ᤕᤠᤁᤢᤒ 2
2
ᤔᤏᤠᤜᤠ᤹ ᤀᤣ᤺ᤰᤐᤀᤣ᤺ᤰ ᤆᤥ᤺ᤰᤔᤠᤛᤡ ᤔᤣ᤺ᤴ
1ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤔᤡᤔᤡᤍᤡᤱᤃᤧᤴ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤧᤴ ᤏᤛᤠᤴ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ᤖᤧᤃ ᤘᤣ᤹ ᤔᤏᤠᤜᤠ᤹ ᤛᤧᤶᤔᤠᤛᤡ ᤔᤧᤏᤢ᤹ᤏᤧᤴᤗᤥ॥ 2ᤀᤠᤸᤗ ᤂᤡᤏᤡ᤹ ᤛᤣᤛᤣ ᤆᤢᤶᤗᤢᤱᤅᤥ ᤔᤏᤠᤎᤡᤰ ᤛᤠᤶᤔᤩᤠᤱ ᤛᤫᤠ᤺ᤃᤧᤵᤐᤡᤴ ᤏᤢ ᤏᤢᤒᤠ ᤆᤠᤱ ᤆᤠᤰᤂᤢᤀᤠᤱ ᤋᤠ᤹᤺. ᤜᤧᤰᤁᤩᤠᤱ ᤜᤠᤒᤠ ᤂᤧᤴ ᤕᤧᤶᤔᤥᤀᤣ ᤕᤠᤱᤃᤧᤛᤠ᤹ᤒᤠ ᤆᤡᤖᤡᤱᤗᤡᤱᤒᤠ ᤆᤠᤱ ᤁᤧᤈᤠᤱᤒᤠ ᤔᤏᤠᤎᤡᤰᤁᤠᤱ ᤋᤠᤏᤧ ᤑᤠ᤹ᤃᤪ. 3ᤂᤧᤴ ᤏᤢᤒᤠ ᤆᤠᤱ ᤁᤧᤈᤠᤱᤒᤠ ᤔᤏᤠᤴ ᤔᤡᤱᤛᤥ ᤀᤡᤱᤎᤠᤱ ᤁᤧᤒᤡᤖᤢᤶᤗ “ᤁᤵᤔᤥ ᤏᤢᤒᤠ ᤋᤧᤴᤏᤥ ᤕᤢᤅᤧ᤹ᤀᤥ” ᤁᤧᤔᤧᤳᤋᤢᤶ. ᤁᤖ ᤂᤧᤴ ᤕᤠᤱᤃᤧᤛᤠ᤹ᤒᤠᤴ “ᤂᤧᤏᤧ᤹ ᤂᤧᤳᤏᤠ ᤕᤧᤒᤧ᤹” ᤀᤡᤃᤪ “ᤁᤵᤔᤥ ᤂᤠᤶᤔᤥ ᤕᤢᤅᤧ᤹” ᤁᤧᤔᤧᤳᤋᤢᤶᤏᤧ ᤑᤠ᤹ᤃᤪ. 4ᤂᤡᤏᤡ᤹ᤃ ᤀᤠᤒᤠᤅᤣ ᤗᤢᤶᤔᤥ ᤔᤏᤠ ᤁᤧᤛᤧᤶᤒᤠ ᤏᤢ ᤑᤧᤴ ᤏᤡᤱᤘᤠ᤹ᤗᤠᤶ ᤂᤠᤛᤧᤴᤗᤥ᤺ᤶᤒᤠ ᤁᤧᤶᤒᤥ᤺ᤰᤂᤡᤴᤒᤡ᥅
5ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤧᤵᤛᤧᤶᤔᤧ᤹ᤀᤥ᥄ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤕᤠᤱᤃᤧᤛᤠ᤹ᤒᤠᤜᤠ᤹ ᤏᤛᤠ᤺ᤴᤏᤥ ᤕᤠᤱᤛᤠᤁᤢᤴᤎᤣᤛᤠᤒᤠ ᤆᤥ᤺ᤰᤛᤧ ᤏᤢ ᤁᤢᤜᤠᤱᤈᤢᤶ ᤗᤰ ᤂᤥᤛᤧ ᤛᤣᤃᤢᤛᤡᤀᤠᤱ ᤘᤠ᤹॥ ᤂᤧᤴ ᤜᤠᤱᤈᤢᤶᤔᤡᤱᤃ ᤂᤢᤏᤧ᤹ ᤁᤠᤰ ᤔᤡ᤺ᤶᤈᤡ ᤁᤧᤔᤧᤵᤐᤠᤜᤠ᤹ ᤐᤡᤔᤠᤛᤡ ᤔᤠᤱᤜᤧᤰ ᤆᤥᤃᤢᤀᤠᤱ ᤘᤠ᤹ᤖᤥ॥ 6ᤁᤖ ᤂᤡᤏᤡ᤹ᤃ ᤕᤠᤱᤃᤧᤛᤠ᤹ᤒᤠᤜᤠ᤹ᤖᤧ ᤂᤢᤏᤡ᤹ ᤏᤠᤃᤧᤎᤠᤛᤢᤶ ᤁᤧᤒᤡᤖᤢᤶᤛᤡᤶᤔᤠᤱ ᤁᤧᤘᤕᤡ᤹ᤖᤥ॥ ᤂᤡᤏᤡ᤹ ᤏᤡᤱᤄᤢᤶ ᤁᤧᤔᤧᤵᤐᤠᤀᤠᤱ ᤂᤠᤛᤧᤴᤜᤡᤶᤔᤥ ᤁᤧᤀᤢ᤺ᤱᤒᤠ ᤁᤧᤍᤣ᤹ᤒᤠᤜᤠ᤹ ᤂᤧᤴ ᤕᤠᤱᤛᤠᤁᤢᤴᤎᤣᤛᤠᤒᤠᤜᤠ᤹ᤀᤣ ᤔᤧ᤺ᤴᤇᤡᤒᤡ᥅ 7ᤂᤡᤏᤡ᤹ ᤏᤛᤠᤴ ᤁᤧᤈᤥᤃᤢᤶᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤏᤢᤒᤠ ᤁᤢᤔᤡᤱᤅᤡᤴ ᤆᤠ᤺ᤳᤌᤡ ᤁᤧᤍᤣᤒᤠᤜᤠ᤹ ᤂᤧᤱᤜᤠ᤹ᤀᤣ ᤔᤧ᤺ᤴᤇᤡᤒᤡ᥅
8ᤛᤧᤰᤂᤠᤀᤣ ᤛᤠᤶᤕᤥᤛᤠᤵᤗᤠᤀᤥᤒᤠ ᤛᤢᤜᤠᤱᤃᤧᤴ ᤌᤡᤶ “ᤂᤡᤏᤡ᤹ ᤐᤠᤱᤓᤣ᤹ᤛᤠᤒᤠᤜᤠ᤹ ᤀᤠᤒᤠᤅᤣ ᤁᤢᤀᤡᤛᤡ᤺ᤰᤁᤣ ᤗᤢᤱᤔᤠ᤹ ᤋᤢᤰᤋᤧᤶᤛᤡᤶᤔᤧ᤹ᤀᤥ” ᤁᤧᤗ᤹ᤒᤠ ᤐᤠ᤺ᤴᤏᤧᤴ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤏᤧ ᤑᤠ᤹ᤃᤪ ᤂᤡᤏᤡ᤹ ᤏᤢᤒᤠᤀᤣ ᤁᤧᤈᤥᤃᤢᤶᤗᤥ॥ 9ᤁᤖ ᤂᤡᤏᤡ᤹ ᤔᤏᤠᤜᤠ᤹ ᤁᤧᤛᤧᤴᤍᤢᤶᤛᤡᤶᤏᤧ ᤑᤠ᤹ᤃᤪ ᤗᤠᤕᤥ ᤁᤧᤈᤥᤃᤢᤶᤔᤠᤱ ᤛᤠᤶᤕᤥᤌᤡᤶᤔᤡᤸᤗᤧ ᤁᤢᤓᤠᤱ ᤁᤧᤓᤣ᤺ᤶᤒᤠ ᤑᤠ᤹ᤀᤠᤱ ᤀᤠᤵᤋᤡᤰ ᤁᤧᤃᤢ᤺ᤳᤋᤡ᤹ᤖᤥ॥
10ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤸᤗᤧ ᤁᤧᤖᤧᤰ ᤛᤠᤶᤕᤥᤌᤡᤶᤔᤡᤴ ᤀᤡ᤺ᤳᤋᤢ ᤏᤠ᤺ᤳᤋᤢ᤹ ᤁᤖ ᤗᤳᤌᤡᤰ ᤐᤠ᤺ᤴᤏᤡᤴ ᤑᤣ᤺ᤴᤍᤢᤏᤧ ᤑᤠ᤹ᤃᤪ. ᤂᤧᤸᤗᤧ ᤁᤧᤖᤧᤰ ᤛᤠᤶᤕᤥᤌᤡᤶᤔᤡᤴ ᤑᤣ᤺ᤴᤍᤢᤒᤠ ᤁᤢᤀᤡᤛᤡᤰ ᤐᤥᤱᤗᤥ॥ 11ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ “ᤆᤠᤖᤠᤶᤔᤠ ᤕᤠ᤺ᤶᤒᤰ ᤔᤧᤈᤥᤃᤧᤴᤏᤧ᤹ᤀᤥ” ᤗ᤹ᤖᤡᤰ ᤐᤠ᤺ᤳᤋᤢ. ᤜᤧᤰᤁᤩᤠᤱ ᤂᤢᤏᤧ᤹ᤀᤣ “ᤔᤏᤠ ᤔᤧᤛᤧᤖᤧᤴᤏᤧ᤹” ᤗ᤹ᤖᤡᤰᤁᤠᤱ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤆᤠᤖᤠᤶᤔᤠ ᤕᤠ᤺ᤶᤒᤰ ᤁᤧᤴᤈᤥᤃᤢᤴᤇᤠᤱ ᤔᤏᤠ ᤁᤧᤛᤧᤳᤏᤧ ᤑᤠ᤹ᤃᤪ. ᤂᤧᤏᤧ᤹ ᤛᤠᤶᤕᤥᤌᤡᤶ ᤁᤧᤓᤣ᤺ᤶᤒᤠ ᤁᤧᤒᤥᤱᤗᤥ॥
12ᤜᤧᤰᤁᤣ᤺ᤸᤗᤧ ᤔᤧᤴᤇᤠᤶ ᤕᤠᤵᤔᤡᤴ ᤆᤥ᤺ᤰᤕᤢᤶᤓᤥ ᤁᤧᤒᤡᤒᤠ ᤛᤠᤶᤕᤥᤌᤡᤶᤗᤠᤶ ᤂᤠᤛᤧᤴ ᤂᤥᤔᤠ ᤁᤧᤒᤥᤱᤒᤠ ᤔᤏᤠᤴ ᤁᤢᤀᤡᤛᤡᤰ ᤐᤠᤖᤧᤶᤔᤧ᤹ ᤆᤥᤃᤧᤶᤔᤧ᤹ᤀᤥ. 13ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤴ ᤔᤏᤠ᤺ᤸᤗᤧ ᤗᤢᤱᤔᤠ᤹ ᤔᤧᤴᤍᤢᤰᤛᤡᤱᤅᤣ ᤘᤣ᤹ᤜᤠ᤹ ᤂᤠᤛᤧᤴ ᤗᤥ᤺ᤴᤍᤢᤛᤡ᤹. ᤂᤧᤸᤗᤧᤴᤏᤠᤱ ᤁᤢᤄᤠᤛᤧᤴᤏᤡᤴ ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤐᤥᤱᤗᤥ॥ ᤘᤣ᤹ᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤐᤠᤸᤗᤧ ᤏᤡᤱᤘᤠ᤹ᤑᤢ ᤂᤠᤛᤧᤴᤏᤡᤴ ᤔᤧᤃᤡᤖᤢᤴᤗᤥ᥄
ᤕᤠ᤺ᤶᤒᤰ ᤔᤣ᤺ᤴᤏᤣᤒᤠ ᤏᤛᤠ᤺ᤴᤏᤡᤴ ᤁᤢᤗᤡᤱᤍᤥ ᤔᤧᤃᤧᤳᤏᤧᤴ
14ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤠᤳᤋᤡᤴ ᤔᤏᤠ᤺ᤸᤗᤧ ᤏᤛᤠᤴ ᤁᤳᤋᤢᤱ ᤗ᤹ᤖᤡᤰ ᤐᤠ᤺ᤳᤋᤢ᤹ ᤁᤖ ᤕᤠ᤺ᤶᤒᤰ ᤔᤧᤈᤥᤃᤢᤴᤏᤧ ᤑᤠ᤹ᤃᤪ ᤌᤣ ᤐᤥ᤺ᤰᤂᤧᤀᤠᤱᤒᤣ᥅ ᤜᤧᤰᤋᤱᤒᤠ ᤏᤛᤠ᤺ᤴᤏᤡᤸᤗᤧ ᤂᤧᤴ ᤋᤠᤱᤛᤧ᤺ᤵᤔᤠ ᤛᤢᤰᤋᤢ᤹ᤒᤡ᥅ 15ᤀᤠᤸᤗ ᤑᤢ᤹ᤏᤢᤛᤠ᤹ ᤀᤡᤃᤪ ᤏᤧ᤹ᤏᤢᤛᤠ᤹ ᤌᤡᤰᤗᤧ ᤆᤠᤱ ᤋᤣᤳ ᤔᤧᤃᤳᤋᤢᤴ ᤜᤧᤰᤁᤩᤠᤱ ᤌᤡᤰᤕᤠ᤺ᤴᤎᤰᤐᤠ ᤆᤠᤔᤠ ᤌᤢᤱᤔᤠ ᤌᤣᤀᤠᤱ ᤔᤧᤃᤳᤋᤢᤴ. 16ᤜᤧᤰᤁᤣ᤺ᤸᤗᤧ ᤂᤡᤏᤡ᤹ᤀᤥ ᤌᤡᤰᤁᤡᤸᤗᤧ “ᤏᤢᤖᤡᤰᤁᤠᤱ ᤐᤣᤃᤧ᤹ᤀᤥ. ᤏᤢᤖᤡᤰ ᤆᤧ᤹ ᤌᤢᤅᤧ᤹ᤀᤠᤱ ᤐᤃᤥᤃᤥᤖ ᤘᤕᤧ᤹ᤀᤥ” ᤔᤧᤳᤋᤢ᤹. ᤁᤖ ᤂᤧᤴ ᤏᤠᤛᤡᤱᤃᤧᤴ ᤁᤢᤎᤰᤁᤥ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤌᤣᤀᤠᤱ ᤁᤢᤓᤠ᤹ ᤔᤧᤒᤡᤖᤢᤴᤏᤧ ᤑᤠ᤹ᤃᤪ ᤌᤣ ᤏᤢᤒᤠ ᤐᤥ᤺ᤰᤂᤧᤀᤠᤱᤒᤣ᥅ 17ᤜᤧᤰᤁᤣᤗ᤹ᤖᤡᤰᤁᤣ ᤏᤛᤠ᤺ᤴᤏᤡᤴ ᤁᤧᤃᤳᤋᤢᤶᤛᤠᤱ ᤂᤧᤴ ᤁᤢᤀᤡᤛᤡᤰ ᤕᤠ᤺ᤶᤒᤰ ᤁᤧᤴᤈᤥᤃᤢᤶᤔᤡᤴᤏᤧ ᤑᤠ᤹ᤃᤪ. ᤂᤧᤴ ᤏᤛᤠ᤺ᤴᤏᤡᤱᤃ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤐᤥᤱᤗᤥ॥
18ᤀᤠᤸᤗ ᤁᤢᤓᤠᤖᤧ ᤔᤧᤒᤠ᤺ᤳᤋᤢᤒᤡᤗᤠ. “ᤂᤧᤏᤧ᤹ ᤏᤛᤠᤴ ᤁᤧᤃᤳᤋᤢ᤹. ᤁᤖ ᤀᤡᤱᤃᤠ᤹ ᤕᤠ᤺ᤶᤒᤰ ᤁᤳᤋᤢᤱ॥” ᤁᤖ ᤀᤡᤱᤃᤠ᤹ ᤔᤧᤳᤏᤡᤱ. “ᤂᤧᤏᤧ᤹ ᤕᤠ᤺ᤶᤒᤰᤁᤡᤸᤗᤧ ᤔᤧᤃᤠᤵᤋᤢᤶᤒᤠ ᤁᤧᤏᤛᤠ᤺ᤴᤏᤡᤴ ᤀᤥᤛᤣ᤺ᤴᤎᤠᤰᤋᤠᤱᤅᤧ᤹. ᤜᤧᤰᤁᤩᤠᤱ ᤀᤡᤱᤃᤠ᤹ᤀᤠᤱ ᤀᤠᤕᤠ᤺ᤶᤒᤰᤗᤠᤶ ᤀᤠᤏᤛᤠ᤺ᤴᤏᤡᤴ ᤀᤥᤛᤣ᤺ᤴᤎᤠᤰᤏᤧ᤹ᤖᤥ॥” 19ᤁᤢᤳᤆᤠ᤹ᤀᤣ ᤌᤡᤰᤗᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤘᤠ᤹ ᤗ᤹ᤖᤡᤰ ᤏᤛᤠᤴ ᤁᤧᤈᤥᤃᤢ᤹॥ ᤂᤧᤱᤃ ᤏᤢᤒᤠᤖᤥ᥄ ᤑᤧᤴᤛᤠᤶᤜᤠ᤹ᤖᤧᤀᤠᤱ ᤂᤧᤴ ᤐᤠ᤺ᤴᤏᤡᤴ ᤏᤛᤠᤴ ᤔᤧᤈᤥᤃᤢᤀᤠᤱ ᤔᤧᤃᤡᤖ ᤌᤧᤃᤰᤁᤰᤏᤠ ᤔᤧᤕᤱᤗᤥ॥ 20ᤀᤍᤱᤛᤣ. ᤕᤠ᤺ᤶᤒᤰᤁᤡᤸᤗᤧ ᤔᤧᤃᤠᤵᤋᤢᤶᤒᤠ ᤏᤛᤠ᤺ᤴᤏᤡᤴ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤐᤥᤱ ᤁᤧᤗ᤹ᤒᤠ ᤐᤷᤔᤠᤱᤃᤡᤴ ᤁᤧᤃᤥ᤺ᤳᤋᤢᤶᤒᤡ᥅
21ᤀᤠᤏᤡ᤹ ᤋᤠᤰᤌᤧᤒᤠ ᤀᤒᤪᤠᤜᤠᤔᤖᤧ ᤁᤢᤛ᤻ᤛᤠ ᤀᤡᤛᤜᤠᤰᤁᤡᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤛᤡᤍᤢᤱᤈᤓᤠ ᤆᤥ᤺ᤰᤛᤧ ᤋᤥ᤺ᤴᤍᤢᤒᤠ ᤕᤠ᤺ᤶᤒᤰᤁᤡᤸᤗᤧᤀᤣ ᤂᤢᤏᤧ᤹ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤆᤥᤃᤢᤒᤠ ᤔᤣ᤺ᤶᤒᤡ᥅ 22ᤂᤢᤏᤧ᤹ ᤁᤢᤏᤛᤠ᤺ᤴᤏᤡᤴ ᤁᤢᤕᤠ᤺ᤶᤒᤰᤁᤡᤸᤗᤧ ᤁᤠᤵᤋᤢᤒᤠᤴ ᤏᤢ ᤒᤠ ᤂᤧᤴ ᤕᤠ᤺ᤶᤒᤰᤁᤡᤸᤗᤧᤀᤣ ᤁᤢᤏᤛᤠ᤺ᤴᤏᤡᤴ ᤁᤢᤗᤡᤱᤍᤥ ᤁᤧᤳᤋᤢᤒᤠᤴ ᤁᤧᤏᤡᤛᤢᤶᤗᤥ॥ 23ᤁᤴ ᤐᤠ᤺ᤴᤏᤡᤱᤃ ᤛᤠᤶᤕᤥᤛᤠᤵᤗᤠ᤺ᤸᤗᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤒᤠᤴ ᤁᤧᤖᤧᤒᤠᤖᤥ. “ᤀᤒᤪᤠᤜᤠᤔᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠᤴ ᤆᤥᤃᤢ. ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤛᤠᤶᤕᤥᤒᤠ ᤗᤣ᤺ᤳᤋᤢᤖᤥ॥”#ᤋᤥᤗᤡᤱ ᥇᥋:᥌ ᤜᤧᤰᤁᤩᤠᤱ ᤂᤢᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤴᤈᤢᤶ ᤑᤠ᤹ᤀᤠᤱ ᤔᤧᤳᤋᤢᤖᤥ॥ 24ᤏᤛᤠ᤺ᤴᤗᤠᤶᤖᤰ ᤔᤣ᤺ᤴ. ᤁᤖ ᤀᤠᤏᤡ᤹ ᤀᤠᤈᤥᤃᤢᤶᤒᤠ ᤕᤠ᤺ᤶᤒᤰᤗᤠᤶᤔᤠᤱ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤀᤠᤒᤥᤱ ᤑᤠ᤹ᤀᤠᤱ ᤁᤧᤏᤡᤛᤢᤶᤗᤥ॥
25ᤜᤧᤰᤁᤣᤗ᤹ᤖᤡᤰᤁᤣ ᤁᤧᤳᤏᤡᤔᤠ ᤖᤠᤜᤠᤒᤖᤧ ᤌᤥ᤺ᤶᤈᤡᤒᤠᤜᤠ᤹ ᤋᤖᤣ ᤋᤥᤛᤢᤛᤡᤀᤠᤱ ᤂᤧᤱᤜᤠ᤹ ᤋᤠᤱᤛᤧ᤺ᤵᤛᤧ ᤘᤣ᤹ ᤗᤠᤶ ᤐᤠᤱᤄᤢᤛᤡᤒᤠ ᤁᤢᤕᤠ᤺ᤶᤒᤰᤁᤡᤸᤗᤧᤀᤣ ᤂᤧᤴ ᤀᤠᤵᤋᤡᤰ ᤔᤧ᤺ᤴᤏᤣᤔᤠ ᤐᤥ᤺ᤰᤂᤧᤖᤥ॥ 26ᤕᤠᤶᤛᤠᤶ ᤔᤣ᤺ᤴᤏᤣᤒᤠ ᤏᤠᤛᤡᤱᤃᤧᤴ ᤌᤰᤁᤡᤴ ᤁᤢᤛᤡᤘᤧᤳ ᤐᤥᤱᤒᤠ ᤁᤢᤀᤡᤛᤡ᤺ᤰᤁᤣ ᤕᤠ᤺ᤶᤒᤰ ᤔᤣ᤺ᤴᤏᤣᤒᤠ ᤏᤛᤠ᤺ᤴᤏᤡᤴᤏᤠᤱ ᤁᤢᤛᤡᤘᤧᤳ ᤐᤥᤱᤗᤥ॥
Currently Selected:
ᤕᤠᤁᤢᤒ 2: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.