2 Reyes 22
22
Yat'el Josías, muc' ajwalil yu'un Judá
(2 Cr 34.1-2)
1Te Josías#Jer 3.6. waxaqueb ya'wilal a te c'alal och ta muc' ajwalile. Jalaj ta muc' ajwalil ta Jerusalén bulucheb xcha'winic (31) ja'wil. Te sme'e Jedida sbiil, yantsil-nich'an Adaía, ja' slumal te ch'in lum Boscat. 2Te yat'el Josías lec ta sit te Cajwaltique, melel ta spisil te bitic la spase, ja' la st'unbey te yat'el David, te ja' antiguo sme'-state. Mero ja' la st'unbey, ma'yuc banti jowej yu'un.
La staic libro yu'un mandaliletic
(2 Cr 34.8-33)
3Ta waxaclajuneb ja'wil yochel ta muc' ajwalil a te Josías, la sticun bael ta templo yu'un Cajwaltic te Safán snich'an Azalía, smam Mesulam, te ja' cronista yu'une, jich la yalbey:
4—Baan, c'opona te Hilcías, te muc' sacerdote, albeya ac'a stsob te taq'uin ich'bil bael ta templo yu'un Cajwaltic, ja' te la sc'anbeyic te yajwal lum te jcanan-ti'nailetique. 5Ac'a yac'bey ta sc'ab te mach'atic ay ta swentaic te at'el ta templo yu'un Cajwaltic, swenta yu'un ya me stojic a te mach'atic yacalic ta at'el ta xchajbanel te templo, 6ja'ic te carpinteroetic, maestroetic yu'un at'el, soc te albañiletique. Soc ya me smanic te'etic soc walubil tonetic yu'un ya yich' xan chajbanel a te templo. 7Soc ya me awalbey te ma ba ya yich'beyic ta wenta te taq'uin ya yac'beyic ta sc'abique, melel toj yo'tanic yacalic ta spasel yat'elic —xi'.
8Hilcías te muc' sacerdote, la yalbey te Safán, te cronista, te la staic ta templo yu'un Cajwaltic te slibroil te mandaliletique. La yac'bey ta sc'ab Safán. Te Safán la sjam yil te libro. 9Patil ba yalbey yaiy te muc' ajwalil te la staiquix te libro, jich c'o yalbey:
—Te abatetic awu'une la stsobiquix te taq'uin ay ta templo, la yac'beyiquix ta sc'abic te mach'atic swentainejic xchajbanel xan te templo yu'un Cajwaltic —xi'.
10Te Safán la yalbey te muc' ajwalil te ac'bot ta sc'ab jun libro yu'un te muc' sacerdote Hilcías. Te Safán la sc'oponbey yaiy te jun te muc' ajwalile. 11C'alal la yaiy te muc' ajwalil te bila ya yal te libro yu'un mandalil, la xch'i' sc'u' yu'un. 12Ora la spas ta mandal te Hilcías, Ahicam snich'an Safán, Acbor snich'an Micaías, Safán ja' te cronista yu'une, soc Asaías abat yu'un te muc' ajwalile, jich la yalbey:
13—Baan jojc'obeyaic bi xi' cu'un te Cajwaltique, soc bi xi' yu'un uuc te yajwal te lume, soc ta spisil Judá ta swenta te bit'il la yich' tael te libro. Te ya cale, ilinem yo'tan cu'untic te Cajwaltic, melel te antiguo jme'-jtatic tele, ma ba la yac' ta yo'tanic te bila ya yal te libro in to. Ma ba la spasic te bitic ts'ibubil ta libro —xi'.
14Te Hilcías, Ahicam, Acbor, Safán soc Asaías, ba yilic te antsil-j'alwanej te Hulda sbiil, te yinam Salum te snich'an Ticva, smam Harhas, te swentainej te sq'uejibal c'u'il ta templo. Te Hulda nainem ta Xchebal Barrio yu'un Jerusalén. C'alal la sc'oponic, 15jich albotic yu'un:
—Ja' sujt'ib c'op yu'un Cajwaltic, Dios yu'un Israel: “Albeya te mach'a la sticunex tel te ay bila tal ajojc'obonique, 16te jo'one Ajwalilon jich ya cal: ‘Ya me cac' taluc tulan wocol ta stojol in q'uinal to, soc ta stojol te mach'atic nainemic tey a, jich te bit'il ya yal te libro la sc'oponix te muc' ajwalil ta Judá. 17Te yajwal lum la xch'ayon ta yo'tanic, och xchic'beyic pom yantic diosetic, la yaq'uic ilinuc co'tan yu'un spisil te bitic la spasique. Ja' yu'un mero til jajch'el slab co'tan ta stojol in q'uinal to, ma ba ya xtup' te slab co'tane’, xoon. 18Albeyaic jiche te muc' ajwalil yu'un Judá te la sticunex tel ta sjojc'oyel ta stojol te Cajwaltique, te jich yaloj xan te Cajwaltic te Dios yu'un Israel: ‘Te bit'il la awac' ta awo'tan te bi la awaiye, 19soc te la amel awo'tan yu'une, soc te la apejc'an aba ta jtojol yu'un te c'alal la awaiy te bi la cal ta jamal ta stojol te lume soc te mach'atic nainemic tey ae te ya xtal tulan wocol ta stojolic soc c'ax boloben sc'oplalic ya xc'otic, soc te la ach'i' ac'u'e, soc te oc'at ta jtojole, ja' yu'un te jo'one la caiybat te ac'ope’. Jo'on Ajwalilon te ya calbate. 20Ja' yu'un ya me cac' te lamal q'uinal a te ya xlajate, ya me xba ajoin te anima ame'-atate. Ma ba ya awilix te wocol ya cac'bey ta stojol te q'uinal in to”, xi' te Cajwaltic —xi' te Huldae.
Te mach'atic la sticun te muc' ajwalile, sujt' bael ta stojol, bajt' ta alel yaiy te sujt'ib te sc'ope.
Currently Selected:
2 Reyes 22: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.