MHO" PEIM: 4
4
Mho Dao: Gyo: Genae" Qhid' Mae" Israel Byu Qere Moshe Ta" Jhan: Byid' Ra" Khyo
1Ai: thao Moshe wa amyu" byu qere- ngo mho" shid' na: ra" tarha" alhab' re phug' cao" ge,- ailao" naonhaung" daui: na mung:- naonhaung" phug' pho" qenho: Mao"So Asang naonhaung" re byid: nae" ga" ra" mug:myid re yeqo" sang: yu: li" genae". 2Ngo- naonhaung" re amyin" byid' to" rumae pe" ja: re: dalaung: ge,- daja: rere: dayu: pye' ge,- ngoyang naonhaung" re amyin" byid' to" ra" naonhaung" Mao"So Asang: amyin" dao: jham re phug' cao" ge,. 3Peora bam mae Asang kad' ra" lo, mau" re naonhaung" yao" myo; yang yao: the' myao: avako". Bala re caung:pa" ko" ra" mo, yaug khao: ngo" re aitau mae yao: se' tam" pye' ava". 4Ngadqere: naonhaung" Mao"So Asang re jhaug' zaug: ra" mo, naonhaung" wa ana" ba joe" sho' daui: na: ashiko".
5Nga" Mao"So Asang: yang ngore kad' nae" ta" to" ru we' dakhyo:- ngo wa tarha" alhab' re naonhaung" re ngo mho' byid' to: va". Naonhaung" jhin" vao ye: yang: yesang: yu genae" ngad: ra" mung" mae ai: tarha" jham re yephug' cao" ge,. 6Aijham re jhaug' zaug za: phug' cao" ge,. ceru wa naonhaung" khoqhi" pha,jhi" bo mo, ngad: ra" khyo re gatau: byumyu" qere qhu" byid' li" nae". Yao: bam ce: tarha" jham alhab' re gyo: gelao" yao: bam wa- ce: qi" qhang: ra" byumyu" wa pha,jhi" we' laba lajhao gyai bo mo, ngad genhaung ga: ta" li" genae".
7Khoqhi" qi" qhang: ra" amyu" ngad: re ngad ngonhaung" Mao"So Asang ngonhaung" re kad' ru we' dakhyo:- yao: bam yao: re qo ca" ko" ra" au: gyai te' ra" so maqo" ko" ngad: ra". Yao: wa ngonhaung" re bao" thaug' byid: nae" mho' khao: ngo" yao: tau: byid' ra". 8Khoqhi" qi" qhang: ra" amyu" ngad: re ngad byu khoja" amyu" re:- ana" ba ngo naonhaung" re mho" byid' ra" tarha" jham we' dakhyo: gyai din:man" ra" tarha" maqo" ko" ngad: ra". 9Naonhaung" yao" myo; yang yao: the' myao va" rure naonhaung" daui: na: ra" yo, gu: mae mato" myhid' pye' lo: lha" yang: xam" to: ge,. 10Amyu" byu qere zhang" ham: to: wa,- ga: ngore ta" ra" au:- Sina bam mae naonhaung" Mao"So Asang: qhid' kheim: mae naonhaung" ye; jo, ko" ra" ba na we' sin" ra" khyo re naonhaung" yao: zo: qere we' yao: myid: qere ta" kyo: ge,. Yao: bam kao so' daui: na: ra" ayo, gyo: mae nga" mho dao: re ba: tae" gyo: nae" yao: bam zhao: yu mung:- yao: bam: zo: dau qere: dakhyo: za: kad' gesho'- yao: bam mho" byid: genae" qhid' mae" ngo ta" nae" dao: re yao: bam re ngo gyo: nhao nug: ra".
11Myikhug' no, ru" ra" jham thaui" yang nghoe' to: mung: mug:gaung khyo myi: bao: do, lo" ra"- bam khyid khyo naonhaung" khoru: ye ye; jo, ko" ra" khyo re naonhaung" myid:zo: qere ta" kyo: ge,. 12Asang wa myi:khug' mae" naonhaung" re khoru: dao: jhau: ru we' yao" dao: jhau thoe re naonhaung" khoru: the' gyo: ko" ra" khyo- ngadqere: yao: re gaung khyao ape' dajhid' re: mathe' myao: ra" khyo re yao: bam re ta" kyo: ge,. 13Yao: bam naonhaung" re yao: we' kad' to" ra" dao: thang" re khoru: phug' cao" nae" ta" ra". Laug pye: shid' pye: dao mae yao: tung" to" ra" amyin" dao: daxe ja: re naonhaung" phug' cao" ca" ako". 14Asang wa ngore- naonhaung" jhin" vao ye: mung: yesang: yu genae" ra" mung" mae naonhaung" yephug' cao" genae" ngad: ra" tarha" alhab' re naonhaung" re mho" shid' byid: nae"- ga: ta" ra".
Solho caung:pa" Rure Lha" Nae" Qhid' Mae" Ta" Peim" Ra" Khyo
15 Asang wa Sina bam dao mae myi:khug' mae" naonhaung" re dao: jhau: au:- pe" akhyao alho rere: naonhaung" mathe' myao ko" ngad: ra". Airumung: ce wa naonhaung" akyu" qhid' mae" ngad: ra". 16Yauggai lho- myiqe: lho- gug'nyhug' lho- 17Ngho' lho- du" yoe" lhau: ra" ja" lho- ngo: lho- jham naonhaung" yao" qhid' mae"- 18Solho daja: ja: re kad' yang:- qobo mashad' genae" qhid' mae" naonhaung" lha" ge,. 19Mug:gaung mae naonhaung" myao ko" ra" ba- lho"- kyi jham re caung:pa" mung: caung da" byid: nae" ju" phyo' ru daqhug' nhao ge. Aiwa naonhaung" Asang Mao"So: byumyu" alhab' qhid' mae" byid' to" ru ngad: ra". 20Naonhaung" wa yao" yang Egutu mung" myi:khyeim" mae" khyad' yu: ra" byumyu" qe ngad: ako". Ana" ba naonhaung" ngad: na: ru we' dakhyo:- yao" byumyu" kad' yu nae" qhid' mae" yao: wa naonhaung" re jhui" thug' lo: ra". 21Naonhaung" mathao mae naonhaung" Mao"So Asang wa ngore nhag' yo: mung:- yao: naonhaung" re byid: nae" ngad: ra" myid xau gai: ra" mung" khyo vao ye: nae" Yodan gyaung: re ngo maqo" gau" de; ye: nae" ga" rure yao: ta" pye' ra". 22Ngo wa ce: mung" mae shid mung:- qid gyaung: re khonhae" re: magau" de, nae" ngad: ra". Ngadqere: naonhaung" wa gau" de; ye: mung: ai: myid xau gai: ra" mung" re yesang: na nae" ngad: avako". 23Naonhaung" Mao"So Asang we' kad' to" ra" dao: thang" re naonhaung" mato" myhid' nae" rure myid: beim: ge,- yao" amyin" dao: re phug' cao" mung:- naonhaung" yao" qhid' mae" solho daja: rere: dakad' ge,. 24Pe"mung:ga"re- naonhaung" Mao"So Asang wa myishae de; ra" myi: we' dau: ra". Yao: re mai qhi" mo, re maqo" zang: kham ngad: ra".
25Naonhaung" ai: mung" mae myao" sho' yena gelao"- yao: zo:- yao: myid: qo" gesho' ngadqere: naonhaung" yao" qhid' mae" solho daja: ja: kad' yang: qobo dashad' ge,- ceru wa Asang: qhid' kheim: mae makhyang" ra" lo, mau" ngad: ra". Amung: airu wa yao: re nhag' yo: nhao: li" nae". 26Naonhaung" nga" amyin" dao: re matae" gyo: ko" re wa- naonhaung" ai: mung" mae" mamyao" re baui" lo" li" genae" ein:- ana" ba naonhaung" shad' mae sagse: khyo" ngo wa mug:gaung we' myidgaung re khai yang: ta" ra". Naonhaung" yesang: yu genae" ra" Yodan gyaung: gau" de; ra" mug:myid mae naonhaung" gyai myao" sho' mana genae". Naonhaung" wa bin sho' phyo' qheim" pye' ru qhug' li" genae". 27Asang wa gatau: byumyu" phaung mae naonhaung" re nha: sin" ke' mung: naonhaung" mae" daqhae: za: na: dang: jo; li" genae". 28Aimae naonhaung" wa byu: lo; yang kad' ra" sag' yang kad' ra" so jham- laug: yang kad' ra" so jham- magai: myao: ra" no" yang magyo" ra"- mazo:- manae: ra" so jham re caung da" byid' li" genae". 29Naonhaung" wa aimae Asang re qho: li" genae". Naonhaung" aung khug nhag' lam: alhab' we' yao: re qho geyang: ngad: re wa yao: re qhug' li" genae". 30Naonhaung" qhug: khai: qug: khai: qhug' mung: aigu: alhab' naonhaung" mae boe" lao" naonhaung" wa lo" thao" mae Asang jhao" phaug' lo mung:- yao" dao: re tae" gyo" li" genae". 31Yao: wa nhag' khyag' shogu: myid: bo: ra" Mao"So ngad: ra". Yao: wa naonhaung" re mashapye' nae"- se' re: mase' tam" pye' nae". Yao: wa naonhaung" phug' pho" qe we' yao: yao: to" to" ra" dao: thang" re mato" myhid' nae".
32Naonhaung" makhau shiko" ra" lai: lo" ra" ayo, myidgaung dao mae Mao"So byu re phan" ra" au: mae" yo, khyin: alhab' re ca: qho ge,- myidgaung geim" re ca: qho ge,- ceqhi" qi" qhang: ra" mau" qhid' phyao: boe" qu" va" ra" i? Ce we' dau: ra" ja: khag' gyo" qu" vako" i? 33Yao: bam re myi:khug' mae" so: yang jhau thoe re the' gyo: thao re naonhaung" we' dakhyo: daui: na: ra" byumyu" na: qu" ra" i? 34Ngonhaung" Mao"So Asang wa Egutu mung" mae naonhaung" re kad' ru we' dakhyo:- gatau: byumyu" mung"dan: mae" amyu" byu qere yevae" jhui" yu mung: yao: bam re yao" byumyu" kad' yu: qu" ra" so na: ra" i? Naonhaung" myo, khung: mae yao: yao" qi" qhang: ra" qam: so' we' qam: o: re ciqhu" ra". Yao: wa qam" no we' gyekhe' poe re boe" nhao mung:- mug' pho: ve, lho we' mug' pho: lo, mau" kad' mung: gyaug din ja: re boe" nhao: ra". 35Yao: dayaug za: Mao"So ngad mung: gatau khag' mana lo" rure naonhaung" re sagse: qhu" byid: nae" qhid' mae" Asang wa ceru re naonhaung" re kad' qhu" ru ngad: ra". 36Yao: naonhaung" re pyang dao: qo" ta" nae" qhid' mae" mug:gaung mae" yao" thoe re naonhaung" re the' gyo: nhao: ra". Amung: ce: myidgaung mae yao" gyang" lho" myi: re naonhaung" re myao nhao mung:- ai: khug mae" naonhaung" re dao: jhau: ra". 37Pe"mung:ga"re yao: wa naonhaung" phug' pho" qere jhid'de; yang: naonhaung" re khyin: yu mung:- yao" qam: so' mo" yang yao: yao: Egutu mung" mae" naonhaung" re jhui" thug' lo: ra". 38Naonhaung" qhid' au: khyo jhin" vao ye" lo" ko" au:- naonhaung" re ai: mung" khyo qo" jhui" vao ye: mung: naonhaung" sang: na shiko" ra" mug:myid ngad: ra" yao: bam: mug:myid naonhaung" re qo" byid: nae" qhid' mae" naonhaung" tho' je: qi: je: qam: bo: ra" byumyu" qere khe' thug' pye' ra". 39Airumung: Asang wa mug:gaung we' myidgaung mae Mao"So ngad: rure ana" ba myid: beim: ge,- so gatau mana lo:ngad: ra". 40Ana" ba ngo naonhaung" re byid' ra" yao" tarha" alhab' re phug' cao" ge,- naonhaung" we' naonhaung" myid:zo: qe alhab' na: dai: li" genae". Naonhaung" Mao"So Asang: yang apyad ato: qhid' mae" naonhaung" re byid: nae" ngad: ra" mung"dan: mae naonhaung" xo' yang: qo" na: li" genae"- ga: ta" ra".
Yodan Gyaung: Ba Thug' Shad' Mae" Phao: Khug: Na Nae" Vogaung: Jham
41Ai: thao Moshe wa- byu dayaug yaug yao" gyevo mangad" ra"- 42Byu dayaug re mamyid: to: lo: se' pye' yang: ngad: re phao: loe; ye: mung: gug: gug: ye qo" na nae" Yodan gyaung: ba thug' shad' mae" vogaung: sam lam: re gatau jaung: to" ra". Aiyaug wa ai: vogaung: jham mae" dalam: lam: khyo qo" phao: loe; ye" ra". Yao: re magai: se' pye' ngad: ra". 43Rubin amyu" kaung qe: qhid' mae" din"pyad' yo bug gaung dao mae jo; ra" Beze vogaung:- Gad amyu" kaung qe: qhid' mae" Gilead mug: mae jo, ra" Ramod vogaung:- Manashe amyu" kaung qe: qhid' mae" Bashan mug: mae jo; ra" Golan vogaung: jham ngad: ako".
Mao"So: Tarha" Re Byid: Nae" Dao: Phung" Ta" Ra" Khyo
44Moshe wa Mao"So: tarha" re byid: mung:- Israel byu qere mho" shid' byid' ra". 45-46Airu wa yao: bam Egutu mung" mae" phao: thug' lo thao: Bethpeo vogaung: tau" te' mae" Yodan gyaung: ba thug' shad' mae" lao: khaung: mae lona ko" au:- yao: wa ce: tarha" jham re byid' ra". Ceru wa Heshbon vogaung: mae eib: ra" Amori kho:kham Sihon sang: ra" mug:myid mae jo; ra". Moshe we' Israel byu qe wa- Egutu mung" mae" phao: thug' loko" au:- yao: re khe' aung: pye' ako". 47Yao: bam wa yao" mug:myid re we' Yodan gyaung: ba thug' shad' mae na: ra". Amori kho:kham gatau dayaug ngad: ra" Bashan kho:kham Oga nho: mug:myid re sang: yu: ako". 48Ce: mug:myid wa Arnon gyaung: yae mae jo; ra" Aroe vogaung: mae"- mug: am: Hermon bam ga" ra" Sirion bam khyo joe" sho' ngad: ra". 49Aiwa Yodan gyaung: ba thug' shad' mug: khaung: alhab'- mug: thao shad' Tham: Shid joe" sho' we' ba thug' shad' khyo Pisga bam khyid joe" sho' re: bobo: ra".
Currently Selected:
MHO" PEIM: 4: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009