KUAN-KUANEN 22
22
1Gelar mehuli ergan kap,
asangken erta-erta,
kekelengen kalak ergan asangken pirak ras emas.
2Kalak bayak ras kalak mesera lit perserina,
TUHAN kap si nepasa kerina.
3Kalak pantas idahna kiniseran, nilah ia,
tapi kalak si la rukur iteruskenna e maka mesui atena.
4Kalak si erkemalangen man TUHAN, meteruk rukur,
e maka datca kebayaken, kemulian dingen kegeluhen.
5Siding ras ragum, lit i bas dalan kalak jahat,
sirangilah e kerina adi atendu selamat.
6Ajarkenlah man anak uga kearusen nggeluh,
maka ikutkenna asa umurna nggeluh.
7Kalak musil jadi suruh-suruhen kalak bayak,
si ngeraih jadi budak kalak si peraihken.
8Kalak si ngajarken si la bujur buahna kiniseran,
dungna kuasana pe bene.
9Kalak bujur ipasu-pasu TUHAN,
perban ibagikenna rejekina man kalak si kekurangen.
10Pelawes kalak si penghina,
gelah ngadi perjengilen, perubaten, ras si panjang-punjuten.
11Kalak si ngena atena kebujuren dingen mehuli pengeranana,
ia me kap teman raja.
12Pemeteh si benar idah TUHAN kap,
ilesapkenna ranan kalak si la bujur.
13Kalak malas ngada-ngada saja i rumah,
nina: adi ndarat ia banci ia irigep singa i tengah dalan.
14Cakap penaki-naki diberu perlua-lua desken siding kap,
nggulingken kalak si kena pernembeh TUHAN.
15Biasa kap adi anak ngelakoken perbahanen si la payo,
tapi perligas banci ngobah langkahna si la payo.
16Kalak si ndedeh kalak si musil-musil,
tujunna e me gelah bayak,
jenari iberekenna pemere man kalak bayak,
tapi kedungenna ia nge si musilna.
Telu puluh petuah kalak pentar
17Dengkehkenlah, maka kuajarken man bandu perkatan kalak pentar. Perdiatekenlah, 18gelah meriah ukurndu kune banci ingetndu dingen banci melaskenca saja pe. 19Sura-surangku gelah kam tek man TUHAN, e me sabapna maka genduari ateku pebetehken ajaren-ajaren enda man bandu. 20Telu puluh pertenget enggo kusuratken man bandu, pertenget si isina kepentaren dingen ajar si mehuli, 21janah ngajarken man bandu kai si benar. Dage, adi kam isuruh pelajarisa, ietehndu me uga njabap alu payo.
–1–
22Ola rugiken kalak musil, erkiteken kam ngasup engkuasai ia; dingen i bas sidang pengadilen ola rugiken kalak si la meherga. 23TUHAN kap si mbela perkarana, janah ngancam kesah kalak si ngancam ia.
–2–
24Ola pertemani kalak si pedas naik darehna. 25Iusihndu denggo ia, jenari lanai kam ngasup meneken kebiasan si bage rupana.
–3–
26Ola erpadan nggalari utang kalak si deban. 27Kune la kam ngasup nggalarisa, ingan medemndu pe ilelangna.
–4–
28Ola kal cuba-cubakenndu miser baleng si enggo itetapken nini-ninindu.
–5–
29Pernah kin idahndu kalak pantas ndahiken dahinna? I bas istana raja-raja kap ia isuruh erdahin, labo i bas rumah kalak biasa.
Currently Selected:
KUAN-KUANEN 22: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.