Popular Bible Verses from MHO" PEIM: 5

Ni" Mao"So ASANG: ngo amyin" byid' ru we' dakhyo:- ni" pho" we' ni" myhi" tao re phug' myao: wa,- airulao" nao na: dai mung: ngo nao re byid: nae" ngad: ra" mung"dan: mae kao qhang sho' qo" na: li" nae".

Ja: khao: ngo" mae naonhaung" na: dai nae" qhid' mae" we' naonhaung" yesang: yu nae" ngad: ra" mung" mae naonhaung" qo" xo' na genae" qhid' mae" aigu: alhab' re phug' cao" ge,.

Pe" ja" so alho rere: dagoe; pa"- aire dacaung: dapa"- pe"mung:ga"re ngo wa ni" Mao"So ASANG ngad mung:- ngo wa mai jho" qhi" mo, khag' rere: maqo" zang: ngad: ra". Ngo wa ngore nghang" ra" mo; dao mae qobo dae byid: mung:- yao: bam: myid:zo: qe: dao mae re: byu sam qae:- byid qae: joe" sho' qobo dae byid: ra". Ngadqere: ngore jhid'de; mung: nga" tarha" jham re phug' cao" mo, re wa byu qae: taung tug joe" sho' nga" jhid'de; myid re ngo qhu" byid' ra".

Mug:gaung mae" pe" ja" khyao dau solho rere:- myidgaung mae" pe" ja" khyao dau sulho rere:- myidgaung o qid khug mae" pe" ja" khyao dau solho rere: naonhaung" yao" qhid' mae" dakad' ge,.

Ngo mae" je yang: so gatau re dacaung: dapa" ge,.

Nga" mang re makhyang: mashab: ra" khyo qhid' mae" dalao:- pe"mung:ga"re naonhaung" Mao"So ASANG ngo wa- nga" mang re mangad' ra" khyo" ci: ra" yaug khag' rere: qobo dae byid: nae".

Yao: bam khonhae" re: ceru: za: ga: ko" qa: we"- yao: bam wa khonhae" re: ngore za: nga: yhe' mung: nga" amyin" dao: jham alhab' re phug' cao" ko" ngad: re wa ja: khao: ngo" mae yao: bam na: dai mung:- yao: bam: myid:zo: qe wa apyad ato mae na: dai genae".

Naonhaung" Mao"So ASANG ngo amyin" byid' to" ru we' dakhyo:- Dugno: Ba re phug' cao" mung: aire gyang" lho" nhao ge,

Su: yham sang myhi" re daqu" myo, nyad- yao" yham yao" jeim qe- yao" mug:myid yao" nung: kyaung"- yao" loze jham- yao: sang: ra" ja: pe" rere: myo, danyad ga:- ta" ra".

Myi: lao dashad'.

Khag' rere: majo: ra" khyo" qobo dazhaug'.

Byu dase'.

Dakhug'.

Egutu mung" mae naonhaung" jeim doe; na gemung:- naonhaung" Mao"So ASANG ngo wa qam: so' mo" we' qam: o: khyo" yang naonhaung" re khyad' yu: ra" khyo re myid: beim: ge,. Ce: mathao mae Dugno: Ba re phug' cao" genae" qhid' mae" ngo amyin" byid' ru ngad: ra".

Naonhaung" nho: mau" zaui: nae" qhid' mae" ba na khyaug' ba ayo, naonhaung" qo" ako". Ngadqere: nhad' ba ein: ba wa ngore qhaug' byid' to" ra" Dugno: Ba na ngad: ra". Ai: ba mae khag' re: mau" dazaui: ge,- nao re:- ni" zoshao qere:- ni" jeim qere:- ni" gug'nyhug' jham re:- ni" mung"dan: khug mae na: ra" taung bug byu qere: mau" dazaui: ge,- ni" jeim qe wa nao we' dakhyo: dug no" na ca" ra".

Ngo wa naonhaung" jeim doe; na: ra" Egutu mung" mae" naonhaung" re khyad' yu: ra" yaug naonhaung" Mao"So ASANG ngad: