2 Reyes 21
21
Yat'el Manasés, muc' ajwalil yu'un Judá
(2 Cr 33.1-20)
1Ay lajchayeb ya'wilal a te Manasés c'alal och ta muc' ajwalile. Jalaj ta muc' ajwalil ta Jerusalén jo'lajuneb yoxwinic (55) ja'wil. Te sme'e Hepsiba sbiil. 2Pero te yat'el ma ba lec ta sit Cajwaltic,#Jer 15.4. yu'un ja' nix la spas te bitic amen nax sba la spasic te jaychajp nacionetic te ch'ojbotic loq'uel ta stojolic yu'un Cajwaltic te israeletique. 3La xcha'pas xan te toyol ch'uunjibaletic te la sjin te Ezequías, ja' te state. La spasbey scajtijib ta chiq'uel smajt'an te Baal; la spas sloc'omba Asera, jich nix te bit'il la spas te Acab, te muc' ajwalil ta Israel a; soc la xch'uun soc la yich' ta muc' spisil te eq'uetic ta ch'ulchane. 4Soc la spas ta templo yu'un Cajwaltic scajtijib ta chiq'uel majt'aniletic yu'un yantic bitic cuybil ta Dios, manchuc me yaloj Cajwaltic te ja' yawil sbiil stuquel te Jerusalén.#2 S 7.13. 5La spas yantic scajtijib ta chiq'uel majt'aniletic ta cheb yamaq'uil templo yu'un Cajwaltic, ja' swenta xch'uunel spisil te eq'uetic ta ch'ulchane.
6Soc la yac' ta chiq'uel te snich'nab swenta smajt'an te bila scuyoj ta Diose. La yich' ta muc' te pucujetique, soc bajt' ta stojol te mach'atic ay bila ya sna'ic syoljoltayel. Spisil ora la sc'opon te ch'ulelaletic, soc la spasulay pic-c'abal. Mero ma ba lec ta sit Cajwaltic te yat'ele, jich la yac' ilinuc yo'tan Cajwaltic ta stojol. 7Soc la yac' ochel sloc'omba Asera ta templo yu'un Cajwaltic, manchuc me jich albotic yu'un Cajwaltic te David, soc nix te snich'ane, ja' te Salomón: “Te templo in to te ay ta Jerusalén, ja' tsabil cu'un ta stojol spisil ta jchajp sts'umbal Israel, sbajt'el me q'uinal ja' yawil te jbiile. 8Ma ba ya jch'ojix loq'uel te israeletic tey ta q'uinal la cac'bey te antiguo sme'-statique, teme ya yaq'uic c'otuc ta pasel te bila mandalil la calbeye, soc spisil te bitic snopjibal ac'botic yu'un te cabat Moisés”,#1 R 9.3-5; 2 Cr 7.12-18. te xie.
9Pero ma ba la yich'ic ta wenta. Te Manasés yolojix la yac'bey spasic bayal ta chajp muliletic a. C'ax jich la spasic a te bit'il yantic ta jchajp ants-winiquetic te la nix yilic te israeletic te la slajin te Cajwaltique. 10Ja' yu'un te Cajwaltic c'opoj ta swenta te abatetic yu'un, ja' te j'alwanejetic yu'une, jich la yal:
11—Ta swenta te bit'il la spasic te bitic amen nax sba te Manasés, soc te bit'il c'axem jich amen bitic la spas a te bit'il amorreoetic te neelal to yu'une, soc te ja' la yac' yaluc ta mulil te yajwal te Judá ta scaj te loc'ombaetic yu'une, 12jo'on Ajwalilon te Dioson yu'un Israel, ya cal ta jamal te ya cac' taluc woclajel ta stojol Jerusalén soc ta stojol Judá. Toj me c'uxubel xchiquin yu'un te mach'a ya yaiye. 13Ya me jp'is te Jerusalén, ja' nix pajal sp'isol soc te Samaria soc te patil alnich'anetic yu'un Acab. Ya me jsuc' jilel c'oem jich bit'il ya yich' suq'uel plato te ya yich' nujanel teme suc'bilixe. 14Te jayeb xan ya xjil te lum cu'une, ya me jpijt'es, ya me cac' ta sc'ab scontro. Ya me x'elc'anbot soc ya me xpojbot sbiluquic yu'un. 15Melel mero amen ta jsit te yat'elique. Ja' to nix te c'alal loq'uic tel ta Egipto te antiguo sme'-statique, c'alal ora yacalic ta yaq'uel ilinuc co'tan yu'unic —xi' te Cajwaltique.
16Te Manasés la sjoin te yajwal Judá ta spasel te muliletic. Soc ay to xan yan a te bitic amen la spasbey ta sit te Cajwaltique: bayal mach'atic tojol la smalbey xch'ich'el. Noj c'oem ta bayal ch'ich' yu'un ta sjunal te Jerusalén. 17Te jayeb xan sc'oplal yat'el Manasés soc spisil te bitic spasoje, soc te muliletic la spase, spisil ts'ibubil ta libro yu'un yat'el muc' ajwaliletic ta Judá. 18C'alal laj, la smuquic ta nichimaltic ta sti'il sna, ja' te nichimaltic yu'un Uza sbiile. Patil ja' och jilel ta sjelol te Amón, te ja' nix snich'ane.
Yat'el Amón, muc' ajwalil yu'un Judá
(2 Cr 33.21-25)
19Te Amón ay cheb xcha'winic (22) ya'wilal a te c'alal och ta muc' ajwalile. Jalaj ta muc' ajwalil ta Jerusalén cheb ja'wil. Te sme'e Mesulemet sbiil, yantsil-nich'an Hazur, talem ta Jotba. 20Pero te yat'ele amen ta sit Cajwaltic, ja' nix jich te bit'il Manasés te state. 21Ja' nix la st'unbey yat'el te state. Ja' nix la xch'uun soc la squejan sba ta stojol te loc'ombaetic te la squejan sba ta stojol te state. 22Jich la yijq'uitay te Cajwaltic te Dios yu'un te antiguo sme'-state, ma jichuc la spas te bit'il la sc'an yo'tan te Cajwaltique.
23Te abatetic yu'un te Amón la xchap sc'opic ta scontroinel, la smilic ta sna. 24Pero te yajwal lum la smilic uuc te mach'atic la xchap sc'opic ta smilel te muc' ajwalil Amón. Ja' la yaq'uic ochel ta sjelol ta muc' ajwalil te snich'ane, ja' te Josías.
25Te jayeb xan sc'oplal yat'el Amón soc te bitic la spase, ts'ibubil ta libro yu'un yat'el muc' ajwaliletic yu'un Judá. 26La smuquic ta muquenal ta nichimaltic yu'un Uza sbiil. Patil ja' och ta sjelol te Josías te ja' nix snich'ane.
Currently Selected:
2 Reyes 21: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.