XEIM: NGAUI" 26
26
Mho Dao: Gyo" Ru Qhid' Mae" Shaman" Jeju
( Mho"Peim: 7.12- 24; 28.1-14)
1 Asang wa- so sulho dakad' ge,- mangad: lao" khyao lho- laug zang- baung: dazhaug' mangad: lao"- caung:pa" byid: nae" laug zang re alho dakyaung" yu ge,. Ngo wa naonhaung" Mao"So Asang ngad:- 2caung:pa" thung" we' sin" ra" poe jham re phug' cao" mung: ngore caung:pa" byid' ra" jo, qo re phug' te' nga: yhe' ge,. Ngo wa Asang ngad: ra".
3Naonhaung" nga" tarha" re cao" yang: kao so' daui: mung: nga" amyin" dao: jham re phug' cao" yang: ngad: ko" re- 4Mug:myid wa qhovo: qhoshi: thug' mung: shigae ashi: zaui: li" genae" qhid' mae" ngo wa jo ang: ra" ayo, mae mug: re qu nhao: ke' nae". 5Naonhaung" nho: qhovo: qhoshi: jham wa saung" gai saung" laug: li" nae" ngad mung:- sabyi shi: phyo' yu nae" ayo, joe" yang: lhao" re: naonhaung" wa gaug zo jham re yad: yu: na li" shi: genae". Amung: naonhaung" wa gaug dam: qho: yo, joe" yang: lhao" re: sabyi shi: jham re phyo' na: li" shi: genae". Naonhaung" gyi: gyi: baug baug qhug' zo" li" genae". Amung: naonhaung" mung"dan: khug mae gug: gam za: qo" na: li" genae".
6Ngo wa naonhaung" mung"dan: re ngaui pyo: yaug yo: ru byid: nae"- naonhaung" khag' rere: magyaug ca" lo: qo" yab: li" genae". Ngo wa gyaug: ci" ca" ra" gug'nyhug' jham alhab' re naonhaung" mung"dan: khug mae" yu: pye' byid: nae". Amung: ai: mung"dan: mae gyekhe' poe majo, lo nae" ngad: ra". 7Naonhaung" wa naonhaung" gyevo qere aung: pye' li" genae". 8Naonhaung" ngo" yaug wa dayo zo: re qo" aung: pye' li" genae". Amung: dayo zo: wa datug zo: re qo" khe' aung: pye' li" genae". 9Ngo wa naonhaung" re shaman" byid: nae" amung: zo: dau myo: sho' qo" nhao nae". Ngo wa naonhaung" we' kad' to" ra" dao: thang" mae" nga" shad' mae" gu: re dao:so: zaung byid: nae". 10Naonhaung" nho: gaug zo yad: yu: ru wa saung" myo: saung" laug yang: aijham wa dazin: geim" dang: jo; li" nae". Ailao" naonhaung" wa gaug sag' ke' nae" jo, qo majo, yang: dang: jo; ra" gaug xug' jham re gag: shapye' ca" li" genae". 11Ngo wa nga" nho: gyang" lho" Zaung mae" naonhaung" phaung gaung: mae na nae". Ngo wa naonhaung" mae" khonhae" re: maphaug' lo" byaug nae". 12Ngo wa naonhaung" we' daga" ngad nae" ngo wa naonhaung" Mao"So ngad nae". Amung: naonhaung" wa nga" nho: byu qe ngad: li" genae". 13Ngo wa naonhaung" jeim madoe; lo: genae" qhid' mae" Egutu mung" mae" naonhaung" re jhui" thug' lo: ra" naonhaung" Mao"So- Asang ngad: ra". Ngo wa naonhaung" re zaui" zag: ci: ra" qam: so' re khyug' pye mung:- naonhaung" au: re myhao sho' tau: to' ci yang: naonhaung" re khyo su: nhao: ra"- ga: ta" ra".
Mho Dao: Magyo" Ru Qhid' Mae Qobo Dae
(Mho"Peim: 28.15- 68)
14 Asang ta" ru wa naonhaung" nga" amyin" dao: jham re maphug' cao" nae" ngad ko" re wa- naonhaung" wa qobo dae byid' ru qhug' li" genae". 15Naonhaung" nga" tarha" jham we' amyin" dao: jham re phug' cao" nae" ha: pye' mung:- ngo naonhaung" we' kad' to" ra" dao: thang" re phyo' pye' geyang: ngad: re- 16Ngo wa naonhaung" re qobo dae byid: nae" ngo wa naonhaung" dao mae qug: khai: kyi" khyag'- agai: ya: ra" no qam" mo" we' naonhaung" re myo, jid nhao: ra" no phyo: boe" nhao mung:- naonhaung" kao so' jeim" lo" nae" khyo re boe" nhao nae". Naonhaung" wa naonhaung" qhovo: qhoshi: jham re qho" li" genae". Ngadqere: ngo wa aijham re magai nhao nae". Pe"mung:ga"re naonhaung" gyevo qe wa naonhaung" re aung: pye' mung:- naonhaung" qho" yhaug' to" ra" qhovo: qhoshi: jham re zo" pye' li" genae". 17Naonhaung" seim" ru qhug' geshao:- ngo wa naonhaung" re gye kad' nae". Naonhaung" yang nghang" ra" mo; yang naonhaung" re eib zo" li" genae". Naonhaung" re khag' yang makhe' yang: re: naonhaung" wa xo sho' gyaug yang: tao" phao: li" genae".
18Ceru: boe" thao lhao" re: naonhaung" nga" dao: re maphug' cao" lo: na ko" re- ngo wa naonhaung" qobo dae re nhad' zhao" laug: li" nhao nae". 19Ngo wa naonhaung" nao: gyi: zag: ra" ngad beim" rure khyug' pye' nae" mug: re: maqu nae". Naonhaung" mug:myid wa jo, to' qao: ra" qhi" kyaug' ho: byaug: li" nae". 20Naonhaung" nho: qam: ke' mau" zaui" ru alhab' naonhaung" re aje amyid- Pe"mung:ga"re naonhaung" mug:myid: wa gaug zo mathug' nae"- shigae jham wa ashi: mazaui: byid: genae".
21Naonhaung" wa xo' yang: ngore ha: pye' gemung:- nga" dao: re phug' cao" nae" ha: pye' shiyang: ngad: re- ngo wa naonhaung" qobo dae re nhad' zhao" myo" laug: li" nhao byid: nae". 22Ngo wa naonhaung" phaung khyo gyaug ci" qo: ra" gug'nyhug' jham re nhao: ke' byid: mung:- aijham wa naonhaung" zoshao qere- naonhaung" khau: ra" gug'nyhug' jham re- bin" se' pye' li" genae". Naonhaung" re dajhid' za: tang" to: yang: naonhaung" khyodang jham wa cae: jhug tag ngad: byaug: li" nae".
23Ce: qobo dae alhab' thao re naonhaung" wa nga" dao: re matae" gyo: lo: ngore kam" wa xo' yang: maphug' makhyad' kad' na shiko" ngad: re- 24Ngo wa naonhaung" re gye kad' yang: qhid' phyao: tho' nhad' zhao" je: qao: ra" khyo" qobo dae byid: nae". 25Naonhaung" nho: dao: thang" re phyo' pye' ru qhid' mae" ngo wa naonhaung" re gyekhe' poe boe" nhao yang: qobo dae byid: nae". Naonhaung" nho: vomo" khug mae gug:gam: ru qhid' mae" zang" ham: na ko" ngad: re- ngo wa naonhaung" phaung gaung: khyo magai: ya: yu lo" ra" qam" no re boe" nhao nae"- amung: naonhaung" wa naonhaung" gyevo qe: lo, mae maqad maqui" aseim" kham lo, tau: pye' nhao: rure qhug' li" genae". 26Ngo wa naonhaung" zao:kho bao" thaug' byid' rure phyid' pye' byid: nae". Airulao" myiqe: daxe yaug wa yao: bam qo" ra" gu: mug alhab' re kad' nae" mug kad' myi: khung: dalam: za: ca" li" genae". Yao: bam aire gae yang- aigu: alhab' re naonhaung" bin: zo" pye' ngadqere: naonhaung" vae: moe' jo, shi: genae".
27Cegu: alhab' thao naonhaung" ngore maphug' makhyad' kad' mung: nga" dao: re phug' cao" nae" ngag: pye' na shiko" ngad: re- 28Nga" nhag' yo" ru wa naonhaung" khyo phaug' lo mung: naonhaung" qobo dae re qhid' phyao: tho' je: xo: ra" qobo dae nhad' zhao" re dam: byid: nae". 29Naonhaung" vae: moe' ru wa gyai dae xo mung: naonhaung" yao" zoshao qere: naonhaung" zo" li" genae". 30Bug gaung jham: dao mae jo; ra" naonhaung" caung:pa" jo, qo jham re phyo' pye' byid: nae". Naonhaung" nho: sheim nae pyo" ra" phan jham re phyo' khyo" byid: mung: naonhaung" mao gaung jham re gyang: byo; jo; ra" naonhaung" solho jham: dao mae pye' zaui: pye' nae". 31Dae xo sho' ca' pye' ru we' ngo wa naonhaung" vomo" jham re byo; qeim: lo" nhao nae". Naonhaung" nho: caung:pa" ra" jo, qo jham re phyo' pye' byid: mung:- naonhaung" xeim: ngaui: byid' rure ha: pye' byid: nae". 32Ngo wa naonhaung" mug:myid re gyai xo: ra" khyo" bin sho' phyo' pye' mung: aire sang: yu ko" ra" gyevo qe wa ai: byo; qeim: rure qu" din: mo; li" genae". 33Ngo wa naonhaung" dao mae gyekhe' poe boe" nhao mung:- taung bug mung"dan: jham khyo naonhaung" re khe' sin" ke' byid: nae". Naonhaung" nho: mug:myid wa cae: jhug tag boe" byaug nae"- naonhaung" vomo" jham wa byo; qeim: jo; li" nae". 34-35Ailao" mug:myid wa naonhaung" yang mabyid' ra" bin sho' thang: na: ra" ba na jham mae ngaui bau" li" nae". Ai: mug: myid wa magan: mago" qo" jo, mung:- naonhaung" gyevo qe: mung" mae naonhaung" yephao: na: jo; ra" bang: mae ai: mug:myid wa myaung: ngho" ru qo" li" nae".
36Taung bug mung" mae yephao: na ko" ra" mo,- naonhaung" re ngo kyaug' mung:- la: yang sag' vho' hug' myhang" ra" thoe wa yao: bam re tao" phao nhao: li" nae". Gye khe' poe mae naonhaung" re khag' yang makhe' ngadqere: naonhaung" tao" phao: li" genae". Naonhaung" nhae mae gyevo mana ngadqere: naonhaung" lang" lo" li" genae". 37Naonhaung" re khag' yang makhe' au: rere: naonhaung" yao: cao: jho" the' thaung" lang" li" genae". Naonhaung" wa gyevo pe" ja: rere: gye maqo" zin: genae". 38Naonhaung" wa taung bug mung" mae yena: jo; au: shid' li" genae". Naonhaung" nho: gyevo qe: mung"dan: yang myug: pye' ru qhug' li" genae". 39Naonhaung" nho: gyevo qenho: mung"dan: mae dang: na ko" ra" mo, naonhaung" dajhid' za" mo, naonhaung" yao" qobo we' naonhaung" phug' pho" qe: qobo mathao mae amyid: avho: jeim" byaug: li" genae".
40Ngadqere: naonhaung" myid:zo: qe wa yao: bam: qobo re we' ngore pad' ka: zhaug' mung: gye kad' tau: lhan: yang:- 41Ngo re yao: bam gye phaug' kad' nhao mung: yao: bam: gyevo qe: mung"dan: khug khyo yao: bam re yedai" pye' ra". Yao: bam: phug' pho" qenho: qobo re lhang: yu: li" genae". Lo" thao" mae naonhaung" myid:zo: qe wa nhag' lam: nyham: khyo" mung: yao: bam nho: tau: lhan" ru we' qobo qhid' mae" qobo dae re bin: kham: pye' gelao"- 42Ngo wa Yaku- Isag- Abraham bam we' kad' to" ra" nga" dao: thang" re myid: beim: nae". Aimung"dan: nga" byu qere byid: nae" qhid' mae" nga" dao:so: re asag' dam: kad' nae". 43Ngadqere: sao qhid' mae ai: mung"dan: mae" byu qere yu: pye' ca" ra". Airulao" ai: mung"dan: wa bin sho' no" na: rure ngaui bau" li" nae". Amung: yao: bam wa nga" tarha" jham re we' nga" amyin" dao: jham re ngag: ha: pye' to: ko" ru qhid' mae" qobo dae re byang" sho' kham: yu ca" genae". 44Ngadqere: airu: yao: bam wa yao: bam: gyevo: qenho: mung"dan: mae na: jo, gengad sho' ngadqere: ngo wa yao: bam re bin sho' mashapye' pye' maphyo' qheim" pye' nae". Airu wa yao: bam we' ngo to" ra" dao: thang" re pin" pye' nae" ngad mung:- ngo wa yao: bam: Mao"So Asang ngad: ra". 45Ngo Asang wa yao: bam: Mao"So boe" nae" qhid' mae" nga" byu qere Egutu mung" mae" jhui" thug' lo: ra" khyo" yang byumyu" alhab' re nga" qam: so' qhu" byid' ra" au:- yao: bam: phug' pho" qe we' ngo kad' to" ra" dao: thang" re asag' dam: kad' nae"- ga: ta" ra".
46Aigu: alhab' wa Israel byu qe: qhid' mae" Sina bam dao mae Asang: yang Moshe re byid' ra" tarha" jham we' amyin" dao: jham ngad: ra".
Currently Selected:
XEIM: NGAUI" 26: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009