Números 3
3
Ahtayel soc ya'tel levitahetic
1Hich ay te sts'umbalic Aarón soc Moisés ta yorahil c'oponot yu'un Jehová te Moisés ta Wits Sinaí. 2Hich ay sbihilic te snich'nab Aarón: ha te Nadab, te ba-alal, Abiú, Eleazar soc Itamar. 3Ha sbihilic te snich'nab Aarón, ha te sacerdotehetic te la yich'ic malel ta aceite scuenta ch'ultesel, te la yich' ya'telic ta sacerdotehil. 4Pero te Nadab soc Abiú lajic ta stojol Jehová te c'alal la yaq'uic yan c'ahc' ta stojol Jehová ta jochol taquin q'uinal Sinaí; mayuc yal-snich'nab hil. Te Eleazar soc Itamar a'tejic ta sacerdotehil ta stojol Aarón te statique.
5Te Jehová hich la yalbe te Moisés: 6Ac'a nohpojuc tal te jchahp yu'un Leví, ya me awac'ticlan ta stojol te sacerdote Aarón scuenta yu'un ya yac' sbahic ta a'batinel yu'un. 7Ha ya yac' sbahic ta a'batinel yu'un soc yu'un spisil te pueblo ta Nahilpac' Templo yu'un tahojibal, ta scuenta spasel a'tel ta Nahilpac' Templo. 8Ya scanantayic spisil te biluquetic yu'un te Nahilpac' Templo yu'un tahojibal, soc ya spasic spisil te bin a'botic spasic ta scuenta te snich'nab Israel ta banti te a'tel ta Nahilpac' Templo. 9Ya me awac'ticlambe te levitahetic ta stojol te Aarón soc te snich'nabe, como ta yohlil te snich'nab Israel ha'ic te jc'axel a'botic ta stojol. 10Te Aarón soc te snich'nab ya me awac' te ya x'a'tejic ta sacerdotehil. Te mach'a yan ya xnohpoj tal, ya me xcham, xchi.
11Te Jehová la yalbe te Moisés: 12Ho'on la jquic' te levitahetic ta yohlil te snich'nab Israel scuenta sjelol spisil te ba-alaletic, ha te queremetic te nahil ya x'ayinic yu'un te snich'nab Israel. Ha cu'un ya xc'ohtic te levitahetic, 13como ho'on cu'un spisil te ba-alaletique. C'alal la jlajin spisil te ba-alal queremetic ta sq'uinal Egipto, ch'ultesbil c'ohtic cu'un spisil te ba-alaletic yu'un te snich'nab Israel soc sba-al schansbahlamic. Ho'on cu'un. Ho'on Jehovahon, xchi.
14Te Jehová hich la yalbe te Moisés ta jochol taquin q'uinal Sinaí: 15Ahtaya te sts'umbal Leví ta scuenta jujuchahp sna sme'static soc jujuchahp te mach'atic ayic ta snahic; ahtaya spisil winiquetic soc queremetic te ay jun u yayinelic, xchi. 16Hich te Moisés la yahtay hich te bin ut'il pasot ta mandar yu'un te Jehová.
17Hich ay sbihilic te snich'nab Leví: ha te Gersón, Coat soc Merari.
18Te sbihilic te snich'nab Gersón ta jujuchahp sna: ha te Libni soc Simei.
19Te snich'nab Coat ta jujuchahp sna: ha te Amram, Izhar, Hebrón soc Uziel.
20Te snich'nab Merari ta jujuchahp sna: ha te Mahli soc Musi. Ha'ic te sts'umbal Leví ta scuenta jujuchahp sna te statique.
21Ta scuenta Gersón chicnaj te jchahp yu'un Libni soc yu'un Simei; ha'ic te jujuchahp yu'un Gersón. 22Ta spisil te winiquetic soc queremetic te ahtaybilic te c'axem ta jun u yayinelic, ha ho'lajunwinic sbalunlajunbahc' (7,500). 23Te jujuchahp yu'un Gersón la spas scampamentohic ta spat te Nahilpac' Templo, ta stojol banti ya xmahl c'ahc'al. 24Te jtsobaw yu'un te sts'umbal Gersón, ha te Eliasaf snich'an Lael. 25Ta banti te Nahilpac' Templo yu'un tahojibal ha hil ta scuenta te snich'nab Gersón scanantayel te nahilpac' soc smuhquil, te pac' yu'un te yochibal te Nahilpac' Templo yu'un tahojibal, 26te paq'uetic yu'un te yamaq'uil, te pac' yu'un te yochibal te yamaq'uil ay ta sjoyobal te Nahilpac' Templo soc te scajtajib ta chiq'uel mahtanil, soc te lazohetic yu'un; spisil bintic ya sc'an pasel tey a.
27Ta scuenta Coat chicnaj te jchahp yu'un Amram, te jchahp yu'un Izhar, te jchahp yu'un Hebrón soc te jchahp yu'un Uziel; ha'ic te jujuchahp yu'un te mach'atic yu'un Coat. 28Te jayeb ta spisil te winiquetic soc queremetic te ay jun u yayinelic, ha jpic soc j'ohlil scha'bahc' (8,600).#3.28 8,600: hich ya yal ta hebro; ta griego (LXX): 8,300, (ilawil te jayeb ay ta vs. 39). Ha ay ta scuentahic scanantayel te ch'ul awilal. 29Te jujuchahp yu'un te snich'nab Coat la spas scampamentohic ta stojol sur yu'un te Nahilpac' Templo. 30Te jtsobaw yu'un te sts'umbal Coat ha te Elizafán snich'an Uziel. 31Ha ay ta scuentahic scanantayel te scaxahul te chapbil-c'op, te mesa, scajtajib c'ahc', te scajtajibic ta chiq'uel mahtanil soc pom, bintic ya xtuhun scuenta a'tel ta ch'ul awilal, te tsalul pac' soc spisil te bintic ay ta pasel tey a.
32Te jolal yu'un te jtsobawetic yu'un te levitahetic, ha te Eleazar snich'an te sacerdote Aarón; ha jtsobaw yu'un te mach'atic ay ta scuenta scanantayel te ch'ul awilal.
33Ta scuenta Merari chicnaj te jchahp yu'un Mahli soc te jchahp yu'un Musi; ha'ic te jujuchahp yu'un Merari. 34Te jayeb ta spisil te winiquetic soc queremetic te c'axem ta jun u yayinelic, ha lajunwinic swaclajunbahc' (6,200). 35Te jtsobaw yu'un te sts'umbal Merari, ha te Zuriel snich'an Abihail. La spas scampamentohic ta stojol norte yu'un te Nahilpac' Templo. 36Ay ta scuenta te snich'nab Merari scanantayel te tablahetic yu'un te Nahilpac' Templo, te sc'atal-te'el, yoyal, scajtajibic soc spisil biluquetic yu'un, soc spisil te bintic ay ta pasel tey a, 37soc nix te oyetic ta sjoyobal te yamaq'uil, te scajtajibic, te ts'acticlambil yich'o-ip, soc bintic ya schuquic a.
38Ta stojol banti ya xloc' tal c'ahc'al yu'un te Nahilpac' Templo, ta stojol te yochibal te Nahilpac' Templo yu'un tahojibal, ya spas scampamentohic te Moisés, Aarón soc snich'nab, te ay ta scuentahic spasel te bin pasel ya sc'an ta ch'ul awilal ta scuenta te snich'nab Israel. Te mach'a yan ya xnohpoj tal, ya me xcham.
39Ta spisil te levitahetic te la yich'ic ahtayel yu'un te Moisés soc Aarón ta scuenta smandar Jehová ta jujuchahp yu'un, spisil te winiquetic soc queremetic te c'axem ta jun u yayinelic, cha'pic soc ho'lajunbahc' (22,000).
Sjelol ba-alaletic
40Te Jehová la yalbe te Moisés: Ahtaya spisil te ba-alal queremetic yu'un te snich'nab Israel te ay jun u yayinelic, otsesa ta hun te sbihilique. 41Tsahbonic te levitahetic scuenta sjelol spisil te ba-alal queremetic yu'un te snich'nab Israel, soc te chambahlametic yu'un te levitahetic scuenta sjelol spisil te sba-al schansbahlamic te snich'nab Israel. Ho'on Jehovahon, xchi.
42Hich te Moisés la yahtay spisil te ba-alal queremetic yu'un te snich'nab Israel, hich te bin ut'il pasot ta mandar yu'un te Jehová. 43Spisil te winiquetic soc queremetic te ay jun u yayinelic te ahtaybilic ta scuenta sbihilic, ha cha'pic soc oxlajuneb schanlajunwinic swaclajunbahc' (22,273).
44Te Jehová la yalbe xan te Moisés: 45Tsaha te levitahetic scuenta sjelol spisil te ba-alaletic yu'un te snich'nab Israel, soc te schansbahlam te levitahetic scuenta sjelol te schansbahlam te snich'nab Israel; ho'on cu'un ya xc'oht te levitahetic. Ho'on Jehovahon. 46Scuenta yu'un ya xcolic te oxlajuneb schanlajunwinic (273) ba-alal queremetic te c'axem ta yahtalul yu'un te levitahetic, 47c'ambeya ho'eb siclo scuenta jujutuhl, ha te siclo yu'un te ch'ul awilal (te jun ciclo ha jtahb geras).#3.47 10 gramos 48Ya me awa'be te Aarón soc snich'nab te taq'uin ya xcolic a te jaytuhl c'axemic ta yahtalul, xchi.
49Hich te Moisés la stsob te taq'uin te ya xcolic a te jaytuhl c'axemic ta yahtalul te hil yu'un te mach'a colemic yu'un te levitahetique. 50Te taq'uin la yich' yu'un te ba-alal queremetic yu'un te snich'nab Israel, ha oxbahc' soc ho'eb sbalunwinic (1,365) siclohetic, hich te bin ut'il te sp'isol yalal te ch'ul awilal. 51Te Moisés la ya'be te Aarón soc snich'nab te taq'uin scuenta scolelic, hich te bin ut'il pasot ta mandar yu'un Jehová.
Currently Selected:
Números 3: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.