MHO" PEIM: 5
5
Amyin" Dao: Daxe
(Phao: Thug' 20.1-17)
1Moshe wa Israel byu qere khai: zhang" yu mung: yao: bam re- Israel byu qe we"- ana" ba naonhaung" re ngo byid: nae" ngad: ra" tarha" jham alhab' re tae" gyo: ge,. Aijham re zhao: yu mung: naonhaung" aire phug' cao" ca" rure beim: ge,. 2Sina bam mae ngonhaung" nho: Mao"So Asang to" to" ra" dao: thang" wa- 3Ngonhaung" yao: pho" qe we' za: mangad: ana" ba daui: na: ra" ngonhaung" alhab' mo, we' re: dao: thang" to" to" ru ngad: ra". 4Aibam: dao mae Asang wa myi:khug' mae" naonhaung" we' myo, khung: zam" zhaung yang: dao: jhau: ra". 5Ai: ayo, mae yao: ta" ra" dao: re naonhaung" re ta" kyo: nae" qhid' mae" ngo wa Asang we' naonhaung" agyo: mae ye; jo; ra". Pe"mung:ga"re naonhaung" wa myi: re gyaug mung: ai: bam khyo mado, ye: ko" ngad: ra".
Asang ta" ru wa- 6Ngo wa naonhaung" jeim doe; na: ra" Egutu mung" mae" naonhaung" re khyad' yu: ra" yaug naonhaung" Mao"So Asang ngad:-
7Ngo mae" je yang: so gatau re dacaung: dapa" ge,.
8Mug:gaung mae" pe" ja" khyao dau solho rere:- myidgaung mae" pe" ja" khyao dau sulho rere:- myidgaung o qid khug mae" pe" ja" khyao dau solho rere: naonhaung" yao" qhid' mae" dakad' ge,. 9Pe" ja" so alho rere: dagoe; pa"- aire dacaung: dapa"- pe"mung:ga"re ngo wa ni" Mao"So Asang ngad mung:- ngo wa mai jho" qhi" mo, khag' rere: maqo" zang: ngad: ra". Ngo wa ngore nghang" ra" mo; dao mae qobo dae byid: mung:- yao: bam: myid:zo: qe: dao mae re: byu sam qae:- byid qae: joe" sho' qobo dae byid: ra". 10Ngadqere: ngore jhid'de; mung: nga" tarha" jham re phug' cao" mo, re wa byu qae: taung tug joe" sho' nga" jhid'de; myid re ngo qhu" byid' ra".
11Nga" mang re makhyang: mashab: ra" khyo qhid' mae" dalao:- pe"mung:ga"re naonhaung" Mao"So Asang ngo wa- nga" mang re mangad' ra" khyo" ci: ra" yaug khag' rere: qobo dae byid: nae".
12Naonhaung" Mao"So Asang ngo amyin" byid' to" ru we' dakhyo:- Dugno: Ba re phug' cao" mung: aire gyang" lho" nhao ge,- 13Naonhaung" nho: mau" zaui: nae" qhid' mae" ba na khyaug' ba ayo, naonhaung" qo" ako". 14Ngadqere: nhad' ba ein: ba wa ngore qhaug' byid' to" ra" Dugno: Ba na ngad: ra". Ai: ba mae khag' re: mau" dazaui: ge,- nao re:- ni" zoshao qere:- ni" jeim qere:- ni" gug'nyhug' jham re:- ni" mung"dan: khug mae na: ra" taung bug byu qere: mau" dazaui: ge,- ni" jeim qe wa nao we' dakhyo: dug no" na ca" ra". 15Egutu mung" mae naonhaung" jeim doe; na gemung:- naonhaung" Mao"So Asang ngo wa qam: so' mo" we' qam: o: khyo" yang naonhaung" re khyad' yu: ra" khyo re myid: beim: ge,. Ce: mathao mae Dugno: Ba re phug' cao" genae" qhid' mae" ngo amyin" byid' ru ngad: ra".
16Ni" Mao"So Asang: ngo amyin" byid' ru we' dakhyo:- ni" pho" we' ni" myhi" tao re phug' myao: wa,- airulao" nao na: dai mung: ngo nao re byid: nae" ngad: ra" mung"dan: mae kao qhang sho' qo" na: li" nae".
17Byu dase'.
18Myi: lao dashad'.
19Dakhug'.
20Khag' rere: majo: ra" khyo" qobo dazhaug'.
21Su: yham sang myhi" re daqu" myo, nyad- yao" yham yao" jeim qe- yao" mug:myid yao" nung: kyaung"- yao" loze jham- yao: sang: ra" ja: pe" rere: myo, danyad ga:- ta" ra".
22Ce: amyin" jham wa- ai: bam mae naonhaung" zang" ham: na ko" au:- naonhaung" alhab' re Asang byid' ra" amyin" dao: jham ngad: ra". Myi: we' nhag' qhid' thaui: khug mae" qam: so' thoe we' yao: jhau: ra" au:- ce: amyin" dao: jham re byid: mung:- gatau mata" laung: ngad: ra". Ai: thao yao: wa aijham re laug pye: shid' pye: dao mae tung" mung: ngore byid' ra".
Mo,byu Qe Gyaug Ko" Ra" Khyo
(Phao: Thug' 20.18-21)
23Bam geim" myi: nga" mung:- cad' no; ra" khug mae" thoe re naonhaung" the' gyo: gelao"- naonhaung" au: jhaung qe we' naonhaung" amyu" kaung au: jhaung qe wa ngojhao" li" mung:- 24Ngonhaung" Mao"So Asang wa yao: qi" qhang: ru we' yao" phungbao re ngonhaung" the' gyo" ra" au:- ngonhaung" re qhu" byid' ava". Mao"So yao: re dao: jhau va" sho' ngadqere: xo' yang: yao: kao so' gai: daui: na: ra" khyo re ana" ba ngonhaung" the' myao: bam va". 25Shid: lo" ja: ngonhaung" pe"mung: dam: kad' nae" i? Ai: qu" gyaug qu" lhaung: ra" myi: wa ngonhaung" re nga" pye' li" nae". Ngonhaung" Mao"So Asang dao: dam: jhau: rure ngonhaung" the' gyo" ngad: re- shid nae" rure ngonhaung" ba: ra". 26Kaoso' daui: na: ra" Mao"So myi:khug' mae" dao: jhau: rure the' gyo: thao daui: na: ra" xao su byu dayaug yaug na: qu" ra" i? 27Moshe we"- dam: tug' ye: mung:- ngonhaung" Mao"So Asang ta" ru ja: khao: ngo" re yetae" gyo" yu wa,- bin lao" dam: tug' lo mung: yao: nao re ta" ra" gu: ngonhaung" re lota" kyo: la,- ngonhaung" wa aire tae" gyo: mung: phug' cao" nae"- ga: ta" ako".
28Cedao: re Asang the' gyo: lao" yao: wa ngore- ce: amyu" byu qe ta" ra" dao: re ngo the' gyo: va"- yao: bam wa jo: ako". 29Yao: bam khonhae" re: ceru: za: ga: ko" qa: we"- yao: bam wa khonhae" re: ngore za: nga: yhe' mung: nga" amyin" dao: jham alhab' re phug' cao" ko" ngad: re wa ja: khao: ngo" mae yao: bam na: dai mung:- yao: bam: myid:zo: qe wa apyad ato mae na: dai genae". 30Yao: wa jamu zaung khyo dam: tug' lo" genae" qhid' mae" yao: bam re lo" ta" wa,. 31Ngadqere: Moshe nao wa- cetau ngo we' daga" thang: na: jo, mung: nga" tarha" alhab' we' nga" amyin" dao: jham ngo nao re byid: nae". Ngo yao: bam re byid: nae" ngad: ra" mung" mae yao: bam qo" phug' cao" nae" qhid' mae" amyu" byu qere mho" byid: wa,.
32Israel byu qe we"- naonhaung" Mao"So Asang: yang naonhaung" re amyin" byid' to" ru ja: khao: ngo" naonhaung" kad' ra" khyo re ba ge,. Yao" tarha" daja: rere: maphug' cao" lo: dakad' ge,. 33Ja: khao: ngo" mae naonhaung" na: dai nae" qhid' mae" we' naonhaung" yesang: yu nae" ngad: ra" mung" mae naonhaung" qo" xo' na genae" qhid' mae" aigu: alhab' re phug' cao" ge,.
Currently Selected:
MHO" PEIM: 5: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009