA