JUNA 4
4
Nembeh ate Juna, tapi mekuah ate Dibata
1Erkiteken si e nembeh kal ate Juna, e maka merawa ia. 2E maka ikatakenna man TUHAN, “O TUHAN, ma enggo kukataken asum aku i negeringku denga, si enda me kal ateNdu ilakokenNdu. Em sabapna maka pedas-pedas aku lompat ku Sepanyol. Kueteh kap maka kam Dibata si perkeleng dingen perkuah; la minter Kam merawa, tapi Kam melias, dingen tetap nggit Kam ngobah keputusenNdu gelah ola iukumNdu kalak. #Kel 34:6 3Dage genduari, o TUHAN, buatlah kesahku, sabap ulin aku mate asang nggeluh.” #1Raj 19:4
4Ngaloi TUHAN nina, “Bujur kin kam merawa?”
5Kenca bage lawes Juna ku julun kuta e; kundul ia i je. Ibahanna sapo-sapona janah i je me ia cilinggem. Itimaina tah kai si nandangi jadi man Niniwe. 6Kenca bage ipeturah TUHAN Dibata sada batang lulang i babo Juna maka linggem iakapna, gelah senang iakapna i je. Erkiteken si e meriah kal iakap Juna kerna batang lulang ndai. 7Tapi pepagina, nandangi pultak matawari, isuruh Dibata nipe-nipe mangani batang lulang ndai seh mate batang lulang e. 8Enggo kenca nangkih matawari isuruh Dibata rembus angin i Timur nari, e maka narus ia labuh erkiteken iparpari las matawari. E maka madin akapna ia mate.
“Ulin aku mate asa nggeluh,” nina.
9Tapi nina Dibata man bana, “Bujur kin kam merawa erkiteken batang lulang ndai?”
Nina Juna, “Seh kal bujurna aku merawa janah pangen aku mate perban nembehna ateku!”
10Nina TUHAN man Juna, “Batang lulang enda turah i bas sada berngi saja, janah pepagina enggo masap. Kai pe la lit penampatndu man batang lulang e, janah labo kam si peturahsa. Tapi amin bage pe ndele ka nge atendu kerna kai si jadi man batang lulang e. 11Dage, tentu kuahen denga ka ateKu ngenehen Niniwe, kuta si mbelin e. Apai denga ka i bas kuta e lit 120.000 danak-danak si langa meteh apai salah apai benar janah asuh-asuhen pe seh buena!”
Currently Selected:
JUNA 4: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.