2 Reyes 10
10
Jehú la slajinbey sts'umbal Acab
1Te Acab ay lajuneb xchanwinic (70) sts'umbal ta Samaria. Ja' yu'un te Jehú la spasbey scarta te mach'atic j'at'el-patanetic ta lum, soc te mamaletic yich'oj yat'elic, soc te mach'atic swentainejbeyic te snich'nab Acab. Jich la yalbey ta jun te Jehú: 2“Te bit'il ja'ex te awentainbeyejic te sts'umbal te awajwalique, soc nix te caballoetic yu'une, te carretaetic yu'un swenta guerra, te tulan anjibal yu'un, soc te at'ejibaletic swenta guerra yu'une, te c'alal ya xc'ot ta awentaic te carta in to, 3tsaaic te banti mero lec soc te mero ay sp'ijil te snich'nab te awajwalique. Mojt'esaic ta naclej ta smuc'ul nactijib te state. Jajch'aic guerra swenta scoltayel te sts'umbal te awajwalique”, xi'.
4Pero, och bayal xiwelic yu'un, jich la yalic:
—Cheb muc' ajwaliletic ma ba ju' ta tsalel yu'unic te la sta sbaic soque; ¿bit'il ya xju'ix cu'untic stsalel a te jo'otique? —xiic.
5Te mayordomo yu'un te sna ajwalil, te mach'a yich'oj yat'el ta stojol lum, te mamaletic soc te mach'atic swentainejic te sts'umbal ajwalile, jich la sticunbeyic ta alel te Jehú: “Te jo'otique ayotic ta awenta. Ya me jpastic spisil te bitic ya awac' jpastique, pero ma'yuc mach'a ya cac'tic ta muc' ajwalil. Pasa te bi ya sc'an awo'tan ya apase”, xiic.
6Swenta xchebal buelta cha'ticunbotic jun yu'un te Jehú, jich albotic yu'un: “Teme jun ayotique, soc teme ya ac'anic ya ach'uunbonic te jmandale, ich'beyaic tel jiche te sjol snich'nab awajwalique. Pajel ta sab ta jich ora in to, ya me xtal awilonic ta Jezreel”, xi'.
Te lajuneb xchanwinic (70) winiquetic sts'umbal muc' ajwalil, ja' swentainejic te mach'atic ich'bilic ta muc' ta lum, te ja' la xch'ijtesique. 7Te c'alal c'ot ta sc'abic te jun, la stsaquic te lajuneb xchanwinic (70), la smilic. Patil la yac'bey ta moch te sjolique, la sticunic ta Jezreel. 8Te c'alal c'ot te abate, jich la yalbey te Jehú:
—La yich'iquix tel sjolic te sts'umbal muc' ajwalile —xi'.
Te Jehú la yal mandal:
—Cha'bus xabusanic ta yochibal te lume, tey ac'a ainuc a ja' to pajel —xi'.
9Ta xchebal c'aal loc' tel Jehú, la stejc'an sba, jich la yalbey ta spisil te yajwal te lume:
—Te ja'exe ma'yuc bila amulinejic. Jo'on nax te la jchap jo'tac ta scontroinel te cajwale, ja' te la jmilixe. Pero ¿mach'a la smil ta spisilic in to? 10Na'aic me ta lec te ma'yuc banti ma xc'ot ta pasel te bila yaloj Cajwaltic ta stojol te sts'umbal Acab. Ja' nix te Cajwaltic yacal spasel te bila yaloj ta swenta te Elías ja' te yabate —xi'.
11Te Jehú la smil te jayeb xan sts'umbal Acab ayic ta lum Jezreel, spisil te swinictac bayal sc'oplalic, te yamigotac mero jun yo'tan soc, soc nix te sacerdoteetic yu'une. Ma'yuc cuxul la yijq'uitay.
12Patil bajt' ta Samaria, c'ot ta Bet-equed yu'un Jcanan-chijetic. 13Tey la stabey a te yermanotac Ocozías, te muc' ajwalil ta Judá. Te Jehú la sjojc'obey:
—¿Mach'aex a? —la yut.
La sjaq'uic:
—Ja' quermanotic te Ocozías, talemotic ta spatbeyel yo'tanic te yal-snich'nab muc' ajwalil soc yalatac te Jezabel —xiic.
14Te Jehú la yalbey mandal te mach'atic t'unbil yu'une:
—Tsacaic ta stelemalic —xi'.
Te mach'atic t'unbil yu'une, cuxul a la stsaquic, la smilic ta nopol pozo Bet-equed yu'un Jcanan-chijetic. Cheb yoxwinic (42) te winiquetique, ma'yuc cuxul la yijq'uitayic jtuluc.
15C'alal jajch' bael tey a te Jehú, la sta sba soc Jonadab sts'umbal Recab, te c'o yile. Te Jehú la spatbey yo'tan soc jich la yalbey:
—¿Buen lec bal awo'tan ta jtojol, jich te bit'il buen lec co'tan ta atojole? —xi'.
—Buen lec co'tan ta atojol —xi' te Jonadab.
—Teme jiche, ac'bon tel ac'ab —xi' te Jehú.
Te Jonadab la yac' te sc'ab, te Jehú la yic' moel sjoin ta scarreta. 16Jich la yalbey:
—Joinawon, ya me awilon bit'il quich'oj ta muc' te Cajwaltique —xi'.
Jich la yic' bael ta scarreta. 17C'alal och bael ta Samaria, te Jehú la smil spisil te sts'umbal Acab te jayeb te cuxulique. Jc'axel la stup'bey sts'umbal, jich nix te bit'il albot yu'un Cajwaltic te Elíase.#Jos 24.25; 1 S 10.25; 2 S 5.3; 2 Cr 15.12-14; 34.31.
Jehú la slajinbey sc'oplal ta ch'uunel Baal
18Patil la stsob spisil lum te Jehú, jich la yalbey:
—Te Acab jteb nax la yich' ta muc' stuquel te Baal, pero te jo'one bayal me ya quich' ta muc'. 19Ja' yu'un ic'aic tel spisil te j'alwanejetic yu'un Baal, te mach'atic yich'ojic ta muq'ue, soc te sacerdoteetic yu'une. Melel chapal cu'un mero muc' milbil majt'anil swenta yich'jibal ta muc' Baal. Te mach'a ma ba ya xtale, ya me xlaj —xi'.
Pero te Jehú chapal yu'un te jich ya slo'laye, swenta yu'un jich ya slajin spisil te mach'atic xch'uunejic Baal. 20Ja' yu'un la yal te ya yich' puquel ta alel te ya yich' pasel buen q'uin yu'un Baal. Jich la yich' pasel yu'unic. 21Ja' yu'un la sticun bael abatetic ta spisil sq'uinal Israel. Spisil te mach'atic yich'ojic ta muc' Baal, c'otic ta templo yu'un, ma'yuc la spas falta jtuluc. Ja' yu'un te templo yu'un Baal noj c'alal ta juju-jejch' sti'il. 22Te Jehú la yalbey te mach'a swentainej sq'uejel c'u'iletic te ya sloq'uesbey sc'u'ic yu'un q'uin te mach'atic xch'uunejic Baal. Te mach'a swentaineje, jich la spas. 23Te Jehú soc te Jonadab ora ochic bael ta templo yu'un Baal. Te Jehú jich la yalbey te mach'atic xch'uunejique:
—Ja' me lec teme ma'yuc ta awolilic te mach'atic xch'uunejic te Cajwaltique, ja' nax me te mach'atic xch'uunejic Baal —la yut.
24Te mach'atic xch'uunejic Baal, ochic ta templo, swenta yu'un ya yac'beyic milbil smajt'an soc chic'bil smajt'an te Baal. Jich te Jehú la yac' chanwinic (80) winiquetic ta spat templo, soc jich la yalbey:
—Teme ay mach'a ya scoltay bael te winiquetic la cac'beyex ta ac'abique, ya me yich' milel —xi'.
25C'alal laj yo'tan ta yaq'uel te chic'bil majt'anil te Jehú, la yalbey mandal te soldadoetic soc te capitanetic yu'une:
—¡Ochanic, milaic! ¡Ma me ayuc ya xjil ni jtuluc! —xi'.
Te swinictac te Jehú la smilic spisil ta puñal, limil jilel yu'unic ta lum ta spat templo. Patil ochic bael c'alal ta awilal ta templo yu'un Baal. 26La sloq'uesic te balal te'etique, la xchiq'uic. 27Soc la sjinic te scajtijib ta chiq'uel smajt'an soc te templo yu'une. La sc'atp'unic ta tsa'anjibal, c'alal ora yo'tic.
28Te Jehú jich la slajinbey sc'oplal ta ch'uunel te lotil dios Baal ta sq'uinal Israel. 29Pero ma ba la yilay te muliletic la yac' yaluc israeletic a te Jeroboam te snich'an Nabat, yu'un la to xch'uun te alal toroetic pasbil ta oro te ayic ta Dan soc ta Betel.#1 R 12.28-30.
30Te Cajwaltic jich la yalbey te Jehú:
—Te bit'il lec te awat'el ta jtojole, soc toj ta jsit te bi ya apase, melel la apasbeyix te sts'umbal Acab spisil te bi la cale, ja' yu'un te patil alnich'anetic awu'un ya me xnajc'ajic ta muc'ul nactijibal yu'un Israel ja' to ta xchancajal —la yut.
31Manchuc me jich albot te Jehú, pero ma ba la yac' puersa ta xch'uunel te smandal Cajwaltic te Dios yu'un Israel, melel ma ba la yijq'uitay te muliletic la spas Jeroboam te la yac'bey sta smulic te israeletique.
32Ja' yorail a, te Cajwaltic la yac' ch'inubuc te sq'uinal Israele. Te Hazael la yac'bey guerra te israeletic ta sjoylejal te sti'il sq'uinal 33te jajch'em bael ta stojol sloq'uib c'aal yu'un muc'ja' Jordán: spisil te sq'uinal Galaad, te sq'uinal Gad, te sq'uinal Rubén, soc te sq'uinal Manasés, te jajch'em ta lum Aroer te pajal ay soc te muc'ul beja' Arnón, tey ochem spisil te sq'uinal Galaad soc te sq'uinal Basán.
34Te jayeb xan sc'oplal te Jehú, soc ta spisil te bitic la spase, soc nix te bitic mero bayal sc'oplal la spase, ts'ibubil ta libro yu'un yat'el muc' ajwaliletic ta Israel. 35C'alal laj te Jehú, la smuquic ta Samaria. Ja' och sjelolin ta muc' ajwalil te Joacaz te snich'ane. 36Te Jehú jalaj ta muc' ajwalil yu'un Israel waxaqueb xcha'winic (28) ja'wil ta lum Samaria.
Currently Selected:
2 Reyes 10: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.