2 Reyes 23
23
1Ja' yu'un te muc' ajwalil la sticun ta iq'uel tel te mamaletic yich'oj yat'elic ta Judá soc Jerusalén, swenta yu'un ya stsob sba soc. 2Patil te muc' ajwalil, soc ta spisil te winiquetic ta Judá, soc te yajwal Jerusalén, te sacerdoteetic, te j'alwanejetic soc ta sjunal te nacione, muc'-biq'uitetic bajt'ic ta templo yu'un Cajwaltic ta spisilic. Tey c'otic ta c'oponel yaiyic ta tulan yu'un te muc' ajwalil, spisil te bitic ya yal te libro yu'un te c'opetic chapal yu'unic ta namey soc te Diose,#Dt 31.11-13; Neh 8.1-8. ja' te libro la yich' tael yu'unic ta templo yu'un te Cajwaltique. 3Te muc' ajwalil la stejc'an sba ta nopol balal taq'uin. La yal sba ta jamal ta stojol te Cajwaltic te ya xch'uunbey spisil te smandale, te jun me yo'tan ya yac' c'otuc ta pasel ta mero spasemal yo'tan te mandaliletic yu'une, te bila yaloj soc te bila chapal yu'une, soc te ya yac' c'otuc ta pasel, jich nix te bit'il chapal yu'un te c'op te ts'ibubil ta libro. Spisil te nación la xch'uunic spasel te bila chajbaje.
La xcha'jajch' xan ta ch'uunel Dios Josías
(2 Cr 34.3-7)
4Te muc' ajwalil la spas ta mandal te Hilcías te muc' sacerdote, soc te xchebal sacerdote, soc te jcanan-ti'nailetic te ya sloq'uesic ta templo yu'un Cajwaltic spisil te bitic swenta yich'jibal ta muc' Baal, te Asera, soc spisil te bitic swenta yich'jibal ta muc' spisil te eq'uetic ta ch'ulchane. La xchic' ta ti'lum Jerusalén, ta spamlej Cedrón. Te stanule ora la yich'ic bael ta Betel. 5Patil la sloq'ues ta yat'el te sacerdoteetic ac'bil yat'elic yu'un muc' ajwaliletic ta Judá, yu'un ya xchic'beyic pom ta toyol ch'uunjibaletic te ayic ta lumetic yu'un Judá soc ta sjoyobal te Jerusalén. Soc la sloq'ues te sacerdoteetic te la xchic'beyic pom te Baal, te c'aal, te u, soc spisil te eq'uetic ta ch'ulchan. 6La sloq'ues ta Jerusalén te sloc'omba Asera ay ta templo yu'un te Cajwaltique. La xchic' ta spamlej Cedrón, asta mero tanub ta c'ajc' yu'un. Patil la slilin ta muquenaletic.#2 R 21.3; 2 Cr 33.3. 7Soc la sjin te cuartoetic te banti ja'ic nix ya spasbey sbaic mulil te winiquetic soc te ya spasic ta swenta yich'el ta muc' te lotil diosetic yu'unic te ay ta templo yu'un te Cajwaltique. Soc la sjin te banti la sjalic paq'uetic antsetic te ya xtuun yu'un te sloc'omba Asera.
8Patil la yal mandal te ya xtal spisil te sacerdoteetic ta lumetic yu'un Judá. La slajinbey sc'oplal spisil te toyol ch'uunjibaletic, jajch'ic tel ta Geba c'alal ta Beerseba, tey ta banti la xchiq'uic pom te sacerdoteetic. Soc la sjin te scajtijib ta chiq'uel smajt'an pucujetic te ayic ta ti'nail yu'un Josué, ja' te jwentainwanej yu'un te lume, ja' te scajtijib te ay ta yochibal te lum ta xq'uexen jc'abtic. 9Te sacerdoteetic yu'un te toyol ch'uunjibaletic ma ba ac'ot ochel ta banti ay scajtijib ta chiq'uel smajt'an Cajwaltic ta Jerusalén. Ja'uc me to, la swe'ic waj te ma ba yich'oj levadura soc te sjo'tac ta sacerdoteile.
10Te Josías la sjinbey sc'oplal uuc te chic'jibal te ay ta spamlej yu'un Ben-hinom,#Jer 7.31; 19.1-6; 32.35. swenta yu'un jich ma'yuquix mach'atic ya xchic' squerem-nich'an soc yantsil-nich'an swenta milbil smajt'an a te Moloc.#Lv 18.21. 11La sloq'ues te caballoetic yac'ojbeyic smajt'anin c'aal te muc' ajwaliletic ta Judá, ja'ic te ayic ta yochibal te templo yu'un Cajwaltic, te slac'oj sba soc te banti nainem Natán-melec te swentainej te bitic yu'un templo. La xchic' te carretaetic yu'un te c'aale. 12Soc la sjin te yantic scajtijib ta chiq'uel majt'anil te la spas te muc' ajwaliletic ta Judá ta banti stoyolil stsalul na yu'un Acaz. Soc la sjin te cajtajibaletic ta chiq'uel majt'anil te la spas Manasés ta amaq'uiletic ta templo yu'un Cajwaltic,#2 R 21.5; 2 Cr 33.5. la swuy soc la xch'oj ochel ta beja' yu'un Cedrón te sts'ubile.
13Te muc' ajwalil la sjinbey sc'oplal te toyol ch'uunjibaletic te ay ta stojol sloq'uib c'aal yu'un Jerusalén, te ay ta stojol sur ta Wits Olivoiltic, te ja' la spas te Salomón te c'ax ta muc' ajwalil yu'un Israel, te ja' yu'un te Astarté antsil dios te ilaybil nax sba, te lotil dios yu'un sidonetique; soc yu'un Quemos, yan loc'omba te ilaybil nax sba, te lotil dios yu'un moabetique; soc yu'un Milcom, loc'omba te ilaybil nax sba, te lotil dios yu'un te amonetique.#1 R 11.7. 14Soc la swuy te tonetic soc te sloc'ombaetic Asera, la snojes ta sbaquel mach'atic lajemic te banti ayic a. 15Ja' nix jich te scajtijib ta chiq'uel majt'anil soc te toyol ch'uunjibal ta Betel te la spas Jeroboam snich'an Nabat#1 R 12.33. te la yac'bey sta smulic te israeletique, la swuy te Josías, jc'axel ts'ubiltic bajt' yu'un. Patil la yac'bey sc'aal, soc la xchic' uuc te sloc'omba Asera.
16C'alal sujt' tel te Josías, la yil te muquenaletic ayic ta ch'in witse, jich la sticun ta loq'uesel te jayeb baquetic ayic tey a. La xchic' ta sba te scajtijib ta chiq'uel majt'anile, jich boloben sc'oplal jil a te scajtijibe. Jich c'ot ta pasel a te bi la yal Cajwaltic, te ja' la sc'ases ta aiyel te j'alwanej yu'un Dios te c'opoj ta neelal toe.#1 R 13.2. 17Soc la sjojc'o xan:
—¿Bi sts'ajc'ul te chican ya quile? —xi'.
Te yajwal te lume jac'bot yu'un:
—Ja' smuquenal te j'alwanej yu'un Dios tal ta Judá, te la yal ta neelal te bi la apasix ta stojol te scajtijib ta chiq'uel majt'anil ta Betel,#1 R 13.30-32. te ja'at muc' ajwalilate —xiic.
18Te Josías la yal mandal:
—Jich ac'a jiluc. Ma me ayuc mach'a ya spicbey te sbaquele —xi'. Jich la yich'beyic ta wenta te sbaquel, soc nix te sbaquel te j'alwanej yu'un Dios tal ta Samaria.
19Te Josías la slajin te naetic swenta toyol ch'uunjibaletic te ayic ta Samaria, te ja' la spasic te muc' ajwaliletic ta Israel, te jich la sjachbeyic yilimba a te Cajwaltique. Jich nix la spasic te bit'il la spas ta Betel. 20Patil la smil ta sba te scajtijib ta chiq'uel smajt'an te lotil diosetic ta spisil te sacerdoteetic yu'un te toyol ch'uunjibaletic te tey ayic a. La xchic'bey sbaquel te mach'atic lajemic ta sba. Patil sujt' xan bael ta Jerusalén.
Josías la spas Pascua
(2 Cr 35.1-19)
21Te muc' ajwalil la spas ta mandal spisil te yajwal lum te ya spasic te Pascua,#Ex 12.1-13,21-27; Lv 23.5-8; Nm 28.16; Dt 16.1-8. ta swenta yich'el ta muc' te Cajwaltic te Dios yu'unique, jich te bit'il ts'ibubil ta slibroil te bi c'opil chapal yu'une. 22Ma'yuc jich yich'oj pasel Pascua a te jayeb c'aal at'ejic te juecetic ta Israel, soc ni ja'uc te jayeb c'aal at'ejic te muc' ajwaliletic ta stojol Israel soc ta stojol Judá. 23Ta swaxaclajunebal ja'wil yochel ta muc' ajwalil a te Josías la yich' pasel te Pasuca ta Jerusalén swenta yich'el ta muc' te Cajwaltique.
Yip yo'tan Josías
24Te Josías jc'axel la sten loq'uel te jpic-c'abaletic, soc te mach'atic ay bila ya sna'ic syoljoltayel. Soc la slajinbey sc'oplal te loc'ombaetic yu'unic ta snaic, soc te yantic loc'ombaetic, soc nix ta spisil te yantic yich'jibal ta muc' te ilaybil nax sbaic, te chicanic ta ilel ta Judá soc ta Jerusalén. Jich la spas, swenta yu'un jich ya xc'ot ta pasel a te bit'il yaloj te mandaliletic ts'ibubil tey ta libro la sta te sacerdote Hilcías ta templo yu'un te Cajwaltique. 25Ma'yuc yan muc' ajwalil, ni ta neelal ni ta patil, te jich la spas te bit'il la spas stuquel te Josías. Ja' te bit'il ta mero spisil yo'tan, soc ta mero spisil xch'ulel, soc ta mero spisil yip la sujt'es yo'tan ta stojol Cajwaltic, te swenta bit'il ja' la yich' ta muc' te mandaliletic yu'un Moisés.
26Manchuc me jich la spas, pero te Cajwaltic tey ilinem jilel a, puersa ilinem ta stojol Judá, yu'un te bila amen pasbot ta stojol yu'un Manasés, te ja' la yac' ilinuque. 27Ja' yu'un la yal te Cajwaltic te ya sta yorail te jc'axel ya sloq'ues ta stojol te Judá, jich te bit'il la sloq'ues ta stojol te Israel, soc ya xch'ay te lum Jerusalén te tsabil yu'un, soc te templo te la yal te tey ya x'ain a te sbiile.
Laj Josías
(2 Cr 35.20-27)
28Te jayeb xan sc'oplal yat'el Josías soc spisil te bitic spasoje, ts'ibubil ta libro yu'un yat'el muc' ajwaliletic ta Judá. 29Te c'alal ay ta muc' ajwalil a, te faraón Necao, muc' ajwalil ta Egipto, bajt' ta muc'ja' Eufrates, yu'un ba scoltay te muc' ajwalil yu'un Asiria. Te muc' ajwalil Josías loc' ta yaq'uel guerra, pero ta lum Meguido milot yu'un te Necao te c'alal ilot yu'une. 30Te abatetic yu'un la yac'beyic ta carreta te sbaq'uetal te Josías. La yich'beyic jajch'el ta Meguido, c'ot yu'unic ta Jerusalén, tey la smuquic ta smuquenal a. Te yajwal lum la yiq'uic te Joacaz te snich'an Josías, la yaq'uic ta muc' ajwalil ta swenta sjelol te state.
Yat'el Joacaz, muc' ajwalil yu'un Judá
(2 Cr 36.1-4)
31Te Joacaz ay oxeb xcha'winic (23) ya'wilal a te och ta muc' ajwalile. Och ta muc' ajwalil ta Jerusalén oxeb u. Hamutal sbiil te sme'e, yantsil-nich'an Jeremías, Libna sbiil te slumale. 32Pero te yat'ele ma ba lec ta sit te Cajwaltique. Ja' nix jich la spas te bit'il antiguo sme'-state. 33Te faraón Necao la xchuc ta lum Ribla ta sq'uinal Hamat, swenta yu'un jich ma x'at'ej ta muc' ajwalil ta Jerusalén a. Pasot ta mandal te nación Judá te ya stoj spatan taq'uin te Necao, oxmil soc jo'lajunwinic (3,300) kilo plata, soc oxlajuneb xcha'winic (33) kilo oro. 34Soc xan te faraón Necao la yac' ta muc' ajwalil te Eliaquim te snich'an Josías, ja' la yac' ochel ta sjelol te state. La sjeltaybey sbiil, Joacim c'ot yu'un. Te Joacaz la yic' bael ta Egipto, tey c'ot ta lajel a.#Jer 22.11-12.
35Te Joacim la yac'bey Necao te plata soc te oro te c'anbot yu'une. La sc'anbey spatanic te yajwal te nación, swenta yu'un jich ju' yu'un stojbel a. Ta juju-jtul la stojic ta plata soc ta oro te spatanic la yich'ic c'anbeyele, chican te jayeb c'ot ta swenta juju-jtul stojele. Jich la yich' aq'uel te faraón Necao.
Yat'el Joacim, muc' ajwalil yu'un Judá
(2 Cr 36.5-8)
36Te Joacim#Jer 22.18-19; 26.1-6; 35.1-19. ay jo'eb xcha'winic (25) ya'wilal a te och ta muc' ajwalile. Jalaj bulucheb ja'wil ta muc' ajwalil ta Jerusalén. Te sme'e Zebuda sbiil, yantsil-nich'an Pedaías, Ruma sbiil te slumale. 37Pero te yat'el te Joacim ma lecuc ta sit te Cajwaltic, ja' nix jich te bit'il yat'el te antiguo sme'-stat tele.
Currently Selected:
2 Reyes 23: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.