᥈ ᤋᤡᤔᤥᤌᤡ 3
3
ᤁᤢᤏᤢᤵᤔᤠ ᤕᤧᤴᤜᤠ᤹ᤀᤥ ᤛᤠᤶᤕᤥ ᤔᤧ᤺ᤴᤏᤣᤒᤠᤜᤠ᤹
1ᤀᤠᤸᤗ ᤁᤢᤏᤢᤵᤔᤠ ᤕᤧᤴᤜᤠ᤹ᤀᤥ ᤁᤧᤛᤠᤰᤐᤠ ᤕᤧᤶ ᤋᤠ᤹᤺ ᤑᤠ᤹ᤀᤠᤱ ᤁᤧᤏᤡᤱᤘᤠ᤹ᤛᤥᤀᤥ ᤕᤢᤰᤂᤧ᤹ᤀᤥ॥ 2ᤂᤧᤴ ᤕᤧᤶᤔᤥᤒᤠ ᤔᤏᤠᤜᤠ᤹ᤃ ᤀᤠᤵᤑᤣᤰᤗᤰ ᤔᤡ᤺ᤶᤈᤡ ᤁᤧᤔᤧᤳᤇᤡᤱᤒᤠ. ᤕᤠᤱᤛᤠᤁᤢᤴᤎᤣᤖᤰ ᤔᤡ᤺ᤶᤈᤡ ᤁᤧᤔᤧᤵᤐᤠ ᤏᤢ ᤀᤠᤵᤑᤣᤰᤗᤰ ᤕᤶᤒᤠᤛᤡᤃᤧ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤀᤡ᤺ᤵᤐᤠ. ᤀᤠᤱᤍᤡᤱ ᤁᤧᤗ᤹ᤒᤠ ᤜᤧᤰᤁᤩᤠᤱ ᤔᤏᤠ ᤆᤠ᤺ᤳᤌᤡ ᤁᤧᤍᤣᤒᤠ ᤔᤧᤒᤥᤱᤗᤥ॥ ᤂᤧᤱᤜᤠ᤹ᤃ ᤐᤠᤔᤠᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤏᤥ ᤔᤧᤶᤒᤵᤔᤏᤠᤒᤠ. ᤀᤥᤒᤧ ᤁᤧᤈᤥᤃᤢ ᤁᤧᤒᤡᤖᤠᤱᤒᤧ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤴᤀᤡ᤺ᤵᤔᤏᤠᤒᤠ. ᤜᤧᤰᤁᤩᤠᤱ ᤛᤠᤶᤕᤥ ᤔᤧᤴᤀᤡ᤺ᤵᤔᤏᤠᤒᤠ ᤀᤠᤈᤡ᤺ᤴᤈᤡ᤺ᤶᤒᤠ ᤔᤧᤒᤥᤱᤗᤥ॥ 3ᤂᤧᤱᤜᤠ᤹ᤖᤧ ᤀᤠᤳᤋᤡᤴᤜᤠ᤹ᤀᤠᤱ ᤗᤢᤱᤔᤠ᤹ ᤔᤧᤴᤍᤢᤰᤋᤢᤴᤛᤡᤴ. ᤘᤣ᤹ᤜᤠ᤹ ᤗᤧᤵᤔᤡ ᤔᤧᤶᤒᤡᤖᤢᤴᤇᤡᤴ. ᤜᤧᤰᤁᤩᤠᤱ ᤆᤧ᤹ᤕᤠ ᤁᤧᤔᤒᤠ. ᤜᤧ᤹ᤗᤧ᤹ᤗᤧᤒᤠ. ᤁᤡᤵᤔᤠ ᤁᤧᤄᤢᤒᤠ. ᤏᤢᤒᤠ ᤐᤠᤴ ᤛᤡᤖᤠ᤹ᤔᤧᤴᤎᤠᤱᤔᤏᤠᤒᤠ ᤔᤧᤒᤥᤱᤗᤥ॥ 4ᤂᤧᤱᤜᤠ᤹ ᤘᤣ᤹ ᤔᤏᤠ ᤀᤡᤱᤗᤧᤰ ᤁᤧᤔᤧᤵᤐᤠ. ᤏᤡᤱᤘᤠ᤹ᤋᤠᤍᤠ ᤁᤧᤈᤥ᤺ᤰᤐᤠ. ᤀᤠᤱᤍᤡᤱᤅᤠᤱ ᤀᤡᤱᤃᤠ᤹ ᤀᤣ᤺ᤰ ᤁᤧᤗ᤹ᤒᤠ ᤔᤧᤒᤥᤱᤗᤥ॥ ᤂᤧᤱᤜᤠ᤹ᤖᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤧᤰᤘᤠ ᤕᤠᤶᤍᤠᤍᤠ ᤏᤡᤱᤘᤠ᤹ᤋᤠᤍᤠ ᤆᤥ᤺ᤰᤔᤠᤀᤣ ᤂᤢᤏᤡ᤹ ᤛᤡᤖᤠ᤹ᤌᤠᤱᤗᤥ॥ 5ᤂᤧᤱᤜᤠ᤹ᤃ ᤛᤠᤶᤕᤥᤒᤠ ᤔᤧᤗᤧᤱᤛᤡᤱ ᤁᤖ ᤔᤢᤰᤛᤠᤶᤔᤡᤴ ᤔᤧᤴᤜᤧᤵᤋᤢᤴᤗᤥ॥ ᤀᤰᤋᤱᤒᤠ ᤔᤏᤠᤜᤠ᤹ᤏᤢ ᤂᤧᤏᤧ᤹ᤃ ᤀᤣ᤺ᤰ ᤘᤕᤧ᤹ᤀᤥ॥
6ᤁᤢᤓᤠᤃ ᤜᤡᤶᤜᤡᤶ ᤔᤧᤒᤣ᤺ᤰᤁᤠᤱ ᤗᤠᤕᤥᤸᤗᤧ ᤁᤧᤵᤋᤢᤛᤡᤔᤠᤜᤠ᤹ ᤏᤢ ᤁᤠᤰ ᤐᤖᤡᤰᤗᤧᤴ ᤕᤠᤶᤏᤡᤱᤘᤠ᤹ᤀᤥ ᤁᤧᤒᤵᤔᤠ ᤏᤡᤱᤘᤠ᤹ ᤛᤢᤱᤃᤡᤰᤔᤠ ᤔᤧᤴᤇᤢᤔᤠᤜᤠ᤹ ᤕᤢᤰᤁᤥ ᤔᤧᤍᤠᤖᤢᤛᤡᤖᤥ॥ 7ᤂᤧᤴ ᤔᤧᤴᤇᤢᤔᤠᤜᤠ᤹ ᤀᤠᤰᤂᤧᤴ ᤔᤧᤜᤢ᤹ᤛᤡᤱᤛᤠᤱ ᤀᤠᤵᤑᤠᤸᤗᤧᤀᤠᤱ ᤛᤧᤰᤂᤠᤴ ᤁᤢᤛᤡᤱ ᤏᤡ᤺ᤵᤔᤠ ᤔᤧᤴᤇᤢᤰᤋᤢᤴᤗᤥ॥ 8ᤈᤣᤴᤏᤛ ᤏᤢ ᤈᤣᤶᤒᤪᤛᤛᤡᤖᤧ ᤔᤥᤛᤠᤴ ᤔᤧᤀᤳᤋᤢᤒᤠ ᤁᤢᤀᤡᤛᤡᤰ ᤂᤧᤴ ᤔᤏᤠᤜᤠ᤹ᤖᤧ ᤛᤧᤰᤂᤠᤴ ᤔᤧᤀᤳᤋᤢᤖᤥ॥ ᤂᤧᤴ ᤔᤏᤠᤜᤠ᤹ ᤑᤧᤴᤏᤡᤱᤘᤠ᤹ᤒᤠᤛᤡᤖᤥ. ᤜᤧᤰᤁᤩᤠᤱ ᤂᤢᤏᤡ᤹ ᤏᤛᤠ᤺ᤴᤏᤡᤴ ᤛᤧᤰᤂᤠᤒᤠ ᤔᤧᤈᤥᤰᤏᤧᤴ॥ 9ᤁᤖ ᤂᤧᤱᤜᤠ᤹ᤖᤧ ᤒᤠ ᤜᤧᤰᤁᤣᤖᤰ ᤆᤥ᤺ᤰᤔᤠᤖ ᤘᤠ᤹ᤔᤠ ᤔᤧᤴᤇᤢᤰᤋᤢᤴᤗᤥ॥ ᤈᤣᤴᤏᤛ ᤏᤢ ᤈᤣᤶᤒᤪᤛᤛᤡ ᤁᤢᤀᤡᤛᤡᤰ ᤂᤧᤱᤜᤠ᤹ᤖᤧᤀᤠᤱ ᤂᤢᤏᤡ᤹ ᤀᤍᤱ ᤆᤥ᤺ᤰᤔᤠᤴᤏᤠᤱ ᤁᤧᤖᤧᤰ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢ᤹ᤖᤥ॥
ᤐᤠᤘᤗᤖᤧ ᤋᤡᤔᤥᤌᤡᤴ ᤀᤡᤱᤈᤠᤱ ᤐᤡᤖᤢ᤹
10-11ᤁᤖ ᤂᤧᤏᤧ᤹ᤃ ᤀᤡᤱᤃᤠ᤹ ᤀᤠᤏᤡᤛᤠᤶᤔᤡᤴ. ᤀᤠᤕᤧᤵᤗᤧᤰᤁᤡᤴ. ᤜᤡᤱᤔᤴᤗᤧᤴ ᤀᤠᤏᤡᤱᤘᤠ᤹ᤛᤥᤰᤁᤡᤴ. ᤀᤠᤏᤛᤠ᤺ᤴᤏᤡᤴ. ᤀᤠᤜᤠᤱᤃᤧᤶᤛᤡᤱᤔᤠᤴ. ᤀᤠᤔᤡ᤺ᤶᤈᤡᤴ. ᤀᤠᤏᤠᤛᤡ ᤌ᤺ᤵᤔᤠᤴ. ᤋᤢᤰᤂᤣ ᤆᤩᤠᤱᤒᤠ ᤐᤠ᤺ᤴᤜᤠ᤹. ᤀᤠᤍᤢᤰᤂᤣᤜᤠ᤹ ᤁᤧᤖᤧᤰ ᤁᤧᤏᤠ᤺ᤳᤋᤢ ᤁᤧᤀᤡ᤺ᤳᤋᤢᤀᤠᤱ ᤁᤧᤘᤠ᤹ᤖᤥ॥ ᤜᤧᤰᤁᤩᤠᤱ ᤀᤣᤴᤋᤡᤀᤥᤁ. ᤀᤠᤀᤡᤁᤥᤏᤡᤕᤔ ᤏᤢ ᤗᤢᤛ᤻ᤋᤪᤠᤀᤥ ᤀᤡᤱᤃᤠ᤹ ᤋᤢᤔᤢᤱᤒᤠ ᤁᤧᤖᤧᤰ ᤋᤢᤰᤂᤣᤜᤠ᤹ ᤏᤢᤖᤡᤰᤁᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤀᤠᤱ ᤁᤧᤘᤠ᤹ᤖᤥ॥ ᤁᤖ ᤍᤠᤱᤒᤠᤸᤗᤧ ᤁᤠᤰ ᤂᤧᤴ ᤋᤢᤰᤂᤣ ᤗᤠᤰᤂᤣᤗᤠᤶ ᤀᤡᤱᤃᤠ᤹ ᤛᤧ᤺ᤵᤋᤠᤱᤗᤥ॥ 12ᤂᤪᤡᤛ᤻ᤋ ᤕᤧᤛᤢᤀᤥ ᤛᤠᤶᤕᤥᤒᤠ ᤜᤡᤱᤔᤴᤏᤥ ᤜᤡᤱᤔᤠ ᤏᤡᤱᤘᤠ᤹ ᤁᤧᤈᤥ᤺ᤰᤐᤠᤱᤃ ᤋᤢᤰᤂᤣ ᤆᤠᤀᤣᤖᤥ॥ 13ᤁᤖ ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤏᤠ ᤏᤢ ᤀᤡᤱᤃᤧᤗᤧᤰᤐᤠ ᤔᤏᤠᤜᤠ᤹ᤃ ᤘᤣ᤹ ᤔᤏᤠᤜᤠ᤹ ᤀᤡᤱᤗᤧᤰᤋᤢᤶᤛᤡᤶᤒᤠ. ᤋᤠᤵᤑᤧ᤺ᤸᤗᤡᤰ ᤔᤧᤳᤋᤢᤶᤛᤡᤶᤒᤠ ᤗ᤹ᤖᤡᤰ ᤔᤧᤀᤡ᤺ᤳᤋᤢᤖ ᤔᤧᤒᤣ᤺ᤰᤁᤡᤸᤗᤧ ᤀᤠᤵᤑᤣᤰ ᤀᤡᤱᤔᤧᤗᤧᤰᤛᤡᤱᤗ ᤛᤠ᤹ᤖᤡᤰᤁᤠᤱ ᤋᤠᤵᤑᤧ᤺ᤶᤒᤠ ᤔᤧᤒᤥᤱᤗ ᤔᤧᤒᤣ᤺ᤰᤗᤥ॥ 14ᤁᤖ ᤂᤧᤏᤧ᤹ᤃ ᤁᤧᤄᤥᤛᤢᤒᤠ ᤏᤡᤛᤠᤶᤔᤥ ᤆᤰᤔᤧᤸᤗ᤹ᤀᤣ ᤐᤳᤇᤧ᤹ᤀᤥ॥ ᤂᤧᤴ ᤏᤡᤛᤠᤶᤜᤠ᤹ ᤛᤧᤰᤂᤠᤀᤣ ᤔᤧᤈᤥᤰ ᤑᤠ᤹ᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢ᤹ᤖᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤏᤡᤛᤠᤶ ᤁᤧᤜᤢ᤹ᤒᤠᤜᤠ᤹ ᤋᤠ᤺ᤰᤐᤥ ᤕᤢᤱᤔᤠ ᤁᤧᤛᤢᤰᤋᤢᤛᤡ᤹ᤖᤥ॥ 15ᤂᤧᤏᤧ᤹ ᤁᤧᤈᤢ᤺ᤰᤋᤧᤀᤠᤱᤎᤥ ᤏᤢᤖᤡᤰᤁᤠᤱ ᤛᤣᤛᤣ ᤛᤠᤶᤕᤥᤛᤠᤵᤗᤠ ᤁᤧᤗᤧᤛ᤻ᤛᤢᤀᤠᤱ ᤁᤧᤘᤠ᤹ᤖᤥ॥ ᤒᤠ ᤁᤴ ᤐᤠ᤺ᤴᤜᤠ᤹ᤀᤥᤗᤠᤶ ᤂᤪᤡᤛ᤻ᤋ ᤕᤧᤛᤢᤴ ᤏᤛᤠᤴ ᤆᤥ᤺ᤰᤔᤠ ᤂᤥᤃᤧᤍᤧᤵᤐᤠ ᤛᤧᤴᤗᤵᤖᤧᤴ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤀᤡᤴ ᤁᤧᤄᤥᤛᤢ᤹ᤖᤥ॥ 16ᤁᤠᤰ ᤛᤠᤶᤕᤥᤛᤠᤵᤗᤠᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠᤶᤈᤠᤱᤘᤠᤗᤠᤶ ᤀᤠᤒᤡᤖᤧᤒᤠᤖᤥ. ᤜᤧᤰᤁᤩᤠᤱ ᤂᤧᤱᤃ ᤛᤠᤶᤕᤥᤒᤠ ᤏᤡᤛᤠᤶ ᤐᤡᤔᤠ. ᤑᤧᤴ ᤕᤠ᤺ᤶᤒᤰ ᤁᤧᤈᤥᤰᤐᤧᤴ ᤏᤢᤖᤡᤰᤁᤠᤱ ᤋᤥ᤺ᤶᤔᤠ. ᤜᤧᤰᤁᤩᤠᤱ ᤏᤛᤠᤏᤡᤒᤠ ᤜᤡᤱᤔᤴᤏᤥ ᤜᤡᤱᤔᤠ ᤀᤥ᤺ᤴᤎᤠᤰ ᤐᤡᤔᤠ. ᤛᤠ᤹ᤖᤡᤰ ᤕᤠ᤺ᤶᤒᤰ ᤀᤠᤒᤡ᤹ᤖᤥ॥ 17ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ᤖᤧ ᤁᤠᤰ ᤏᤢᤒᤠ ᤕᤠ᤺ᤶᤒᤰᤜᤠ᤹ ᤆᤥ᤺ᤰᤔᤠ ᤔᤧᤛᤢᤰᤋᤢᤖ ᤑᤠ᤹ᤀᤠᤱ ᤛᤠᤶᤕᤥᤛᤠᤵᤗᤠ ᤀᤠᤒᤡᤖᤧᤒᤠᤖᤥ॥
Currently Selected:
᥈ ᤋᤡᤔᤥᤌᤡ 3: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.