Amós 9
9
Mayuc mach'a ya xcol ta castigo yu'un Jehová
1La jquil te Cajwaltic teq'uel ta sts'ehl te scajtajib ta chiq'uel mahtanil, hich la yal:
Maja te sni'il te bahlal oy,
ac'a syuq'uilan te puertahetic,
wuyticlana cohel ta sjol spisilic.
Te mach'atic cuxul ya xhilic
ya jmilticlan ta espada;
mayuc mach'a ya x'ahnic bahel,
mayuc mach'a ya xcol.
2Aunque ya sjoq'uic
c'alal ta stsobojibal mach'atic chamenic,
tey ya jtsacticlan ta jc'ab a;
aunque ya xmohic bahel c'alal ta ch'ulchan,
tey ya jcohtes tal a.
3Teme ya snac' sbahic ta ba wits yu'un Carmelo,
tey ya jle a soc ya jtsacticlan;
aunque ya snac' sbahic ta jtojol c'alal ta sc'ubulil mar,
tey ya calbe ta mandar te chan te ya sti'e.
4Teme ya x'ic'otic bahel ta chuquel yu'un te scontratac,
tey ya jticon bahel a te espada te ya xmilotic yu'un.
Ya cac' jsit ta stojolic yu'un ya jpasbe te bin ma lecuc,
ma ha'uc te bin leque.
5Te Ajwalil, te Jehová te scuentahinej spisil,
ya stij te q'uinal, ya x'uhl yu'un,
soc ya x'oq'uic
spisil te mach'atic ya xnahinic tey a;
spisil te q'uinal ya xnoj bahel
hich te bin ut'il muc'ul-ha',
soc ya xco bahel
hich te bin ut'il te muc'ul-ha' yu'un Egipto.
6Ha la spas sna ta ch'ulchan
soc la ya'be yich' yip te sjamalil ch'ulchan
ta yahc'olal te lumquinale;
ha ya yic' tal te ha'etic yu'un te mar,
soc ya smal bahel ta sba te lumq'uinal:
ha Jehová te sbihile.
7Snich'nabex Israel,
¿Ma bal hichuc ayex ta jtojol
te bin ut'il te etiopiahetic? xchi te Jehová.
¿Ma bal lajuc quic' loq'uel tal te Israel ta sq'uinal Egipto,
te filisteohetic ta Caftor,
soc te arameohetic ta Kir?
8Te sit te Jehová te Ajwalil
ay ta stojol te mulawil nación,
ya jtup' bahel ta sba te lumq'uinal,
pero ma ba ya jlajin spisil te sna Jacob, xchi te Jehová.
9Como ya cal ta mandar
te ya yich' chihchinel te sna Israel
ta yohlil spisil te nacionetic,
hich te bin ut'il ya yich' chihchinel trigo ta schihchinojibal,
ma ba ya xch'ay jp'ijuc ta lum.
10Spisil te jmulawiletic ta pueblo cu'un
ya xlajic ta espada,
te hich ya yalic: Ma ba ya xnohpoj tal,
ma ba ya stahotic te bin chopol, te xhihique.
Ya yich' lecubtesel ta patil Israel
11Ta hich ora ya jcha'hach te snahilpac' David te yahleme. Ya jmacbe te banti jamajtic, ya jcha'pas xan banti jihnem, hich ya jcha'pas xan te bin ut'il ta nahil to, 12scuenta yu'un te mach'atic yich'ojbonic te jbihile ya me yu'untayic te mach'atic hilemic yu'un Edom soc spisil te nacionetic, xchi te Jehová te ya spas ini.
13Ya me xtal yorahil, xchi te Jehová, te mach'a ya stuc lum ya sta c'ohel te mach'a ya stsobe sit, soc te mach'a ya sts'o' ta teq'uel ts'usub ya sta c'ohel te mach'a ya ya'iy ts'umbajel. Ta witsiltic ya xt'uhlaj cohel yach'il vino soc ya x'oquin cohel ta spisil te tsehletique. 14Ya quic' suhtel tal te pueblo Israel cu'un te bahemic ta chuquel; ha ya scha'pasic xan te pueblohetic te jihnemic soc tey ya xnahinic a; ya sts'unic ts'usubiletic soc ya me yuch'beyic te vino yu'une; ya sts'unic awal-ts'unubiletic soc ya me swe'beyic te site. 15Ya jts'unticlan ta sq'uinalic, mayuquix bin ora ya yich'iquix bulel loq'uel ta q'uinal te la jca'be, xchi te Jehová te Dios awu'une.
Currently Selected:
Amós 9: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.