KUAN-KUANEN 23
23
–6–
1Kune kam kundul man ras si biak raja, ingetlah ise ia. 2Adi kam merincuh kal manca, angkarlah. 3Ola sangkar man nakan si iberekenna man bandu, nggit mawen ijeratna atena kam.
–7–
4Ola suhsahi dirindu ndarami kebayaken, 5sabap i bas sengkemirep saja banci mayap ertandu, tempa lit kabengna jenari kabang ia ku awang-awang desken rajawali.
–8–
6Ola kam nggit man ras kalak mediker. Ola kam merincuh man pangan entabeh si isikapkenna. 7Sabap bagenda me nina kari man bandu, “Mari man; tambahi nakanndu,” kepeken labo bage sura-surana. Lain kata pedempak lain kata petundal. 8Iutahkenndu me dungna kai si enggo ipanndu, cakapndu mehuli bana pe lanai lit gunana.
–9–
9Ola cubaken ngajarken kalak bodoh; la terergaisa ajarndu e.
–10–
10Ndigan pe ola cubakenndu miser baleng ntah pe muat sikerajangen anak melumang. 11Sabap TUHAN kap pembela si erkuasa; IA kap nampati anak-anak melumang e ngelawan kam.
–11–
12Perdiatekenlah ajar gurundu jenari erlajarlah pekeri gegeh.
–12–
13Ola kam biar-biaren ndidik anakndu, adi ipekpekndu ia labo ia mate, 14tapi selamat.
–13–
15O anakku, meriah kal ukurku adi pentar kam. 16Ersurak pusuhku megiken kam melasken ranan si dem pemeteh.
–14–
17Ola morahi kalak perdosa. Erkemalangenlah man TUHAN, 18gelah terang wari-warindu si pepagi, dingen pengarapenndu pe la bene.
–15–
19Dengkehkenlah o anakku! Jadilah pentar. Megermetlah nandangi perdalanen geluhndu. 20Ola pertemani kalak pemabuk dingen kalak merangap, 21sabap jadi kalak musil me ia. Adi medem saja pendahinndu nandangi lanai bo kam ergonje.
–16–
22Begikenlah ranan bapandu; sabap adi la erkiteken ia labo kam lit. Kune nandendu enggo metua, cidahkenlah maka meherga iakapndu ia.
23Kebenaren, kepentaren, pengajaren, dingen pengertin kerina perlu itukur, tapi ola kal dayaken.
24Malem ate bapa adi anakna erkemalangen man Dibata; ersurak pusuhna adi pentar anakna.
25Bahanlah maka megah iakap nande bapandu; malemlah ate diberu si mupusken kam.
–17–
26O anakku, megermetlah dingen usihlah aku! 27Diberu perdenggal si pencarinna erlua-lua siding si bahaya kap. 28Ia desken perampuk si nggempangi, jenari ibabaina nterem dilaki erlua-lua.
–18–
29-30Ietehndu kang kai si banci jadi nandangi kalak peminem anggur adi melalasa ia minem inemen keras? Mesui naring atena dingen mesera iakapna. Rusur ia erjengil dingen kelsehen. Matana megara, badanna luka-luka, kepeken kerina si e banci isilahkenna. 31Ola pelepas dirindu igoda anggur aminna pe rupana teridah erndilap maler ku bas gelas, entabeh man tatapen. 32Pepagina erpagi-pagi igejapndu tempa kam enggo itagut nipe si erbisa. 33Gelap pengenen matandu, rukur lanai kam ngasup, ngam-ngamen babahndu. 34Iakapndu bandu bali ras sanga i datas ancuk-ancuk kapal i lawit; melimber takalndu, mbewat-mbewat perdalanndu. 35E maka ngerana me kam, “Ugapa pe enggo aku igudam kalak janah iparapi kalak, tapi lanai kuinget kai si enggo jadi. Engkai maka madat kal matangku? Minem denga ateku!”
Currently Selected:
KUAN-KUANEN 23: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.