Isaías 1
1
Jmulawil nación
1Ha snahalsit Isaías snich'an Amoz banti la yilbe sc'oblal Judá soc Jerusalén ta yorahil Uzías, Jotam, Acaz soc Ezequías, ajwaliletic yu'un Judá.
2A'iya awa'iy, ch'ulchan, a'iya awa'iy, bahlumilal;
como hich ya yal te Jehová:
La jcoltes jnich'nab, la jmuc'ubtes,
pero la stoy sbahic ta jtojol.
3Te j'a'tel-wacax ya sna'be sba te yajwal,
te burro ya sna'be sba te yawil swe'el yu'un te yajwal,
yan te Israel ma sna',
mayuc snopojibal yu'un te pueblo cu'une, xchi.
4¡Obol aba, jmulawil nación,
ha pueblo te bayel smul,
ha jcaj ts'umbalil yu'un mach'atic chopol ya'telic,
bohl al-nich'anex!
¡La yihquitayic te Jehová,
la sp'ajic te Ch'ul Dios yu'un Israel,
suht ta spatic ta stojol!
5¿Bin yu'un te yac ac'an yac awich'ic xan castigo?
¿Ya to bal atoy abahic?
Ay ta chamel swohlol ajol,
ay ta wocol spisil awo'tan.
6C'alal ta stahn awoc c'alal ta yohlil ajol
mayuc banti lec ay,
ha ehchen, siht'em, c'a'em;
ma ba poxtaybil, ma ba potsbil
soc ma ba c'unubtesbil ta aceite.
7Jihnemix te aq'uinal,
lajic ta chiq'uel te pueblohetic awu'unic;
ta asitic la swe'beyex te ts'unub awawalic te jyanlumetic,
jihnem, hich te bin ya yich' jinel yu'un jyanlumetic.
8Te yantsil-nich'an Sión
hich hil te bin ut'il yaxna ta ts'usubil,
hich te bin ut'il lehchel-patna ta banti ts'umbil melón,
hich te bin ut'il pueblo te joytaybil yu'un scontra.
9Te manchuc la yihquitaybotic jtut chahp
te Jehová te scuentahinej spisil,
hich c'ohotic te bin ut'il Sodoma,
hich te bin ut'il Gomorra, te hichuque.
Tsitsel te yacuc suhtes yo'tanic ta smelelil
10¡Príncipaletic yu'un Sodoma,
a'iybeya awa'iyic te sc'op Jehová!
¡Pueblo yu'un Gomorra,
a'iybeya awa'iy te ley yu'un te Dios cu'untique!
11Hich ya yal te Jehová:
¿Bistuc cu'un te bayel milbil mahtaniletic awu'unic?
C'axemix co'tan yu'un te scohtol chic'bil tat tuminchijetic
soc te sjuhp'el chambahlametic;
ma jc'an te sch'ich'el torohetic,
tuminchijetic o tat tentsunetic.
12¿Mach'a la sc'ambeyex ini
te c'alal ya xtalex ta jtojol,
yu'un yac ats'o'ic ta teq'uel
te amaq'uetic yu'un te templo cu'une?
13Ma me xawich'boniquix tal mahtanil te mayuc sc'oblal;
ya quihlay te pom.
Ma xcuhchix cu'un te yuhnenal u,
te sc'ahc'alel cux-o'tan soc te tsoblejetic awu'unique.
14Ya quihlay te q'uinetic yu'un yuhnenal u
soc te tsoblejetic awu'unic;
al c'ohem ya ca'iy,
luhbenonix ta scuchel.
15Te c'alal yac ahach ac'abic ta jtojol,
ya jnac' jsit ta atojolic;
aunque bayel yac ac'opononic,
ma ba ya ca'iybeyex;
yatinej ch'ich' te ac'abique.
16Poca abahic, lecubtesa abahic,
loq'uesa bahel ta jsit te chopol awa'telic;
ihquitayahic hilel spasel te bin ma lecuc,
17nopahic spasel te bin lec,
lehahic te bin stojil ta pasel,
coltayahic te mach'a ay ta tulan uts'inel,
toj me xachahpanic te me'ba' alaletic,
c'opojanic yu'un te me'ba' antsetique.
18La'ic, xchi te Jehová,
ya jchahpantic te c'op ini:
aunque hich amulic te bin ut'il buen tsaj,
buen sac ya xhilic hich te bin ut'il me'sic;
aunque hich ayic te bin ut'il c'ax tsaj,
hich sac ya xc'ohtic te bin ut'il sac stsotsel tuminchij.
19Teme yac ac'anic soc teme yac ach'uhunique,
ya me awe'ic te bintic lec ya xloc' ta q'uinal;
20yan teme ma xac'anic soc teme yac atoy abahique,
ya me xlajex ta espada, xchi.
Hich yaloj te Jehová.
Chahpanel soc coltayel yu'un Jerusalén
21¡Ilawil bin ut'il sutp'ij ta j'antsinel-ants
te pueblo te jun yo'tan!
Ta nahil nojel ta bin stojil ta pasel,
nahinem tey a te bin toj ay,
¡pero ta ora ini nahinemic tey a te jmilawetique!
22Te plata awu'un c'atp'ujem ta c'a'pal,
capal ta ha' te vino awu'une.
23Te príncipaletic awu'un ha jtoybahetic
soc smohlol j'eleq'uetic.
Spisilic toyol yo'tanic ya schon sbahic
soc ya st'unic bahel mahtaniletic;
ma ba toj ya schahpanic te me'ba'etic,
soc ma xc'oht ta stojolic te swocol
te me'ba' antsetique.
24Ha yu'un hich ya yal te Cajwaltic,
te Jehová te scuentahinej spisil,
te Mach'a Tulan yu'un Israel:
¡Tiq'uix a! ¡Ya ca'be stoj te jcontratac,
ya ca'be spacol te mach'atic ya scontrahinonic!
25Ya jach jc'ab ta acontra;
ya jpocbat ta lejía te awabaquil
soc ya jloq'uesbat spisil abohlil.
26Ya cac' te hich ya xc'oht te juecetic awu'un
te bin ut'il ta nahil to,
soc te j'ac'-o'taniletic awu'unic
hich te bin ut'il ta shahchibal;
ta patil hich ya x'a'botat abihilin:
Pueblo yu'un tojil-o'tanil,
Pueblo te jun yo'tan ta jtojol.
27Ya x'ac'ot ta libre te Sión ta scuenta toj-o'tanil,
te mach'atic suhtem yo'tanic ya x'ac'otic ta libre
ta scuenta bin toj ay ta pasel.
28Pero te jtoybahetic soc te jmulawiletic ya me xjihnic,
soc te mach'atic ya yihquitayic te Jehová ya me xlajic.
29Ya xq'uexawex yu'un
te jihte'etic te la amulanic;
soc ya yaq'uex ta q'uexlal
te ts'umbil q'uinal te tsahbil awu'unique.
30Hich ya xc'ohex te bin ut'il jihte' te taquijem ya'binal,
hich te bin ut'il ts'umbil q'uinal te mayuc ya'lel.
31Te mach'a ay yip hich ya xc'oht te bin ut'il taquin ac,
soc te ya'tel hich te bin ut'il nich-c'ahc';
ta schebal pajal ya xchic'otic,
soc mayuc mach'a ya stup', xchi te Jehová.
Currently Selected:
Isaías 1: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.