2 Corintios 5
5
1U̶u̶ch du'un ajtu̶m ajku̶xy neby tu'ug tu̶jk je̱'e̱ mu̶dyiibu̶ ya naaxwiiñ yajmu̶dajtpu̶ñ, neby tu'ug wit tu̶jk je̱'e̱ mu̶dyiibu̶ ka'p wiinu̶u̶xu̶u̶ y'ijtu̶yu̶ñ; peru̶ nnejwu̶u̶yu̶mby ajku̶xy ko pu̶nu̶ windu̶gooby naty adayaaba wit tu̶jk, ni'ixu̶'u̶ je̱'e̱ Dios tu̶jk jiiby tzajpjooty xyaj'ijtu̶yu̶ ajtu̶m ajku̶xy, je̱'e̱ mu̶dyiibu̶ wiinu̶u̶xu̶u̶ ijtu̶u̶bu̶ñ, je̱'e̱ mu̶dyiibu̶ je̱'e̱ Dios tu̶ kojyu̶ñ y ka'p ñaaxwiiñjya'ayu̶ch. 2Paady du'un oynejpy njajt n'abe̱jtu̶m ajku̶xy ko ya ndzu̶naay njugy'ajtu̶m ajku̶xy ma adayaaba naaxwiiñu̶ñ mu̶u̶d adayaaba ni'kx kopt, je̱'e̱ mu̶dyiibu̶ du'un jada'achám neby tu'ug wit tu̶jku̶ñ, janch ja'anu̶kxaamb ajtu̶m ajku̶xyu̶ñ tzu̶naaybyu̶ jiiby tzajpjooty ma je̱'e̱ ndu̶jk jiiby ajtu̶m ajku̶xyu̶ñ. 3Je̱'e̱ mu̶dyiibu̶ du'un xyu'tz xy'amé̱ttu̶mu̶bu̶ñ ajku̶xy neby je̱'e̱ wit yu'uch y'amechu̶ñ, ka'pu̶ ni'iwa'adz u̶xwa'adz n'ijtu̶mu̶ch ajku̶xy. 4Ma yam njugy'ajtu̶mnu̶ ajku̶xy mu̶u̶d adayaaba ni'kx kopt je̱'e̱ mu̶dyiibu̶ du'un neby wit tu̶jku̶ñ, paady ndaj nmaayu̶m ajku̶xy je̱' ko oyñejpy njajt n'abe̱jtu̶m ajku̶xy, peru̶ ka'p it nja'a'o'ogaan nja'atu̶goyaanu̶m ajku̶xy, je̱' ni'igyu̶ nja'atzojku̶mby ajku̶xy je̱'e̱ jembyu̶ jugy'ajtu̶ñ ma ka'p nimu̶naaxu̶u̶ n'o'k ndu̶gooyu̶mu̶chu̶ñ ajku̶xy. 5Y je̱'e̱ Dios adaa du'un tu̶ xyajnibu̶daagu̶u̶yu̶m ajku̶xy, y je̱' je̱'e̱ Espíritu Santo tu̶ xyaj'adu̶gu̶u̶y xyajjoottu̶gu̶u̶yu̶m ajku̶xy, du'un neby du'umbu̶ tu̶ xyjyuuyu̶'ku̶mu̶ñ ajku̶xy ko nbadaanu̶m ajku̶xy je̱'e̱ mu̶dyiibu̶ xymyo'owaanu̶mbu̶ñ ajku̶xy.
6Paady je'emy jootkujk n'ijtu̶m ajku̶xy. Nejwu̶u̶yu̶mby ajku̶xy ko mabaad ndzu̶naay njugy'ajtu̶m ajku̶xy mu̶u̶d adayaaba ni'kx kopt, du'un nyajpaatu̶mu̶ch ajku̶xy neby ju̶gue̱m du̶goy ndzu̶naay njugy'ajtu̶mu̶ñ ajku̶xy, ju̶gue̱m ma je̱'e̱ Windzú̶n Jesúsu̶ñ. 7Nejwu̶u̶yu̶mby adaa du'un ajku̶xy je̱' ko nmu̶bu̶jku̶m ajku̶xy oy je̱'e̱ Jesús nga'a'ijxu̶m ajku̶xy; 8peru̶ jootkujk ajtu̶m ajku̶xy, y ja'amu̶naamb du'un ajtu̶m ajku̶xyu̶ñ ko u̶xyu̶py adayaaba ni'kx n'u̶xmajtzu̶nu̶ ajku̶xy neby jiiby nu̶kxy mu̶baad ndzu̶naaydyaakpu̶jku̶nu̶ju̶ñ ajku̶xy ma je̱'e̱ Windzu̶nu̶ñ. 9Paady u̶u̶ch du'un njatytimyjoottu̶gooygyu̶xy ndzu̶naay njugy'ajtku̶xyu̶ch neby je̱'e̱ Windzú̶n Jesús ku'umáyu̶ñ, ka'p ñejpyu̶ch pu̶nu̶ jaktzu̶naayu̶mb mu̶u̶d adayaaba ni'kx o pu̶nu̶ n'u̶xmajtzu̶mby adayaaba ni'kx nu̶kxy jiiby ndzu̶naayu̶nu̶ ajku̶xy ma je̱'e̱ju̶ñ. 10Je̱' ko nigu̶xyu̶ je̱'e̱ Cristo nwinguwa'agu̶u̶yu̶mu̶ch ajku̶xy ma je̱'e̱ tyu̶ydyuundaaktu̶ñ, neby nidu'ug nidu'ug paadu̶chu̶ñ je̱'e̱ mu̶dyiibu̶ naty paattu̶bu̶ñ, du'un neby naty tu̶ chu̶na'ay tu̶ jyugy'atyu̶ñ, pu̶nu̶ tu̶ je̱'e̱ oybyu̶ tuñ o je̱'e̱ ju̶bu̶kpu̶ tuñ ma najty ya naaxwiiñ yajpaatyñu̶ju̶ñ.
Je̱'e̱ ayuuk tu̶y'ajt mu̶dyiibu̶ je̱'e̱ yuung'ajt naaxypy'ajt mu̶u̶du̶ñ
11Paady, je̱' ko nnejwu̶u̶yu̶mby ko je̱'e̱ Windzú̶n Jesús nwindzu̶gu̶u̶yu̶mu̶ch ajku̶xy, paady u̶u̶ch njatytimymyu̶joottu̶gooygyu̶xy nyajku'ubu̶jkku̶xyu̶ch je̱'e̱ ja'ay je̱'e̱ ayuuk tu̶y'ajt. Ñejwu̶u̶by je̱'e̱ Dios oy yajxón neby u̶u̶ch je̱'e̱ joot winma'añ nmu̶dajtku̶xyu̶ñ y nan nju̶jp'ijxypyu̶ch mnejwu̶u̶ygyu̶xu̶ch miich nandu'un neby u̶u̶ch je̱'e̱ joot winma'añ nmu̶dajtku̶xyu̶ñ. 12Ka'p u̶u̶ch yam ja'adu'ook ku̶'u̶m nnaygyu'umaaydyu̶gu̶u̶yu̶gu̶xnu̶bu̶, je̱'e̱ xu̶u̶ tiempo miich yam du'un nja'amooygyu̶xy neby miich jootkujk mnayjyu̶wu̶u̶yu̶gu̶xu̶ch mu̶u̶d u̶u̶ch kyu̶xpu̶ ajku̶xy, neby je̱'e̱ ja'ay mu̶baad m'adzoogu̶xy, je̱'e̱ mu̶dyiibu̶ nigoo naygyu'umaayu̶gu̶xpu̶ñ neby ni'igú̶xp ku'uduuy kyu̶'u̶xu̶'kku̶xyu̶ñ y ka'p neby je̱'e̱ joot winma'añ mu̶dajtku̶xyu̶ñ. 13Pu̶nu̶ mu̶naangu̶xp je̱'e̱ ja'ay ko u̶u̶ch nlooku̶ch ajku̶xy, je̱' gyu̶xpu̶ je̱'e̱ du'un ko u̶u̶ch je̱'e̱ Dios nmu̶duungu̶xy; y pu̶nu̶ ka'p u̶u̶ch nlooku̶ch ajku̶xy, je̱' je̱'e̱ du'un neby je̱'e̱ m'oy'ajtu̶ñ miich mbaadku̶xu̶chu̶ñ. 14Je̱'e̱ Cristo u̶u̶ch xychojkku̶xp xyjyu̶wu̶u̶ygyu̶xp, y paady u̶u̶ch je̱'e̱ y'ayuuk tyu̶y'ajt nguydyuunu̶ ajku̶xy, je̱' ko je̱'e̱ Cristo je̱'e̱ ja'ay nigu̶xyu̶ ni'o'ktuut, y paady du'un nandu'un ni'ipaady neby nu̶wu̶'u̶y nigu̶xyu̶ nandu'un kipxy tu̶ n'o'ku̶mu̶ñ ajku̶xy mu̶u̶d je̱'e̱ Cristo. 15Y je̱'e̱ Cristo je̱'e̱ ja'ay nigu̶xyu̶ ni'i'o'ktuut, ka'pu̶ je̱'e̱ mu̶dyiibu̶ jaktzu̶naaby jakjugy'ajtku̶xpu̶ñ je̱'e̱ kyu̶'u̶m joot kyu̶'u̶m winma'añ yajtuungu̶xu̶ch ma je̱'e̱ chu̶naay jyugy'ajtu̶ñ ajku̶xyu̶ñ, Cristo kyu̶xpu̶ je̱'e̱ wan tzu̶naay jugy'ajtku̶xy, je̱'e̱ mu̶dyiibu̶ o'ku̶ñ y jyuugypyu̶jky mu̶u̶d je̱' gyu̶xpu̶ ajku̶xy. 16Y paady u̶u̶ch ka'p ngweentu̶tuungu̶xnu̶ neby je̱'e̱ naaxwiiñjya'ay ñayñigapx ñayñimu̶dyáku̶gu̶xyu̶ñ, jékyu̶p nnigapxypy nnimu̶dyaakypyu̶ch je̱'e̱ Cristo ijty oyñejpy ajku̶xy, jada'achám ka'p u̶u̶ch du'un n'okja'ay'ajtku̶xnu̶ neby u̶u̶ch ijty je̱' jékyu̶p nnigapx nnimu̶dyaakku̶xyu̶ñ. 17Y du'unu̶tz, pu̶n tu'ugyu̶ yajpaatp mu̶u̶d je̱'e̱ Cristo jemy jyoot wyinma'añ je̱'e̱ju̶ñ. Tu̶ je̱'e̱ ju̶bu̶kjoot ju̶bu̶kwinma'añ najtz'ixu̶u̶yñu̶ je̱'e̱ mu̶dyiibu̶ ijty jékyu̶p myu̶dajtypyu̶ñ; y je̱'e̱ mu̶dyiibu̶ cham myu̶dajtnu̶byu̶ñ, agu̶ jemy je̱'e̱ju̶ñ.
18Ku̶xyu̶ adaa, Dios adaa du'un ku̶'u̶m tu̶ tuñ mu̶u̶d je̱'e̱ Cristo ko je̱'e̱ tzip ma'ad tu̶ nyajku̶jx nyajnajxu̶m ajku̶xy neby jootkujk n'ijtu̶nu̶ch ajku̶xy mu̶u̶d je̱'e̱ Dios, y tu̶ u̶u̶ch xyajni'ipu̶jkku̶xy ko u̶u̶ch je̱'e̱ ayuuk tu̶y'ajt ngapxwa'kxku̶xu̶ch neby je̱'e̱ ja'ay je̱'e̱ tzip ma'ad mu̶baaad yajku̶jx yajnajxku̶xyu̶ñ mu̶u̶d je̱'e̱ Dios neby mu̶baad jootkujk y'ijtku̶xnu̶ju̶ñ mu̶u̶d je̱'. 19Du'un u̶u̶ch du'un ndijy, Cristo kyu̶xpu̶ je̱'e̱ Dios tzip ma'ad ku̶'u̶m tu̶ yajkú̶xy yajnáxy neby je̱'e̱ naaxwiiñjya'ay najty myu̶dzip'ajtu̶gu̶xyu̶ñ neby mu̶baad jootkujk y'ijtku̶xnu̶ju̶ñ, ka'p je̱'e̱ ja'ay pyoky kyu̶dyeey yujkpu̶jk yujk'ijxu̶ ajku̶xy; y u̶u̶ch xyajni'ipu̶jku̶ch ajku̶xy ko u̶u̶ch je̱'e̱ y'ayuuk tyu̶y'ajt nyajnajxu̶ch ajku̶xy ma je̱'e̱ ja'ay ajku̶xyu̶ñ. 20Y du'unu̶tz, u̶u̶ch je̱'e̱ Cristo kyexyo'oybyu̶du̶jk ajku̶xy, je̱'e̱ mu̶dyiibu̶ du'un ni'ipaatpu̶ñ neby je̱'e̱ Dios miich du'un ku̶'u̶m xymyu̶nukxtaakku̶xpu̶ñ mu̶u̶d u̶u̶ch je̱'e̱ n'ayuuk ajku̶xy neby je̱'e̱ Cristo y'ayuuk tyu̶y'ajt nja'ayajwingapxu̶u̶ygyu̶xyu̶ñ. Y paady cham nmu̶nukxtaakku̶xy Cristo kyu̶xpu̶ ko yajku̶jx yajnajxku̶xnu̶ je̱'e̱ tzip ma'ad mu̶u̶d je̱'e̱ Dios, wan jootkujk m'ijtku̶xnu̶ch mu̶u̶d je̱'. 21Cristo ka'p je̱'e̱ nidu'uñdyu̶ pyokytyuuñ; peru̶ mu̶u̶d u̶u̶ch kyu̶xpu̶ nboky ngu̶dyeey ajtu̶m ajku̶xy, du'un je̱'e̱ Dios yajnajxu̶ neby pokyjya'ayu̶ñ, neby je̱'e̱ nboky ngu̶dyeey mu̶baad xywyinmé̱kxu̶yu̶ ajtu̶m ajku̶xy Cristo kyu̶xpu̶.
Currently Selected:
2 Corintios 5: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005