Cantares 8
8
1¡Te ha'uc jbanquilat,
te la achu'umbe schu' te jnane!
C'alal ya jtahat ta calle ya cuhts'uyat,
mayuc mach'a ya sp'ajon yu'un.
2Ya quic'at bahel soc ya cohtsesat ta sna jnan,
ha'at yac anohpteson.
Ya ca'bat awuch' lequil vino,
te ya'lel te granada cu'un te hichuque.
3Te ha'uc ay ta ye'tal jol te sq'uexam-c'ab,
soc te yacuc smech'on ta swa'el-c'ab.
Winic:
4¡Ach'ixetic yu'un Jerusalén, tulan ya calbeyex,
ma me xatijbeyic swayel te c'uxul-o'tanil
ha to c'alal ya sc'an stuquel!
Te yip te c'uxul-o'tanil
Coro:
5¿Mach'a te yac ta talel ta jochol taquin q'uinal,
te pacal ta snehquel te mach'a c'ux ta yo'tan?
Winic:
Ta ye'tal ste'el manzana la jtijbat awayel;
ta banti hahch sc'uxul swocol ta alajel te anane,
ta banti hahch sc'uxul te mach'a la yayintesat.
Ants:
6Ac'awon hichuc sello ta awo'tan,
hich te bin ut'il marca ta ac'ab;
como hich ay yip te sc'uxul-o'tanil
te bin ut'il te lajele,
soc tulan te xut'xut'-o'tanil
hich te bin ut'il te stsobojibal mach'atic chamenic.
Te sc'ahc'ale ha muc'ul c'ahc',
ha yat c'ahc' te bayel yip.
7Bayel ha'etic ma xhu' ya stup' te sc'uxul-o'tanil,
ma xhu' ya xmulot yu'un muc'ul-ha'etic.
Te ayuc mach'a ya yac' spisil bintic ay ta sna
scuenta stahel te sc'uxul-o'tanil,
ya xp'ajot yu'un te hichuque.
Coro:
8Ay quihts'intic te ma to ayuc schu'.
¿Bin ya jpastic yu'un te c'alal ya xtal ta c'anele?
9Te ha'uc ts'ahc,
ya jtehc'antic tey a toyol bahlal ts'ahquetic
pasbilic ta plata;
te ha'uc puerta,
ya jmactic ta tabla yu'un cedro te hichuque.
Ants:
10Ho'on ts'ahcon,
te jchu' pajal soc bahlal ts'ahquetic.
Ha yu'un hich c'ohemon ta sit
te bin ut'il mach'a ya yac' lamal q'uinal.
11Te Salomón ay jun sts'usubil ta Baal-hamón;
la yac' hilel ta canantayel.
Jujutuhl ya sc'an ya yich' talel
lajunwinic yoxbahc' (1,000) ta sehp plata te site.
12Te ts'usubil cu'un ay ta jtojol;
te lajunwinic yoxbahc' (1,000) ta sehp plata,
ha'at awu'un, Salomón,
soc te lajunwinic (200) ta sehp plata
yu'un te mach'atic ya scanantayic te site.
Winic:
13Ha'at, te ya xnahinat ta ts'umbil q'uinal,
te mach'atic sjoquinejonic
yac smahliybel ya'iyic te ac'ope.
¡Halbon ca'iy!
Ants:
14¡Suja aba, ha'at te c'uxat ta co'tan!
hichucat te bin ut'il gacela-chij o yal tsajal chij
ta sba te witsiltic nojel ta sumet yic'.
Currently Selected:
Cantares 8: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.