᥈ ᤋᤡᤔᤥᤌᤡ 2
2
ᤂᤪᤡᤛ᤻ᤋᤖᤧ ᤁᤢᤏᤡᤱᤘᤠ᤹ᤀᤡᤖᤧ ᤂᤥ᤺ᤵᤋᤢᤒᤠ ᤌᤰᤛᤢᤒᤠ
1ᤜᤧᤰᤁᤣ᤺ᤸᤗᤧ ᤀᤠᤛ᤻ᤛᤠᤀᤣ. ᤂᤧᤏᤧ᤹ᤃ ᤂᤪᤡᤛ᤻ᤋ ᤕᤧᤛᤢᤀᤥ ᤁᤧᤘᤠ᤹ᤒᤠ ᤗᤢᤱᤃᤢᤶᤗᤠᤶᤒᤠ ᤁᤧᤎᤢᤶᤒᤠ ᤐᤥ᤺ᤰᤂᤧ᤹ᤀᤥ॥ 2ᤕᤖᤡᤰ ᤋᤥ᤺ᤴᤍᤡᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤁᤧᤄᤧᤵᤛᤢᤒᤠ ᤀᤠᤒᤠ᤺ᤴᤏᤡᤴ ᤁᤧᤏᤡᤱᤘᤠ᤹ᤀᤡᤖᤧ ᤂᤥ᤺ᤵᤋᤢᤛᤡᤒᤠ ᤔᤏᤠᤜᤠ᤹ ᤜᤢ᤹ᤔᤠ ᤁᤧᤛᤢᤰᤐᤠ ᤏᤛᤠ᤺ᤴᤛᤠᤒᤠ ᤘᤣ᤹ ᤔᤏᤠᤜᤠ᤹ ᤜᤢᤰᤛᤢᤵᤋᤧᤛᤧ᤹ᤀᤥ॥
3ᤂᤪᤡᤛ᤻ᤋ ᤕᤧᤛᤢᤖᤧ ᤛᤧᤰᤂᤠᤀᤣᤒᤠ ᤁᤢᤎᤰᤛᤢᤒᤠ ᤁᤢᤀᤡᤛᤡᤰ ᤂᤧᤏᤧ᤹ ᤀᤠᤏᤡᤃᤧᤏᤢ ᤋᤢᤰᤂᤣ ᤆᤠᤔᤠᤀᤥ ᤆᤢᤶ ᤐᤥ᤺ᤰᤂᤧ᤹ᤀᤥ॥ 4ᤌᤰᤛᤢᤒᤠ ᤋᤢᤖᤠᤀᤥ ᤁᤧᤕᤠᤰᤐᤠ ᤀᤠᤳᤋᤡᤴ ᤌᤰᤛᤢᤒᤠᤴᤏᤠᤱ ᤜᤡᤶ ᤕᤠ᤺ᤶᤒᤰᤁᤥ ᤔᤧᤜᤶᤛᤡᤱᤅᤡᤴ. ᤁᤖ ᤂᤧᤸᤗᤧᤃ ᤂᤢᤏᤧ᤹ ᤁᤢᤎᤰᤋᤢᤶᤒᤠᤸᤗᤧ ᤁᤢᤏᤡᤱᤘᤠ᤹ ᤋᤠᤔᤠ ᤏᤡᤱᤘᤠ᤹ ᤆᤥᤃᤢ᤹ᤖᤥ॥ 5ᤜᤰᤆᤠ᤺ᤳᤋᤥ ᤁᤧᤗᤥ᤺ᤰᤐᤧᤴ ᤜᤰᤆᤠ᤺ᤳᤋᤥᤒᤠ ᤌᤡᤶᤜᤠ᤹ ᤁᤢᤀᤡᤛᤡᤰ ᤔᤧᤗᤥ᤺ᤰᤏᤧᤴᤏᤧ ᤑᤠ᤹ᤃᤪ ᤂᤧᤸᤗᤧ ᤌᤢᤶᤄᤥ ᤔᤧᤄᤥᤛᤢᤴᤗᤥ॥ 6ᤕᤠᤶᤒᤢᤎᤡᤰᤁᤠᤱ ᤕᤠ᤺ᤴᤃᤧᤔᤒᤠ ᤔᤏᤠ᤺ᤸᤗᤧᤀᤣ ᤁᤧᤍᤢᤶᤒᤠ ᤆᤠ᤺ᤴ ᤁᤠᤰᤏᤢ ᤋᤃᤡ ᤂᤢᤏᤧ᤹ᤀᤣ ᤆᤠᤔᤠ ᤂᤥᤔᤠ ᤐᤥᤱᤗᤥ॥ 7ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤠ᤺ᤴᤜᤠ᤹ ᤏᤢᤖᤡᤰᤁᤠᤱ ᤏᤡᤱᤘᤠ᤹ ᤀᤡ᤺ᤳᤋᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤍᤠᤱᤒᤠᤸᤗᤧ ᤂᤧᤏᤧ᤹ ᤁᤠᤰ ᤐᤠ᤺ᤴᤜᤠ᤹ ᤁᤢᤛᤡᤱ ᤏᤡ᤺ᤵᤔᤠ ᤑᤠ᤹ᤀᤠᤱ ᤀᤡ᤺ᤳᤇᤡᤱᤛᤠᤶ ᤁᤧᤒᤡ᤹ᤖᤥ॥
8ᤛᤡᤔᤧᤴᤗᤠᤶ ᤕᤠᤶᤔᤥ ᤁᤧᤜᤡᤱᤒᤠ ᤍᤠᤀᤢᤍ#᥈:᥎ ᤍᤠᤀᤢᤍᤧᤴ ᤀᤡᤛᤪᤠᤀᤡᤗᤡᤜᤠ᤹ᤖᤧᤴ ᤕᤶᤒᤠ ᤜᤠᤱ ᤘᤕᤧ॥ ᤂᤢᤏᤧ᤹ ᤂᤪᤡᤛ᤻ᤋᤧᤴᤏᤢ᤺ᤸᤗᤧ ᤋᤱᤒᤣ ᤜᤧᤴᤇᤡᤱ ᤌᤡᤰ (᥇᥆᥆᥆) ᤋᤃᤡ ᤘᤕᤧ॥ ᤍᤠᤀᤢᤍᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤀᤥ ᤌᤡᤰᤐᤠ ᤔᤛᤡᤜ (ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ) ᤐᤥᤱᤗᤥ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤋᤠᤱᤛᤧ᤺ᤵᤛᤧ ᤂᤢᤏᤧ᤹ᤀᤣ ᤐᤠᤱᤄᤢᤒᤠᤖᤥ ᤑᤠ᤹ᤀᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤛᤠᤵᤋᤢᤀᤠᤱ ᤘᤕᤧ॥ ᤜᤠᤱᤅᤡᤸᤗᤧ ᤁᤢᤔᤢ᤹ᤀᤡᤍᤠᤱᤛᤠ ᤕᤧᤛᤢ ᤂᤪᤡᤛ᤻ᤋᤧᤴ ᤏᤡᤱᤘᤠ᤹ ᤀᤡ᤺ᤳᤋᤧ᤹ᤀᤥ॥ ᤀᤡᤱᤃᤠ᤹ ᤀᤡᤱᤓᤴ ᤆᤥᤃᤢᤱᤒᤠ ᤛᤢᤏᤠᤀᤡᤱᤅᤡᤴ ᤒᤠ ᤁᤴᤏᤣᤖᤥ॥ 9ᤒᤠ ᤂᤧᤴ ᤛᤢᤏᤠᤀᤡᤱᤅᤡᤴ ᤀᤡᤱᤃᤠ᤹ ᤀᤡᤱᤓᤥᤛᤢᤱᤒᤠᤸᤗᤧ ᤆᤥᤃᤢᤸᤗᤧ ᤋᤢᤰᤂᤣ ᤆᤠᤀᤠᤖ ᤘᤠ᤹ᤀᤠ. ᤜᤧᤰᤁᤩᤠᤱ ᤁᤢᤓᤠᤱ ᤁᤧᤓᤣ᤺ᤶᤒᤠ ᤁᤢᤀᤡᤛᤡ᤺ᤰᤁᤠᤱ ᤀᤡᤄᤣ᤺ᤱᤅᤥ ᤌᤠᤀᤠᤖᤥ॥ ᤁᤖ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤱᤃ ᤀᤠᤵᤑᤠᤸᤗᤧᤀᤠᤱ ᤀᤡᤄᤣ᤺ᤱᤅᤥ ᤔᤧᤎᤠᤏᤧᤴᤗᤥ॥ 10ᤂᤧᤸᤗᤧᤆᤥᤃᤢᤸᤗᤧᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤛᤡᤒᤠ ᤁᤢᤔᤏᤠᤜᤠ᤹ ᤂᤪᤡᤛ᤻ᤋ ᤕᤧᤛᤢᤀᤥ ᤛᤧᤴᤗᤵ ᤏᤢ ᤔᤧᤴᤏᤢᤵᤔᤏᤠᤒᤠ ᤔᤡᤔᤡᤍᤡᤱ ᤔᤧᤄᤥᤛᤢᤖ ᤑᤠ᤹ᤀᤠᤱ ᤁᤠᤰ ᤋᤢᤰᤂᤣᤜᤠ᤹ ᤀᤡᤱᤃᤠ᤹ ᤌᤶᤔᤠ ᤛᤢᤰᤋᤢᤱᤗᤥ॥
11ᤁᤴ ᤐᤠ᤺ᤵᤔᤏᤠᤒᤠ ᤐᤠ᤺ᤴᤏᤡᤱᤃ ᤛᤧᤰᤂᤠᤀᤣᤖᤥ.
ᤀᤠᤏᤡ᤹ ᤂᤢᤏᤧ᤹ᤏᤢᤀᤣ ᤀᤠᤛᤩᤧᤀᤠᤱ ᤀᤠᤘᤠ᤹ᤏᤧ ᤑᤠ᤹ᤃᤪ ᤂᤢᤏᤧ᤹ᤏᤢᤀᤣ ᤀᤠᤜᤡᤱᤗᤥ॥
12ᤀᤠᤏᤡ᤹ ᤆᤰᤔᤧᤸᤗ᤹ᤀᤣ ᤏᤠᤛᤡ ᤀᤠᤎ᤺ᤳᤋᤢᤶᤏᤧ ᤑᤠ᤹ᤃᤪ ᤀᤠᤏᤡ᤹ᤀᤠᤱ ᤂᤢᤏᤧ᤹ᤏᤢᤀᤣ ᤜᤠᤱ ᤀᤠᤈᤥᤃᤢᤶ॥
ᤀᤠᤏᤡ᤹ ᤂᤢᤏᤧ᤹ ᤀᤠᤏᤠ᤹ᤖᤢᤶᤏᤧ ᤑᤠ᤹ᤃᤪ. ᤂᤢᤏᤧ᤹ᤀᤠᤱ ᤀᤠᤏᤡ᤹ ᤀᤠᤏᤠ᤹ᤖᤥ॥
13ᤀᤠᤏᤡ᤹ ᤏᤛᤠ᤺ᤴᤛᤠᤒᤠ ᤀᤠᤶᤒᤥᤱᤏᤧᤴᤇᤠᤱ ᤂᤢᤏᤧ᤹ᤃ ᤏᤛᤠ᤺ᤴᤛᤠᤒᤠ ᤆᤥᤰᤗᤥ॥
ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤀᤠᤵᤑᤣᤰ ᤏᤠ᤹ᤛᤡᤱᤔᤠ ᤔᤧᤛᤢᤰᤏᤧᤴᤗᤥ॥
ᤁᤢᤛᤠᤱ ᤁᤧᤗᤒᤠ ᤕᤠ᤺ᤶᤒᤰ
14ᤛᤣᤛᤣᤜᤢᤵᤗᤰᤁᤥᤒᤠ ᤁᤠᤰ ᤔᤏᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤔᤠᤀᤥ ᤜᤠᤖᤠ᤹ ᤂᤧᤱᤜᤠ᤹ ᤐᤠ᤺ᤴᤛᤢᤳᤗᤠᤀᤥ ᤐᤠ᤺ᤴᤎᤱ ᤔᤧᤴᤈᤥ᤺ᤰᤏᤧᤴᤗ ᤑᤠ᤹ᤀᤠᤱ ᤛᤠᤶᤍᤡᤱ ᤐᤡᤖᤧᤛᤧ᤹ᤀᤥ॥ ᤂᤧᤴ ᤐᤠ᤺ᤴᤎᤱᤅᤡᤸᤗᤧ ᤏᤢᤒᤠ ᤔᤧᤒᤥᤱᤏᤧᤴ. ᤁᤖ ᤁᤧᤄᤧᤶᤒᤠᤜᤠ᤹ᤖᤧ ᤂᤢᤏᤡ᤹ ᤀᤡᤶᤔᤥᤰᤗᤰ ᤐᤥᤱᤗᤥ॥ 15ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤖᤠ᤹ ᤌᤠᤱᤗ ᤑᤠ᤹ᤀᤠᤱ ᤏᤢ᤺ᤖᤡᤰᤁᤠᤱ ᤁᤧᤛᤢᤰᤛᤢᤰ ᤕᤠ᤺ᤶᤒᤰ ᤆᤥᤃᤧ᤹ᤀᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤧᤰᤂᤠᤒᤠ ᤐᤣᤗᤡᤃᤧᤴ ᤁᤢᤒᤠ᤺ᤴᤈᤠᤰᤁᤡᤴ ᤌᤥ ᤕᤥ ᤔᤧᤴᤈᤥ᤺ᤰᤁᤣ ᤜᤢ᤹ᤖᤧᤛᤧ᤹ᤖ ᤛᤡᤖᤡᤱᤔᤔᤠ ᤔᤧᤶᤒᤥᤱᤅᤣ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤐᤥ᤺ᤰᤂᤧ᤹ᤀᤥ॥ 16ᤁᤖ ᤂᤧᤏᤧ᤹ᤃ ᤁᤢᤒᤢᤱᤏᤠ ᤁᤢᤛᤶᤒᤠ ᤀᤍᤱ ᤐᤠ᤺ᤴᤎᤱᤅᤥᤗᤠᤶ ᤀᤣ᤺ᤰ ᤘᤕᤧ᤹ᤀᤥ॥ ᤜᤧᤰᤋᤱᤒᤠ ᤐᤠ᤺ᤴᤎᤱᤅᤡᤸᤗᤧ ᤏᤛᤠᤏᤡᤒᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤔᤠ᤺ᤱᤄᤠ ᤋᤣ᤹ᤖᤢᤛᤡᤖᤥ॥ 17ᤜᤧᤰᤋᤱᤒᤠ ᤐᤠ᤺ᤴᤜᤠ᤹ᤃ ᤀᤠᤵᤑᤠᤸᤗᤧᤀᤠᤱ ᤔᤧᤴᤘᤣ᤺ᤵᤔᤏᤠᤒᤠ ᤕᤠᤱᤄᤣ᤺ᤰ ᤁᤢᤀᤡᤛᤡ᤺ᤰᤗᤥ॥ ᤀᤰᤋᤱᤒᤠ ᤛᤡᤰᤛᤠᤶᤒᤠᤜᤠ᤹ᤀᤥᤃ ᤜᤠᤀᤡᤔᤣᤏᤡᤕᤛ ᤏᤢ ᤑᤡᤗᤣᤋᤛᤛᤡᤖᤥ॥ 18ᤂᤧᤱᤜᤠ᤹ᤖᤧᤃ ᤛᤧᤰᤂᤠᤒᤠ ᤔᤠᤖᤠᤶᤔᤡᤴ ᤗᤧᤖᤧᤳᤇᤢᤀᤠᤱ ᤀᤠᤏᤡ᤹ ᤛᤡᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤠᤱᤃ ᤋᤃᤡ ᤐᤥ᤺ᤰᤂᤧ ᤆᤢᤖᤧᤖᤥ ᤗ᤹ᤖᤡᤰ ᤜᤢ᤹ᤛᤢᤛᤡᤀᤠᤱ ᤁᤢᤓᤠ ᤏᤛᤠ᤺ᤴᤏᤡᤒᤠᤜᤠ᤹ᤖᤧ ᤂᤢᤏᤡ᤹ ᤏᤛᤠ᤺ᤴᤏᤡᤴ ᤗᤧᤱᤛᤢᤖ ᤘᤠ᤹ᤛᤡᤖᤥ॥
19ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤛᤠᤶᤔᤡᤸᤗᤧᤴ ᤕᤢᤰᤛᤡᤱᤃᤧᤴ ᤐᤠᤱᤕᤢᤰᤁᤡᤴ ᤔᤧᤶᤔᤢᤴᤏᤣᤀᤣ ᤏᤧᤖᤥ. ᤜᤧᤰᤁᤩᤠᤱ ᤀᤰᤂᤣᤗ᤹ᤖᤡᤰ ᤛᤠᤵ ᤗᤰᤛᤡᤱᤅᤠᤱ ᤘᤠ᤹ᤖᤥ. “ᤍᤠᤱᤒᤠᤸᤗᤧ ᤀᤠᤵᤑᤣᤰ ᤁᤢᤔᤏᤠᤜᤠ᤹ ᤁᤢᤛᤡᤱ ᤏᤡ᤺ᤳᤋᤢᤛᤡ᤹ᤖᤥ.” ᤜᤧᤰᤁᤩᤠᤱ “ᤍᤠᤱᤒᤠᤸᤗᤧ ᤁᤢᤔᤡᤱ ᤁᤧᤗᤥᤱᤒᤠᤜᤠ᤹ ᤁᤠᤰ ᤗᤠᤕᤥᤗᤠᤶ ᤔᤠ᤺ᤱᤄᤠᤀᤣ ᤔᤧᤒᤥᤱᤗᤖᤥ॥”
20ᤕᤶᤒᤠ ᤜᤡᤶᤔᤥ ᤕᤖᤡᤰ ᤐᤖᤡᤰᤗᤧᤴ ᤛᤠᤶᤔᤩᤠᤱ ᤏᤢ ᤕᤢᤵᤐᤠ ᤜᤧᤰᤁᤩᤠᤱ ᤛᤡᤱ ᤏᤢ ᤂᤠᤶᤔᤡᤸᤗᤧᤴ ᤆᤧᤳᤌᤩᤠ ᤏᤢ ᤂᤵᤐᤩᤠᤜᤠ᤹ ᤔᤧᤘᤠ᤹ᤖᤥ॥ ᤁᤢᤓᤠᤃ ᤀᤡᤱᤎᤠᤱᤒᤠ ᤏᤢ ᤁᤢᤓᤠ ᤀᤡᤱᤎᤠᤱᤔᤣ᤺ᤴᤒᤠ ᤕᤠ᤺ᤶᤒᤰᤁᤥ ᤀᤥᤃᤵ ᤐᤥᤱᤗᤥ॥ 21ᤀᤠᤳᤋᤡᤸᤗᤧ ᤑᤧᤴᤕᤠ᤺ᤶᤒᤰᤁᤡᤴ ᤗᤧᤖᤢᤀᤠᤱ ᤛᤣᤛᤣ ᤆᤥ᤺ᤰᤛᤡᤱ. ᤂᤧᤱᤃ ᤀᤡᤱᤎᤠᤱᤒᤠ ᤕᤠ᤺ᤶᤒᤰᤁᤥ ᤀᤥᤃᤵ ᤐᤥᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤁᤢᤴᤍᤠᤱᤒᤠᤸᤗᤧ ᤁᤢᤕᤠ᤺ᤶᤒᤰᤁᤥ ᤀᤠᤳᤋᤡᤴ ᤏᤢᤒᤠ ᤕᤠ᤺ᤶᤒᤰᤁᤥᤛᤠᤱ ᤂᤧᤱᤃ ᤀᤥᤃᤵ ᤐᤥᤱᤔᤠ ᤕᤠᤖᤡᤵ ᤐᤥᤱᤗᤥ॥
22ᤌᤠᤱᤒᤧᤴ ᤔᤧᤴᤇᤡᤕᤠ᤹ ᤗ᤹ᤔᤠᤗᤠᤶ ᤁᤧᤍᤠᤒᤠ ᤑᤧᤴ ᤏᤡᤱᤘᤠ᤹ᤗᤠᤶ ᤀᤣ᤺ᤰ ᤘᤕᤧ᤹ᤀᤥ॥ ᤜᤧᤰᤁᤩᤠᤱ ᤛᤣᤛᤣ ᤏᤡᤱᤘᤠ᤹ᤀᤥᤗᤠᤶ ᤍᤠᤱᤒᤠᤴᤏᤢ ᤋᤢᤘᤠ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ᤏᤢ ᤛᤠᤶᤕᤥᤏᤡᤔᤥ. ᤏᤛᤠ᤺ᤴᤏᤥ. ᤔᤡ᤺ᤶᤈᤡᤀᤥ ᤜᤧᤰᤁᤩᤠᤱ ᤛᤏᤠᤖᤢᤱᤅᤥ ᤘᤕᤧ᤹ᤀᤥ॥ 23ᤁᤖ ᤁᤢᤒᤢᤱᤏᤠ ᤁᤢᤛᤶᤒᤠ ᤐᤠ᤺ᤴᤎᤱᤅᤡᤴ ᤏᤠ᤹ᤖᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧᤃ ᤂᤧᤔᤠ᤹ᤖᤰ ᤑᤥ᤺ᤰᤂᤢ᤹ᤖᤥ॥ 24ᤍᤠᤱᤒᤠᤸᤗᤧ ᤁᤧᤛᤧᤘᤠᤖᤥᤒᤠᤴ ᤂᤣᤔᤠ ᤔᤧᤏᤢ᤹ᤏᤧᤴᤗᤥ॥ ᤂᤢᤏᤧ᤹ᤃ ᤁᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤐᤠ. ᤜᤢ᤹ᤔᤠ ᤁᤧᤛᤢᤰᤐᤠ. ᤜᤧᤰᤁᤩᤠᤱ ᤏᤡᤱᤘᤠ᤹ ᤜᤠᤱᤃᤧᤃᤧᤶᤛᤡᤱᤒᤠ ᤐᤥᤱᤔᤠ ᤐᤥᤱᤗᤥ॥ 25ᤜᤧᤰᤁᤩᤠᤱ ᤋᤰᤗᤧᤱᤘᤠᤀᤥ ᤁᤧᤒᤥ᤺ᤰᤐᤠᤜᤠ᤹ᤀᤠᤱ ᤛᤡᤰ ᤏ᤺ᤶᤏ᤺ᤶᤔᤠᤱ ᤂᤠᤜᤢᤴ ᤐᤡᤔᤠ ᤁᤧᤛᤢᤰᤐᤠ ᤐᤥᤱᤔᤠ ᤐᤥᤱ. ᤜᤧᤰᤁᤣᤗ᤹ᤖᤡᤰ ᤛᤧᤰᤂᤠᤒᤠ ᤐᤠᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤡ᤹ ᤗᤠᤕᤥᤗᤠᤶ ᤏᤢ᤺ᤰᤋᤢ ᤋᤠᤖᤢᤛᤡᤖᤖᤥ॥ 26ᤜᤧᤰᤁᤩᤠᤱ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤆᤥ᤺ᤰᤔᤠ ᤐᤠᤱᤔᤠᤛᤡ ᤑᤠ᤹ᤀᤠᤱ ᤀᤡᤈᤥ ᤕᤢᤰᤋᤢᤛᤡᤒᤠ ᤐᤠ᤺ᤴᤏᤡᤴ ᤂᤢᤏᤡ᤹ ᤏᤡᤱᤘᤠ᤹ ᤛᤣ ᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤀᤠᤱ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤀᤡᤈᤥᤗᤠᤶ ᤐᤡᤶᤔᤠ ᤔᤧᤛᤢᤰᤗᤥ॥
Currently Selected:
᥈ ᤋᤡᤔᤥᤌᤡ 2: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.