ᤛᤣ᤺ᤰᤕᤢᤰᤔᤡᤒᤠᤜᤠ᤹ 2
2
ᤐᤧᤴᤋᤡᤁᤥᤛᤀᤥ ᤛᤣᤛᤣᤔᤠᤱᤅᤡᤴ ᤕᤢ᤹᤺
1ᤐᤧᤴᤋᤡᤁᤥᤛ#᥈:᥇ ᤐᤧᤴᤋᤡᤁᤥᤛ—ᤁᤴ ᤋᤱᤏᤠᤶᤔᤡᤴ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤡᤴᤏᤢ᤺ᤸᤗᤧ ᤅᤠᤃᤡᤵ (᥋᥆) ᤕᤧᤴ ᤀᤣᤃᤠᤱ ᤁᤧᤍᤠᤒᤠ ᤋᤱᤏᤠᤶᤗᤥ॥ ᤋᤱᤏᤠᤶᤔᤥ ᤕᤖᤢᤛᤗᤧᤶᤔᤥ ᤏᤛᤠᤏᤡᤒᤠᤜᤠ᤹ ᤌᤡᤰ ᤋᤧᤴᤏᤥ ᤔᤧᤈᤢᤵᤛᤧᤀᤠᤱ ᤔᤧᤘᤕᤧ॥ 2ᤜᤰᤆᤄᤳ ᤂᤧᤵᤔᤥ ᤕᤶᤒᤠ ᤛᤢᤖᤡᤳ ᤁᤣᤈᤱ ᤁᤧᤜᤢᤒᤠ ᤁᤢᤀᤡᤛᤡᤰ ᤀᤡᤰᤗᤠᤎᤡᤰ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤕᤧᤀᤠᤱ ᤂᤧᤱᤜᤠ᤹ ᤔᤧᤕᤠᤃᤧᤒᤠ ᤜᤡᤶᤔᤡᤴ ᤛᤡᤍᤠᤰ ᤌᤡᤶᤛᤢᤖᤥ॥ 3ᤜᤧᤰᤁᤩᤠᤱ ᤔᤡᤖᤠ᤺ᤰᤗᤠᤶ ᤁᤧᤛᤧᤒᤠ ᤔᤡᤛᤠᤱ ᤜᤧᤰᤋᤱᤒᤠ ᤔᤡᤴ ᤁᤧᤖᤧᤰᤗᤧ ᤂᤢᤏᤡ᤹ ᤌᤧᤃᤣ᤺ᤰᤁᤥ ᤆᤢᤰᤋᤧᤒᤠ ᤂᤧᤱᤜᤠ᤹ᤖᤧ ᤔᤧᤏᤡᤛᤢᤖᤥ॥ 4ᤜᤧᤰᤁᤩᤠᤱ ᤛᤣᤛᤣᤔᤠᤱᤅᤡᤸᤗᤧ ᤌᤢᤰᤋᤢᤛᤡᤀᤠᤱ ᤛᤣᤛᤣᤔᤠᤱᤅᤡᤸᤗᤧ ᤐᤡᤖᤢᤛᤡᤒᤠ ᤁᤢᤀᤡᤛᤡᤰ ᤘᤣ᤹ ᤘᤣ᤹ ᤔᤧᤸᤗᤧᤛ᤻ᤛᤢᤶᤒᤠ ᤐᤠ᤺ᤴᤍᤠᤱᤅᤥ ᤐᤠ᤺ᤵᤔᤠ ᤔᤧᤜᤣ᤺ᤰᤋᤧᤖᤥ॥
5ᤀᤠᤸᤗ ᤕᤖᤢᤛᤗᤧᤶᤔᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤗᤠᤈᤣ᤹ᤀᤥᤏᤢ ᤁᤧᤍᤠᤒᤠᤀᤠᤱ ᤁᤧᤘᤠ᤹ᤒᤠ ᤕᤜᤢᤍᤡ ᤛᤠᤶᤕᤥᤒᤠ ᤔᤏᤠᤜᤠ᤹ᤀᤠᤱ ᤔᤧᤘᤕᤧᤖᤥ॥ 6ᤕᤖᤡᤰ ᤔᤏᤠᤜᤠ᤹ᤖᤧ ᤁᤴ ᤀᤡᤰᤗᤠᤴ ᤔᤧᤄᤧᤵᤛᤢᤀᤠᤱ ᤂᤧᤴ ᤋᤧᤴᤏᤥ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤔᤧᤈᤢᤵᤛᤧ. ᤌᤣᤀᤠᤱᤓᤧᤸᤗᤧ ᤁᤧᤍᤠᤒᤠᤜᤠ᤹ᤖᤧ ᤂᤢᤏᤡ᤹ ᤀᤠᤒᤠᤅᤣ ᤐᤣᤗᤡᤃᤧᤴ ᤐᤠ᤺ᤴᤍᤠᤱᤅᤥ ᤂᤧᤴ ᤏᤛᤠᤏᤡᤒᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤔᤧᤄᤧᤵᤛᤢ॥
7ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤀᤠᤱ ᤛᤣ᤺ᤴᤔᤧᤍᤥᤛᤢᤛᤡ. “ᤔᤧ᤺ᤶᤒᤧ᥄ ᤁᤴ ᤁᤠᤰ ᤁᤧᤒᤠ᤺ᤵᤐᤠᤜᤠ᤹ᤃ ᤃᤠᤗᤡᤗᤡᤛᤡ ᤔᤧ᤺ᤴᤇᤡᤒᤡ᥅ 8ᤜᤧᤰᤁᤣ᤺ᤸᤗᤧ ᤁᤱᤜᤠ᤹ᤖᤧ ᤀᤠᤒᤠᤅᤣ ᤀᤠᤏᤡ᤹ ᤐᤠ᤺ᤴᤍᤠᤱᤜᤠ᤹ᤀᤥ ᤀᤠᤰᤂᤣᤗ᤹ᤖᤡᤰ ᤐᤠ᤺ᤵᤔᤠ ᤔᤧᤛᤢᤰᤋᤢᤒᤠᤒᤣ᥅ 9ᤀᤠᤏᤡ᤹ᤃ ᤐᤷᤌᤡᤕᤠ. ᤔᤣᤍᤡᤕᤠ. ᤀᤣᤗᤠᤔᤡ. ᤔᤧᤛᤥᤐᤥᤋᤠᤔᤡᤕᤠ. ᤕᤜᤢᤍᤡᤕᤠ. ᤁᤠᤵᤐᤠᤍᤥᤁᤡᤕᤠ. ᤐᤥᤴᤋᤛ. ᤀᤣᤛᤡᤕᤠ. 10ᤑᤪᤡᤃᤡᤕᤠ. ᤐᤠᤶᤑᤡᤗᤡᤕᤠ. ᤔᤡᤛᤪ ᤏᤢ ᤗᤡᤒᤡᤕᤠ ᤁᤢᤒᤣᤛᤠᤱᤒᤠ ᤛᤠᤀᤡᤖᤣᤏᤡ ᤋᤧᤱᤃᤵ. ᤜᤧᤰᤁᤩᤠᤱ ᤖᤥᤔᤗᤠᤶ ᤁᤧᤍᤠᤒᤠ (ᤕᤜᤢᤍᤡᤜᤠ᤹ ᤏᤢ ᤕᤜᤢᤍᤡ ᤛᤠᤶᤕᤥ ᤁᤧᤏᤠ᤺ᤵᤐᤠ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹). 11ᤁᤪᤣᤋᤡᤜᤠ᤹ ᤜᤧᤰᤁᤩᤠᤱ ᤀᤖᤒᤡᤜᤠ᤹ᤀᤠᤱ ᤀᤠᤘᤠ᤹॥ ᤁᤖᤛᤠᤱ ᤂᤧᤱᤜᤠ᤹ᤖᤧᤃ ᤀᤠᤏᤡ᤹ ᤀᤠᤒᤠᤅᤣ ᤐᤠ᤺ᤴᤍᤠᤱᤅᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤔᤧᤈᤧᤰᤂᤢᤖ ᤔᤧᤒᤵᤐᤠ ᤀᤠᤄᤧᤵᤛᤢᤶᤗᤥ॥” 12ᤂᤢᤏᤡ᤹ ᤏᤡᤱᤘᤠ᤹ ᤔᤕᤧ ᤜᤧᤰᤁᤩᤠᤱ ᤜ᤺ᤴᤍᤠ ᤔᤧᤗᤧᤰᤋᤧᤀᤠᤱ ᤀᤰᤂᤣᤗ᤹ᤖᤡᤰ ᤛᤣ᤺ᤴᤔᤧᤍᤥᤛᤡᤱ. “ᤁᤴ ᤑᤠ᤹ᤀᤡᤱᤃ ᤌᤧᤔᤠ᤺ᤴᤒᤣ᥅” 13ᤁᤖ ᤁᤢᤓᤠᤖᤧ ᤁᤡᤏᤠ᤺ᤴᤍᤡ ᤔᤧᤒᤡᤖᤢᤛᤡᤖ ᤆᤧᤸᤗᤧᤰᤛᤣ᤹ ᤌᤡ᤺ᤸᤗᤧ ᤔᤕᤢᤛᤡᤀᤠᤱ ᤘᤠ᤹ ᤗ᤹ᤖᤡᤰ ᤔᤧᤔᤧᤳᤋᤢᤛᤡᤖᤥ॥
ᤐᤋᤪᤢᤛᤖᤧ ᤁᤢᤀᤡᤱᤄᤱ
14ᤁᤖ ᤐᤋᤪᤢᤛᤧᤴ ᤘᤣ᤹ ᤌᤡᤰᤌᤡᤰ (᥇᥇) ᤛᤣ᤺ᤰᤕᤢᤰᤔᤡᤒᤠᤜᤠ᤹ᤏᤢ ᤕᤧᤶᤛᤡᤱᤅᤠᤱ ᤕᤶᤒᤠ ᤀᤡᤰᤗᤠᤀᤥ ᤁᤠᤰᤗᤧ ᤔᤧᤄᤧᤵᤛᤢᤖ ᤔᤧᤳᤋᤢᤛᤡ. “ᤕᤜᤢᤍᤡᤕᤠᤗᤠᤶ ᤁᤧᤍᤠᤒᤠ ᤕᤜᤢᤍᤡᤜᤠ᤹ ᤏᤢ ᤕᤖᤢᤛᤗᤧᤶᤔᤥ ᤁᤧᤕᤢᤱᤒᤠᤛᤣ. ᤁᤴ ᤌᤣ ᤐᤥ᤺ᤰᤂᤧᤒᤠ ᤑᤠ᤹ᤀᤠᤱ ᤔᤧᤳᤏᤡᤱᤗᤥ. ᤀᤠᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ᥄ 15ᤁᤴ ᤔᤏᤠᤜᤠ᤹ ᤏᤢ ᤀᤡᤱᤃᤠ᤹ ᤂᤡᤏᤡ᤹ ᤁᤧᤀᤡ᤺ᤳᤋᤢᤶᤒᤠ ᤁᤢᤀᤡᤛᤡᤰ ᤆᤧᤸᤗᤧᤰᤛᤣ᤹ ᤌᤡ᤺ᤸᤗᤧ ᤔᤕᤡᤃᤧᤒᤠ ᤔᤣ᤺ᤴᤗᤥ॥ ᤋᤠᤏᤠᤶᤒᤠ ᤁᤢᤔᤢᤰ ᤑᤠᤱᤛᤡᤀᤥᤛᤠᤃ (᥏) ᤀᤠᤳᤋᤡᤴᤜᤠ᤹ᤖᤧᤀᤠᤱ ᤆᤧᤸᤗᤧᤰᤛᤣ᤹ ᤌᤡ ᤔᤧᤴᤎᤢᤅᤢᤴᤗᤥ॥ 16ᤁᤖ ᤁᤱᤃ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤥᤀᤣᤗᤖᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤧᤖᤧᤒᤠᤖᤥ—
17“‘ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤀᤠᤱ ᤘᤠ᤹.
ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤏᤢᤵᤔᤠ ᤕᤧᤴᤜᤠ᤹ᤀᤥ ᤀᤡᤱᤃᤠ᤹ ᤀᤠᤛᤣᤛᤣᤔᤠᤱᤅᤡᤴ ᤁᤠᤰ ᤔᤧᤴᤇᤠᤶᤃᤧᤴ ᤛᤢᤘᤠᤱ ᤛᤶᤍᤠᤱ ᤐᤠᤱᤄᤢᤱᤅᤠᤱ ᤂᤡᤏᤡ᤹ ᤕᤧᤶᤒᤡᤳᤇᤠ᤹ ᤏᤢ ᤔᤧᤴᤇᤢᤔᤠ᤹ᤛᤠᤜᤠ᤹ᤖᤧ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤒᤠ᤺ᤳᤋᤢ᤹.
ᤂᤡᤏᤡ᤹ ᤏᤠᤗᤡᤱᤃᤧᤴ ᤌᤠᤱᤒᤧᤴᤛᤠᤜᤠ᤹ᤖᤧ ᤛᤢᤑᤥ ᤔᤧᤏᤡᤛᤢ᤹.
ᤜᤧᤰᤁᤩᤠᤱ ᤂᤡᤏᤡ᤹ ᤂᤍᤠᤰᤔᤡᤜᤠ᤹ᤖᤧ ᤋᤠᤍᤡᤃᤧᤴ ᤛᤧᤵᤔᤠᤱ ᤔᤧᤔᤠᤰᤋᤢ᤹ᤖᤥ॥
18ᤂᤧᤴ ᤕᤧᤴᤜᤠ᤹ᤀᤥ ᤀᤡᤱᤃᤠ᤹ ᤀᤠᤛᤧᤘᤠ ᤁᤧᤈᤥ᤺ᤰᤐᤠ ᤁᤧᤈᤥ᤺ᤰᤔᤠᤜᤠ᤹ᤀᤥ ᤀᤠᤛᤣᤛᤣᤔᤠᤱᤅᤡᤴ ᤐᤠᤱᤄᤢᤱ᤹
ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤒᤠ᤺ᤳᤋᤢ᤹ᤖᤥ॥
19ᤜᤧᤰᤁᤩᤠᤱ ᤀᤡᤱᤃᤠ᤹ ᤌᤥ ᤋᤠᤱᤛᤠᤰᤐᤥ ᤏᤡᤱᤘᤠ᤹ ᤁᤧᤔᤠᤒᤠ ᤐᤠ᤺ᤴᤜᤠ᤹ ᤆᤥᤃᤢᤱ᤹
ᤜᤧᤰᤁᤩᤠᤱ ᤕᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤀᤠᤱ ᤔᤡᤰᤛᤣᤴ ᤆᤥᤃᤢᤱ᤹—
ᤔᤠᤰᤂᤡ᤹. ᤔᤡ ᤜᤧᤰᤁᤩᤠᤱ ᤜᤠ᤺ᤱᤃᤢ ᤜᤠ᤺ᤱᤃᤢ ᤁᤧᤗ᤹ᤒᤠ ᤔᤡ᤺ᤰᤂᤢ᤹ᤀᤡᤴ ᤀᤥᤛᤣ᤺ᤴᤎᤠᤰᤏᤡᤱᤗᤥ॥
20ᤜᤧᤰᤁᤩᤠᤱ ᤌᤥ ᤋᤠᤱᤛᤠᤰᤐᤥ ᤏᤠᤶᤔᤡᤸᤗᤧ ᤏᤠᤶᤛᤠᤱ ᤐᤡᤔᤠ ᤗᤧᤖᤢᤀᤠᤱ ᤂᤠᤍᤠᤶᤗᤥ
ᤜᤧᤰᤁᤩᤠᤱ ᤗᤠᤒᤠᤴ ᤔᤠᤰᤂᤡ᤹ ᤜᤧᤰᤁᤣ ᤜᤧ᤺ᤳᤗ᤹ᤖᤡᤰ ᤗᤧᤱᤛᤡᤱᤗᤥ॥ ᤁᤴ ᤁᤠᤰ ᤐᤠ᤺ᤴᤜᤠ᤹ ᤍᤠᤱᤒᤠᤴ ᤏᤢ᤺ᤱ ᤕᤢᤒᤠ ᤐᤕᤶ ᤕᤶᤒᤠ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤧᤴᤏᤡᤴ ᤋᤠᤔᤠᤏᤢ᤺ᤸᤗᤧ ᤋᤃᤡ ᤐᤥᤱᤗᤥ॥
21ᤜᤧᤰᤁᤩᤠᤱ ᤜᤠ᤺ᤳᤗᤧ ᤍᤠᤱᤒᤧᤸᤗᤧ ᤁᤢᤔᤡᤱᤅᤡᤴ ᤗᤥ᤺ᤰᤂᤢ᤹ ᤂᤧᤴ ᤋᤠᤱᤛᤧ᤺ᤵᤗᤥ॥’#ᤕᤥᤀᤣ ᥈:᥈᥎-᥉᥈
22“ᤀᤡᤛᤪᤠᤀᤡᤗᤡᤛᤣ. ᤁᤴ ᤐᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ—ᤏᤠᤛᤖᤋᤛᤔᤠ ᤕᤧᤛᤢ᤺ᤴᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤜᤧᤰᤁᤩᤠᤱ ᤔᤡᤰᤛᤣ᤺ᤴᤜᤠ᤹ᤏᤢ ᤂᤡᤏᤡ᤹ ᤗᤢᤶᤔᤥ ᤐᤠᤱᤄᤢᤖᤥ॥ ᤂᤡᤏᤡ᤹ ᤗᤢᤶᤔᤥ ᤕᤠ᤺ᤶᤒᤰᤜᤠ᤹ ᤆᤥᤃᤢᤒᤠᤱᤃ. ᤂᤡᤏᤡ᤹ᤀᤠᤱ ᤁᤧᤏᤡᤛᤢᤶᤔᤣᤖᤥ॥ 23ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤀᤠᤒᤠᤅᤣ ᤁᤢᤏᤡᤱᤛᤣᤰ ᤏᤢ ᤋᤃᤡ ᤏᤡᤱᤘᤠ᤹ᤀᤥ ᤜᤧᤰᤁᤣ ᤕᤧᤛᤢᤴ ᤂᤡᤏᤡ᤹ ᤜᤢᤰᤁᤥ ᤐᤡᤖᤧᤀᤠᤱ ᤑᤧᤴ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥᤗᤠᤶ ᤂᤢᤏᤧ᤹ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤁᤧᤓᤥ᤺ᤴᤍᤢᤶᤔᤠᤱ ᤁᤧᤛᤧᤖᤢᤶᤗᤥ॥ 24ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤡᤔᤧᤸᤗᤧ ᤋᤢᤰᤂᤣᤘᤠᤗᤠᤶ ᤆᤥ᤺ᤰᤕᤢᤶᤓᤥ ᤐᤡᤖᤢᤀᤠᤱ ᤁᤢᤜᤡᤱᤘᤧᤳ ᤆᤥᤃᤢᤖᤥ. ᤌᤣᤀᤠᤱᤓᤧᤸᤗᤧ ᤛᤡᤔᤧᤸᤗᤧ ᤂᤢᤏᤧ᤹ ᤌᤣ᤺ᤰᤔᤠ ᤔᤧᤛᤢᤰᤋᤢᤴᤗᤥ॥ 25ᤍᤠᤀᤢᤍ ᤜᤠᤱᤅᤡᤸᤗᤧ ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤢᤀᤠᤱ ᤐᤳ.
“‘ᤛᤍᤠᤍᤡᤱ ᤀᤡᤱᤃᤠ᤹ ᤀᤠᤴᤍᤠᤱᤒᤧᤱᤃ ᤀᤠᤍᤃᤠᤱ ᤏᤡᤛᤢᤱᤗᤥ॥
ᤂᤢᤏᤧ᤹ ᤀᤠᤈᤢᤵᤛᤠᤱ ᤗᤧᤵᤔᤠᤱ ᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤔᤧᤃᤡᤀᤠᤴᤗᤥ॥
26ᤂᤧᤸᤗᤧᤆᤥᤃᤢᤸᤗᤧ ᤀᤡᤱᤃᤠ᤹ ᤛ᤺ᤳᤋᤠᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥᤛᤢᤱᤗᤥ॥
ᤏᤠᤛᤡᤱᤃᤧᤴ ᤀᤠᤎᤰᤗᤠᤀᤥ ᤀᤡᤱᤃᤠ᤹ ᤛᤡᤀᤠᤛᤠᤱ ᤕᤠᤶᤔᤥ ᤜᤡᤱᤅᤠ ᤁᤧᤗ᤹ᤒᤠ ᤏᤡᤱᤛᤠᤱᤅᤥ ᤜᤠᤱᤜᤠᤱ ᤘᤠ᤹ᤀᤠᤖᤥ॥
27ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤣ.
ᤀᤡᤱᤃᤠ᤹ ᤀᤠᤕᤠᤶᤛᤠᤶᤔᤡᤴ ᤂᤧᤔᤠᤕᤱᤛᤱᤅᤥ ᤐᤰᤁᤧᤴᤎᤏᤧᤴᤗᤥ॥
ᤜᤧᤰᤁᤩᤠᤱ ᤛᤣᤛᤣ ᤁᤧᤛᤧᤘᤠᤖᤥᤒᤠᤸᤗᤧ ᤁᤢᤎᤰᤁᤡᤴ ᤀᤡ᤺ᤵᤐᤢᤱᤅᤥ ᤁᤡᤔᤠ ᤕ᤺ᤵᤔᤠ ᤁᤧᤶᤒᤠᤱᤄᤢᤴᤗᤥ॥
28ᤕᤠᤶᤔᤥ ᤜᤡᤱᤅᤠ ᤑᤠ᤹ᤀᤠᤱ ᤂᤧᤏᤧ᤹ ᤀᤥᤛᤣ᤺ᤴᤃᤧᤎᤠᤰᤋᤠᤱᤅᤠᤱ ᤘᤠ᤹ᤖᤥ॥
ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤍᤃᤠᤱ ᤘᤠ᤹ᤀᤠᤸᤗᤧ ᤛ᤺ᤵᤔᤠᤸᤗᤧ ᤁᤧᤎᤡᤶᤀᤠᤖᤥ॥’
29“ᤑᤢ᤹ᤏᤢᤛᤠ᤹ᤛᤣ. ᤀᤠᤸᤗ ᤀᤡᤱᤃᤠ᤹ ᤏᤡᤛ᤻ᤛᤣᤀᤠᤱ ᤀᤰᤂᤣ ᤐᤠ᤺ᤵᤔᤠ ᤛᤢᤰᤋᤢᤱᤗᤥ—ᤀᤠᤏᤡ᤹ ᤋᤠᤰᤌᤧᤒᤠ ᤍᤠᤀᤢᤍᤧᤱᤃ ᤛᤩᤧ ᤜᤧᤰᤁᤩᤠᤱ ᤔᤧᤗᤢᤵᤋᤢᤀᤠᤱ ᤁᤢ᤺ᤀᤡᤵᤐᤢᤱᤅᤡᤴ ᤀᤠᤸᤗᤥ ᤌᤠᤖᤡᤰᤁᤠᤱ ᤏᤧᤖᤥ॥ 30ᤜᤧᤰᤁᤣᤛᤠᤱ ᤂᤢᤏᤧ᤹ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤆᤥᤃᤧᤒᤠᤸᤗᤧ ᤁᤢᤔᤢ᤹ᤀᤡᤍᤠᤱᤛᤠᤀᤥ ᤒᤠ ᤂᤢᤏᤧ᤹ ᤜᤧᤰᤋᤱᤒᤠ ᤜᤠᤱ ᤐᤥᤱ ᤁᤧᤗ᤹ᤒᤠ ᤔᤠᤱᤜᤧᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢᤒᤠᤴ ᤂᤢᤏᤧ᤹ ᤁᤢᤛᤡᤱᤏᤡ᤺ᤳᤋᤢ॥ 31ᤜᤧᤰᤁᤩᤠᤱ ᤍᤠᤀᤢᤍᤖᤧ ᤋᤃᤡᤏᤢᤛᤠ ᤋᤠ᤺ᤴᤍᤡ ᤌᤣ ᤐᤥᤱ ᤁᤧᤗ᤹ᤒᤠᤴ ᤏᤡᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤖᤧ ᤁᤢᤛᤡᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤠᤖᤧ ᤁᤢᤕᤠ᤺ᤶᤒᤣᤀᤥ ᤀᤰᤂᤣ ᤐᤠ᤺ᤳᤋᤢᤖᤥ. ‘ᤂᤢᤏᤧ᤹ᤃ ᤂᤧᤔᤠᤕᤱᤛᤱᤅᤥ ᤐᤰᤔᤧᤎᤠᤏᤧᤴ. ᤜᤧᤰᤁᤩᤠᤱ ᤂᤢᤏᤧ᤹ ᤏᤠᤛᤡᤱᤃᤧᤴ ᤁᤢᤎᤰᤁᤡᤴᤏᤠᤱ ᤔᤧᤃᤡᤏᤧᤴᤗᤥ॥’#ᤏᤡᤱ ᤛᤢᤶ ᥇᥌:᥇᥆
32“ᤒᤠ ᤁᤴ ᤕᤧᤛᤢᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠᤶᤔᤥ ᤁᤢᤜᤡᤱᤘᤧᤳ ᤆᤥᤃᤢᤒᤠ ᤐᤠ᤺ᤴᤏᤥ ᤀᤠᤏᤡᤃᤣ ᤁᤧᤖᤧᤰ ᤁᤧᤏᤡᤒᤠ ᤋᤥ᤺ᤴᤍᤡ ᤘᤕᤡᤃᤧᤖᤥ॥ 33ᤜᤧᤰᤁᤩᤠᤱ ᤂᤢᤏᤧ᤹ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱ ᤕᤢᤰᤂᤢ॥ ᤂᤢᤏᤧ᤹ ᤏᤡᤱᤘᤠ᤹ᤑᤢᤐᤠᤗᤠᤶ ᤛᤣᤛᤣᤔᤠᤱᤅᤡᤸᤗᤧᤴ ᤔᤠᤱᤜᤧᤰᤁᤡᤴ ᤂᤥᤛᤢᤀᤠᤱ ᤀᤠᤏᤡᤃᤧᤀᤥ ᤌᤠᤛᤢᤒᤠᤴ ᤂᤡᤏᤡ᤹ ᤀᤠᤒᤠᤅᤣ ᤁᤧᤏᤡᤛᤢᤶ ᤁᤧᤄᤧᤵᤛᤢᤶᤔᤠᤱ ᤁᤧᤘᤕᤡ᤹ᤖᤥ॥ 34-35ᤍᤠᤀᤢᤍ ᤜᤠᤱᤅᤡᤱᤃ ᤛᤠᤱᤃᤪᤠᤶᤐᤣᤍᤠᤱ ᤌᤠ᤺ᤱ ᤔᤧᤒᤣᤏᤧᤴᤇᤠᤱ ᤂᤢᤏᤧ᤹ᤃ ᤀᤠᤒᤠᤅᤣ ᤀᤰᤂᤣ ᤐᤠ᤺ᤳᤋᤢ.
“ᤕᤜᤘᤣ ᤍᤠᤱᤒᤠᤸᤗᤧ ᤀᤠᤴᤍᤠᤱᤒᤠᤴ ᤀᤰᤂᤣ ᤔᤧᤳᤋᤢ.
‘ᤂᤧᤏᤧ᤹ ᤁᤧᤏᤡᤱᤔᤡᤜᤠ᤹ ᤔᤧᤏᤠ᤺ᤴᤍᤢᤱᤛᤡᤱᤅᤡᤸᤗ ᤌᤠᤖᤡᤰ ᤀᤠᤈᤢᤵᤛᤠᤱ ᤗᤧᤵᤔᤠᤱ ᤕᤢᤅᤧ᤹ᤀᤥ॥’
36“ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤏᤢ ᤁᤠᤰ ᤀᤡᤛᤪᤠᤀᤡᤗᤛᤔᤠ ᤜᤡᤶᤛᤕᤱᤜᤠ᤹ᤖᤧ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤁᤧᤓᤥ᤺ᤴᤍᤢᤶᤒᤠ ᤕᤧᤛᤢᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤴ ᤍᤠᤱᤒᤠ ᤏᤢ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋ ᤆᤥᤃᤢᤀᤠᤱ ᤘᤠ᤹ ᤁᤧᤗ᤹ᤒᤠᤴ ᤁᤢᤛᤡᤱ ᤏᤡ᤺ᤵᤔᤠᤀᤣ ᤐᤥᤱ॥”
37ᤀᤠᤸᤗ ᤁᤴ ᤐᤠᤴ ᤁᤧᤄᤧᤶᤒᤠᤜᤠ᤹ᤖᤧ ᤂᤢᤏᤡ᤹ ᤕᤥᤶ ᤐᤢ᤹ᤖᤧᤀᤠᤱ ᤐᤋᤪᤢᤛ ᤏᤢ ᤘᤣ᤹ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤛᤣ᤺ᤴᤔᤧᤍᤥᤛᤢᤛᤡ. “ᤑᤢ᤹ᤏᤢᤛᤠ᤹ᤛᤣ. ᤀᤠᤸᤗ ᤀᤠᤏᤡᤃᤣ ᤌᤣ ᤆᤥᤃᤢᤶᤒᤧᤒᤠᤒᤣ᥅”
38ᤜᤧᤰᤁᤩᤠᤱ ᤐᤋᤪᤢᤛᤖᤧ ᤔᤧᤳᤋᤢᤛᤡ. “ᤂᤡᤏᤡ᤹ ᤁᤧᤖᤧᤰ ᤗᤠᤕᤥᤗᤠᤶ ᤜᤡᤴᤍᤧᤶᤔᤧ᤹ᤀᤠᤱ ᤍᤠᤱᤒᤠᤀᤥ ᤏᤢ᤺ᤰᤂᤧᤶᤔᤧ᤹. ᤜᤧᤰᤁᤩᤠᤱ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤑᤠ᤹ᤀᤠᤱ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤔᤡᤱᤅᤥ ᤒᤵᤋᤡᤛ᤻ᤔᤠ ᤐᤥ᤺ᤰᤂᤧᤶᤔᤧ᤹ᤀᤥ᥄ ᤜᤧᤰᤁᤩᤠᤱ ᤛᤣᤛᤣᤔᤠᤱᤅᤡᤸᤗᤧᤴ ᤐᤷᤎᤠ᤺ᤶ ᤁᤧᤄᤥᤛᤢᤶᤗᤥ॥ 39ᤌᤣᤀᤠᤱᤓᤧᤸᤗᤧ ᤁᤴ ᤛᤣᤛᤣᤔᤠᤱᤅᤡᤸᤗᤧᤴ ᤔᤠᤱᤜᤧᤰᤁᤡᤱᤃ ᤂᤡᤏᤡ᤹ ᤗᤠᤃᤡ ᤏᤢ ᤂᤡᤏᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤗᤠᤃᤡ. ᤜᤧᤰᤁᤩᤠᤱ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤢ᤺ᤳᤋᤢᤛᤡᤒᤠ ᤔᤠ᤺ᤱᤄᤠ ᤔᤠ᤺ᤱᤄᤠᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤗᤠᤃᤡᤖᤥ॥” 40ᤜᤧᤰᤁᤩᤠᤱ ᤂᤢᤏᤧ᤹ ᤕᤖᤡᤰ ᤐᤠᤴ ᤐᤠ᤺ᤳᤋᤢᤖ ᤛᤠᤶᤍᤡᤱ ᤐᤡᤖᤢᤛᤡᤀᤠᤱ “ᤁᤴ ᤑᤧᤴ ᤕᤠᤵᤔᤡᤜᤠ᤹ᤖᤧ ᤔᤧᤄᤥᤛᤢᤒᤠ ᤂᤢᤶᤍᤡᤱᤗᤠᤶ ᤛᤧ᤺ᤵᤐᤠᤛᤡᤶᤔᤧ᤹ᤀᤥ” ᤔᤧᤳᤋᤢᤛᤡᤖ ᤂᤠᤜᤢᤴ ᤐᤡᤖᤢᤛᤡᤖᤥ॥
41ᤜᤧᤰᤁᤣ᤺ᤸᤗᤧ ᤁᤴ ᤐᤠ᤺ᤴᤈᤠᤴ ᤏᤛᤠᤴ ᤁᤧᤈᤥ᤺ᤰᤐᤠᤜᤠ᤹ ᤒᤵᤋᤡᤛ᤻ᤔᤠ ᤔᤧᤒᤥ᤺ᤰᤂᤧᤀᤠᤱ ᤒᤠ ᤂᤧᤴ ᤕᤧᤴᤏᤥ ᤜᤧᤴᤇᤡᤱ ᤛᤢᤶᤛᤡ (᥉.᥆᥆᥆) ᤕᤠᤖᤡᤰ ᤔᤏᤠᤜᤠ᤹ ᤂᤧᤱᤜᤠ᤹ᤀᤥ ᤔᤧᤕᤥ᤹ᤛᤡᤱᤗᤥ॥ 42ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤂᤢᤏᤡ᤹ ᤏᤡᤛᤠᤶᤔᤡᤴ ᤏᤢ ᤛᤣᤛᤣ ᤋᤱᤈᤢᤶᤔᤥ. ᤜᤧᤰᤁᤩᤠᤱ ᤋᤢᤘᤠ ᤆᤥ᤺ᤰᤔᤠ ᤏᤢ ᤔᤡ᤺ᤶ ᤛᤠᤓᤠᤱᤈᤠ ᤆᤠᤔᤠᤀᤥ#᥈:᥊᥈ ᤔᤡ᤺ᤶ ᤛᤠᤓᤠᤱᤈᤠ ᤆᤠᤔᤠᤀᤥ—ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤛᤡᤔᤧᤸᤗᤧᤴ ᤏᤡᤱᤘᤠ᤹ᤛᤥᤀᤥ ᤜᤢ᤹ᤛᤠᤶᤒᤠᤜᤠ᤹ ᤆᤥᤰ ᤐᤠᤱᤄᤢᤛᤡᤒᤠ ᤛᤠᤓᤠᤱᤈᤠ. ᤂᤧᤱᤃ ᤂᤖᤧ᤺ᤱ ᤆᤠᤔᤠ ᤏᤢ ᤆᤧᤸᤗᤧᤰᤛᤣ᤹ ᤌᤡ ᤌᤢᤱᤔᤠ ᤌᤡᤶᤗᤥ॥ ᤆᤰᤔᤧᤸᤗ᤹ᤀᤣ ᤔᤧᤒᤳᤇᤧᤖᤥ॥
ᤏᤛᤠᤏᤡᤒᤠᤜᤠ᤹ᤖᤧ ᤂᤢᤏᤡ᤹ ᤛᤣᤛᤣ ᤋᤱᤈᤢᤶ
43ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤕᤖᤡᤰ ᤔᤡᤰᤛᤣ᤺ᤴᤜᤠ᤹ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤔᤧᤈᤥᤃᤢᤒᤠᤸᤗᤧ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥ 44ᤜᤧᤰᤁᤩᤠᤱ ᤏᤛᤠᤴ ᤁᤧᤈᤥ᤺ᤰᤐᤠᤜᤠ᤹ ᤛᤥᤛᤥᤖᤡᤰ ᤔᤧᤕᤢᤅᤧ ᤔᤧᤘᤕᤧ॥ ᤜᤧᤰᤁᤣᤗ᤹ᤖᤡᤰ ᤂᤢᤏᤡ᤹ ᤆᤡᤃᤰᤘᤠᤜᤠ᤹ᤀᤠᤱ ᤛᤥᤖᤡᤰ ᤀᤥᤃᤵ ᤔᤧᤈᤥᤃᤢᤖᤥ॥ 45ᤜᤧᤰᤁᤩᤠᤱ ᤁᤢᤓᤠᤖᤧ ᤂᤢᤏᤡ᤹ ᤕᤠᤱᤛᤠᤁᤢᤴᤎᤣᤜᤠ᤹ ᤆᤡᤃᤰᤘᤠᤜᤠ᤹ ᤔᤧᤛᤱᤄᤢᤖ ᤆᤠᤕᤥ᤺ᤶᤒᤥᤀᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤕᤠᤱᤅᤡᤴ ᤔᤧᤜᤠ᤺ᤳᤋᤢᤛᤡᤖᤥ॥ 46ᤂᤧᤱᤜᤠ᤹ ᤌᤡᤰᤜᤢᤵ ᤔᤧᤒᤥ᤺ᤰᤂᤧᤀᤠᤱ ᤌᤡᤰᤕᤠ᤺ᤴᤎᤰ ᤔᤠᤱᤜᤡᤶᤔᤥ ᤔᤧᤒᤣᤖ ᤂᤢᤏᤡ᤹ ᤜᤡᤶ ᤜᤡᤶᤔᤥ ᤔᤡ᤺ᤶ ᤛᤠᤓᤠᤱᤈᤠ ᤔᤧᤈᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤛ᤺ᤳᤋᤧᤖ ᤂᤢᤏᤡ᤹ ᤏᤡᤱᤘᤠ᤹ ᤋᤩᤧᤀᤠᤱ 47ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤔᤧᤓᤥᤛᤢᤀᤠᤱ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤧᤱᤜᤠ᤹ ᤏᤢᤖᤡᤰ ᤔᤧᤔᤧᤳᤋᤢᤛᤡᤖᤥ॥ ᤜᤧᤰᤁᤩᤠᤱ ᤍᤠᤱᤒᤠᤸᤗᤧ ᤌᤡᤰᤕᤠ᤺ᤴᤎᤰ ᤛᤧᤴᤗᤵ ᤁᤧᤄᤥᤒᤠ ᤔᤏᤠᤜᤠ᤹ ᤂᤢᤏᤧ᤹ᤀᤥ ᤑᤥᤛᤢᤛᤡᤖ ᤋᤣ᤹ᤖᤢᤛᤡᤖᤥ॥
Currently Selected:
ᤛᤣ᤺ᤰᤕᤢᤰᤔᤡᤒᤠᤜᤠ᤹ 2: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.