Isaías 2
2
Te cuentahinel yu'un Jehová ta swohlol bahlumilal
1Ha te bin la yil te Isaías snich'an Amoz sc'oblal Judá soc Jerusalén:
2Ta nopol slajibal c'ahc'al
ha jolal ya xc'oht yu'un spisil witsetic
te wits yu'un te sna Jehová;
ha toyol ya xc'oht yu'un te tsehletic,
soc spisil te nacionetic ya me xtal syom sbahic ta stojol.
3Ya xtalic bayel pueblohetic soc hich me ya yalic:
La'ic, mohucotic ta wits yu'un Jehová,
ta sna te Dios yu'un Jacob.
Ha ya ya'botic jnoptic te behetic yu'un,
hich ya xbehenotic ta tut behetic yu'un, xchihic.
Como ya xloc' tal ta Sión te Ley,
ta Jerusalén ya xloc' tal te sc'op te Jehová.
4Ha ya schahpambe te c'op hahchem yu'un te nacionetic
soc ya me stsitsticlan tsobol pueblohetic.
Ya sc'atp'unic ta arado te espada yu'unic,
soc te slanzahic ya sc'atp'unic ta hoz.
Mayuc nación ya shach espada ta scontrahinel yan nación,
soc ma ba ya schahpanix sbahic ta yaq'uel guerra.
5Conic, sna Jacob,
behenucotic ta sacal q'uinal yu'un Jehová.
Castigo yu'un Jehová ta stojol jtoybahetic
6Jehová, awihquitayej te pueblo awu'un,
ha te sna Jacob,
como nojel ta stalelic
te talemic ta stojol banti ya xloc' tal c'ahc'al,
nojel ta jna'ojeletic, hich te bin ut'il te filisteohetic;
soc ya schap sc'opic soc jyanlumetic.
7Te sq'uinalic nojel ta plata soc oro,
mayuc slajibal te sc'ulejalique.
Te sq'uinalic nojel ta cawuhetic
soc ma ahtaybaj te scarretahic yu'un guerra.
8Ha nix hich nojel ta loc'ombahetic te sq'uinalique,
ya squejan sbahic ta stojol te ya'tel te sc'abic,
te bin spasojic ta yal sc'abic.
9Hich pehc'anot te ants-winic,
hich peq'uel c'oht te winique;
ma me xapasticlambe perdón.
10¡Ochan bahel ta ch'en,
nac'a aba ta lumq'uinal ta stojol te Jehová te xiweltic sba,
ta stojol te sts'anabul te smuc'ul yutsilale!
11Ya xpehc'anot te stoybahil te sit te ants-winic,
te stoybahil te ants-winic ya me yich' pehc'anel.
Ha nax ya xtoybot sc'oblal te Jehová ta hich ora.
12Como te Jehová te scuentahinej spisil
ay sc'ahc'alel te ya xtal scontrahin
spisil jtoybahetic soc te muc' yac'oj sbahic,
spisil mach'atic stoyoj sc'oblalic,
ya me yich'ic pehc'anel;
13spisil te cedrohetic ta Líbano
te toyol ayic soc te stoyoj sbahic,
soc spisil te jihte' ta Basán;
14spisil te toyol witsetic
soc spisil toyol tsehletic;
15spisil toyol ts'ahquetic
soc spisil ts'ahquetic ay yipic;
16spisil barcohetic yu'un Tarsis
soc spisil t'ujbil barcohetic.
17Te stoybahil te ants-winic ya yich' pehc'anel,
ya xpehc'anot te muc' scuyoj sbahic;
ha nax stuquel te Jehová
te ya xtohybot sc'oblal ta hich ora.
18Soc jc'axel ya xch'ay bahel
spisil te loc'ombahetique.
19Te ants-winiquetic ya me x'ochic bahel ta ch'entiquil
soc ta banti jamajtic te lumq'uinal,
ta scuenta te xi'el te Jehová
soc te sts'anabul te smuc'ul yutsilal,
te c'alal ya xhahch ya'be castigo te lumq'uinale.
20Ta hich ora te ants-winiquetic ya me sch'ojic bahel
ta stojol te ch'ohetic soc sots'etic,
te loc'ombahetic yu'unic te pasbilic ta plata soc ta oro,
te la spasic yu'un ya sch'uhuntayic.
21Ya x'ochic ta ch'entiquil
soc ta banti jamajtic tontiquil
ta scuenta te xi'el te Jehová
soc te sts'anabul te smuc'ul yutsilal,
te c'alal ya xhahch ya'be castigo te lumq'uinale.
22¡Ihquitayahic hilel te ants-winic,
te ta ic' nax ay scuxlejalic!
como ¿binti ya xtuhun a?
Currently Selected:
Isaías 2: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.