Amós 7
7
Oxchahp nahalsitil yu'un jinel
1Hich la ya'bon quil te Jehová te Ajwalil: Ha la yac' ta pasel c'ulubetic ta yorahil yac ta puhl te aquiltic te patilix ya xcol, te lajix ta tsobel a te sit te ha yu'un te ajwalile. 2C'alal lajix swe'bel a te ya'malel q'uinal te c'ulubetic, hich la jcal: ¡Cajwal Jehová, pasa perdón! ¿Bin ut'il c'an cuhchuc yu'un te Jacob, te melel ha tut? xchihon yu'un. 3Ha yu'un te Jehová la suht sc'op, hich la yal: Ma hichuc ya xc'oht ta pasel, xchi.
4Te Jehová te Ajwalil hich la ya'bon quil: Te Jehová te Ajwalil yac yich'bel tal c'ahc' scuenta chahpanel; ha la slajin te muc'ul xahab soc jsehp te q'uinale. 5Hich la jcal: ¡Coma aba, Cajwal Jehová! ¿Bin ut'il c'an cuhchuc yu'un te Jacob, te melel ha tut? la jcut. 6Ha yu'un te Jehová la suht sc'op, hich la yal: Ha nix hich ma ba ya xc'oht ta pasel, xchi.
7Soc la ya'bon quil ini: Te Cajwaltic teq'uel ta ba ts'ahc te toj pasbil ta plomo, soc ay plomo yu'un albañil ta sc'ab. 8Hich la sjoc'obon te Jehová: ¿Bin yac awil, Amós? xchi.
Jun plomo yu'un albañil, xchihon.
Hich la yalbon: Ilawil, ya cac' te plomo yu'un albañil ta yohlil te pueblo Israel cu'un; ma ba ya jpasbeyiquix xan perdón. 9Te toyol awilaletic yu'un Isaac ya me yich'ic jinel, te ch'ul awilaletic yu'un Israel ya me yich'ic jinel, soc ya jach espada ta scontrahinel te sna Jeroboam, xchi.
Amós soc Amasías
10Te Amasías te sacerdote ta Bet-el la sticon ta halbeyel te Jeroboam ajwalil yu'un Israel, hich la yal: Te Amós hahch scontrahinat ta yohlil te Israel. Te q'uinal ma xcuhch yu'un spisil te sc'ope. 11Como hich yaloj te Amós: Te Jeroboam ya xlaj ta espada, soc ya x'ic'ot bahel ta chuquel te Israel, xchi.
12Te Amasías hich la yalbe te Amós: Ha'at j'il-q'uinalat, loc'an bahel, ahnan bahel ta sq'uinal Judá, we'an tey a te pan awu'une, hala sc'op-jalwanej tey a; 13pero ma me xawalix sc'op-jalwanej ta Bet-el, como ha ch'ul awilal yu'un te ajwalil soc ha muc'ul templo yu'un te ban c'alal scuentahinej, xchi.
14Ha yu'un te Amós hich la sjac'be te Amasías: Ma ba jalwanejon soc ma ba yal-snich'anon jalwanej, ho'on jcanan-tuminchijon soc ya jtsob sit ha'mal higuerahetic. 15Pero te Jehová la yic'on loq'uel ta scanantayel te tuminchijetic, hich la yalbon: Bahan, halbeya sc'op-jalwanej te Israel te pueblo cu'une, xchi.
16Ha yu'un, a'iybeya awa'iy te sc'op Jehová. Ha'at yac awal: Ma me xawal sc'op-jalwanej ta scontrahinel Israel, ma me xc'opojat ta scontrahinel te sna Isaac, xchihat. 17Ha yu'un hich yaloj te Jehová: Te awihnam ha j'antsinel ants ya xc'oht ta yohlil te muc'ul pueblo, te ach'ix-queremetic awu'un ya me xlajic ta espada soc te aq'uinal ya me yich' puhquel ta scuenta spasel seña ta na'el; te ha'at ya me xchamat ta q'uinal te ma lecuc sc'oblal, soc te Israel chucul ya x'ic'otic bahel, namal ya xhil sq'uinalic, xchi.
Currently Selected:
Amós 7: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.