ᤕᤠᤁᤢᤒ 3
3
ᤗᤧᤛᤥ᤺ᤵᤐᤧᤴ ᤕᤢᤰᤁᤥ ᤁᤵᤔᤠ
1ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤗᤢᤶᤔᤥ ᤕᤖᤡᤰ ᤛᤡᤰᤛᤠᤶᤒᤠ ᤐᤥᤱᤔᤠ ᤔᤧᤃᤥ᤺ᤳᤋᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤛᤡᤰᤛᤠᤶᤒᤠᤜᤠ᤹ ᤘᤣ᤹ᤜᤠ᤹ᤏᤢ᤺ᤸᤗᤧ ᤁᤧᤛᤠᤰᤐᤠ ᤂᤠᤛᤧᤴᤏᤥ ᤀᤠᤎᤠ᤹᤺ ᤁᤧᤗ᤹ᤒᤠᤴ ᤁᤧᤏᤡᤛᤢᤶᤗᤥ॥ 2ᤀᤠᤏᤡ᤹ ᤁᤧᤖᤧᤰ ᤕᤖᤡᤰ ᤐᤠ᤺ᤴᤜᤠ᤹ᤀᤥ ᤀᤠᤒᤣ᤺ᤴᤗᤥ. ᤁᤖ ᤀᤠᤳᤋᤡᤴ ᤔᤏᤠᤴ ᤀᤠᤒᤠᤅᤣ ᤐᤠ᤺ᤳᤋᤢᤒᤠ ᤐᤠ᤺ᤴᤏᤥ ᤔᤧᤒᤣ᤺ᤴᤏᤡᤴᤏᤧ ᤑᤠ᤹ᤃᤪ ᤛᤧᤰᤂᤠᤛᤠᤱ ᤂᤧᤸᤗᤧᤃ ᤏᤠᤛᤡᤱᤃᤧᤴ ᤁᤢᤎᤰᤁᤡᤴ ᤕᤢᤰᤁᤥ ᤁᤵᤔᤠ ᤛᤢᤰᤋᤢ᤹. ᤜᤧᤰᤁᤩᤠᤱ ᤂᤧᤴ ᤔᤏᤠᤴ ᤁᤢᤗᤡᤱᤍᤥ ᤁᤧᤃᤧᤵᤐᤠ ᤐᤥᤱᤗᤥ॥
3ᤀᤴᤏᤡᤸᤗᤧ ᤁᤢᤔᤢᤖᤠᤀᤥ ᤆᤢᤰᤛᤠ ᤁᤖᤧᤗᤡᤴ ᤁᤣ᤺ᤵᤔᤠᤀᤠᤱ ᤂᤧᤴ ᤕᤶᤒᤠ ᤌᤰᤛᤠᤴ ᤀᤠᤳᤋᤠᤴ ᤋᤣ᤹ᤔᤠ ᤏᤡᤱᤘᤠ᤹ ᤀᤠᤈᤥᤃᤢᤶ ᤂᤧᤵᤔᤥᤀᤣ ᤋᤣ᤹ᤔᤠ ᤀᤠᤛᤢᤰᤋᤢᤶᤗᤥ॥ 4ᤜᤧᤰᤁᤣᤗ᤹ᤖᤡᤰᤁᤣ ᤘᤠᤗᤠᤎᤠᤴ ᤕᤶᤒᤠ ᤆᤥᤰ. ᤜᤧᤰᤁᤩᤠᤱ ᤕᤶᤒᤠ ᤛᤢᤖᤡᤳᤋᤡᤸᤗᤧ ᤔᤢ᤺ᤳᤋᤢ ᤋᤣ᤹ᤖᤢᤛᤠᤱ ᤘᤠᤍᤥ ᤆᤠ᤺ᤰᤐᤠᤸᤗᤧ ᤏᤠ ᤁᤳᤏᤠ ᤁᤧᤜᤡᤒᤠ ᤆᤢᤰᤛᤠ ᤛᤠᤔᤠ᤺ᤸᤗᤧ ᤘᤠᤗᤠᤎᤠᤴ ᤀᤠᤳᤋᤠᤴᤛᤠᤱ ᤋᤣ᤹ᤔᤠ ᤛᤢᤰᤋᤢ᤹ᤖᤥ॥ 5ᤜᤧᤰᤁᤣᤗ᤹ᤖᤡᤰᤁᤣ ᤗᤧᤛᤥ᤺ᤵᤐᤧᤴᤏᤠᤱ ᤏᤠᤛᤡᤱᤃᤧᤴ ᤌᤰᤁᤥ ᤆᤢ᤺ᤰᤛᤠᤱ ᤁᤴ ᤕᤶᤒᤕᤶᤒᤠ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤠᤱᤍᤡᤱ ᤗ᤹ᤖᤥ॥
ᤆᤢᤰᤛᤠ ᤔᤡᤛᤣ᤺ᤰᤁᤡᤸᤗᤧ ᤕᤶᤒᤠ ᤋᤠᤶᤓᤢᤱᤅᤡᤴ ᤂᤠᤵᤐᤢᤌᤩ᤺ᤱ ᤆᤥ᤺ᤰᤔᤠ ᤛᤢᤰᤋᤢ᤹ᤖᤥ ᤗ᤹ᤖᤡᤰ ᤀᤡ᤺ᤳᤋᤧᤶᤔᤧ᤹ᤀᤥ᥄ 6ᤜᤧᤰᤁᤣᤗ᤹ᤖᤡᤰᤁᤣ ᤗᤧᤛᤥ᤺ᤵᤐᤠᤱᤃ ᤔᤡ ᤜᤧᤰᤋᤱᤒᤠᤖᤥ॥ ᤁᤱᤃ ᤏᤠᤛᤡᤱᤃᤧᤴ ᤌᤰᤁᤥ ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ᤖᤧ ᤁᤢᤒᤢᤱᤗᤥ॥ ᤂᤧᤴ ᤗᤧᤛᤥ᤺ᤵᤐᤠᤸᤗᤧ ᤔᤏᤠ᤺ᤸᤗᤧ ᤁᤠᤰ ᤏᤠᤛᤡᤱᤃᤧᤴ ᤁᤢᤎᤰᤁᤡᤴ ᤆᤡ᤺ᤴᤍᤢ᤹ᤀᤠᤱ ᤁᤢᤜᤡᤱᤔᤴᤏᤡᤴ ᤁᤧᤖᤧᤰ ᤔᤡᤎᤡᤰᤂᤢ᤹ᤖᤥ॥ ᤂᤧᤴ ᤔᤡᤱᤃ ᤂᤧᤔᤠᤕᤱᤛᤱᤗᤠᤶᤔᤣ ᤗ᤺ᤴᤗᤥ॥
7ᤁᤠᤰ ᤐᤖᤡᤰᤐᤠ ᤌᤰᤛᤠᤐᤢᤛᤠ. ᤁᤧᤀᤢ᤺ᤱᤛᤡᤱᤒᤠ ᤁᤧᤛ᤺ᤴᤇᤡᤱᤒᤠ ᤏᤢ ᤘᤠᤜᤱᤅᤥᤒᤠ ᤌᤰᤛᤠᤜᤠ᤹ ᤂᤢᤶᤔᤠ ᤛᤢᤰᤔᤧᤍᤧᤳᤗᤥ. ᤜᤧᤰᤁᤩᤠᤱ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤂᤧᤱᤜᤠ᤹ ᤔᤧᤄᤢᤶᤛᤢᤛᤡ᤹ᤖᤥ. 8ᤁᤖ ᤗᤧᤛᤥ᤺ᤵᤐᤠᤱᤃ ᤀᤠᤳᤋᤡᤴ ᤔᤏᤠ᤺ᤸᤗᤧᤀᤠᤱ ᤂᤢᤶᤔᤠ ᤔᤧᤛᤢᤰᤋᤢᤴᤗᤥ॥ ᤁᤱᤃ ᤕᤢᤰᤁᤥ ᤁᤵᤔᤠ ᤛᤢᤰᤔᤧᤴᤍᤧᤵᤔᤏᤠ ᤋᤠᤵᤑᤧ᤺ᤶᤒᤠ ᤆᤥᤰ. ᤜᤧᤰᤁᤩᤠᤱ ᤔᤧᤴᤇᤠᤶ ᤕᤠᤵᤔᤡ ᤁᤧᤛᤧᤵᤐᤠ ᤏᤡᤱᤅᤡᤸᤗᤧ ᤁᤢᤎᤡᤶᤒᤠ ᤆᤥᤰᤗᤥ॥
9ᤒᤠ ᤁᤴ ᤗᤧᤛᤥ᤺ᤵᤐᤠᤸᤗᤧᤀᤣ ᤀᤠᤏᤡ᤹ ᤍᤠᤱᤒᤠ ᤏᤢ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤀᤠᤓᤥᤛᤢᤶ. ᤜᤧᤰᤁᤩᤠᤱ ᤒᤠ ᤁᤴᤗᤠᤶᤒᤠᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤠᤅᤣ ᤁᤢᤒᤡ ᤁᤢᤀᤡᤳᤇᤠᤵᤐᤥ ᤆᤥᤃᤢᤛᤡᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤛᤠᤰᤔᤢᤖᤠ ᤀᤠᤔᤧᤳᤋᤢᤶᤛᤡᤶᤗᤥ॥ 10ᤜᤧᤰᤁᤣᤗ᤹ᤖᤡᤰ ᤗᤳᤇᤠ ᤔᤢᤖᤠᤀᤥᤗᤠᤶ ᤔᤢ᤹ᤀᤡᤛᤠᤶ ᤏᤢ ᤛᤠᤰᤔᤢᤖᤠᤴ ᤗ᤺ᤴᤗᤥ॥ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤰᤂᤣ ᤐᤥᤱᤔᤠᤃ ᤔᤧᤏᤢ᤹ᤏᤧᤴᤗᤥ॥ 11ᤗᤳᤌᤡᤰ ᤘᤠᤒᤢᤴᤏᤥᤗᤠᤶ ᤁᤢᤈᤠ ᤁᤧᤏᤢ᤹ᤒᤠ ᤏᤢ ᤁᤧᤗᤠ᤺ᤰᤐᤠ ᤆᤫᤠ᤺ᤳᤋᤡᤴ ᤐᤢᤴᤒᤡ᥅ 12ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤐ᤺ᤳᤇᤣ᤹ᤀᤡᤸᤗᤧ ᤁᤢᤒᤢᤱᤔᤥ ᤈᤤᤋᤢᤏᤧᤸᤗᤧ ᤁᤢᤛᤣ᤹ ᤌᤥ᤺ᤰᤐᤡ. ᤀᤡᤃᤪ ᤆᤧᤸᤗᤧᤰᤛᤣ᤹ᤀᤡᤸᤗᤧ ᤁᤢᤒᤢᤱᤔᤥ ᤐ᤺ᤳᤇᤣ᤹ᤀᤡᤴ ᤌᤥ᤺ᤰᤐᤡ᥅ ᤔᤧᤎᤥ᤺ᤰᤏᤧᤴᤗᤥ᥄ ᤜᤧᤰᤁᤩᤠᤱ ᤁᤧᤗᤠ᤺ᤰᤐᤠ ᤘᤠᤒᤢᤴᤏᤥᤗᤠᤶ ᤁᤢᤈᤠ ᤁᤧᤏᤢ᤹ᤒᤠ ᤆᤫᤠ᤺ᤳᤋᤡᤴ ᤔᤧᤒᤢᤴᤏᤧᤴᤗᤥ॥
ᤛᤧᤰᤂᤠᤒᤠ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤀᤡᤴ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤋᤠ᤺
13ᤂᤡᤏᤡ᤹ ᤗᤢᤶᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤛᤡᤰᤁᤢᤶᤛᤠᤒᤠ ᤏᤢ ᤀᤡ᤺ᤳᤇᤡᤱᤛᤠᤶᤛᤠᤒᤠᤸᤗᤧ ᤏᤢᤒᤠ ᤁᤢᤜᤡᤱᤔᤴᤏᤥᤗᤠᤶ ᤜᤧᤰᤁᤩᤠᤱ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤗᤠᤶ ᤁᤧᤍᤠᤒᤠ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶᤔᤥ ᤆᤥᤃᤢᤒᤠ ᤕᤠ᤺ᤶᤒᤰᤁᤥᤗᤠᤶ ᤀᤥᤛᤣ᤺ᤴᤎᤠᤰᤛᤡᤱᤗᤖᤥ॥ 14ᤁᤖ ᤂᤡᤏᤡ᤹ ᤋᤡᤱᤍᤡᤱᤃᤧᤴ ᤏᤠᤜᤧᤶᤔᤠ ᤏᤢ ᤀᤠᤒᤠᤅᤣᤖᤰ ᤏᤢ᤹ᤔᤠ ᤋᤠᤔᤠ ᤏᤡᤱᤘᤠ᤹ ᤁᤧᤃᤳᤋᤢᤶᤏᤧ ᤑᤠ᤹ᤃᤪ ᤂᤡᤏᤡ᤹ ᤛᤧᤰᤂᤠᤀᤣ ᤁᤧᤈᤥᤃᤢᤶᤒᤠ ᤗᤠᤕᤥᤴ ᤀᤠᤱᤍᤡᤱ ᤁᤧᤗ᤹ᤖᤡᤖ ᤜᤧᤰᤁᤩᤠᤱ ᤀᤡᤱᤗᤧᤰ ᤁᤧᤒᤠᤖᤡᤖ ᤔᤧᤔᤠ᤹ᤖᤧᤶᤔᤡᤴᤏᤧ᤹ᤀᤥ॥ 15ᤀᤰᤋᤱᤒᤠ “ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤀᤡᤱᤃ” ᤌᤠ᤺ᤱ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤔᤣ᤺ᤴ. ᤁᤖ ᤀᤡᤰᤛᤠᤒᤠ ᤏᤢ ᤕᤠᤶᤏᤡᤱᤘᤠ᤹ᤒᤠ ᤆᤥᤰ. ᤜᤧᤰᤁᤩᤠᤱ ᤂᤧᤱᤃ ᤔᤠᤑᤧᤴᤛᤠᤶᤗᤠᤶ ᤋᤠ᤺ᤖᤥ॥ 16ᤌᤣᤀᤠᤱᤓᤧᤸᤗᤧ ᤀᤠᤳᤋᤥ ᤏᤠᤜᤧᤶᤔᤠ ᤏᤢ ᤀᤠᤒᤠᤅᤣᤖᤰ ᤏᤢ᤹ᤔᤠ ᤋᤠᤔᤠ ᤏᤡᤱᤘᤠ᤹ ᤁᤧᤃᤵᤐᤠ ᤔᤏᤠ ᤔᤧᤘᤠ᤹. ᤂᤧᤵᤔᤥ ᤕᤧᤔᤧᤴᤍᤱ ᤐᤠᤴ ᤏᤢ ᤁᤠᤰ ᤐᤖᤡᤰᤗᤧᤴ ᤑᤧᤴᤐᤠᤴ ᤐᤥᤱᤗᤥ॥
17ᤁᤖ ᤌᤠ᤺ᤱ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤢ᤺ᤒᤠ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤀᤡᤴ ᤁᤠᤰᤏᤢ᤺ᤸᤗᤧ ᤋᤃᤡᤃ ᤛᤣᤛᤣᤒᤠ ᤆᤥᤰ. ᤜᤧᤰᤁᤩᤠᤱ ᤛᤏᤠᤖᤢᤱᤒᤠ. ᤗᤢᤶᤗᤢᤶᤒᤠ. ᤘᤣ᤹ᤜᤠ᤹ᤏᤢ ᤁᤧᤍᤱᤒᤠ. ᤗᤢᤱᤍᤢᤰ ᤁᤢᤎᤡᤶ. ᤏᤢᤒᤠ ᤕᤠ᤺ᤶᤒᤰᤜᤠ᤹ᤖᤧ ᤁᤢᤎᤡᤶ. ᤔᤏᤠ ᤔᤧᤴᤇᤧᤶᤔᤏᤠᤒᤠ ᤏᤢ ᤏᤛᤠ᤺ᤴᤛᤠᤒᤠ ᤆᤥᤰᤗᤥ॥ 18ᤛᤏᤠᤖᤢᤱ ᤁᤧᤍᤠ᤺ᤵᤐᤠᤜᤠ᤹ᤖᤧ ᤕᤠ᤹ᤖᤡ᤺ᤶᤒᤠᤴ ᤋᤣ᤺ᤶᤏᤠᤒᤠ ᤁᤢᤀᤡᤛᤡᤰ ᤛᤏᤠᤖᤢᤱᤅᤡᤴ ᤔᤧᤍᤣᤛᤢ᤹. ᤜᤧᤰᤁᤩᤠᤱ ᤕᤖᤡᤰ ᤁᤢᤈᤠ ᤔᤧᤛᤢᤵᤛᤢᤒᤠ ᤁᤢᤀᤡᤛᤡᤰ ᤂᤧᤱᤜᤠ᤹ᤖᤧ ᤕᤖᤡᤰ ᤛᤠᤶᤕᤥᤒᤠ ᤔᤏᤠᤜᤠ᤹ ᤔᤧᤛᤢᤵᤛᤢᤛᤡ᤹ᤖᤥ॥
Currently Selected:
ᤕᤠᤁᤢᤒ 3: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.