Números 2
2
Scampamentohic soc jtsobawetic yu'un jujuchahp
1Te Jehová hich la yalbe te Moisés soc Aarón: 2Te snich'nab Israel ya me spasic snahilpaq'uic ta sjoyobal te Nahilpac' Templo yu'un tahojibal, jujutuhl ta banti te bandera yu'unic, ta banti te seña yu'un te sna te sme'statique.
3Te mach'atic ya spasic snahilpaq'uic ta stojol banti ya xloc' tal c'ahc'al: ha te bandera yu'un te campamento yu'un Judá ta jujuchahp yu'unic. Te jtsobaw yu'un te sts'umbal Judá, ha te Naasón snich'an Aminadab. 4Te jaytuhlic te ahtaybilic, ha balunpic soc lajunwinic shucbahc' (74,600). 5Tey nix ta sts'ehl ya me spasic snahilpac' te sts'umbal Isacar. Te jtsobaw yu'unic ha te Natanael snich'an Zuar. 6Te jaytuhlic te ahtaybilic, ha wacpic soc waclajunbahc' (54,400). 7Soc te sts'umbal Zabulón, te jtsobaw yu'unic ha te Eliab snich'an Helón. 8Te jaytuhlic te ahtaybilic, ha hucpic soc lajunwinic schanbahc' (57,400). 9Ta spisil te ahtaybilic ta campamento yu'un Judá ha oxeb scha'winic ta pic soc wacbahc' (186,400), ta scuenta jujuchahp yu'unic. Ha'ic te primero ya xloq'uic bahel.
10Te bandera yu'un te campamento yu'un Rubén ya xc'oht ta stojol sur, ta scuenta jujuchahp yu'unic. Te jtsobaw yu'un te sts'umbal Rubén, ha te Elisur snich'an Sedeur. 11Te jaytuhlic te ahtaybilic, ha ho'pic soc ho'winic shuclajunbahc' (46,500). 12Tey ta sts'ehl ya xc'oht te jchahp yu'un Simeón; te jtsobaw yu'unic ha te Selumiel snich'an Zurisadai. 13Te jaytuhlic te ahtaybilic, ha hucpic soc ho'winic sbalunbahc' (59,300). 14Soc te sts'umbal Gad; te jtsobaw yu'unic ha te Eliasaf snich'an Reuel. 15Te jaytuhlic te ahtaybilic, ha ho'pic soc lajuneb yoxwinic yo'lajunbahc' (45,650). 16Ta spisil te ahtaybilic ta campamento yu'un Rubén, ha waxaclajunpic soc lajuneb swaxaclajunwinic swaclajunbahc' (151,450), ta scuenta jujuchahp yu'unic. Ha'ic te schebal ya xloq'uic bahel.
17Patil ya xbaht te Nahilpac' Templo yu'un tahojibal soc te campamento yu'un te levitahetic ta yohlil te campamentohetique. Te bin ut'il chohlolchohl ay scampamentohic, hich nix ya xbehenic bahel jujuchahp soc te bandera yu'unique.
18Te bandera yu'un te campamento yu'un Efraín ya xc'oht ta stojol banti ya xmahl c'ahc'al, ta scuenta jujuchahp yu'unic. Te jtsobaw yu'unic, ha te Elisama snich'an Amiud. 19Te jaytuhlic te ahtaybilic, ha ho'pic soc ho'winic scha'bahc' (40,500). 20Tey ta sts'ehl ya xc'oht te jchahp yu'un Manasés; te jtsobaw yu'unic, ha te Gamaliel snich'an Pedasur. 21Te jaytuhlic te ahtaybilic, ha chanpic soc lajunwinic (32,200). 22Soc te chahp yu'un Benjamín; te jtsobaw yu'unic, ha te Abidán snich'an Gedeoni. 23Te jaytuhlic te ahtaybilic, ha chanpic soc j'ohlil sbalunbahc' (35,400). 24Ta spisil te ahtaybilic te ayic ta campamento yu'un Efraín, ha oxlajunpic soc ho'winic sbuluchbahc' (108,100). Ha'ic te yoxebal ya xloq'uic bahel.
25Te bandera yu'un te campamento yu'un Dan ya xc'oht ta stojol norte; ta scuenta jujuchahp yu'unic. Te jtsobaw yu'unic, ha te Ahiezer snich'an Amisadai. 26Te jaytuhlic te ahtaybilic, ha hucpic soc ho'lajunwinic shuclajunbahc' (62,700). 27Tey ta sts'ehl ya xc'oht te campamento yu'un te jchahp yu'un Aser; te jtsobaw yu'unic, ha te Pagiel snich'an Ocrán. 28Te jaytuhlic te ahtaybilic, ha ho'pic soc ho'lajunwinic schanbahc' (41,500). 29Soc te jchahp yu'un Neftalí; te jtsobaw yu'unic, ha te Ahira snich'an Enán. 30Te jaytuhlic te ahtaybilic, ha wacpic soc j'ohlil schanlajunbahc' (53,400). 31Spisil te ahtaybilic te ayic ta campamento yu'un Dan, ha balunlajunpic soc chanlajunbahc' (157,600). Ha'ic te slajibal ya xloq'uic bahel soc te banderahic yu'unique, xchi te Jehová.
32Ha'ic ini te snich'nab Israel te la yich'ic ahtayel ta scuenta te jujuchahp sna te statique; ta spisil te ahtaybilic ta jujun campamento, ta scuenta jujuchahp, ha ho'lajuneb schanwinic ta pic soc lajuneb swaxacwinic sbalunbahc' (603, 550). 33Pero te levitahetic ma ba pajal la yich'ic ahtayel soc te snich'nab Israel, hich te bin ut'il pasot ta mandar yu'un Jehová te Moisés.
34Te snich'nab Israel la spasic hich te bin ut'il spisil te pasot ta mandar yu'un Jehová te Moisés. Hich la spas scampamentohic ta banti ay te sbanderahic, soc hich behenic bahel jujutuhl soc te mach'atic ay yu'un, ha chican te jujuchahp sna te sme'statique.#2.34 Ta hebreo: static, xchi nax, yu'un ha nax la yich'ic ta cuenta te sbihil te winique.
Currently Selected:
Números 2: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.