XEIM: NGAUI" 25
25
Nhad' Zin Ein: Zin
(Mho"Peim: 15.1-11)
1 Asang wa Sina bam dao mae Moshe re dao: jhau mung:- o mae ta" to" thung"li jham re Israel byu qere byid: nae" qhid' mae" amyin" byid' ra". 2Airu wa Asang: yang naonhaung" re byid: nae" ra" mung"dan: khyo naonhaung" joe" vao ye: gelao" nhad' zin ein: zin- zin khao: ngo" mug:myid re qhovo: maqho: lo: kad' ra" khyo" yang naonhaung" wa Asang re phug' te' nga: yhe' byid: genae" ngad: ra". 3Naonhaung" wa nhad' zin gu: mae- naonhaung" yo jham mae qhovo: qho:- naonhaung" sabyi khyae re cu: shaung- naonhaung" qhovo: qhoshi: jham re jham" yu genae" ngad: ako". 4Ngadqere: nhad' zin ein: zin wa mug:myid qhid' mae" bin sho' no: nae" zin na- Asang re qhaug' byid' to" ra" zin na ngad: ra". Naonhaung" yo myid jham mae qhovo: daqho: ge,- mangad: lao" naonhaung" sabyi khyae jham re dacu: shaung ge,. 5Byu: yang maqho lo:- yao: yao: za: yaug: ra" gaug re lhao" re:- dayad: yu ge,- macu: shaung: to" ra" naonhaung" sabyi khyae jham mae" sabyi shi: jham re daphyo' zhang: yu ge,- aiwa mug:myid qhid' mae" bin sho' no: nae" zin na ngad: ra". 6Ai: zin re mug:myid mae qhovo: qhoshi: maqho: sho' ngadqere:- aiwa naonhaung" qhid' mae" re:- naonhaung" jeim qe: qhid' mae" re:- naonhaung" okaung qe we' naonhaung" we' daga" na: jo, ko" ra" taung bug byu qe: qhid' mae" re:- 7Naonhaung" nho: yham mae khau: to" ra" gug'nyhug' jham: qhid' mae" re:- Pa: din" jham mae na ko" ra" seyo: gug'nyhug' jham: qhid' mae" re: zo:ve byid' li" nae". Aimae yaug: thug' li" ru ja: khao: ngo" re zo: nae" ngad: ra".
Dam: Tug' Byid' Ra" Zin
8Nhad' zin zin mung: nhad' lhang nghe' re alhab' wa byid xe: gug zin ngad: ra". 9Ai: thao lho" nhad' khye' ein: khye' daxe ba ein: ba wa mang: dae tae" ra" ba na ngad mung:- mung"dan: geim" mae jao: sho' labo" mad nae" qhid' mae" byu nhao: ke' ge,. 10Ceru: kad' mung: naonhaung" wa ngo" xe zin ein: zin re gatau san: to: mung:- mung"dan: mae na: ra" mo, alhab' re loe; beim: ra" khyo re ta" pyo: hau" ke' genae" ngad: ako". Ce: zin gyo: mae aung" pye' va" ra" jo,nho" zai yo alhab' re azhao sang: ra" yaug re- mangad: lao" yao" myid:zo: qere dam: tug' byid: nae" ngad: ako". Amung: jeim khyo" aung" pye' qhug' ra" yaug khag' re ngadqere: yao" yham khyo dam: phao: lo" nhao ca" ra". 11Naonhaung" wa naonhaung" yo myid jham mae qhovo: magai: qho:- mangad: lao" yao: yao: za: yaug: ra" gaug re magai: yad: yu macu: shaung: to" ra" naonhaung" sabyi khyae mae" sabyi shi: jham re magai: phyo' zhang: yu genae" ngad: ra". 12Naonhaung" qhid' mae" ai: zin geim" gyang" lho" jo, nae" ngad: ra". Naonhaung" wa yo myid jham mae yao: yao: za: yaug ra" gu: re za: zo: nae" ngad: ako".
13Ce: zin mae aung" pye' va" ra" jo,nho" dai kham alhab' re azhao sang: ra" yaug re dam: tug' byid: nae" ngad: ra". 14Airumung: naonhaung" wa mug:myid re naonhaung" Israel mao:nhaung: pho" re aung: byid' ra". Ai mangad: lao"- yao: mae" mug:myid vai: yu: ra" au: re madin: maman" ra" khyo" dakad' ge,. 15Mug:myid phug' re dam: tug' byid' ra" zin na qhid' zin joe" sho' zin na gyo: mae ai: mug:myid yang yaug: thug' byid: nae" ngad: ra" qhovo: qhoshi: jham re cao" yang: aphug' gau jho" ta" phyid' nae" ngad: ra". 16Zin na myo" ngad: re wa aphug' gau jho wa je: myhao nae" ngad: ra". Ngadqere: zin na nang" ngad: re wa aphug' gau jho wa nang: nae" ngad: ra". Pe"mung:ga"re aung" ru wa ai: mug:myid: yang qo" yaug: thug' byid' ra" qhovo: qhoshi: jham re ngad: ra". 17Israel mao:nhaung: re damhug' zo: ge, naonhaung" Mao"So Asang re kam" wa mho dao: gyo: ge,.
Nhad' Zin Ein: Zin Nho: Aqug: Akhai:
18 Asang: tarha" jham we' amyin" dao: jham re phug' cao" ge,. Airulao"- naonhaung" wa ai: mung"dan: mae gug: gam qo" na nae" ngad: ako". 19Mug:myid wa qhovo: qhoshi: jham re zaui: byid' mung: gyi: gyi: baug baug qhug' zo" li" genae". Amung: gug: gam za: qo" na: li" genae".
20Ngadqere: byu dayaug yaug wa yo myid jham mae qhovo: qhoshi: maqho:- qhovo: qhoshi: jham re maphyo' mazhang: yu re- ai: nhad' zin ein: zin gyo: mae pe" zo: nae" laug ga: dayaug yauggai: myid' ra". 21Asang wa khyaug' zin mug:myid re shaman" byid: mung:- ai: mug:myid wa shid' zin: qhid' mae" zo:ve laug sho' qhovo: qhoshi: jham mae" zo:ve laug sho' qhovo: qhoshi: jham zaui: byid' li" nae". 22Naonhaung" wa she' zin mae naonhaung" yomyid jham mae qhovo: qhoshi: qho: ko" au:- khyaug' zin gyo: mae yad: yu: to" ra" gaug zo jham re naonhaung" zo" na shi: genae" ngad: ra". Amung:- naonhaung" wa ai: zin mae qho" ra" qhovo: qhoshi: jham re yad: yu: ra" ayo, joe" sho' laug: zo: nae" zo:ve qo" li" genae".
Jo,nho" Dai Kham Re Dam: Tug' Byid' Ra" Khyo
23Naonhaung" nho: mug:myid re khonhae" re: malai: lo: sang nae" khyo" magai ngad: ra". Pe"mung:ga"re naonhaung" wa ai: mug:myid re masang ko" ngad: ra". Aire sang yaug wa Mao"So ngad: ra". Naonhaung" wa ai: mug:myid mae zaui: zo: nae" akhang" byid' to: qhug' ra" taung bug byu we' dau: ako". 24Mug:myid re aung" pye' lao"- azhao ai: mug:myid re sang: ra" yaug dam: tug' vai: yu nae" akho: akhang" re axam: aso: kad' byid: ca" ra". 25Israel byu dayaug wa myaung sho" byaug mung:- yao" mug: myid re deim" zag: aung: nhao qhug' ngad: re- yao: we' je: jhao" ra" ba nam sang: cao: yaug wa aire dam: gai: tug' vai: yu: ra". 26Aire tug' vai: yu nae" ba nam sang: cao: maqo" ra" yaug wa thao re na: dai: li" mung: yao: yao: aire dam: gai: tug' vai: yu: ra". 27Ce: mau" mae yao: wa yao" mug:myid re pe" ru: boe" boe" dam: tug' yu nug lao"- yao: wa ai: mug:myid re vai: yu: ra" yaug re dam: tug' byid' ra" zin joe" sho' gyo: mae" zin na jham re sun: yang: aphug' gau jho jho" byid: ca" ra". 28Ngadqere: yao: wa ai: mug:myid re dam: tug' vai: yu nae" ngaui laug sho' maqo" yang: ngad: re- ai: mug:myid wa dam: tug' byid: nae" zin na joe" sho' vai: yu: ra" yaug: nho: lo, khug mae bo: jo; ra". Ai dam: tug' byid' ra" zin mae wa ai: mug:myid re azhao sang: ra" yaug re dam: tug' byid: nae" ngad: ra".
29Byu dayaug wa vang khug vomo" mae jo; ra" yham dayham re aung: yang: ngad: re- aung" pye' ra" ba na mae" sao qhid' dazin byang" ra" ayo, gyo" gu: mae aire dam: tug' vai: yu nae" akho: akhang" yao: qo" ra". 30Ngadqere: yao: wa ai: zin na khug mae aire madam: tug' vai: yu ngad: re wa- yao: wa dam: vai: yu nae" akho: akhang" seim" pye' mung:- ai: yham wa vai: yu: ra" yaug we' yao" myid:zo: qenho: khonhae" re: malai" ra" jo,nho" dai kham boe" lo: ra". Aimung: dam: tug' byid' ra" zin na mae dam: tug' byid: ca" nae" mangad:- 31Vang makad' to" ra" vogaung: jham mae" yham jham re kam" wa yo myid jham re we' dakhyo: kad' nae" ngad: ra". Azhao sang: ra" yaug wa aijham re dam: tug' vai: yu nae" akho: akhang" qo" mung: azhao: mae" ru: dam: kad' ra" zin mae dam: tug' byid' ru qhug' nae" ngad: ra". 32Ngadqere: Levi byu qe wa yao: bam: qhid' mae" jaung: to" ra" vomo" jham mae yao: bam: jo,nho" dai kham re khoyo, re ngad ngad dam: tug' vai: yu nae" akhang" qo" ako". 33Ce: vomo" jham: khug mae" yham dayham re Levi byu dayaug: yang aung: yang: madam: tug' vai: yu ngad: re- airu re dam: tug' byid' ra" zin mae dam: tug' byid: qo: ra". Pe"mung:ga"re yao: bam: vomo" jham" khug mae" yao: bam sang: ra" yham jham wa Israel phaung gaung: mae yao: bam: khonhae" re: malai: lo: sang: ra" jo,nho" dai kham ngad: ako". 34Ngadqere: Levi byu qe sang ko" ra" vomo" jham: avai: ayae mae" mhin: gyo, jao: mug:myid re wa khonhae" re: magai: aung: nae" ngad: ra". Airu wa yao: bam: apyad ato: ra" jo,nho" zai yo ngad: ako".
Myaung Sho: Yaug Re Jhid' Byid' Ra" Ngaui
35Ni" nhae mae na: ra" Israel mao:nhaung: dayaug wa myaung sho" byaug mung:- yao: yao" vae: dug: re maqo" khau yang: ngad: re- ni" nhae mae xo' yang: yao: qo" na: jo, nae" qhid' mae" okaung dayaug khyo" yao: re lhaung: yu mung: yao: re bao" thaug' byid: ca" ra". 36Yao: re gau pai: damho' wa,- Mao"So re kam" wa gyaug phug' mung: ni" nho: Israel mao:nhaung: pho" nhae mae na nhao wa,. 37Yao: re jhid' byid' ra" ngaui re gau pai: dabyid: nhao wa,- amung: nao yao: re aung: byid' ra" zo:ve dao mae gau pai: dayu wa,- 38Ceru wa naonhaung" re Khanan mung" byid: mung: yao: wa naonhaung" Mao"So boe" nae" qhid' mae" Egutu mung" mae" naonhaung" re jhui" thug' lo: ra" yaug ngad: ra" naonhaung" Mao"So Asang: amyin" dao: jham ngad: ra".
Jeim Jham Re Dam: Lhoe' Ke' Ra" Khyo
39Nao we' jhao" na: ra" Israel mao:nhaung: dayaug gyai myaung sho: yang: yao: yao" gaung re jeim khyo" nao re li" aung: yang: ngad: re nao wa yao: re jeim mau" magai: zaui: nhao nae" ngad: ra". 40Yao: wa okaung dayaug khyo" nao we' daga" na mung: dam: tug' byid' ra" zin na joe" sho' nao re caung da" byid: nae" ngad: ra". 41Ai: ayo, mae we' yao" zoshao qe wa nao mae" thug' lo" mung:- yao" yham khug byu qe we' yao" phug' pho" qenho: jo,nho" dai kham khyo dam: tug' lo" nae" ngad: ra". 42Israel byu qe wa Asang: jeim qe ngad gemung:- yao: wa yao: bam re Egutu mung" mae" jhui" thug' lo: ra". Yao: bam re jeim khyo" magai: aung: nae" ngad: ra". 43Yao: bam re akyaung athin dakad' wa,- ni" Mao"So re kam" wa mho dao: tae" gyo: byid: wa,. 44Nao wa jeim kad' nae" ca" yang: ngad: re- naonhaung" lhang" gam: mae na ko" ra" byumyu" qemae" ai: jeim qere vai: yu wa,- 45Nao wa naonhaung" phaung gaung: mae na ko" ra" taung bug byu qenho: zoshao qere re: gai: vai: yu: ra". Ni" mung"dan: mae khau: ra" ai ru" ra" zoshao qe wa ni" nho: jo,nho" dai kham boe" lo mung:- 46Nao wa yao: bam re ni" yauggai zo: qe: qhid' mae" ma khyo" gai: to: byid: co' ra". Yao: bam wa aibam re yao: bam: kao so' daui: na ra" myhao" caung da" byid: genae" ngad: ra". Ngadqere: nao wa ni" Israel mao:nhaung: pho" re akyaung athin pe" daja: re: magai: kad' ngad: ra".
47Nao we' daga" na: ra" taung bug byu dayaug jo,nho" qo" li" mung:- Israel mao:nhaung: pho" dayaug myaung sho" byaug: yang: jeim dayaug khyo" ai: taung bug pho" mangad: lao" yao" yham byu dayaug re yao: yao" gaung re aung" pye' ein gelang:- 48Yao: aung" pye' thao yao: wa dam: tug' vai: yu nae" akhang" qo" jo; ashi"- 49Yao" nho: mao:nhaung: qemae" dayaug mangad: lao" yao" phomo" yao: gan- mangad: lao" yao" mao:nhaung: bye" mangad: lao"- yao: we' jhao" ra" ba nam sang: cao: qe wa yao: re gai: dam: tug' vai: yu: ra". Mangad: lao"- yao: yao: ngaui laug sho' qo" kaung yu: yang: ngad: re- yao: wa yao: yao" loe; beim khyo re gai: vai: yu: ra". 50Yao: wa yao: re vai: yu: ra" yaug we' jho" qham ca" ra". Yao: bam wa yao: yao" gaung re- yao: yao: aung" pye' ra" ba na mae" dam: tug' byid' ra" zin na joe" sho' gyo: mae" zin na jham re nghe' mung:- okaung lao jhao: phug' byid' rumae apan aqao: to: yang: yao" gau jho re ta" phyid' qo: ra". 51-52Yao: wa zin na re apan aqao: to: yang: okaung khyo" ngho" ru qhug' yaug ngad: re- zin na khonho" dang shi" ein: rure cao" yang: aphug' sun: mung: vai: ra" aphug' ngaui re dam: khyug' byid: ca: ra". 53Yao" nho: jeim sang wa yao: re akyaung athin magai: kad' ngad: ra". 54Yao: wa ai: khyo jham mae" daja: khyo" re: maloe, ngad: re wa yao: we' yao" zoshao qe wa azhao ru: dam: tug' byid' ra" zin na mae lhoe' ke' byid: ru qhug' ca" ra". 55Israel byu dayaug wa khonhae" malai" ra" jeim magai: doe; ngad: ra". Pe"mung:ga"re Israel byu qe wa Asang: jeim qe ngad: ako". Yao: wa yao: bam re Egutu mung" mae" jhui" lo: ra". Yao: wa yao: bam: Mao"So Asang ngad: ra".
Currently Selected:
XEIM: NGAUI" 25: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009