ᤛᤣ᤺ᤰᤕᤢᤰᤔᤡᤒᤠᤜᤠ᤹ 3
3
ᤐᤋᤪᤢᤛᤖᤧ ᤗᤠᤱᤛᤰᤁᤠᤴ ᤏᤢᤛᤢ᤹
1ᤌᤡᤰᤕᤧᤴ ᤗᤧᤴᤍᤡᤰ ᤁᤢᤔᤢᤰ ᤛᤢᤶᤛᤡᤒᤠ ᤋᤢᤘᤠ ᤆᤥ᤺ᤰᤔᤠ ᤕᤧᤶᤔᤥ ᤐᤋᤪᤢᤛ ᤏᤢ ᤕᤢᤜᤢᤴᤏᤠᤴ ᤔᤠᤱᤜᤡᤶᤔᤥ ᤐᤣᤛᤡ॥ 2ᤂᤧᤵᤔᤥ. ᤁᤢᤄᤧᤶᤛᤡᤱ ᤏᤢᤒᤠ ᤔᤧᤵᤔᤏᤠᤒᤠ ᤗᤠᤶᤎᤣ᤺ᤵᤐᤥ. ᤔᤏᤠᤜᤠ᤹ᤖᤧ ᤛᤠᤘᤠ᤺ᤴᤇᤡᤱᤅᤠᤱᤎᤥᤀᤣ ᤁᤢᤗᤠᤱ ᤁᤧᤛᤰᤐᤠ ᤔᤏᤠᤴ ᤔᤠᤱᤜᤡᤶᤔᤥ ᤋᤢᤘᤠ ᤆᤥ᤺ᤰᤛᤧ ᤁᤧᤒᤣ᤺ᤰᤐᤠᤜᤠ᤹ ᤕᤠᤱ ᤏᤠ᤺ᤰᤋᤢᤛᤡᤖ ᤑᤠ᤹ᤀᤠᤱ ᤌᤡᤰᤕᤠ᤺ᤴᤎᤰ ᤔᤧᤒᤰᤂᤢ ᤔᤧᤍᤠᤖᤢᤀᤠᤱ ᤔᤧᤕᤢᤰᤂᤢᤖ ᤔᤧᤘᤕᤧᤖᤥ॥ 3ᤂᤧᤸᤗᤧ ᤐᤋᤪᤢᤛ ᤏᤢ ᤕᤢᤜᤢᤴᤏᤠᤴ ᤔᤠᤱᤜᤡᤶᤔᤥ ᤐᤣᤛᤡᤖ ᤐᤳᤇᤧᤳᤇᤡᤒᤠ ᤏᤡᤛᤢᤛᤡᤀᤠᤱ ᤕᤠᤱ ᤏᤠ᤺ᤰᤋᤢᤛᤡᤖᤥ॥ 4ᤜᤧᤰᤁᤣ᤺ᤸᤗᤧ ᤐᤋᤪᤢᤛ ᤏᤢ ᤕᤢᤜᤢᤴᤏᤠᤴ ᤂᤢᤏᤧ᤹ ᤗᤧᤵᤔᤠᤱ ᤏᤢᤖᤡᤰᤁᤠᤱ ᤀᤥᤔᤕᤧᤳᤇᤡ ᤜᤧᤰᤁᤩᤠᤱ ᤐᤋᤪᤢᤛᤖᤧ ᤔᤧᤳᤋᤢ “ᤀᤠᤴᤇᤡᤃᤣ ᤕᤠᤵᤔᤡ ᤀᤥᤀᤠᤔᤧᤳᤋᤧ᤹॥” 5ᤂᤧᤸᤗᤧᤀᤠᤱ ᤌᤣ᤺ᤴᤏᤡ ᤂᤥᤛᤢᤱᤅᤡᤕᤠ ᤑᤠ᤹ᤀᤠᤱ ᤀᤥᤔᤧᤳᤋᤢᤛᤡ॥
6ᤐᤋᤪᤢᤛᤖᤧ ᤔᤧᤳᤋᤢ. “ᤀᤡᤱᤃᤠ᤹ ᤌᤣᤀᤠᤱ ᤔᤧᤃᤳᤋᤠᤴᤗᤥ. ᤁᤖ ᤀᤡᤱᤃᤠ᤹ ᤌᤣ᤺ᤴ ᤁᤳᤋᤢᤱ ᤒᤠᤂᤧᤴᤏᤣ ᤐᤡᤏᤧ—ᤏᤠᤛᤖᤋᤛᤔᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤔᤡᤱᤅᤥ ᤂᤧᤏᤧ᤹ ᤐᤥᤃᤧ᤹ᤀᤠᤱ ᤗᤠᤱᤄᤣᤃᤧ᤹॥” 7ᤜᤧᤰᤁᤩᤠᤱ ᤐᤋᤪᤢᤛᤖᤧ ᤂᤧᤴ ᤗᤠᤱᤛᤰᤐᤧᤸᤗᤧ ᤁᤢᤈᤢᤵᤛᤠᤱ ᤜᤢᤰᤁᤡᤴ ᤋᤧᤶᤛᤢᤀᤠᤱ ᤑᤥ᤺ᤰᤂᤢ॥ ᤜᤧᤰᤁᤣ᤺ᤸᤗᤧ ᤂᤧᤴ ᤔᤏᤠ᤺ᤸᤗᤧ ᤁᤢᤗᤠᤱ ᤏᤢ ᤁᤢᤗᤠᤱᤔᤡᤰᤁᤥ ᤌᤢᤶ ᤗᤠᤛᤧᤀᤠᤱ 8ᤐᤡᤆ᤻ᤆᤠᤰ ᤐᤡᤴᤍᤧᤖ ᤋᤰᤐᤧᤳ ᤕᤧᤶᤛᤡᤱ ᤜᤧᤰᤁᤩᤠᤱ ᤗᤠᤱᤄᤣ᤺ᤰᤔᤠ ᤜᤣ᤺ᤰᤋᤧᤖᤥ॥ ᤜᤧᤰᤁᤩᤠᤱᤃ ᤂᤧᤱᤃ ᤗᤠᤱᤄᤣᤃᤧᤖ. ᤐᤡᤆ᤻ᤆᤠᤰ ᤐᤡᤴᤍᤧᤖ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥᤛᤢᤖ ᤐᤋᤪᤢᤛ ᤜᤧᤰᤁᤩᤠᤱ ᤕᤢᤜᤢᤴᤏᤠ᤺ᤴᤏᤢ ᤔᤠᤱᤜᤡᤶᤛᤡᤃᤠᤱ ᤐᤣᤖᤥ॥ 9ᤂᤧᤵᤔᤥᤒᤠ ᤁᤠᤰ ᤔᤏᤠᤜᤠ᤹ᤖᤧ ᤂᤧᤴ ᤗᤠᤱᤄᤣᤃᤧᤒᤠ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥᤛᤢᤒᤠ ᤔᤧᤏᤡᤛᤢᤸᤗᤧ 10ᤂᤧᤱᤃ ᤔᤠᤱᤜᤡᤶᤔᤡᤸᤗᤧ ᤁᤢᤄᤧᤶᤛᤡᤱ ᤏᤢᤒᤠ ᤔᤧᤵᤔᤏᤠᤒᤠ ᤗᤠᤶᤎᤣ᤺ᤵᤐᤥ ᤛᤍᤠᤍᤡᤱ ᤆᤠᤏᤠ᤺ᤰᤏᤢ ᤁᤧᤕᤢᤱᤒᤠ ᤏᤢ ᤗᤠᤱᤄᤣ᤺ᤰᤔᤠ ᤔᤧᤴᤇᤢᤰᤔᤏᤠᤒᤠ ᤔᤏᤠ᤺ᤴᤏᤣ ᤑᤠ᤹ᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤀᤠᤱ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥
ᤐᤋᤪᤢᤛᤖᤧ ᤔᤠᤱᤜᤡᤶᤔᤥ ᤛᤢᤏᤠᤀᤡᤱ ᤀᤡᤱᤓᤥᤛᤢ᤹
11ᤜᤧᤰᤁᤣ᤺ᤸᤗᤧ ᤂᤧᤴ ᤔᤏᤠ᤺ᤸᤗᤧ ᤐᤋᤪᤢᤛ ᤏᤢ ᤕᤢᤜᤢᤴᤏᤠᤴ ᤋᤧᤶᤛᤢᤛᤡᤖ ᤔᤠᤱᤜᤡᤶᤔᤥᤒᤠ ᤛᤥᤗᤥᤔᤏᤖᤧ#᥉:᥇᥇ ᤛᤥᤗᤥᤔᤏᤖᤧ ᤁᤢᤀᤠ᤺ᤶᤓᤥ—ᤔᤠᤱᤜᤡᤶᤔᤡᤸᤗᤧᤴ ᤏᤠᤶᤃᤧᤴ ᤐᤡᤛᤠᤱ ᤁᤧᤏᤧᤒᤠ ᤀᤠ᤺ᤶᤓᤥᤴ ᤘᤕᤧ॥ ᤁᤢᤀᤠ᤺ᤶᤓᤥ ᤔᤧᤵᤔᤏᤠᤒᤠ ᤋᤧᤴᤏᤥ ᤘᤕᤧ॥ ᤂᤧᤵᤔᤥ ᤔᤏᤠᤜᤠ᤹ ᤔᤧᤗᤥ᤺ᤰᤋᤧᤖ ᤔᤧᤍᤩᤧᤀᤠᤱ ᤂᤢᤏᤡ᤹ ᤂᤡᤖᤡ ᤔᤧᤈᤢᤵᤛᤧᤖᤥ॥ 12ᤜᤧᤰᤁᤩᤠᤱ ᤐᤋᤪᤢᤛᤖᤧ ᤂᤧᤱᤜᤠ᤹ ᤀᤥᤔᤧᤳᤋᤢᤛᤡᤖ ᤔᤧᤳᤋᤢᤛᤡ. “ᤀᤡᤛᤪᤠᤀᤡᤗᤡᤛᤣ. ᤁᤴ ᤐᤠ᤺ᤴᤏᤥ ᤌᤣᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤔᤕᤧᤒᤠᤒᤣ᥅ ᤌᤣᤀᤠᤱ ᤁᤴ ᤔᤏᤠᤴ ᤀᤠᤴᤇᤡᤃᤣ ᤔᤢᤰᤛᤠᤶ ᤏᤢ ᤛᤠᤶᤕᤥᤒᤠᤸᤗᤧ ᤗᤠᤱᤃᤧᤄᤣ᤺ᤰᤐᤠ ᤆᤥᤃᤢᤒᤠ ᤑᤠ᤹ᤀᤠᤱ ᤕᤠᤵᤔᤡ ᤀᤥᤃᤧᤔᤧᤳᤋᤡᤒᤠᤒᤣ᥅ 13ᤀᤒᤪᤠᤜᤠᤔ. ᤀᤡᤛᤜᤠᤁ ᤏᤢ ᤕᤠᤁᤢᤒ ᤜᤧᤰᤁᤩᤠᤱ ᤀᤠᤏᤡ᤹ ᤘᤣ᤹ ᤐᤠᤎᤧᤒᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤧᤘᤠᤖᤥᤒᤠ ᤕᤧᤛᤢᤴ ᤔᤡᤔᤡᤍᤡᤱ ᤆᤥᤃᤢᤀᤠᤱ ᤘᤠ᤹ᤖᤥ॥ ᤂᤢᤏᤧ᤹ ᤁᤧᤍᤧᤶᤛᤢᤶᤔᤠᤱ ᤜᤠᤱᤕᤢᤰᤐᤠᤜᤠ᤹ᤖᤥ ᤛᤧᤳᤇᤧ ᤜᤢᤰᤁᤧᤛᤢᤵᤋᤢᤶ॥ ᤛᤢᤜᤠᤱᤃᤧᤶᤒᤠ ᤐᤡᤗᤠᤋᤛᤖᤧ ᤂᤢᤏᤧ᤹ ᤗᤧᤵᤔᤠ ᤏᤡᤱᤘᤠ᤹ ᤆᤥᤃᤢᤛᤠᤱ ᤂᤡᤏᤡ᤹ ᤁᤧᤏᤠ᤹ᤖᤢᤶᤗᤥ॥ 14ᤂᤡᤏᤡ᤹ ᤛᤣᤛᤣ ᤏᤢ ᤛᤠᤶᤕᤥᤒᤠ ᤔᤏᤠ᤺ᤸᤗᤧ ᤁᤢᤗᤧᤰᤘᤠ ᤔᤏᤠ ᤁᤧᤛᤧᤵᤐᤧᤴ ᤗᤧᤖᤧᤶ ᤀᤠᤒᤡᤖᤧᤶᤔᤧ᤹ ᤑᤠ᤹ᤀᤠᤱ ᤁᤧᤏᤠ᤺ᤰᤋᤢᤶᤗᤥ॥ 15ᤀᤰᤂᤣᤗ᤹ᤖᤡᤰ ᤂᤡᤏᤡ᤹ ᤏᤧᤳᤋᤡᤃᤧᤴ ᤜᤡᤱᤔᤴᤗᤧ ᤁᤢᤒᤢᤴᤏᤡᤴ ᤛᤧᤵᤔᤠ ᤁᤧᤒᤠᤱᤄᤢᤶᤛᤡᤶ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ᤃ ᤁᤢᤛᤡᤘᤧᤳᤗᤠᤶ ᤁᤢᤜᤡᤱᤘᤧᤳ ᤆᤥᤃᤢᤖᤥ॥ ᤂᤧᤴ ᤐᤠ᤺ᤴᤏᤡᤸᤗᤧᤴ ᤋᤥ᤺ᤴᤍᤡ ᤀᤠᤏᤡᤃᤣ ᤘᤕᤡᤃᤧᤖᤥ॥ 16ᤜᤧᤰᤁᤩᤠᤱ ᤕᤧᤛᤢᤀᤥᤒᤠ ᤏᤛᤠ᤺ᤴᤏᤡᤸᤗᤧ ᤆᤥᤃᤢᤸᤗᤧ ᤁᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤒᤠ ᤔᤏᤠᤴ ᤁᤧᤎᤢᤶᤒᤠ ᤐᤥ᤺ᤰᤂᤧᤒᤠ ᤁᤧᤏᤡᤛᤢᤶᤔᤠᤱ ᤁᤧᤘᤕᤡ᤹ᤖᤥ॥ ᤂᤧᤴ ᤕᤧᤛᤢᤀᤥᤒᤠ ᤏᤛᤠ᤺ᤴᤏᤡᤸᤗᤧ ᤁᤴ ᤔᤏᤠᤴ ᤒᤠ ᤂᤡᤏᤡ᤹ ᤋᤃᤡᤀᤣ ᤘᤣ᤺ᤳᤋᤧᤀᤠᤱ ᤘᤠ᤹ᤖᤥ॥
17“ᤀᤠᤸᤗ ᤑᤢ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤕᤧᤛᤢᤴ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤢᤒᤠ ᤜᤧᤰᤁᤣ ᤂᤡᤏᤡ᤹ᤃ ᤌᤣᤀᤠᤱ ᤔᤧᤴᤏᤡᤀᤣ ᤔᤧᤸᤗᤧᤀᤣ ᤁᤴ ᤁᤧᤈᤥᤃᤢᤶᤒᤠᤖᤥ ᤑᤠ᤹ᤀᤠᤱ ᤀᤡᤱᤃᤠ᤹ ᤏᤡᤱᤘᤠ᤹ ᤁᤳᤋᤢᤱᤗᤥ॥ 18ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤸᤗᤧᤃ ᤋᤢᤰᤂᤣ ᤆᤠᤔᤠᤀᤠᤱ ᤛᤡᤔᤠᤀᤣ ᤐᤥᤱ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤗᤠᤶ ᤐᤠ᤺ᤳᤋᤢᤒᤠᤴ ᤁᤧᤖᤧᤒᤠᤖᤥ॥ 19ᤂᤧᤸᤗᤧᤆᤥᤃᤢᤸᤗᤧ ᤀᤠᤸᤗᤥ ᤂᤡᤏᤡ᤹ ᤗᤠᤕᤥᤗᤠᤶ ᤜᤡᤴᤍᤧᤶᤔᤧ᤹ᤀᤠᤱ ᤍᤠᤱᤒᤠᤀᤥ ᤏᤢ᤺ᤰᤂᤧᤶᤔᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤗᤠᤕᤥ ᤗᤠᤛᤥ᤺ᤳᤜᤠ᤹ ᤔᤠᤒᤣ᤺ᤰᤏᤡ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢ ᤍᤠᤱᤒᤠᤗᤠᤶ ᤕᤠᤶᤛᤠᤶᤔᤥ ᤁᤧᤎᤢᤶᤒᤠ ᤐᤥᤱᤔᤠ ᤕᤧᤶ ᤋᤠᤏᤡᤖᤥ॥ 20ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤋᤃᤡᤛᤠ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤂᤡᤏᤡ᤹ᤀᤥ ᤕᤠᤶᤔᤥ ᤁᤧᤒᤠᤱᤄᤡ ᤁᤧᤒᤡᤖᤡ᤹ᤖᤥ॥ 21ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤃᤡᤏᤢᤛᤠᤀᤣ ᤁᤢᤛᤣᤛᤣ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤁᤧᤖᤧᤰ ᤐᤠ᤺ᤴᤜᤠ᤹ ᤕᤠᤶᤔᤥ ᤁᤢᤛᤱ ᤔᤧᤴᤈᤥ᤺ᤰᤁᤣ ᤌᤠᤖᤡᤰ ᤕᤧᤛᤢ ᤂᤪᤡᤛ᤻ᤋᤧᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤘᤠ᤹ᤔᤠ ᤐᤥᤱ ᤑᤠ᤹ᤀᤠᤱ ᤐᤠ᤺ᤳᤋᤢᤀᤠᤱ ᤘᤠ᤹॥ 22ᤔᤥᤛᤠᤖᤧᤀᤠᤱ ᤔᤠᤱᤎᤢᤰᤏᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤠ᤹.
“‘ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤜᤧᤰᤋᤱᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤴ ᤂᤡᤏᤡ᤹ ᤑᤢ᤹ᤏᤢᤛᤠ᤹ᤗᤠᤶ ᤑᤥ᤺ᤰᤂᤢ᤹ᤖᤥ॥
ᤁᤢᤒᤠ᤺ᤴᤏᤡᤴ ᤂᤡᤏᤡ᤹ ᤁᤧᤄᤧᤵᤛᤢᤶᤗ ᤐᤥᤱᤗᤥ॥
23ᤂᤧᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤸᤗᤧ ᤁᤢᤒᤠ᤺ᤴᤏᤡᤴ ᤔᤧᤱᤄᤧᤶᤔᤏᤠᤒᤠᤜᤠ᤹
ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ᤗᤠᤶ ᤔᤧᤛᤧᤴᤏᤠᤱ ᤔᤧᤔᤧᤰᤗᤥ॥’
24“ᤜᤧᤰᤁᤩᤠᤱ ᤛᤠᤔᤢᤀᤧᤸᤗᤠᤱᤎᤥ ᤕᤠᤱᤛᤡᤒᤠ ᤁᤠᤰ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤜᤠᤒᤠ ᤁᤴ ᤕᤧᤴᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤒᤠ᤺ᤳᤋᤢᤀᤠᤱ ᤔᤧᤘᤠ᤹ᤖᤥ॥ 25ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤏᤢ ᤆᤥᤃᤢᤒᤠ ᤔᤠᤱᤜᤢᤵᤐᤡᤴ ᤂᤡᤏᤡ᤹ᤀᤠᤱ ᤁᤧᤄᤥᤛᤢᤶᤔᤠᤱ ᤁᤧᤘᤕᤡ᤹ᤖᤥ॥ ᤂᤢᤏᤧ᤹ ᤀᤒᤪᤠᤜᤠᤶᤔᤡᤴ ᤀᤰᤂᤣ ᤔᤧᤳᤋᤢ. ‘ᤂᤧᤏᤧ᤹ ᤁᤧᤔᤢ᤹ᤀᤡᤍᤠᤱᤛᤠᤗᤠᤶᤔᤣ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤛᤢᤘᤠᤱᤃᤧᤴ ᤛᤕᤱᤜᤠ᤹ᤖᤧ ᤔᤢ᤹ᤀᤡᤛᤠᤶ ᤔᤧᤄᤥᤛᤢ᤹ᤖᤥ॥’ 26ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤑᤧᤴᤕᤠ᤺ᤶᤒᤰᤁᤥᤗᤠᤶ ᤏᤢ᤺ᤰᤔᤠᤛᤡᤀᤠᤱ ᤔᤢ᤹ᤀᤡᤛᤠᤶ ᤐᤡᤔᤠᤛᤡ ᤑᤠ᤹ᤀᤠᤱ ᤂᤢᤏᤧ᤹ ᤀᤠᤒᤠᤅᤣ ᤁᤧᤛᤧᤘᤠᤖᤥᤒᤠᤴ ᤁᤠᤰᤏᤢ ᤋᤃᤡ ᤂᤡᤏᤡ᤹ ᤀᤡᤛᤪᤠᤀᤡᤗᤡᤜᤠ᤹ᤖᤥ ᤐᤠᤱᤄᤢᤀᤠᤱ ᤘᤠ᤹ᤖᤥ॥”
Currently Selected:
ᤛᤣ᤺ᤰᤕᤢᤰᤔᤡᤒᤠᤜᤠ᤹ 3: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.