2 Reyes 11
11
Atalía la spoj at'el
(2 Cr 22.10—23.21)
1Te c'alal la yaiy te Atalía sme' Ocozías te lajix te yale, bajt', la yac' ta milel spisil te mach'atic ay yu'un te muc' ajwalile. 2Te Josaba yantsil-nich'an muc' ajwalil Joram, yijts'in-ach'ix te Ocozías, la snac' te Joás te snich'an Ocozías. La spit loq'uel tel ta stojol yantic snich'nab muc' ajwalil te yacalic ta milele, la snac'bey ta sit te Atalía. La snac' soc te jch'ijteswanej ta bay jtsal wayibal na. Jich ma ba la smilic. 3Te Joás jalaj ta naq'uel waqueb ja'wil soc te jch'ijteswanej yu'un ta templo yu'un te Cajwaltique. Ja' ochem ta muc' ajwalil yu'un Judá a te ants Atalía.
4Ta sjuquebal ja'wil te Joiada la sticun ta iq'uel te capitanetic yu'un soldadoetic, te cereteoetic soc te jcananetique. La yic' ochel ta templo yu'un Cajwaltic ta banti ay stuquel. Tey la xchap sc'op soc a te jc'axel chapal c'ote, soc la yac'bey yilic te Joás, te snich'an muc' ajwalile. 5La spas ta mandal, jich la yal:
—Jich me ya apasic te ja'exe: oxchajp ya xloq'uex a, jchajp ya xbajt' ta jcanan ta sna ajwalil ta sc'aalelal cux-o'tan. 6Yan jchajp ya xbajt' ta yochibal Shur sbiil. Te yan xan jchajbe ya xbajt' ta sts'eel yochibal sna soldado-jcanantaywanejetic. Jich ma'yuc jochol ya xjil a te yawile, ya ajel abaic ta scanantayel te sna muc' ajwalile. 7Lec ay jiche, ta acha'chajbalic te ya xloq'uex ta sc'aalelal cux-o'tane, ja'ex me te ya x'ochex ta canantaywanej ta templo yu'un Cajwaltic ta banti ay te mach'a ya x'och ta muc' ajwalile. 8Ya me ajoytayic te muc' ajwalile. Ta juju-jtulex ya me atsac ta ac'abic te awat'ejibic yu'un guerra. Te mach'a ya sc'an ya x'och bael ta atojolique, ya me xlaj. Te ja'exe ya me ajoinic te muc' ajwalil ta bayuc ya xbajt' —la yut.
9Te capitanetic yu'un soldadoetic la spasic spisil te bila albotic yu'un te sacerdote Joiada. Ta juju-jtul la swentain te swinictaquique, te mach'atic ya x'ochic ta jcanan ta sc'aalelal cux-o'tane, soc jich nix te mach'atic ya xloq'uique, jich c'otic ta stojol te sacerdote Joiada. 10Jich te sacerdote la yac'bey te capitanetic yu'un soldado te lanzaetic soc te majq'uilaletic yu'un guerra te ja' to yu'un te muc' ajwalil David, te tey ay ta templo yu'un Cajwaltique. 11Te soldadoetic ayic ta canantaywanej, la yac' sbaic ta yawilic, jajch' ta swa'el te templo, c'alal ta xq'uexen, soc ta sjoylejal te scajtijib ta chiq'uel smajt'an te Diose. Ta juju-jtul stsacoj ta sc'ab yat'ejibic yu'un guerra, swenta yu'un ya scanantayic a te muc' ajwalile. 12Jich te Joiada la sloq'ues tel te snich'an ajwalile. La yac'bey ta sjol te corona, soc la yac'bey ta sc'ab te yantic seña muc' ajwalile. C'alal la smalbey aceite ta sjol, la yal te ochix ta muc' ajwalile. Ora jajch' spac' sc'abic ta spisilic soc awunic:
—¡Viva muc' ajwalil! —xiic.
13C'alal la yaiy te Atalía te bi la yalic ta aw te jcananetic soc te yantique, bajt' ta templo yu'un Cajwaltic, tey ta banti ayic spisilique. 14La yil teq'uel te muc' ajwalil querem ta sts'eel te toyol balal taq'uine, yu'un jich te scostumbreique. Ta xujc' ayic te capitanetic soc te mach'atic ya stijic música. Te winiquetic mero bayal yutsil yo'tanic yacalic ta yoq'uesinel oq'ues. Jich yu'un te Atalía la sjats sc'u' soc awun:
—¡Muquen jinwanej! ¡Muquen jinwanej! —xi'.
15Pero te sacerdote Joiada, jich la yalbey mandal te capitanetic:
—Loq'uesaic bael ta jtojoltic te antse. Te mach'a ya st'un baele, milaic me ta puñal —xi'.
Te bit'il la yal te sacerdote te ma ba ya smilic ta templo yu'un te Cajwaltique, 16la stsaquic la yiq'uic bael ta banti ya x'ochic ta sna ajwalil te mach'atic ayic ta caballo. Tey c'o smilic a te Atalía.
17Patil te Joiada la yal te ya me xchap sc'opic soc Cajwaltic te muc' ajwalil soc te lume, ja' te bit'il ja'ic me te lum yu'un te Cajwaltique. Soc la xchap sc'opic te muc' ajwalil soc te lume. 18Patil bajt'ic spisilic ta templo yu'un Baal, c'o sjinic ta jc'axel. La sjinbeyic te scajtijib ta chiq'uel majt'anil yu'un Baal, soc te loc'ombaetic yu'une. Ja' nix jich te Matán, te sacerdote yu'un Baal, la smilic ta stojol scajtijib ta chiq'uel smajt'an Baal. Ja' nix ta yorail a te sacerdote Joiada la yac' jcananetic ta templo yu'un Cajwaltic. 19Patil la yic' te capitanetic yu'un soldadoetic, te cereteoetic, te jcananetic, soc ta spisil te mach'atic tey ayic a, jun nax la sjoinic bael te muc' ajwalile. Jajch'ic ta templo yu'un Cajwaltic, bajt'ic ta sna muc' ajwalil, ochic ta ti'nail yu'un jcananetic. Te Joás najc'aj ta muc'ul nactijibal. 20Spisil te yajwal lum bin nax yo'tanic yu'un, soc ma'yuquix swocol jilic yu'un te bit'il lajix ta milel ta puñal ta sna ajwalil te Atalía. 21Te Joás juqueb ya'wilal a te och ta muc' ajwalile.
Currently Selected:
2 Reyes 11: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.