2 Corintios 6
6
1Jada'achám, miich mu̶dyiibu̶ je̱'e̱ Dios tyuung nandu'un tuunu̶gyu̶xpu̶ñ, cham nmu̶nukxtaakku̶xy ko ka'p je̱'e̱ Dios y'oy'ajt myay'ajt nigoo mni'i'ijxu̶ ajku̶xy je̱'e̱ mu̶dyiibu̶ tu̶ xyaj'ijx xyajnejwu̶u̶ygyu̶xyu̶ñ. 2Je̱' ko du'un je̱'e̱ Dios myu̶na'añ ma je̱'e̱ ñakyu̶ñ:
“Ko je̱'e̱ xu̶u̶ tiempo paaty, nmu̶doowu̶ch je̱'e̱ mju̶u̶yu̶ñ myaaxu̶ñ;
nbube̱jt nbudu̶gu̶u̶y ko je̱'e̱ aanu̶mu̶ ni'idzooku̶ñ najty tu̶ myu̶baad'áty tu̶ paady.”
Y jada'achám je̱'e̱ xu̶u̶ tiempo tu̶ myu̶baad'áty.
¡Jada'achám xu̶u̶ je̱'e̱ aanu̶mu̶ ni'idzooku̶ñ ñaxy wya'kxy!
3Ka'p u̶u̶ch je̱'e̱ lugaar nye̱jkku̶xy nu̶kxy je̱'e̱ ja'ay myu̶naangu̶xy ko u̶u̶ch ju̶bu̶k nja'ay'ajtku̶xy, ka'pu̶ myu̶naangu̶xu̶ch ko u̶u̶ch je̱'e̱ nduung ka'p y'óyu̶ch ajku̶xy. 4Ni'igyu̶ u̶u̶ch nyajni'igu̶xu̶'kku̶xy ma ku̶xyu̶ tijaty u̶u̶ch nduungu̶xypyu̶ñ ko Dios mu̶duumbu̶ u̶u̶ch ajku̶xy; y tu̶ nmu̶madaakku̶xyu̶ch mu̶u̶d ku̶xyu̶ me̱kxtujku̶ñ je̱'e̱ tzaachpyu̶ ayo'on, je̱'e̱ xoñyii ayoyiibyu̶, je̱'e̱ nimu̶jaaba tzu̶naayu̶ñ, 5je̱'e̱ naywyobu̶u̶, je̱'e̱ naychum naymyadzu̶u̶, je̱'e̱ naymyu̶ya'ax naymyu̶jogu̶u̶ je̱'e̱ nimu̶jaaba nu̶u̶ tuung, je̱'e̱ yuu xu̶u̶ y tu̶ nga'amaa nga'apókxku̶xyu̶ch. 6Nan nyajni'igu̶xu̶'kku̶xypyu̶ch ko u̶u̶ch tu̶y tu'uda'agy ndzu̶naay njugy'ajtku̶xy, ko u̶u̶ch je̱'e̱ Dios tyu̶y'ajt nnejwu̶u̶yu̶ ajku̶xy, ko u̶u̶ch nme̱kxtujkku̶xy y ko u̶u̶ch nba'a''ayoobu̶ja'ayu̶ch ajku̶xy, ko u̶u̶ch je̱'e̱ Espíritu Santo nmu̶dajtu̶ ajku̶xy ma u̶u̶ch je̱'e̱ njoot nwinma'añ ajku̶xyu̶ñ, ko u̶u̶ch je̱'e̱ tzojku̶ñ pa'a''ayoowu̶ñ tu'ug'aa tu'ugjoot nduungu̶xy, 7ko u̶u̶ch je̱'e̱ ayuuk tu̶y'ajt nyajwa'kxku̶xy, y ko u̶u̶ch je̱'e̱ Dios myu̶k'ajt nmu̶dajtu̶ ajku̶xy. Je̱'e̱ tu̶y'ajt tu'uda'agypyu̶ u̶u̶ch nyajtuungu̶xypy ko u̶u̶ch naty je̱'e̱ ayuuk tu̶y'ajt pu̶n nyajwingapxu̶'u̶waangu̶xy, y nan je̱' u̶u̶ch nayyajniwaanu̶gu̶xp ko u̶u̶ch naty pu̶n xymyu̶mayu̶u̶ygyu̶xy. 8Mu̶naajáty u̶u̶ch je̱'e̱ ja'ay xyajmu̶j'ajtku̶xy, y mu̶naajáty u̶u̶ch xywyingapx xyjyu̶jpkápxku̶xy; mu̶naajáty u̶u̶ch oy yajxón xyñigapx xyñimu̶dyaakku̶xy, y mu̶naajáty u̶u̶ch ju̶bu̶kjaty axu̶u̶gjáty xyñigapx xyñimu̶dyaakku̶xy. Anu̶u̶ u̶u̶ch xytyijku̶xy, oy u̶u̶ch je̱'e̱ tu̶y'ajt nja'akápx nja'amu̶dyaakku̶xy. 9Du'un u̶u̶ch je̱'e̱ xy'ijxku̶xy neby u̶u̶ch ka'pu̶ xy'ixy'ajtku̶xyu̶ñ, oy u̶u̶ch oy xyjya'a'ixy'ajtku̶xy. O'kju̶jp'aam u̶u̶ch n'ijtku̶xy; peru̶ jakjugy'ajtp u̶u̶ch ajku̶xy; xychaachtyuumb u̶u̶ch ajku̶xy; peru̶ ka'p u̶u̶ch xyaj'o'kku̶xy. 10Du'un u̶u̶ch ngu̶xu̶'kku̶xy neby u̶u̶ch du'umbu̶ ndajku̶xy nmaaygyu̶xyu̶ñ; peru̶ jootkujk u̶u̶ch je'emy ajku̶xy. Du'un u̶u̶ch ngu̶xu̶'kku̶xy neby u̶u̶ch du'umbu̶ n'ayoogu̶xyu̶ñ, peru̶ may je̱'e̱ ja'ay oy'ajtu̶ñ tu̶ paatku̶xy mu̶u̶d u̶u̶ch je̱'e̱ nduung kyu̶xpu̶ ajku̶xy; du'un u̶u̶ch ngu̶xu̶'kku̶xy neby u̶u̶ch ka'pu̶ tii nmu̶dajtku̶xyu̶ñ, peru̶ nmu̶dajtypy u̶u̶ch ku̶xyu̶ tii ajku̶xy y ka'p u̶u̶ch tii xytyu̶goy'ajtu̶ ajku̶xy.
11Corintios mu̶gu'uktu̶jk ajku̶xy, tu̶ miich je̱'e̱ tu̶y'ajtu̶ñ ku̶xyu̶ nyajmu̶dkápx nyajmu̶dmu̶dyaakku̶xy; tu̶ miich n'awaanu̶ ajku̶xy neby miich tu'ug'aa tu'ugjoot ndzojkku̶xy nju̶wu̶u̶ygyu̶xyu̶ñ. 12Ka'p miich mu̶naa tu̶ n'u̶xmajtzku̶xy neby miich ndzojkku̶xy nju̶wu̶u̶ygyu̶xyu̶ñ; miich tu̶ xy'u̶xmajtzku̶xy neby u̶u̶ch ijty xychojkku̶xy xyjyu̶wu̶u̶ygyu̶xyu̶ñ. 13Cham nmu̶nukxtaakku̶xy, du'un neby tu'ug ungteedy y'ung y'ana'k mu̶nukxtaakku̶xyu̶ñ, ko tzojku̶ch ju̶wu̶u̶ygyu̶ch ajku̶xy du'un neby u̶u̶ch miich ndzojkku̶xy nju̶wu̶u̶ygyu̶xyu̶ñ.
Je̱'e̱ juugypyu̶ Dios xychajptu̶jk'ajtp ajtu̶m ajku̶xy
14Ka'p mbuyo'oy mbunaxu̶u̶ygyu̶xy je̱'e̱ mu̶dyiibu̶ je̱'e̱ Jesucristo ka'p mu̶bu̶jkku̶xyu̶ñ. ¿Nej naybyudu̶gu̶u̶yu̶p je̱'e̱ tu'uda'agy'ajtu̶ñ mu̶u̶d je̱'e̱ ka'pu̶ tyu'uda'agy'ajtu̶ch? ¿O nej mu̶baad je̱'e̱ jaju̶ñ ñaymyu̶gu'ug'ajtu̶gu̶xy mu̶u̶d je̱'e̱ koodzpu̶? 15Ka'p je̱'e̱ Cristo mu̶baad tu'ugyu̶ y'ity mu̶u̶d je̱'e̱ mu̶jku'u, ni je̱' mu̶baad tu'ugyu̶ kya'a'ijtku̶xy je̱'e̱ mu̶dyiibu̶ je̱'e̱ tu̶y'ajt mu̶bu̶jkpu̶ñ mu̶u̶d je̱'e̱ mu̶dyiibu̶ je̱'e̱ tu̶y'ajt ka'p mu̶bu̶kyu̶ñ. 16Ka'p je̱'e̱ tzaadzéch kepychech jiiby mu̶baad y'ity ma je̱'e̱ Dios tyu̶jku̶ñ. Je̱' ko du'un u̶u̶ch ajtu̶m ajku̶xy neby je̱'e̱ juugypyu̶ Dios chajptu̶jku̶ñ, neby je̱'e̱ Dios ku̶'u̶m myu̶naañu̶ñ:
“Tzu̶na'awu̶bu̶ch y wu̶díttu̶bu̶ch ma yu̶'u̶ ajku̶xyu̶ñ;
u̶u̶ch je̱'e̱ xyDyios'ajtku̶xu̶p y je̱' u̶u̶ch nja'ay'ajtku̶xu̶py.”
17Paady je̱'e̱ Windzú̶n Dios nandu'un myu̶na'añ:
“Pu̶dzu̶u̶mgu̶x ma je̱'e̱ du'umbu̶ ja'ay ajku̶xyu̶ñ, y puyo'oydyuutku̶x;
ka'p je̱'e̱ ju̶bu̶kpu̶ mmu̶waangu̶xy.
Mu̶'it miich ngu'ubu̶jkku̶xu̶ch
18y u̶u̶ch miich xtyeedy'ádu̶p ajku̶xy,
y miich nya'ay'úng ndo'oxy'ung'ádu̶py ajku̶xy,
du'un je̱'e̱ Windzú̶n Dios mu̶jmu̶k'ajtmu̶u̶dpu̶ myu̶na'añ.”
Currently Selected:
2 Corintios 6: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005